មានមោទនភាពពេលបានធ្វើជាវិធីការិនីភាសាខ្មែរ

វិធីការិនីថាច់ធីវេសាលីកំពុងបំពេញការងារក្នុងកម្មវិធីទូរទស្សន៍។

វិធីការិនីថាច់ធីវេសាលី (កើតឆ្នាំ ១៩៨៣) នៅភូមិពោធ៌ធំឃុំហ្វាអឹង ស្រុកកូវកែ។ ដំណាក់កាលនៅរៀនថ្នាក់សកល វេសាលីបានឆ្លៀតពេលទៅរៀនអក្សរសាស្រ្តខ្មែរនៅតាមវត្តលើភូមិ​សាស្រ្តស្រុកកូវកែ រួចទទួលសញ្ញាបត្រពុទ្ធិកមធ្យមសិក្សាបឋមភូមិ (បាលីរង)កាលពី ឆ្នាំ ២០០៥។ លុះរៀនចប់ថ្នាក់វិទ្យាល័យ វេសាលី រៀនបន្តថ្នាក់ឧត្តមសិក្សាភាសាអង់គ្លេសរួចទទួលបានសញ្ញាបត្រនៅឆ្នាំ ២០០៦។ វេសាលីបានជ្រើសចូលធ្វើការនៅការិយាល័យភាសាខ្មែរនៃស្ថានីយវិទ្យុ-ទូរទស្សន៍ត្រាវិញ ដោយទទួលនាទីជាវិធីការិនីកម្មវិធីទូរទស្សន៍ភាសាខ្មែរ។ ឆ្នាំ ២០០៧ បងទទួលបន្ទុកជាវិធីការិនីភាសាខ្មែរ ទាំងកម្មវិធីវិទ្យុនិងកម្មវិធីទូរទស្សន៍។ ក្នុងអំឡុងពេលបំពេញការងារ វិធីការិនីវេសាលី បានថ្នាក់ដឹកនាំការិយាល័យបង្កលក្ខណៈឲ្យចូលរួមបណ្តាថ្នាក់បំពាក់បំប៉នមុខជំនាញវិធីករ មុខជំនាញសារពត៌មានជាដើម។ ក្រៅពីនោះ បងនៅទាំងឆ្លៀតពេលសិក្សាបន្តឡើងមហាវិទ្យាល័យនៅសាលាមហាវិទ្យាល័យត្រាវិញរួចទទួលបរិញ្ញាបត្រភាសាអង់គ្លេសកាលឆ្នាំ ២០១១។ មិនតែប៉ុណ្ណោះ ឆ្នាំ ២០១៦ វិធីការិនីវេសាលីនៅទាំងបន្តការសិក្សាកម្រិតមហាបរិញ្ញារួចទទួលសញ្ញាបត្រមហាបរិញ្ញាផ្នែកវប្បធម៌កាលពីឆ្នាំ ២០១៩ ។

សំណេះសំណាលពីបទពិសោធន៍ក៏ដូចជាក្តីរីករាយនិងមោទនភាពក្នុងការបំពេញភារកិច្ចរបស់ខ្លួន វិធីការិនីវេសាលីមានប្រសាសន៍ថា៖ ធ្វើជាវិធីករស្ថានីវិទ្យុ-ទូរទស្សន៍ភាសាវៀតណាមមានការលំបាកណាស់ហើយ ទម្រាំធ្វើជាវិធីករភាសាខ្មែរកាន់តែលំបាកជាងទៀត។ លំបាកបំផុតគឺភាសាខ្មែរ ក្នុងតំបន់នីមួយៗនិយាយសំឡេងខុសប្លែកកពីគ្នា ដូច្នោះក្នុងនាមជាវិធីការិនីត្រូវចេះអានភាសាខ្មែរឲ្យបានល្អ ងាយស្តាប់ ដើម្បីចាក់ផ្សាយតាមរលកធាតុអាកាស។ ដូច្នោះក្នុងពេលអានព័ត៌មានជាដំណឹងក្តី  អត្ថបទក្តីនៃកម្មវិធីវិទ្យុ-ទូរទស្សន៍ ខ្ញុំតែងដាស់សតិដោយខ្លួនឯងថាមិនត្រូវអានប្រយោគវែងពេក អានរហ័សពេក មិនត្រូវបញ្ចេញសំឡេងធូរពេកឬតឹងពេកដែរ ដើម្បីឱ្យប្រជាជនខ្មែរគ្រប់តំបន់ងាយស្តាប់ ងាយក្តាប់ព័ត៌មាន។ ក្នុងអំឡុងពេលបំពេញការងារ កត្តាដែលញ៉ាំងឱ្យខ្ញុំសប្បាយចិត្តនិងមានមោទនភាពបំផុតនោះគឺបានអ្នកស្តាប់ ទស្សនិកជនចាប់អារម្មណ៍ចំពោះកម្មវិធីវិទ្យុ-ទូរទស្សន៍ភាសាខ្មែរ។ ជាពិសេសក្នុងពេលទៅមូលដ្ឋាន ខ្ញុំនៅទាំងទទួលបានការបំពេញយោបល់ដោយសុទ្ធចិត្តពីសំណាក់អ្នកស្តាប់ ទស្សនិកជនផង នោះបានជំនួយឲ្យខ្ញុំជម្នះបានចំណុចអន់ខ្សោយរបស់ខ្លួនក្នុងពេលបំពេញភារកិច្ចជាវិធីការិនី។

បញ្ជាក់ពីលទ្ធផលនៃស្មារតីព្យាយាមរបស់វិធីការិនីវេសាលី អ្នកកាសែត ថាច់ធីលាភី អនុប្រធានការិយាល័យភាសាខ្មែរនៃស្ថានីយវិទ្យុ-ទូរទស្សន៍ត្រាវិញមានប្រសាសន៍ថា៖ ទន្ទឹមនឹងអនុវត្តល្អភារកិច្ចជាវិធីការិនី ការិយាល័យនៅទាំងបែងការងារឱ្យវេសាលីទទួលបន្ទុកបន្ថែមជាអ្នកយកព័ត៌មានទៀតផង។ វេសាលីបានទៅមូលដ្ឋានសរសេរអត្ថបទក្នុងកម្មវិធីនារីនិងការរស់នៅ មធ្យមភាគពី ០១-០២ អត្ថបទ ក្នុងមួយសប្តាហ៍។ ក្នុងអំឡុងពេលបំពេញការងារវិធីការិនីវេសាលីតែងខិតខំអស់ពីលទ្ធភាពចំពោះការងារ។  ទោះបីទទួលតួនាទីណាក៏ដោយ វិធីការិនីវេសាលីតែងបំពេញបានល្អភារកិច្ចដែលបានប្រគល់ឲ្យ។

សំណេះសំណាលអំពីការបំពេញភារកិច្ចជាអ្នកយកព័ត៌មានក្នុងរយៈកាលជិត ០១ ឆ្នាំកន្លង វិធីការិនីវេសាលីបានឲ្យដឹង៖ បំពេញតួនាទីជាវិធីការិនី ខ្ញុំក៏រៀនសូត្រចំណុចល្អៗ និងមានប្រយោជន៍យ៉ាងច្រើនសម្រាប់ខ្លួនខ្ញុំ។ លុះដល់ទទួលនាទីជាអ្នកយកព័ត៌មាន បានទៅមូលដ្ឋាន ខ្ញុំក៏រៀនសូត្របានច្រើនដែរ។ជាក់ស្តែងដូចជាខ្ញុំបានទៅជិតដិត ក្តាប់ព័ត៌មានអំពីជីវភាពរស់នៅរបស់ប្រជាជនខ្មែរ ជាពិសេសក្តាប់ពីរបៀបបង្កើតនិងកសាងអាជីពរបស់បងប្អូននារី។ ផ្តើមពីការងារជាក់ស្តែងទាំងនោះ ជំនួយឲ្យខ្ញុំមានចំណេះដឹងនិងបទពិសោធន៍យ៉ាងច្រើនសម្រាប់ការងារមុខជំនាញក៏ដូចជាសម្រាប់ជីវភាពសង្គម៕

អត្ថបទ-រូបថត៖សុជា