រវៀសរវៃក្នុងការបង្រៀន និងរៀនដើម្បីប្រឡងយកសញ្ញាបត្រ និងធានាសុវត្ថិភាពក្នុងការបង្ការ ទប់ស្កាត់អាសន្នរោគ

ម៉ោងរៀនរបស់សមណសិស្សនៅវត្តកំពង់។

ថ្នាក់ពុទ្ធិកមធ្យមសិក្សាទុតិយភូមិ (ឆ្នាំទី ៣) វត្តកំពង់ ឆ្នាំសិក្សា ២០២១-២០២២ មាន សមណសិស្ស និងយុវសិស្ស ៣៤ អង្គ និងរូបចូលរៀន។ អស់រយៈកាលជាង ០៣ ខែអនុវត្ត ម៉ឹងម៉ាត់ការបង្ការ  និងទប់ស្កាត់អា​សន្នរោគកូវីដ-១៩ លោកគ្រូ អ្នកគ្រូសាលាវត្តកំពង់ក៏ផ្អាកបង្រៀនដែរ។ លុះពេលមានសេចក្តីប្រកាសលេខ ០៦/TB-HDKSSYN ចុះថ្ងៃទី ១១ ខែកញ្ញាឆ្នាំ ២០២១ របស់សមាគមព្រះសង្ឃសាមគ្គីស្នេហាជាតិខេត្ត ស្តីពីបន្តកា​របង្រៀនបណ្តាថ្នាក់ពុទ្ធិកសិក្សាក្នុងខេត្តនាឆ្នាំសិក្សា ២០២១-២០២២  គ្រូបង្រៀនវត្តកំពង់បាន បន្តកា​របង្រៀន តាំងពីថ្ងៃទី ៣០ តុលា ឆ្នាំ ២០២១ រហូតមក។

ដោយប្តេជ្ញាត្រៀមឲ្យបានល្អសម្រាប់ការប្រឡងយកសញ្ញាបត្រក្នុងពេលខាងមុខ គ្រូនិង សិស្សកំពុងសកម្មក្នុងការបង្រៀន និងរៀនដើម្បីបញ្ចប់កម្មវិធីសិក្សា និងរំលឹកមេរៀនឲ្យ បានល្អ។ ចំពោះសមណសិស្សដែលស្នាក់នៅវត្តរៀន គ្រូអចិន្ត្រៃយ៍ងាយ​ស្រួលក្នុងការគ្រប់ គ្រង បង្រៀន និងរំលឹកមេរៀនឡើងវិញ។ ចំពោះយុវសិស្សមួយចំនួនដែលនៅឆ្ងាយ ដោយសារ អា​សន្នរោគរាតត្បាតស្មុគស្មាញមិនបានមករៀន គ្រូអចិន្រ្តៃយ៍ក៏បង្កលក្ខណៈឲ្យនៅផ្ទះរំលឹក មេរៀន។

ម៉ោងរៀនមុខវិជ្ជាមង្គលត្ថទីបនីនៃសាលាពុទ្ធិកមធ្យមសិក្សាទុតិយភូមិ (ឆ្នាំទី ៣) វត្តកំពង់។

ឆ្នាំសិក្សាកន្លង (២០២០-២០២១) ថ្នាក់ពុទ្ធិកមធ្យមសិក្សាទុតិយភូមិឆ្នាំទី ៣ វត្តកំពង់ មានសិស្សប្រឡងជាប់ ១០០%។ ជាពិសេស មានសមណសិស្ស ០៥ ព្រះអង្គទទួលបាន លទ្ធផលខ្ពស់គឺ៖ ទទួលបានលេខ ១ លេ​ខ ២ លេ​ខ ៧ លេ​ខ ៨ និងលេខ ៩ ។

ព្រះតេជគុណ ថាច់ច័ន្ទកុមា​រ គ្រូអចិន្រ្តៃយ៍ថ្នាក់ពុទ្ធិកមធ្យមសិក្សាទុតិយភូមិសាលាវត្តកំពង់មានថេរដីកាថា៖ ក្នុងនាមជាគ្រូបង្រៀនអចិន្រ្តៃយ៍ អាត្មាចលនាគ្រូបង្រៀនគ្រប់មុខវិជ្ជា យកចិត្តទុកដាក់ចំពោះការបង្រៀន និងរំលឹកមេរៀនជូនសិស្សឱ្យសមស្របនឹងពេលវេលាដ៏ខ្លីនាបច្ចុប្បន្ននេះ។ ជាពិសេស កម្មវិធីបង្រៀនក្នុងថ្នាក់ត្រូវកាត់បន្ថយឲ្យខ្លីមក និងយកចិត្តទុកដាក់បង្រៀនមេរៀនណាសំខាន់ៗ និងអនុវត្តវិធីសាស្រ្តបង្រៀនឲ្យបានល្អដើម្បីសមណសិស្សងាយយល់ ងាយចាំ ។ ជំរុញទឹកចិត្តគ្រូបង្រៀន និមន្ត និងអញ្ជើញមកបង្រៀនឲ្យបានទៀងទាត់តាមកាលបរិច្ឆេទ ព្រមទាំងផ្ញើឯកសារដល់យុវសិស្សដែលនៅផ្ទះរំលឹកមេរៀន។ បច្ចុប្បន្ន សមណសិស្ស និងយុវសិស្សបានបង្កើនស្មារតីម្ចាស់ការក្នុងការស្វាធ្យាយរៀនសូត្រដើម្បីត្រៀមប្រឡងយកសញ្ញាបត្រក្នុងពេលខាងមុខ។

ព្រះតេជគុណ ថាច់សាមុត ប្រធាន​ថ្នាក់​ពុទ្ធិកមធ្យមសិក្សាទុតិយភូមិ​វត្ត​កំពង់ មានថេរដីកា​ថា៖ ដោយសារអាសន្នរោគ​រាតត្បាតស្មុគស្មាញ ជះឥទ្ធិពលច្រើន​ដល់ការរៀនសូត្ររបស់ព្រះ សង្ឃ ប៉ុន្តែអាត្មា និងមិត្តរួមថ្នាក់តែងខិតខំរំលឹកមេរៀនឲ្យបានល្អតាមការណែនាំរបស់លោកគ្រូ អ្នកគ្រូ ដើម្បីចូលរួមប្រឡងសម្រេចបានលទ្ធផលល្អ។

ព្រះឧបជ្ឈាយ៍ ថាច់វ៉ាយ ព្រះចៅអធិការវត្តកំពង់មានថេរដីកាថា៖ នៅជាង០២ ខែទៀតដល់ថ្ងៃប្រឡងយកសញ្ញាបត្រពុទ្ធិកមធ្យមសិក្សាទុតិយភូមិឆ្នាំសិក្សា ២០២១-២០២២។ ក្នុងនាម​ជា​ព្រះចៅអធិការវត្ត អាត្មាតែងជំរុញស្មារតី និង​បង្ក​លក្ខណៈដើម្បី​សមណសិស្ស​រៀនសូត្របានល្អ​។ ជាក់ស្តែងគឺតាំងពីអនុវត្តគម្លាតសង្គមរហូតមកអាត្មាចលនាគណៈអារាមាភិបាល ពុទ្ធបរិស័ទមកវត្តចម្អិនចង្ហាន់ប្រគេនដល់ព្រះសង្ឃក៏ដូចជាសមណសិស្សក្នុងវត្ត មិនទុកឲ្យសមណសិស្សនិមន្តទៅបិណ្ឌបាត ដើម្បីធានាបង្ការ ទប់ស្កាត់អាសន្នរោគជំងឺកូវីដ-១៩ ផង ដើម្បីបង្កលក្ខណៈឲ្យសមណសិស្សមានពេលរៀនសូត្របានល្អផង។

ពិធីប្រឡងយកសញ្ញាបត្រពុទ្ធិកមធ្យមសិក្សាទុតិយភូមិ (ឆ្នាំទី ៣) ឆ្នាំសិក្សា ២០២១-២០២២ តាមការគ្រោងទុកនឹងចាត់តាំងនៅចុងខែមករា ឆ្នាំ ២០២២។ សមណសិស្ស និងយុវសិស្សចូលរួមប្រឡងត្រូវប្រឡង ១០ វិញ្ញាសាគឺ វិញ្ញាសា មង្គលត្ថទីបនី សាសនាសកល ព្រះបាតិ មោក្ខ បរមត្ថាធិប្បាយ​ កំណាព្យ អក្សរសាស្រ្ត គណិតវិទ្យា សរសេរតាមអាន វេយ្យាករណ៍ បាលី និងភាសាអង់គ្លេស។ ដោយបានការយកព្រះទ័យទុកដាក់ពីសំណាក់ព្រះចៅអធិការ គណៈអារាមាភិបាល ពុទ្ធបរិស័ទវត្តកំពង់ រួមនឹងស្មារតីម្ចាស់ការក្នុងការបង្រៀន និងរៀនសង្ឃឹម ថា គ្រូ និងសិស្សសាលាវត្តកំពង់នឹងទទួលបានជោគជ័យពុំខាន៕ 

អត្ថបទ‑រូបថត៖សុជា