រួមចំណែកសម្រាលការលំបាកដល់អ្នកលក់សន្លឹកឆ្នោត

ដើម្បីឧបត្ថម្ភអ្នកលក់សន្លឹកឆ្នោត ដោះស្រាយការលំបាកក្នុងជីវភាពរបស់អ្នកលក់សន្លឹកឆ្នោត នៅថ្ងៃទី ១២ ខែកក្កដា ឆ្នាំ ២០២១ ប្រធានគណៈកម្មាធិការប្រជាជនខេត្ត លោឡេវ៉ាំងហាំង បានចុះហត្ថលេខាចេញផ្សាយសារលិខិតលេខ ២៧១៤/UBND-KT “ស្តីពីការឧបត្ថម្ភអ្នកលក់សន្លឹកឆ្នោត (អ្នកលក់រាយ) លើភូមិសាស្រ្តខេត្តត្រា​វិញអាស្រ័យផ្អាកសកម្មភាពអាជីវកម្មឆ្នោតជាតិបណ្តោះអាសន្ន” ខ្លឹមសារនៃសារលិខិតបានចែង៖ យល់ព្រមតាមការដែលក្រុមហ៊ុនចំកាតឯកសមាជិកឆ្នោតជាតិខេត្តត្រាវិញដកយកថវិកាពីប្រភពចំណាយសកម្មភាពផលិតធ្វើអាជីវកម្មដើម្បីឧបត្ថម្ភដល់អ្នកលក់សន្លឹកឆ្នោតលើភូមិសាស្រ្តខេត្តត្រូវឥទ្ធិពលដោយសារផ្អាកសកម្មភាពអាជីវកម្មឆ្នោតបណ្តោះអាសន្ន ជាមួយកម្រិតឧបត្ថម្ភម្នាក់ៗ ៦០.០០០ ដុងក្នុងមួយថ្ងៃ។ រយៈពេលឧបត្ថម្ភ ១៥ ថ្ងៃ គិតតាំងពីថ្ងៃទី ៩ ខែកក្កដា ឆ្នាំ ២០២១។

សប្បុរសជនជូនអំណោយដល់អ្នកលក់សន្លឹកឆ្នោតពីព្រោះរងការឥទ្ធិពលនៃអាសន្នរោគកូវីដ‑១៩។

ការដែលចេញផ្សាយសារលិខិតខាងលើបាននាំមកភាពរីករាយជូនដល់អ្នកលក់សន្លឹកឆ្នោតជាច្រើនរូប។ បងស្រីថាច់ធីថាង នៅភូមិស្លែងថ្មី ឃុំភឿកហ៊ឹង ស្រុកថ្កូវចែករំលែក៖ ខ្ញុំប្រកបរបរលក់សន្លឹកឆ្នោតជាង ១០ ឆ្នាំហើយ ដោយអាស្រ័យស្គាល់បានមនុស្សច្រើនបង្គួរ  ម៉្លោះហើយជារៀងរាល់ថ្ងៃខ្ញុំលក់សន្លឹកឆ្នោតបានពី ១៥០‑១៧០ សន្លឹក ទទួលបានប្រាក់​ចំណូលប្រមាណ ១៥០.០០០‑១៧០.០០០ ដុង គ្រប់ប្រើប្រាស់ក្នុងគ្រួសារ និងគិតគូរឱ្យកូន​រៀនសូត្រ។ គ្រួសារគ្មានរបរអ្វីក្រៅពីលក់សន្លឹកឆ្នោតឡើយ។ ជាងមួយសប្តាហ៍មុន ពេលមានដំណឹងថាផ្អាកការចេញផ្សាយសន្លឹកឆ្នោត ខាងដេប៉ូក៏មានជូនអំណោយដល់ខ្ញុំរួមមាន៖ អង្ករ មី ស្ករ ប៊ីចេង និងប្រាក់ ២០០.០០០​  ដុង។ រំលឹកមកវិញកាលពីឆ្នាំ ២០២០ អា ស្រ័យឥទ្ធិពលដោយអាសន្នរោគ  ក្រុមហ៊ុនក៏បានផ្អាកការចេញផ្សាយរយៈពេល ១៥ ថ្ងៃ។   ប៉ុន្តែនោះជាលើកដំបូង ការផ្អាកចេញផ្សាយលេខឆ្នោតជាបណ្តោះអាសន្ន ខាងដេប៉ូក៏មានអំណោយសម្រាប់ជូនដល់អ្នកលក់សន្លឹកឆ្នោតដែរ។ ប៉ុន្តែលើកនេះក៏រងផលប៉ះពាល់ ម៉្លោះហើយឧបត្ថម្ភអំណោយរបស់ដេប៉ូក៏តិចជាងមុន។ ឮដំណឹងថាបានខេត្តយើងឧបត្ថម្ភប្រាក់ដល់អ្នកលក់សន្លឹកឆ្នោត ខ្ញុំត្រេកអរយ៉ាងខ្លាំង ចំនួនប្រាក់ឧបត្ថម្ភរួមចំណែកជួយឱ្យគ្រួសារខ្ញុំគិតគូរសព្វបែបយ៉ាងដើម្បីការបង្ការ ទប់ស្កាត់អាសន្នរោគលើកនេះបាននឹងនរចិត្តជាង។

ដូច្នេះ នេះគឺជាលើកទី ២ ដែលខេត្តត្រាវិញក៏ដូចជាខេត្តដទៃៗទៀតផ្អាកចេញ​ផ្សាយឆ្នោត  និងបង្វិលលេខបើករង្វាន់ជាបណ្តោះអាសន្ន។ កាលពីមុននៅខែមេសា ឆ្នាំ ២០២០ ខេត្តត្រាវិញរួមជាមួយទូទាំងប្រទេសបង្ការ ទប់ស្កាត់អាសន្នរោគក៏ផ្អាកការចេញផ្សាយឆ្នោត និងបង្វិលលេខបើករង្វាន់ជាបណ្តោះអាសន្នក្នុងរយៈពេល ១៥ ថ្ងៃដែរ។ លោកង្វៀងវ៉ាំងទ្វឹង ប្រធានគណៈកម្មាធិការប្រជាជនឃុំភឿកហ៊ឹង ស្រុកថ្កូវបានឱ្យដឹងថា៖ ជាមូលដ្ឋានដែលមានភ្ញៀវទៅមកច្រើន មានមូលដ្ឋានផលិត ក្រុមហ៊ុនជាច្រើនទាក់ទាញពលករពីមូលដ្ឋាននានាមកធ្វើការនៅមូលដ្ឋាន ទន្ទឹមនឹងនោះ ក៏មានសមាជិកនៃបណ្តាគ្រួសារលំបាកប្រកបរបរលក់សន្លឹកឆ្នោតទាំងរដូវប្រាំងនិងវស្សា។ ពួកគាត់ចាត់ទុករបរលក់សន្លឹកឆ្នោតជាប្រភពចំណូលចម្បងរបស់គ្រួសារ។ តាមតួលេខស្ថិតិ បច្ចុប្បន្ន មានអ្នកប្រកបរបរលក់សន្លឹកឆ្នោតជាង ៤០ នាក់ មានអ្នកខ្លះ​មិនត្រឹមតែលក់ឱ្យភ្ញៀវទៅមកលើភូមិសាស្រ្តឡើយ នៅទាំងទៅដើរលក់ដល់បណ្តាមូលដ្ឋាន​ដទៃៗទៀត។​​ បណ្តាក្រុមហ៊ុនផ្អាកចេញផ្សាយសន្លឹកឆ្នោតបណ្តោះអា​សន្នគឺជាកម្លាំងរឹតរួតយ៉ាងធំដល់គ្រួសាររបស់ពួកគាត់។ ដូច្នេះ ការឧបត្ថម្ភចំពោះអ្នកលក់សន្លឹកឆ្នោត គឺសំដៅរួមចំណែកបន្ថយការលំបាកដល់គ្រួសាររបស់ពួកគាត់។

លោកមាសឺនក្វិញ ប្រជាជននៅភូមិស្លែងចាស់បានចែករំលែក៖ ខ្ញុំរស់នៅទីនេះជាង ៧០ ឆ្នាំហើយ ខ្ញុំធ្លាប់បានឃើញផ្ទាល់អ្នកមួយចំនួន​ ច្បាម​តាមរបរលក់សន្លឹកឆ្នោត ពួកគាត់ចាត់ទុករបរនេះជាឆ្នាំងបាយសម្រាប់ចិញ្ចឹមគ្រួសារ  មិនថាថ្ងៃឬយប់ពួកគាត់តែងត្រាច់រង្គាត់គ្រប់ទីកន្លែង។ ឃើញរដ្ឋយកចិត្តទុកដាក់ឧបត្ថម្ភ​ដល់អ្នកលក់សន្លឹកឆ្នោតដូចលើមធ្យោបាយព័ត៌មានមហាជនបានផ្សាយនារយៈពេលកន្លង ឃើញថាជាការសមស្រប ព្រោះពួកគាត់ទន្ទឹងរង់ចាំដើម្បីទទួលបានការចែករំលែកពីអ្នកដទៃក្នុងពេលបង្ការ ទប់ស្កាត់អាសន្នរោគ៕

អត្ថបទ‑រូបថត៖ ថាច់សម្បត្តិ