ទឹកព្រះទ័យព្រះសង្ឃរដូវអាសន្នរោគកូវីដ ១៩

ក្នុងអំឡុងពេលអនុវត្តគម្លាតសង្គមយើងគ្រប់គ្នាបានឃើញរូបភាព ព្រះចៅអធិការនានាវត្ត ច្រើនអង្គបានប្រើរទេះសាឡីអូសនាំយកស្បៀង អាហារទៅជូនដល់បណ្តាគ្រួសារដែលជួបលំបាកអាស្រ័យមហាសន្នរោគ។ ជាក់ស្តែងដូច ជាព្រះតេជគុណ ថាច់សុវណ្ណ ព្រះចៅអធិការវត្តផ្នោរអំពូង ឃុំតឹងហ៊ីប ស្រុកថ្កូវ លៃលកអំណោយចែកជូនដល់មាមីងប្រជាពុទ្ធបរិស័ទ។ ព្រះតេជគុណថាច់សុវណ្ណ មានថេរដីកាឱ្យដឹងថា៖ ក្នុងពេលដែលរដ្ឋបង្កើនការងារបង្ការ ទប់ស្កាត់អាសន្នរោគកូវីដ‑១៩ កាន់តែឃើញច្បាស់ពីភាពលំបាករបស់ប្រជាជន សំខាន់គឺបណ្តាគ្រួសារដែលមានពលករចម្បងក្នុងគ្រួសារត្រូវបាត់ការងារធ្វើ។ គិតមកទល់ពេលនេះ ទោះបីសកម្មភាពមួយចំនួនបានវិលត្រឡប់មកសភាពធម្មតាក៏ដោយ ប៉ុន្តែគ្រួសារទាំងនោះនៅតែលំបាក អាស្រ័យមនុស្សជាច្រើននៅតែជាប់នៅបណ្តាខេត្ត ទីក្រុងដែលកំពុងមានបាតុភាពខ្ពស់អំពីអាសន្នរោគ មិនត្រឡប់មកផ្ទះបាន បណ្តាកូនដែលរស់នៅជាមួយតាយាយ សាច់ញាតិ។ ហេតុនោះ អាត្មាបន្តការចែករំលែកដល់ស្ថានភាពទាំងនោះតាមលទ្ធភាពដែលអាចធ្វើទៅបាន។

ព្រះតេជគុណថាច់សុវណ្ណជូនអំណោយដល់ជនក្រីក្រ។

ព្រះតេជគុណថាច់កាលី ព្រះពហូសូត វត្តចុងមីសថ្មី ឃុំញីទ្រឿង ស្រុកកូវង៉ាង កន្លងហើយព្រះអង្គតែងភ្ជាប់ជាមួយនឹងរទេះសាឡីនាំយក យកអំណោយនិមន្តទៅជូនដល់ផ្ទាល់គ្រួសារនីមួយៗក្នុងចំណុះវត្ត។ ព្រះតេជគុណ ថាច់កាលី មានថេរដីកាឱ្យដឹងថា៖ មានពុទ្ធបរិស័ទមួយចំនួនប្រកបកិច្ចការស៊ីឈ្នួលជួលព័ទ្ធ មានអ្នកខ្លះក៏មានជីវភាពលំបាក ពេលអាសន្នរោគផ្ទុះឡើង គ្រួសារទាំងនោះកាន់តែលំបាកជាងទៀត។ ផ្តើមពីការគិតឃើញយ៉ាងនោះ អាត្មាក៏មានទង្វើដើម្បីចែករំលែកជាមួយស្ថានភាពទាំងនោះ។​ គិតតាំងពីខែកក្កដាមកទល់ដើមខែតុលា ឆ្នាំ ២០២១ ព្រះតេជគុណ ថាច់កាលី ចាត់ចែងជូនអំណោយដល់ជនក្រីក្របានជាង ៦០០ ចំណែក អំណោយមួយចំណែកៗ រួមមាន៖ អង្ករ ទឹកស៊ីអ៊ីវ ត្រីខកំប៉ុង មី និងវត្ថុចាំបាច់ផ្សេងៗ​ គិតជាតម្លៃក្នុងមួយចំណែកៗជាង ២០០ ពាន់ដុង។ ក្រៅពីនោះ ព្រះតេជគុណនៅទាំងនិមន្តទៅសួរសុខទុក្ខ ជូនអំណោយអ្នកជំងឺជាង ១០ នាក់ដែលគ្មានលក្ខណៈទៅព្យាបាលជំងឺក្នុងរដូវអាសន្នរោគ ដោយអំណោយមួយចំណែកៗជាទឹកប្រាក់ជាង ១ លានដុង។

លោកឡេថុងញ៉ឹក ប្រធានគណៈកម្មាធិការប្រជាជនឃុំញីទ្រឿង បានឱ្យដឹងថា៖ បច្ចុប្បន្ន លើភូមិសាស្រ្តឃុំញីទ្រឿង មានវត្តពុទ្ធសាសនាគណៈមហានិកាយខ្មែរ ០៤ វត្ត។ ក្នុងរដូវអាសន្នរោគ ព្រះសង្ឃនៃបណ្តាវត្តមានបណ្តាសកម្មភាពរួមជាមួយរដ្ឋអំណាចមូលដ្ឋានថែទាំដល់រាល់ស្ថានភាពលំបាក។ នោះជារូភាពល្អល្អះពេលមូលដ្ឋានកំពុងមានសេចក្តីត្រូវការដល់ទង្វើទាំងនោះ។

ក្រៅពីបណ្តាអង្គខាងលើ នៅមានព្រះសង្ឃជាច្រើនទៀតដែលមានទឹកព្រះទ័យប្រកបដោយការអនុគ្រោះដូចជា៖ ព្រះតេជគុណ ថាច់រ៉ីយ៍ ប្រធានសមាគមព្រះសង្ឃសាមគ្គីស្នេហាជាតិស្រុកកូវង៉ាង ព្រះចៅអធិការវត្តចុង មីសចាស់ (ឃុំហ៊ីបហ្វា ស្រុកកូវង៉ាង)​។​ ព្រះតេជគុណថាច់រឿន ប្រធានសមាគមព្រះសង្ឃសាមគ្គីស្នេហាជាតិស្រុកយ្វៀងហាយ ព្រះចៅអធិការវត្តប្រខុប (ឃុំង៉ូវឡាក ស្រុកយ្វៀងហាយ) ។ ព្រះតេជគុណ ថាច់ញឹក ព្រះចៅអធិការវត្តស្វាយសៀមថ្មី(ឃុំង៉ាយស្វៀង ស្រុកថ្កូវ)។ ព្រះតេជគុណថាច់ថាវ ប្រធានសមាគមព្រះសង្ឃសាមគ្គីស្នេហាជាតិស្រុកកូវកែ ព្រះចៅអធិការវត្តកណ្តាល (ឃុំហ្វាអឹង ស្រុកកូវកែ) ព្រះតេជគុណត្រឹងយ៉ឹង ព្រះចៅអធិការវត្តខ្ទឹង (សង្កាត់លេខ ៧ ទីក្រុងត្រាវិញ)។ល។ អង្គទាំងនោះ អនុវត្តល្អ មេត្តា ករុណា ការងារសប្បុរសធម៌សុខុមាលភាពចំពោះបណ្តាស្ថានភាពពុទ្ធបរិស័ទរបស់ព្រះអង្គក្នុងចំណុះជើងវត្តក៏ដូចជាភូមិស្រុកនានាក្នុងខេត្ត៕         

អត្ថបទ‑រូបថត៖ ថាច់សម្បត្តិ