រួមដំណើរជាមួយសិស្សជនជាតិខ្មែរក្នុងរដូវអាសន្នរោគ៖

អនុវត្តតាមកម្មវិធី “ រួមជាមួយប្អូនៗរៀនបន្តផ្ទាល់” គិតតាំងពីដើមខែកញ្ញាដល់ចុងខែ តុលា ឆ្នាំ ២០២១ សម្ព័ន្ធយុវជនខេត្តចលនាបណ្តាអង្គការចាត់តាំង និងសប្បុរសជនឧបត្ថម្ភគ្រឿងម៉ាស៊ីនថេប្លេត (tablet) ២០ គ្រឿងដល់សិស្សជនជាតិខ្មែរ ២០ រូប នៅបណ្ដាស្រុក៖ កូវង៉ាង យ្វៀងហាយ ថ្កូវ ទីវកឹង និងជូនកាដ ៤G ជិត ៣.០០០ កាដដល់សិស្សានុសិស្ស មានស្ថានភាពលំបាកក្នុងខេត្តត្រាវិញនិយាយរួម សិស្សជនជាតិខ្មែរនិយាយដោយឡែក មាន មធ្យោបាយ និងអ៊ីនធើណែតសម្រាប់រៀនបន្តផ្ទាល់តាមបណ្តាញ។

ជីដូនរបស់ថាញ់ហៀងក៏រីករាយមើលប្អូនរៀន។

ប្អូនគឹមធីថាញ់ហៀងសិស្សថ្នាក់ទី ៨/៦ សាលាអនុវិទ្យាល័យហាមយ៉ាង ជាសិស្សម្នាក់ក្នុង ចំណោមសិស្ស ០៥​ នាក់នៅស្រុកថ្កូវទទួលបានម៉ាស៊ីនថេប្លេតដែលសម្ព័ន្ធយុវជនខេត្តឧបត្ថម្ភ។ កាន់ម៉ាស៊ីនថេប្លេតក្នុងដៃ ប្អូនថាញ់ហៀងរៀបរាប់ដោយរំភើបថា៖ អាស្រ័យបានសម្ព័ន្ធយុវជនខេត្តឧបត្ថម្ភម៉ាស៊ីនថេប្លេតទើបប្អូនមានឧបករណ៍ប្រភេទទំនើបសម្រាប់រៀនបន្តផ្ទាល់។ ប្អូនសន្យា​ថា​នឹង​ខិតខំ​រៀន​ឲ្យបានល្អ មិនឲ្យគ្រួសារ អង្គការចាត់តាំង និង​សប្បុរស ជនខកបំណងឡើយ។

សំណេះសំណាលជាមួយយើងខ្ញុំ មីងគឹមធីខើយ (ត្រូវជាជីដូនរបស់ប្អូនថាញ់ហៀង) នៅ ភូមិបន្ទាយក្រ(អា) ឃុំហាមយ៉ាង ស្រុកថ្កូវឲ្យដឹងថា៖ ថាញ់ហៀងរស់នៅជាមួយគ្រួសារ គាត់កាលនៅតូចម្ល៉េះ។ ជីវភាពគ្រួសារគាត់ស្ថិតក្នុងក្របខ័ណ្ឌគ្រួសារជិតក្រ ប៉ុន្តែប្តីប្រពន្ធគាត់តែងជំរុញទឹកចិត្តឱ្យចៅខិតខំរៀនសូត្របានល្អ។ ត្រេកអរណាស់ពេលដែលចៅរបស់គាត់ទទួលបានម៉ាស៊ីនថេប្លេតមួយគ្រឿងសម្រាប់រៀនបន្តផ្ទាល់ដូចមិត្តភ័ក្តិរួមថ្នាក់។

មានស្ថានភាពលំបាកដូចប្អូនថាញ់ហៀងដែរ ប្អូនគាងធីង៉ឹងហឿង នៅភូមិក្បាលប្លុយ ជាសិស្សថ្នាក់ទី ៨/៣ អនុវិទ្យាល័យឡុងស៊ើង ស្រុកកូវង៉ាង បានសម្ព័ន្ធយុវជនខេត្តឧបត្ថម្ភម៉ាស៊ីនថេប្លេតមួយគ្រឿងផងដែរ។ មុនពេលទទួលបានម៉ាស៊ីនថេប្លេត ង៉ឹងហឿង រៀនមេរៀនតាមឯកសារដែលសាលាផ្តល់ឲ្យ។ ង៉ឹងហឿងសំណេះសំណាលដោយ​ខ្សឹកខ្សួលថា៖ ប្អូនមានបំណងចង់បានឧបករណ៍ទំនើបនេះណាស់សម្រាប់រៀនបន្តផ្ទាល់ជាមួយមិត្តភ័ក្តិ ប៉ុន្តែប្អូនមិនហ៊ានប្រាប់ឪពុកម្តាយ ពីព្រោះប្អូនយល់ពីស្ថានភាពលំបាករបស់គ្រួសារ។​ ពេលនេះបំណងប្អូនបានសម្រេចហើយ។ ប្អូនសប្បាយចិត្តគ្មានអ្វីឧបមា។ ប្អូនសន្យាថានឹងខិតខំរៀនសូត្របានល្អ។

គ្រួសារង៉ឹងហឿង ជា​គ្រួសារ​ក្រីក្រ។ ម្តាយ​របស់ង៉ឹងហឿងជាមុខសញ្ញា​ស្ថិត​ក្នុងក្របខ័ណ្ឌ​គាំពារ​សង្គម ពីព្រោះគាត់​ពិការ​ភ្នែកទាំងសងខាង​​ជាង ១៣ ឆ្នាំ​​ហើយ។ ពីមុនឪពុកង៉ឹងហឿង ធ្វើការស៊ីឈ្នួលយួរកំបោរនៅទីក្រុងហូជីមិញដើម្បីចិញ្ចឹមសមាជិក ០៤ នាក់ក្នុងគ្រួសារ ប៉ុន្តែ​រយៈ​ពេល​ ៦ ​ខែ​កន្លង​មក​នេះ ដោយសារ​ជំងឺ​កូវីដ​-១៩ ទើបឪពុកង៉ឹងហឿង​មិន​ទៅ​ធ្វើ​ការ។ ជីវភាពគ្រួសារ​ប្អូន​រស់នៅអាស្រ័យបានការអាណិតស្រឡាញ់របស់អង្គការចាត់តាំងសប្បុរសជនដែលឧបត្ថម្ភគ្រឿងបរិភោគ និងប្រាក់​ជាង ១,២ លានដុង​ក្នុង​មួយ​ខែរបស់ម្តាយប្អូនប៉ុណ្ណោះ។

លេខាសម្ព័ន្ធយុវជនឃុំហាមយ៉ាងណែនាំប្អូនថាញ់ហៀងប្រើម៉ាស៊ីនថេប្លេត។

អ្នកស្រី ថាច់ធីធឿង (ម្តាយរបស់ង៉ឹងហឿង) សំណេះសំណាលថា៖ ពេលទទួលបាន ដំណឹងពីសាលាថា ឆ្នាំសិក្សានេះរៀនបន្តផ្ទាល់តាំងពីដើមឆ្នាំទៅ ប្តីប្រពន្ធខ្ញុំបារម្ភខ្លាំង ណាស់។ ចំពោះខ្ញុំទោះបីមើលមិនឃើញកូនៗក៏ដោយ ប៉ុន្តែពេលឮកូនៗរៀនមេរៀនក្នុងឯកសារ ខ្ញុំបារម្ភណាស់ ព្រោះកូនៗមិនបាន រៀនបន្តផ្ទាល់ ខ្លាចក្រែងរៀនមេរៀនមិនទាន់ មិត្តរួមថ្នាក់។ បច្ចុប្បន្នកូនខ្ញុំបានសម្ព័ន្ធយុវជនខេត្តឧបត្ថម្ភម៉ាស៊ីនថេប្លេត គ្រួសារ​ខ្ញុំសប្បាយ ចិត្តណាស់។ អំណោយ​នេះ​មិន​ត្រឹម​តែមានប្រយោជន៍ជាក់ស្តែងចំពោះកូនៗខ្ញុំ​ប៉ុណ្ណោះ​ទេ ថែម​ទាំង​ជួយ​សម្រាលទុក្ខលំបាក​របស់ប្តីប្រពន្ធខ្ញុំទៀតផង​។​ ខ្ញុំសូម​អរគុណយ៉ាងជ្រាលជ្រៅ ចំពោះបងប្អូនធ្វើការនៅអង្គការសម្ព័ន្ធ​ខេត្ត។

លោកថាយវ៉ាំងច្វឹងសមាជិកអចិន្ត្រៃយ៍‑ប្រធានគណៈយុវជន និងកុមារសាលារៀននៃសម្ព័ន្ធយុវជនខេត្ត មានប្រសាសន៍ថា៖ ដើម្បីរួមចំណែកជាមួយបណ្តាផ្នែកមានសមត្ថកិច្ចអនុវត្តល្អវិស័យអប់រំក្នុងអំឡុងអាសន្នរោគកូវីដ -១៩ កំពុងស្មុគស្មាញ សម្ព័ន្ធយុវជនខេត្តក៏ដូចជាគណៈកម្មាធិការយុវជន និងកុមារសាលារៀននៃសម្ព័ន្ធយុវជនខេត្តបាន និងកំពុង ចលនាបណ្តាអង្គការចាត់តាំង និងសប្បុរសជនឧបត្ថម្ភសិស្សមានស្ថានភាពលំបាក ក្នុង​នោះ ​មានសិស្សជនជាតិ​ខ្មែរឲ្យមានមធ្យោបាយសម្រាប់រៀនបន្តផ្ទាល់។ ក្នុងពេលខាងមុខ សម្ព័ន្ធ យុវជនខេត្តនឹងបន្តការចលនាឧបត្ថម្ភកាដ ៤G MobiFone ចំនួន ១.០០០ កាដ ដល់សិស្សក្នុង ខេត្ត។ ទន្ទឹមនឹងនោះ សម្ព័ន្ធយុវជនខេត្តក៏បានចលនាឧបត្ថម្ភប្រាក់ ១ លានដុងដល់សិស្សដែល មានឪពុក ឬម្តាយស្លាប់ដោយសារជំងឺកូវីដ-១៩ ដើម្បីធ្វើល្អតាមគោលលំនាំ “មិនបោះបង់សិស្ស ម្នាក់ណាឡើយ”៕ 

អត្ថបទ‑រូបថត៖សុជា