ដាក់ក្ដីជំនឿ និងក្តីសង្ឃឹមទៅក្នុងមហាសន្និបាតតំណាងបក្ខភាគខេត្តត្រាវិញលើកទី ១១ អាណត្តិកាល ២០២០-២០២៥

អាណត្តិកាលមួយកន្លងផុតទៅបន្សល់នៅភាពវិវឌ្ឍន៍ថ្មី

 ព្រះឧបជ្ឈាយ៍ ថាច់សុខសាន្ត​។​​​ រូបថតៈ សម្បត្តិ

           ព្រះឧបជ្ឈាយ៍ ថាច់សុខសាន្ត ប្រធានគណៈអភិ​បាលសមាគមពុទ្ធសាសនាវៀតណាមខេត្តត្រាវិញ ប្រធានសមាគមព្រះសង្ឃសាមគ្គីស្នេហាជាតិខេត្តត្រាវិញ «អាណត្តិកាលមួយកន្លងផុតទៅបន្សល់នៅភាពវិវឌ្ឍន៍ថ្មី»។
      ពិនិត្យឡើងវិញក្នុងរយៈពេល 0៥ ឆ្នាំនៃអាណត្តិកាលមហាសន្និបាតបក្ខភាគខេត្ត ឃើញថាខេត្តត្រាវិញកាន់តែមានភាពវិវឌ្ឍន៍ដ៏គួរឱ្យពណ៌នា។ ជាក់ស្តែងអំពីគោលនយោបាយជនជាតិ គោលនយោបាយសាសនា៖ តែងបានគណៈកម្មាធិការបក្ស រដ្ឋអំណាចគ្រប់លំដាប់ថ្នាក់យកចិត្តទុកដាក់ផ្សព្វផ្សាយអនុវត្តល្អ ញុាំងឱ្យជីវភាពរបស់ជនរួមជាតិកាន់តែបានកែលម្អអត្រាគ្រួសារក្រីក្រក្នុងតំបន់ជនរួមជាតិខ្មែរកាន់តែបានថយចុះ មានគ្រួសារក្រ ជាច្រើនបានចាកផុតភាពក្រីក្រស្ថិរភាព ដោយបង្កើតបានទម្រង់ប្រកបកិច្ចការទទួលទាន មានប្រាក់ចំណូលទៀងទាត់។ ចំពោះការអនុវត្តន៍ជំនឿ និងការគោរពសាសនាកាន់តែបានយកចិត្តទុកដាក់៖ បណ្តាវត្តលើភូមិសាស្រ្តបានបង្កលក្ខណៈឱ្យកសាងបណ្តាសំណង់ បម្រើដល់ការស្នាក់អាស្រ័យរៀនសូត្រផ្នែកពុទ្ធិកសិក្សារបស់សមណសិស្សក៏ដូចជាការបម្រើដល់ការគោរពជំនឿផ្លូវព្រះពុទ្ធសាសនារបស់ពុទ្ធសាសនិក។  ក្នុងបណ្តាឆ្នាំកន្លង មានវត្តជាច្រើន បានអនុញ្ញាតឱ្យកសាងសំណង់ ធំៗដូចមានព្រះវិហារជាដើម កាន់តែធ្វើឱ្យវត្តទាំង នោះ មានភាពស្រស់ស្អាត ស័ក្តិសមជាកន្លែងគោរពបូជាដ៏ថ្លៃថ្លារបស់ជនរួមជាតិខ្មែរ។ វត្តដែលមានស្នាដៃក្នុងសម័យសង្គ្រាមក៏បានឧបត្ថម្ភថវិកាពី ១០០ - ២០០ លានដុងសម្រាប់កសាងសំណង់នានានៅក្នុងវត្ត។
         អំពីវិស័យអប់រំ - បណ្តុះបណ្តាល និងធនធានមនុស្សក្នុងជនរួមជាតិខ្មែរ កាន់តែបានវិនិយោគ ញុាំងឱ្យវិស័យអប់រំ - បណ្តុះបណ្តាលក្នុងតំបន់ជនរួមជាតិខ្មែរកាន់តែមានភាពរីកចម្រើន។ ផ្តើមពីនោះ បង្កបានគ្រឹះធារសម្រាប់សមណសិស្ស - សិស្សក្នុងនិងក្រៅខេត្តបានសិក្សាផ្នែកពុទ្ធិកសិក្សា សិក្សាខាងអនុវិទ្យាល័យ វិទ្យាល័យ និងសកលវិទ្យាល័យព្រមទាំងសិក្សាបណ្តាចំណេះវិជ្ជាកាន់តែខ្ពស់ដោយទទួលបានរបបអាទិភាពរបស់រដ្ឋជាធរមាន។ មានសមណសិស្សមួយចំនួនអង្គកំពុងសិក្សានៅបរទេសក៏ដោយសារមានកិច្ចសហការល្អរវាងសមាគមព្រះសង្ឃសាមគ្គីស្នេហាជាតិខេត្ត និងបណ្តាផ្នែកពាក់ព័ន្ធក្នុងការដោះស្រាយ និងផ្តល់ទិដ្ឋាការឱ្យអង្គទាំងនោះចេញទៅសិក្សាស្របតាមគោលនយោបាយរបស់រដ្ឋ។ បណ្តាស្រុកក៏បានបង្កើតសាលាអន្តេវាសិកជនជាតិពីកម្រិតអនុវិទ្យាល័យដល់វិទ្យាល័យ។ ទន្ទឹមនឹងនោះគួរពិនិត្យមើលផងដែរសំណង់សាលាមធ្យមសិក្សាបាលី - ខ្មែរត្រាវិញជាសំណង់មួយក្នុងចំណោមសំណង់អំណរមហាសន្និបាតបក្ខភាគខេត្ត បានកសាងសម្រេចដោយ តម្លៃសាងសង់រាប់សិបពាន់លានដុង រួចបានដាក់ឱ្យប្រើប្រាស់នារយៈពេលកន្លង ជាមជ្ឈមណ្ឌលរួមចំណែកយ៉ាងសំខាន់ដល់ការបណ្តុះបណ្តាលធនធានព្រះសង្ឃកូនចៅជនរួមជាតិខ្មែរនាពេលខាងមុខ។ រីឯការលៃលកឱ្យមានកម្មាភិបាលបុគ្គលិក និយោជិតបំពេញការងារនៅតាមស្ថាប័នរដ្ឋលើភូមិសាស្រ្តខេត្តក៏មានចំនួនកាន់តែច្រើនឡើង ឆ្លើយតបបានតម្រូវការផ្លាស់ថ្មី និងស្ថានភាពនាពេលបច្ចុប្បន្ន។
      ឆ្នាំ ២០២០ ជាឆ្នាំចុងក្រោយនៃការអនុវត្តន៍សេចក្តីសម្រេចចិត្តមហាសន្និបាតបក្ខភាគខេត្តលើកទី ១០ អាណត្តិកាល ២០១៥ - ២០២០ ហើយក៏ជាឆ្នាំដែលខេត្តត្រូវរងផលប៉ះពាល់ដោយកត្តាអសកម្មជាច្រើនក្នុងនោះមានឥទ្ធិពលនៃរោគរាតត្បាតកូវីដ - ១៩។ ថ្វីត្បិតតែដូចច្នោះ ដោយកិច្ចចង្អុលការម៉ឹងម៉ាត់របស់គណៈកម្មាធិការបក្សខេត្ត ការចូលរួមរបស់គណៈកម្មាធិការប្រជាជនខេត្ត ការជ្រោមជ្រែងរបស់បណ្តាគណៈផ្នែក និងប្រជាជនក្នុងខេត្តកាន់តែធ្វើឱ្យសន្ទុះកំណើនសេដ្ឋកិច្ចរបស់ខេត្តមានការរីកចម្រើនហើយខេត្តក៏ទប់ស្កាត់មានប្រសិទ្ធភាពពីការឆ្លងរាលដាលនៃរោគរាតត្បាតកូវីដ - ១៩។ សង្ឃឹមថា មហាសន្និបាតបក្ខភាគខេត្តលើកទី ១១ នាពេលខាងមុខ នឹងជ្រើសរើសបាន
         ថ្នាក់ដឹកនាំខេត្ត ប្រកបដោយគុណធម៌ សីលធម៌ យកចិត្តទុកដាក់ដើម្បីប្រមូលផ្តុំយ៉ាងខ្លាំងក្លាជាងទៀត ពីកិច្ចការជីវភាព ស្មារតីក្នុងតំបន់ជនរួមជាតិខ្មែរ។ ពីព្រោះអាណត្តិកាលកន្លង ទុកជាមានការយកចិត្តទុកដាក់របស់បក្ខភាគខេត្តយ៉ាងសកម្មក៏ដោយ ក៏នៅមានការខ្វះខាត មិនទាន់សព្វគ្រប់នៅឡើយ។ អាណត្តិកាលថ្មីត្រូវតែបន្តវេនកិច្ចការសាសនា និងជនជាតិ វិនិយោគទុនដាំដុះ ក៏ដូចជាអនុវត្តល្អជាងទៀតសេចក្តីសម្រេចចិត្តលេខ ៣៣ របស់រដ្ឋាភិបាលអំពីការឧបត្ថម្ភផ្ទះជូនគ្រួសារក្រីក្រ ជួយឱ្យជីវភាពជនរួមជាតិខ្មែរបានកែលម្អ ស្មើជាមួយបណ្តាជនជាតិក្នុងតំបន់។ បង្កើតការងារធ្វើជូនពលករជាជនរួមជាតិខ្មែរឱ្យសមស្រប រួមចំណែកក្នុងការអភិវឌ្ឍន៍សេដ្ឋកិច្ច សង្គម សន្តិសុខ របៀបរៀបរយរបស់ខេត្តយើងឱ្យមានការរីកចម្រើន។ល។

បានការយកចិត្តទុកដាក់របស់គណៈ កម្មាធិកាបក្សគ្រប់លំដាប់ថ្នាក់ ការបួសរៀនរបស់ព្រះសង្ឃ ការគោរពជំនឿ របស់ជនរួមជាតិខ្មែរបានល្អប្រសើរជាង

ព្រះឧបជ្ឈាយ៍ថាច់សង។​ រូបថតៈ សម្បត្តិ

         ព្រះឧបជ្ឈាយ៍ថាច់សង ប្រធានគណៈអភិបាលសមាគមពុទ្ធសាសនាវៀតណាមស្រុកកូវង៉ាង ប្រធានកិត្តិយសសមាគមព្រះសង្ឃសាមគ្គីស្នេហាជាតិស្រុកកូវង៉ាង «បានការយកចិត្តទុកដាក់របស់គណៈកម្មាធិកាបក្សគ្រប់លំដាប់ថ្នាក់ សណ្តាប់ធ្នាប់បួសរៀនរបស់ព្រះសង្ឃ ការគោរពជំនឿរបស់ជនរួមជាតិខ្មែរបានល្អប្រសើរជាង»។ រយៈពេល ០៥ ឆ្នាំកន្លង បណ្តាវត្តខ្មែរទាំង ២៣ វត្តលើភូមិសាស្រ្ត​ស្រុកតែងបានបើកបង្រៀនបណ្តាថ្នាក់ពុទ្ធិកសិក្សា ពីពុទ្ធិកមធ្យមសិក្សាបឋមភូមិ ដល់ពុទ្ធិកមធ្យម សិក្សាទុតិយភូមិ។ ទន្ទឹមនឹងនោះ ក្នុងរដូវវិស្សមកាលពីសាលាសកល វត្តទាំងអស់បើកថ្នាក់វិជ្ជាខេមរភាសាពីថ្នាក់ទី ១ ដល់ថ្នាក់ទី ៥ ដោយទទួលប្អូនៗជាកូនចៅជនរួមជាតិខ្មែររាប់រយរូបចូលរៀន។  រីឯបណ្តាថ្នាក់ពុទ្ធិកមធ្យមសិក្សា ក្រៅពីការប្រឡងត្រីមាស ឆមាសនៅក្នុងវត្តដែលបើកសាលានោះ សមាគមសាមគ្គីស្នេហាជាតិស្រុកនៅទាំងចាត់តាំងមណ្ឌលប្រឡងរួមនៅវត្តណាមួយដែលបានស្នើចាត់តាំង ដោយនៅក្រោមការអនុញ្ញាតពីរដ្ឋអំណាចមូលដ្ឋាន។ ការគោរពជំនឿរបស់ពុទ្ធបរិស័ទខ្មែរតែងមានការត្រួតពិនិត្យរបស់ផ្នែកពាក់ព័ន្ធ ទន្ទឹមនឹងនោះ ជៀសវាងការផ្សាយព័ត៌មានពឹសពុល ប្រាស់ចាកការពិត បំភាន់គំនិតមហាជន ដោយមានគោលបំណងបន្ទាបបង្អាប់ចំពោះការដឹកនាំរបស់បក្ស ការគ្រប់គ្រងរបស់រដ្ឋពីអានុភាពជាអមិត្ត។ ស្រុកកូវង៉ាងមានសាលាជនជាតិអន្តេវាសិក ជារៀងរាល់ឆ្នាំទទួលសិស្សានុសិស្សជនជាតិខ្មែររាប់សិបរូបចូលរៀន។ ប្អូនៗចូលរៀននៅសាលានេះតែងបានដោះស្រាយរបបឧបត្ថម្ភរបស់រដ្ឋ ។ ប្រការគួរចាប់អារម្មណ៍ជាងទៀត ក្នុងពេលកន្លង បណ្តាគ្រូបង្រៀនភាសាខ្មែរនៅតាមវត្តខ្មែរ បានរដ្ឋឧបត្ថម្ភប្រាក់បង្រៀន ជាការជំនួយដល់ស្មារតីគ្រូ បង្រៀនបំពេញការងារបង្ហាត់បង្រៀននៅតាមវត្តបានល្អប្រសើរ។ នោះក៏គួរពណ៌នាដល់គោលការណ៍ គោលយោបាយរបស់បក្ស រដ្ឋចំពោះជនរួមជាតិខ្មែរ ជាពិសេសមានការយកចិត្តទុកដាក់របស់គណៈកម្មាធិការបក្ស រដ្ឋអំណាចគ្រប់លំដាប់ថ្នាក់ក្នុងខេត្ត។ អាណត្តិកាលកន្លងបក្ខភាគខេត្តជ្រើសបានមនុស្សឆ្លើយតបបានបំណងប្រាថ្នារបស់ប្រជាជន សង្ឃឹមថាអាណត្តិកាលខាងមុខ បក្ខភាគខេត្តនឹងជ្រើសបានអ្នកមានសមត្ថភាពបញ្ញាញាណ មានសីលធម៌ថ្លៃថ្លាអស់ពីចិត្តដើម្បីមាតុភូមិត្រាវិញ គិតគូរបានល្អប្រសើរជាងទៀតពីផលប្រយោជន៍ប្រជាជន លើវិស័យទាំងអស់លើភូមិសាស្រ្តស្រុកនិយាយរួម វិស័យអប់រំ - បណ្តុះបណ្តាលនិយាយដោយឡែកឲ្យកាន់តែរីកចម្រើនជាង។

ដាក់ក្ដីសង្ឃឹមទៅលើការសម្រេចចិត្តដ៏ត្រឹមត្រូវ

ពិធីប្រគល់ជូនផ្ទះ​។​ រូបថតៈ ថាច់ហ្វាង

           ជាមួយតួនាទីជាអនុប្រធានសមាគមព្រះសង្ឃសាមគ្គីស្នេហាជាតិខេត្ត ប្រធានសមាគមព្រះសង្ឃសាមគ្គីស្នេហាជាតិស្រុកថ្កូវព្រះឧបជ្ឈាយ៍ គឹមង៉ុកត្វង សហការជាមួយរដ្ឋអំណាចមូលដ្ឋានចលនាសប្បុរិសជនក្នុងនិងក្រៅខេត្តឧបត្ថម្ភសាងសង់ផ្ទះមេត្តាធម៌បាន ១៧ ខ្នងជូនដល់គ្រួសារក្រីក្រ។ គិតដោយឡែកតែក្នុងឆ្នាំ ២០១៩ និង ០៦ ខែដើមឆ្នាំ ២០២០ ព្រះឧបជ្ឈាយ៍រួមជាមួយបណ្ដាព្រះតេជគុណក្នុងគណៈប្រតិបត្តិការសមាគមព្រះសង្ឃសាមគ្គីស្នេហាជាតិស្រុកចលនាព្រះសង្ឃ ពុទ្ធបរិស័ទចូលរួមសកម្មភាពសប្បុរិសធម៌សង្គមដូចជា៖ ជូនអំណោយគ្រួសារក្រីក្រ ឧបត្ថម្ភបុណ្យសព ជូនអាហារូបករណ៍ដល់សិស្សនិស្សិតក្រីក្រសង្វាតរៀនសូត្រ ជូនអំណោយដល់សិស្សក្រីក្រសួរសុខទុក្ខដល់អ្នកជំងីក្រីក្រ ឧបត្ថម្ភគណៈកម្មាធិការរណសិរ្សមាតុភូមិវៀតណាមស្រុកក្នុងរដូវអាសន្នរោគ កូវីដ - ១៩ ឧបត្ថម្ភអង្ករដល់វត្តទាំង ១៧ ក្នុងស្រុក ទិញដីសាងសង់ផ្ទះជូនគ្រួសារក្រីក្រ។ល។ សរុបថវិកាជាង ១៥ ពាន់លានដុង។
         បច្ចុប្បន្ន ចលនាសប្បុរិសធម៌សង្គមនៅលើភូមិសាស្រ្ដស្រុកថ្កូវបានរីករាលដាលគ្រប់ទីកន្លែងក្នុងពុទ្ធបរិស័ទ។ ការចូលរួមបំពេញរបស់ព្រះឧបជ្ឈាយ៍ គឹមង៉ុកត្វង ក្នុងពេលកន្លងគួរជាទីគោរពបង្ហាញឲ្យនូវគោលលំនាំរស់នៅ “ល្អសាសនា ថ្លៃថ្លាសង្គម” របស់ពុទ្ធសាសនា និងបណ្ដាទង្វើដ៏មានអត្ថន័យ ពីចលនា “រៀនសូត្រនិងធ្វើតាមសតិអារម្មណ៍ សីលធម៌ ឥរិយាបថហូជីមិញ” របស់មូលដ្ឋាន។ គុណធម៌នេះមិនត្រឹមតែជួយឲ្យបណ្ដាគ្រួសារជួបការលំបាកខ្លាំងមានលក្ខណៈរស់នៅប្រសើរជាង មានឱកាសឈានឡើង លំនឹងជីវភាពហើយនៅទាំងរួមចំណែកជាមួយមូលដ្ឋានអនុវត្តមានប្រសិទ្ធភាពគោលនយោបាយសុខុមាលភាពសង្គមក្នុងតំបន់មានជនរួមជាតិខ្មែររស់នៅច្រើនទៀតផង។
           ជាមួយតួនាទីជាអ្នកមានប្រជាប្រិយភាពក្នុងតំបន់ជនរួមជាតិខ្មែរ តំណាងក្រុមប្រឹក្សាប្រជាជនស្រុកថ្កូវ ព្រះឧបជ្ឈាយ៍គឹមង៉ុកត្វងដាក់ក្ដីសង្ឃឹមទៅលើមហាសន្និបាតបក្ខភាគខេត្តត្រាវិញលើកនេះនឹងជ្រើសរើសកម្មាភិ បាលដែលអស់ពីចិត្ត ដាក់ចេញនូវការសម្រេចចិត្តដ៍ត្រឹមត្រូវ ទន្ទឹមនឹងនោះ ធ្វើជាគំរូឈានមុខក្នុងរាល់ចលនាដើម្បីមហាជនអនុវត្ត។ ព្រះឧបជ្ឈាយ៍ក៏ដាក់ក្ដីសង្ឃឹមទៅក្នុងបណ្ដាការសម្រេចចិត្តពីអង្គមហាសន្និបាត​ នឹងធ្វើឲ្យផ្លាស់ប្ដូរជីវភាពជនរួមជាតិខ្មែរលើភូមិសាស្រ្ដខេត្ត ជំរុញមាំការពង្រីកសេដ្ឋកិច្ច- សង្គម បន្តយកចិត្តទុកដាក់ជាងទៀត លើកកម្ពស់ជីវភាពសម្ភារៈ ស្មារតីជូនដល់ជនរួមជាតិខ្មែរដែលមានស្ថានភាពលំបាក។

គប្បីត្រួតពិនិត្យបំពេញបន្ថែមរបប គោលនយោបាយចំពោះអ្នកមិនជំនាញការថ្នាក់ឃុំ

អ្នកស្រីគឹមធីថាញ់ស្វឹង​។ រូបថតៈ សុជា

        សំណេះសំណាលអំពីគោលបំណងផ្ញើជូនមហាសន្និបាត អ្នកស្រីគឹមធីថាញ់ស្វឹង លេខាបក្ខភាគឃុំតឹងហ៊ីប ស្រុកថ្កូវបានឲ្យដឹង៖ឆ្លងតាមរយៈការបណ្តុះបណ្តាល បំពាក់បំប៉នបង្កើនចំណេះដឹងមុខជំនាញ កម្មាភិបាលបុគ្គលិក អ្នកមិនជំនាញការថ្នាក់ឃុំ តែងពង្រីក ល្អលទ្ធភាព មុខជំនាញរបស់ខ្លួនដើម្បីរួមចំណែកជាមួយគណៈកម្មាធិការបក្ស រដ្ឋអំណាច អនុវត្តល្អភារកិច្ច សង្គមនៅមូលដ្ឋាន។ ហេតុនោះ ការយកចិត្តទុកដាក់ក្នុងការបណ្តុះ បណ្តាល និងពង្រីកលទ្ធភាពមុខជំនាញរបស់កម្មាភិបាល បុគ្គលិក អ្នកមិនជំនាញការថ្នាក់ឃុំ  គឺជាកត្តាសំខាន់ណាស់។ ទន្ទឹមនឹងនោះ ក៏គប្បីយកចិត្តទុកដាក់គិតគូរដល់ជីវភាពសម្ភារៈស្មារតីរបស់ពួកគាត់ដែរ។ ពីព្រោះអ្នកមិនជំនាញការថ្នាក់ឃុំ ធ្វើការងារច្រើន ប៉ុន្តែប្រភពចំណូលតិច។ អនុវត្តតាមអនុក្រឹត្យលេខ ៩២/ ២០០៩/ NĐ-CP ចុះថ្ងៃទី ២២ តុលា ឆ្នាំ ២០០៩ របស់រដ្ឋាភិបាលស្តីពីតួនាទី ចំនួនរបបគោលនយោបាយចំពោះកម្មាភិបាល បុគ្គលិកនៅឃុំ សង្កាត់ ទីប្រជុំជននិងអ្នកមិនជំនាញការ គឺអ្នកមិនជំនាញការថ្នាក់ឃុំម្នាក់ៗទទួលរបបប្រាក់ឧបត្ថម្ភរួម ៣,៥ លានដុងក្នុងមួយខែ។ ទទួលបានរបបប៉ុណ្ណោះ មិនអាចកែលម្អជីវភាពបានឡើយ ។ ម្ល៉ោះហើយជីវភាពអ្នកមិនជំនាញការថ្នាក់ឃុំនិយាយរួម អ្នកមិនជំនាញការជនជាតិខ្មែរឃុំតឹងហ៊ីប ១១ នាក់និយាយដោយឡែក ជួបប្រ ទះការលំបាកច្រើន។ ដូច្នោះហើយ ខ្ញុំសង្ឃឹមថា គណៈប្រតិបត្តិការបក្ខភាគខេត្តអាណត្តិកាលថ្មីគប្បីត្រួតពិនិត្យបំពេញបន្ថែមរបបគោលនយោបាយចំពោះអ្នកមិនជំនាញការថ្នាក់ឃុំ ដើម្បីពួកគាត់ទទួលរបបបានសមស្របនឹងការងារមុខជំនាញដែលពួកគាត់ទទួលបន្ទុក។

បន្តការវិនិយោគជំរុញមាំការផ្លាស់ប្ដូរ រចនាសម្ព័ន្ធដំណាំ សត្វចិញ្ចឹមក្នុងតំបន់ជនរួមជាតិខ្មែរ

លោកថាច់សុភី ។​ រូបថតៈ សុជា

         នោះគឺជាយោបល់របស់លោកថាច់សុភីជា អ្នកមានប្រជាប្រិយភាពតំបន់ជនរួមជាតិខ្មែរ ជាតំណាងក្រុមប្រឹក្សាប្រជាជនឃុំដាឡុក ស្រុកចូវថាញ់ ផ្ញើជូនមហាសន្និបាតបក្ខភាគខេត្ត។ ក្នុងសេចក្តីព្រាងសេចក្តីរបាយការណ៍នយោបាយជូនមហាសន្និបាតបក្ខភាគខេត្តលើកទី ១១ លោកថាច់សុភីយកចិត្តទុកដាក់បំផុតចំពោះប្រភពចំណូលមធ្យមភាគរបស់មនុស្សម្នាក់ (GRDP ) ក្នុង ០៥ ឆ្នាំកន្លង កើន ១២,៤% លុះដល់ចុងឆ្នាំ ២០២០ GRDP មធ្យមភាគសម្រេច ៦៥ លានដុ ក្នុងមួយឆ្នាំ  កើន ៣៥,២ លានដុងបើប្រៀបនឹងចុងឆ្នាំ ២០១៥។ តាមប្រសាសន៍លោកថាច់សុភី លទ្ធផលនោះ អាចអះអាងបានថា ទូទាំងបក្ស ទូទាំងកងទ័ព ទូទាំងប្រជាជនក្នុងខេត្ត បានសាមគ្គី ខិតខំជម្នះរាល់ការលំបាក អនុវត្តល្អសេចក្តីសម្រេចចិត្តមហាសន្និបាតបក្ខភាគខេត្តលើកទី ១០ អាណត្តិកាល ២០១៥ ២០២០ បានដាក់ចេញ។ 
        ខ្ញុំសង្ឃឹមថា គណៈប្រតិបត្តិការបក្ខភាគខេត្តអាណត្តិកាលថ្មី បន្តការវិនិយោគ ជំរុញមាំការផ្លាស់ប្ដូររចនាសម្ព័ន្ធដំណាំ សត្វចិញ្ចឹមក្នុងតំបន់ជនជាតិខ្មែរ។ យកចិត្តទុកដាក់បណ្តុះបណ្តាល បំពាក់បំប៉នកម្មាភិបាលវិស្វករកសិកម្មជនជាតិខ្មែរដើម្បីពួកគាត់បន្តការណែនាំកសិករខ្មែរអំពីវិទ្យាសាស្រ្តបច្ចេកទេសដោយភាសាខ្មែរជំនួយឲ្យកសិករខ្មែរងាយយល់និងអនុវត្តទៅក្នុងការផលិតកសិកម្មនាំមកលទ្ធផលសេដ្ឋកិច្ចខ្ពស់។ទន្ទឹមនឹងនោះ បង្កើន កិច្ចចង្អុលការ បង្កើនគុណភាពសកម្មភាពសហករណ៍នៅបណ្តាមូលដ្ឋាន ពីព្រោះបច្ចុប្បន្ននេះ សហករណ៍មួយចំនួនធ្វើសកម្មភាពមិនទាន់មានប្រសិទ្ធភាព គ្រាន់តែធ្វើដើម្បីជារូបភាពប៉ុណ្ណោះ  មិនទាន់មានគុណភាពខ្ពស់ដើម្បីទាក់ទាញកសិករ ចូលរួមសេដ្ឋកិច្ចសមូហភាពជាទ្រង់ទ្រាយធំនៅឡើយ៕      

   ថាច់ហ្វាង-សម្បត្តិ-សុជា