ឃុំដូងចូវលើកកម្ពស់ស្មារតីប្រុងប្រយ័ត្នបង្ការជំងឺកូវីដ ១៩

ជាមូលដ្ឋានកត់សម្គាល់មានអ្នកវិជ្ជមានអាសន្នរោគកូវីដ‑១៩ ក្នុងពេលដែលកំពុងអនុវត្តចត្តាឡីស័កនៅផ្ទះ ក្នុងថ្ងៃទី ២៦ ខែតុលា នៅភូមិដំបងពាក់។ ពេលនេះ រដ្ឋអំណាចមូលដ្ឋានចាប់ផ្តើមអនុវត្តការបិទខ្ទប់ទូទាំងភូមិ ដោយមានប៉ុស្តិ៍គ្រប់គ្រង ០២ កន្លែង។

ប្រជាជនទទួលអំណោយនៅប៉ុស្តិ៍គ្រប់គ្រងអាសន្នរោគភូមិដំបងពាក់អាស្រ័យរណសិរ្សឃុំជូន។

លោកស្រីផាមធីយុង ប្រធានគណៈកម្មាធិការប្រជាជនឃុំដូងចូវបានឱ្យដឹងថា៖ ក្រោយពេលកត់សម្គាល់មានអ្នកវិជ្ជមានអាសន្នរោគរយៈពេលថ្មីៗនេះ មូលដ្ឋានផ្ទៀងផ្ទាត់ប្រជាជនដែលជាប់ពាក់ព័ន្ធទាំងអស់ចាត់តាំងការធ្វើតេស្តរហ័សដើម្បីសម្រាំង ឆាប់រកឃើញអ្នកជ្រាបជំងឺ។ ឆ្លងតាមរយៈនោះ លើកកម្ពស់ស្មារតីប្រុងប្រយ័ត្នអំពីការបង្ការ ទប់ស្កាត់អាសន្នរោគក៏ដូចជាអនុវត្តកិច្ចចង្អុលការរបស់លោកអនុលេខាប្រចាំការបក្សខេត្ត គឹមង៉ុកថាយ។ លទ្ធផល គិតមកដល់ពេលនេះ មិនទាន់កត់សម្គាល់បន្ថែមពីចំនួនអ្នកដែលពាក់ព័ន្ធជាមួយ​អ្នកវិជ្ជមាននៅភូមិដំបងពាក់ទៀតឡើយ។ ទោះបីដូច្នោះក៏ដោយ មូលដ្ឋានក៏ចង្អុលការអនុវត្តការបិទខ្ទប់ដើម្បីតាមដានសុខភាពរបស់ប្រជាជន។ គិតតាំងពីថ្ងៃទី ០១ ដល់ថ្ងៃទី ២៩ ខែតុលា ឆ្នាំ ២០២១ ឃុំដូងចូវទទួលប្រជាជនមកពីបណ្តាខេត្ត ក្រុងជាង ៣៣០ នាក់ និងបានបញ្ជូនទៅធ្វើចត្តាឡីស័កប្រមូលផ្តុំ។ គិតមកទល់ពេលនេះ មានប្រជាជនជាង ២០០ នាក់សម្រេចការធ្វើចត្តាឡីស័កប្រមូលផ្តុំបានវិលត្រឡប់ទៅផ្ទះធ្វើចត្តាឡីស័កបន្តនៅនឹងផ្ទះ និងតាមដានសុខភាពរៀងរាល់ថ្ងៃ។ មូលដ្ឋានតែងបានពង្រឹងគ្រប់គ្រងការធ្វើដំណើរទៅមករបស់ប្រជាជន តាមដានយ៉ាងដិតដល់រាល់ការ ប្រែប្រួលរបស់អ្នកធ្វើចត្តាឡីស័ក ពេលសម្រេចការធ្វើចត្តាឡីស័ក វិលត្រឡប់មកផ្ទះ ក៏បានបំផុសចលនាមិនឱ្យប៉ះពាល់ជាមួយមនុស្សច្រើនគ្នា។ ប្រការនោះ គឺបង្ការហានិភ័យកើតមានអាសន្នរោគ ជាបាតុភាពឆ្លងរាលដាលក្នុងសហគមន៍។

គណៈចង្អុលការឃុំដូងចូវតែងលើកកម្ពស់ការផ្សព្វផ្សាយឱ្យប្រជាជនប្រតិបត្តិល្អបណ្តាវិធានការបង្ការ ទប់ស្កាត់អាសន្នរោគ ក្នុងនោះ មានវិធានការ ៥K។ មូលដ្ឋានក៏ព្យួរបដា សញ្ញាពេចន៍ផ្សព្វផ្សាយយ៉ាងទូលំទូលាយនៅតាមមូលដ្ឋាន និងនៅផ្សារដូងចូវ ជួយឱ្យប្រជាជនមានការប្រុងប្រយ័ត្ន អនុវត្តល្អអនុសាសន៍ ៥K ភ្ជាប់ជាមួយកម្រិតពិន័យពេលដែលមិនអនុវត្តតាមការព្រមាន។

បងស្រីត្រឹងថាញ់ង៉ា ឈ្មួញលក់ផ្លែឈើគ្រប់ប្រភេទនៅផ្សារដូងចូវបានឱ្យដឹងថា៖ ចាប់ពីពេលមូលដ្ឋានកត់សម្គាល់មានអ្នកវិជ្ជមានអាសន្នរោគកូវីដ‑១៩ រួមជាមួយការផ្សព្វផ្សាយរបស់រដ្ឋអំណាចមូលដ្ឋាន ប្រជាជននៅទីនេះតែងមានការភ្ញាក់រលឹកខ្ពស់។ អ្នកចូលទិញដូររបស់របរនៅក្នុងផ្សារតែងប្រតិបត្តិតាមការព្រមានរបស់ផ្នែកសុខាភិបាល ការណែនាំរបស់គណៈគ្រប់គ្រងផ្សារ។ បច្ចុប្បន្ន ទោះបីផ្សារបានធ្វើសកម្មភាពក្នុងសភាពធម្មតាថ្មីក៏ដោយ ប៉ុន្តែប្រជាជននៅតែប្រតិបត្តិល្អតាមការព្រមាន ៥K​​ ជ្រោមជ្រែងបានល្អជាមួយចលនារបស់រដ្ឋអំណាចមូលដ្ឋាន នាំមកសុវត្ថិភាពក្នុងជីវភាពជូនប្រជាជន។     

លោកមាគឹមសម្បូរ ប្រជាជននៅភូមិបាកោយបានចែករំលែក៖ មូលដ្ឋានចាត់ទុកការងារបង្ការ ទប់ស្កាត់អាសន្នរោគជាភារកិច្ចសំខាន់ ម៉្លោះហើយតែងចង្អុលការដល់បណ្តាភូមិក្តាប់ច្បាស់អំពីការធ្វើដំណើរទៅមករបស់ប្រជាជន។ ពេលដឹងថាទីណាមានបាតុភាពខ្ពស់អំពីការកើតជំងឺនោះ រដ្ឋអំណាចមូលដ្ឋានបញ្ជូនកងកម្លាំងសុខាភិបាលមកធ្វើតេស្តរហ័ស បំផុសចលនាបណ្តាមុខសញ្ញាដែលសង្ស័យមានការប៉ះពាល់ផ្ទាល់ជាមួយអ្នកជ្រាបជំងឺធ្វើចត្តាឡីស័កនៅផ្ទះ ធ្វើតេស្តរហ័សដឹងពីលទ្ធផល។ ផ្តើមពីនោះ ញ៉ាំងឱ្យប្រជាជនស្ងប់ចិត្ត និងមានការព្រមព្រៀងខ្ពស់ជាមួយរដ្ឋអំណាចមូលដ្ឋាន។

ទន្ទឹមនឹងនោះ លោកអនុលេខាប្រចាំការបក្សខេត្តនៅទាំងចង្អុលការស្រុកយ្វៀងហាយគប្បីពង្រីកតួនាទីក្រុមកូវីដសហគមន៍ ធានាសន្តិសុខ សណ្តាប់ធ្នាប់។ អនុវត្តល្អការឧបត្ថម្ភតាមសេចក្តីសម្រេចចិត្តលេខ ៦៨ របស់រដ្ឋាភិបាល ដោះស្រាយការងារធ្វើជូនពលករ។ ត្រៀមបម្រុងបន្ទប់រៀន សាលារៀនដើម្បីទទួលប្អូនៗត្រឡប់មករៀនសូត្របន្តទៀតពេលដែលគ្រប់លក្ខណៈ។ ផ្សព្វផ្សាយ ជ្រួតជ្រាបអនុវត្តសេចក្តីសម្រេចចិត្តលេខ ១២៨/NQ-CP របស់រដ្ឋាភិបាល និងសារលិខិតលេខ ៥៥៤០/UBND-KGVX ចុះថ្ងៃទី ២២ ខែតុលា ឆ្នាំ ២០២១ របស់ប្រធានគណៈកម្មាធិការប្រជាជនខេត្ត ស្តីពីការអនុវត្តបណ្តាវិធានការសមស្រប សុវត្ថិភាព រវៀសរវៃ គ្រប់គ្រងអាសន្នរោគកូវីដ‑១៩ លើភូមិសាស្រ្តមានប្រសិទ្ធភាព ឆាប់នាំយកមូលដ្ឋានត្រឡប់មកសភាពធម្មតាថ្មីវិញ៕ 

អត្ថបទ‑រូបថត៖ ថាច់សម្បត្តិ