ស្រុកថ្កូវ៖ បង្វែរផ្ទៃដីដាំអំពៅផ្ដល់ទិន្នផលទាបមកផលិតស្រូវ និងដាំដំណាំវិញ

សំណេះសំណាលជាមួយយើងខ្ញុំ លោក ត្រឹងវ៉ាំងដុង អនុប្រធានការិយាល័យកសិកម្មនិងអភិវឌ្ឍន៍ជនបទស្រុកថ្កូវបានឲ្យដឹងថា៖ ដើម្បីបង្កើនលទ្ធផលសេដ្ឋកិច្ចក្នុងការផលិត ជាពិសេសចំពោះបណ្ដាតំបន់ដាំអំពៅមិនសូវបានងាយស្រួល ផ្ដល់ទិន្នផលទាប គិតតាំងពី ឆ្នាំ ២០១៧ មកទល់ពេលនេះ អ្នកដាំអំពៅក្នុងស្រុកបានបង្វែរមកចិញ្ចឹមជលផលនិងដាំប្រភេទដំណាំផ្សេងវិញ។ ជាពិសេសគឺបង្វែរពីផ្ទៃដីដាំអំពៅមកដាំស្មៅបានជាង ៧៥៦ ហិកតា។ ដោយឡែកក្នុងរយៈពេល ០៦ ខែដើមឆ្នាំ​ ២០២១ មានផ្ទៃដីដាំអំពៅចំនួន ៤៥,២៤ ហិកតាបានបង្វែរមកដាំស្មៅ។ តម្លៃសេដ្ឋកិច្ចពីផ្ទៃដីដាំអំពៅបង្វែរមកដាំស្មៅផ្ដល់ទិន្នផលខ្ពស់ នេះជាប្រភេទដំណាំមួយក្នុងបណ្ដាប្រភេទដំណាំមានលក្ខណៈពិសេសច្រើនអាចដាំបាននៅតំបន់ដីមិនសូវមានជីជាតិ ពិបាកផលិត (ខ្វះទឹក ជន់លិច ជ្រាបជាតិជូរប្រៃ​។ល។) ឆ្លងតាមនោះជំរុញចលនាចិញ្ចឹមគោឲ្យរីកចម្រើន។

មាមីងកសិកររៀបចំចម្ការអំពៅដើម្បីចុះពូជដំណាំ។ រូបថត៖ រតនា

កសិករឡឹមយ៉ង នៅភូមិបាឆាវ (បេ) ឃុំគីមស៊ើងបានឲ្យដឹងថា គ្រួសារគាត់មានផ្ទៃដីដាំអំពៅជិត ០,២ ហិកតា ប៉ុន្ដែដាំខាតដើមទុនច្រើនឆ្នាំបន្តបន្ទាប់។ ឆ្នាំ ២០១៩ គាត់ចាប់ផ្ដើមដាំស្មៅចិញ្ចឹមគោមេ ០៤ ក្បាល គ្រួសារមិនចាំបាច់ទិញចំបើងបន្ថែមឡើយ។ ក្នុងមួយឆ្នាំ ហ្វូងគោមេរបស់គាត់កើតកូនបានពី ០៣ -០៤ ក្បាល។ តម្លៃកូនគោនាពេលបច្ចុប្បន្នក្នុងមួយក្បាលពី ១៧-២០ លានដុង(កូនគោមានអាយុកាល ០៦ ខែ)ក្នុងមួយឆ្នាំគ្រួសារគាត់ទទួលបានប្រភពចំណូលជាង ៣៥ លានដុង។

បានដឹងថា ជាមួយបណ្ដាពូជស្មៅបច្ចុប្បន្ននេះ កំពុងបានប្រជាជននៅស្រុកថ្កូវដាំច្រើនសម្រាប់ចិញ្ចឹមគោ ចិញ្ចឹមពពែក្នុងមួយហិកតាផ្ដល់ទិន្នផលពី ១៦០-២០០ តោនក្នុងមួយឆ្នាំ។តាមប្រសាសន៍របស់លោកត្រឹងវ៉ាំងតឿ កម្មាភិបាលការិយាល័យកសិកម្មនិងអភិវឌ្ឍន៍ជនបទស្រុកថ្កូវ៖ ស្មៅបច្ចុប្បន្នបានម្ចាស់កសិដ្ឋានចិញ្ចឹមគោមួយចំនួនទិញក្នុងមួយគីឡូក្រាមជាមួយតម្លៃពី ១.០០០-១.១០០ ដុង ប្រសិនបើទម្រង់ដាំស្មៅរបស់មាមីងកសិករឆ្ពោះទៅតាមទិសពាណិជ្ជកម្ម និងចងសម្ព័ន្ធជាមួយបណ្ដាកសិដ្ឋានគ្រួសារចិញ្ចឹមគោច្រើនដើម្បីលក់ស្មៅនោះនឹងនាំមកតម្លៃសេដ្ឋកិច្ចខ្ពស់ជាងដំណាំផ្សេង។ តាមការគិតប្រសិនបើដាំស្មៅ តែមួយមុខក្នុងមួយហិកតាក្នុងមួយឆ្នាំអាចមានប្រភពចំណូលជាង ១៥០ លានដុង ព្រោះទុន ចំណាយដាំស្មៅតិច។

ផ្ដើមពីចលនាបង្វែរដីដាំអំពៅមកដាំស្មៅចិញ្ចឹមគោ បានជះឥទ្ធិពលយ៉ាងសកម្មដល់ការបង្កើនហ្វូងគោរបស់ស្រុកថ្កូវ។ បច្ចុប្បន្ននេះ  សរុបហ្វូងគោរបស់មាមីងនៅស្រុកថ្កូវមកពង្រីកបាន ៣៩.២៦៤ ក្បាល សម្រេច ១០៦,១១% ប្រៀបជាមួយផែនការ (៣៧.០០០ ក្បាល)​កើន ១១.៩០៩ ក្បាលប្រៀបជាមួយដំណាក់កាលជាមួយនៃឆ្នាំមុន។

មីងគឹមធីបៃ នៅភូមិស្វាយជ្រំ ឃុំគីមស៊ើង បានឲ្យដឹងថា៖ បណ្ដាឆ្នាំកន្លង គ្រួសារដាំអំពៅខាតដើមទុន ម៉្លោះហើយឆ្នាំ ២០២០ គ្រួសារគាត់បង្វែរមកដាំស្មៅជាង ០,៤ ហិកតា។ គ្រួសារគាត់ចិញ្ចឹមគោបាន ០៥ ក្បាល ចាប់តាំងពីពេលដាំស្មៅមកទល់ពេលនេះ គ្មានទិញចំបើងទៀតឡើយ ស្មៅផ្ដល់គ្រប់សម្រាប់ហ្វូងគោរបស់គ្រួសារ។ ដាំស្មៅផ្ដល់ប្រភពចំណូលខ្ពស់ ប៉ុន្តែដោយសារហ្វូងគោក្នុងបណ្ដាគ្រួសារមិនច្រើនប៉ុន្មាន ម៉្លោះហើយផ្ទៃដីដាំអំពៅនៅចោលច្រើន បច្ចុប្បន្ននេះ ចំនួនផ្ទៃដីដែលបានបង្វែរមកដាំស្មៅគ្រប់តែផ្ដល់ឲ្យហ្វូងគោរបស់គ្រួសារ។ បណ្ដាគ្រួសារដែលមានផ្ទៃដីដាំអំពៅនៅទីនេះមានបំណងថា បើសិនបានចងសម្ព័ន្ធជាមួយបណ្ដាតំបន់ដែលមានចិញ្ចឹមគោច្រើនត្រូវការទិញស្មៅនោះ​ នឹងមានគ្រួសារជាច្រើនទៀតបង្វែរផ្ទៃដីដាំអំពៅមកដាំស្មៅសម្រាប់លក់៕    

ប្រែសម្រួល៖ លឺវវូ