មាមីងកសិករឃុំធ្វឹងហ្វា ដាំ និងថែទាំដំណាំសម្រាប់លក់ក្នុងឱកាសបុណ្យចូលឆ្នាំថ្មី

លោកមា ថាច់ភិរម្យ (ខាងឆ្វេង) ជាមួយ​ម្ទេស​ដៃនាងត្រៀមលក់ក្នុងរដូវចូលឆ្នាំថ្មី។

ទៅកាន់ចម្ការដំណាំលោកមា ថាច់ភិរម្យនៅភូមិចុងផ្នោ គាត់ដាំម្ទេសដៃនាង ១,៥ ហិកតា និងដំណាំផ្សេងៗដូចជា៖ ម្រះ សាលាដជាដើម​ត្រៀមលក់ក្នុងឱកាសបុណ្យចូលឆ្នាំថ្មី។​ ការដាំ គួបផ្សំថែទាំដំណាំបានល្អ ជាចំណុចដែលលោកមាភិរម្យយកចិត្តទុកដាក់កាលទើបតែចុះពូជរហូតមក។

លោកមា ភិរម្យមានប្រសាសន៍ថា៖ តាមទម្លាប់ប្រចាំឆ្នាំ មុនបុណ្យចូលឆ្នាំថ្មីប្រហែល ០២ ខែ គ្រួសារខ្ញុំដាំឆ្លាស់ប្រភេទដំណាំផ្សេងៗ។ ដូច្នោះហើយ អំឡុងពេលមុន ក្នុង និងក្រោយ បុណ្យចូលឆ្នាំថ្មី គ្រួសារខ្ញុំ មមាញឹកនឹងការថែទាំ ប្រមូលផលដំណាំ ។ ជាពិសេស ខ្ញុំតែងបង្ការ ទប់ស្កាត់ជំងឺលើដំណាំធានាទាំងបរិមាណផល និងគុណភាព។

កសិករថាច់ខាញ់ នៅភូមិពលទេព ឃុំធ្វឹងហ្វា បានឲ្យដឹងដែរថា៖ គ្រួសារខ្ញុំដាំដំណាំឆ្លាស់រដូវលើផ្ទៃដី ២,៥ កុង ដូចជា ខ្ទឹមស្លឹក សាលាដ ជី ជាដើមសម្រាប់លក់អំឡុងពេលមុន និងក្រោយ បុណ្យចូលឆ្នាំថ្មី ២០២៥ ក្នុងនោះមានផ្ទៃដីជាង ១ ហិកតា ដាំដំណាំសម្រាប់លក់ក្នុងឱកាសបុណ្យចូលឆ្នាំថ្មី។ បច្ចុប្បន្ន​មានឈ្មួញ​មកកក់​ផលិតផល​បន្លែ​ផ្សេងៗ​ជា​មុន ដោយ​តម្លៃ​ពី១0 -​២៥ ពាន់​ដុង​ក្នុង​មួយ​គីឡូក្រាម។ ជិត​បុណ្យ​ចូលឆ្នាំ​ថ្មី បើសិន​តម្លៃ​កើនឡើង ​ឈ្មួញ​ក៏​បង្កើន​តម្លៃដែរ​។ បើគិតនឹងតម្លៃពី ១០-២៥ ពាន់ ដុង ក្នុងមួយគីឡូក្រាម ពេលទូទាត់ខ្ទង់ចំណាយរួច គ្រួសារចំណេញពី ២-៣,៥ លានដុងក្នុង ១ កុង។

លោកត្រឹងក្វឹកត្វង ប្រធានសមាគមកសិករឃុំធ្វឹងហ្វា បានឲ្យដឹងថា៖ ដើម្បីជំនួយសិករត្រៀមដាំដំណាំផ្សេងៗសម្រាប់លក់នៅ ទីផ្សារបុណ្យចូលឆ្នាំថ្មី សមាគមកសិករឃុំសហការជាមួយកម្មាភិបាលកសិកម្មឃុំផ្សព្វផ្សាយនិងណែនាំមាមីងកសិករអំពីរបៀប បង្ការ និងទប់ស្កាត់ជំងឺលើដំណាំ។ ផ្ទៃដីដាំដំណាំលក់នៅ​ទីផ្សារបុណ្យចូលឆ្នាំ​ថ្មី​ ​ឆ្នាំ ​២០២៥ ​កើនឡើង​ប្រមាណ​ ៤% បើប្រៀបនឹងដំណាក់កាលជាមួយ​គ្នានៃ​ឆ្នាំកន្លង ។

សិករប្រមូលផលដំណាំខ្ទឹមស្លឹក។

បច្ចុប្បន្ន ឃុំធ្វឹងហ្វា ដាំដំណាំគ្រប់ប្រភេទជិត ២០ ហិកតា។ ក្នុងនោះមានដំណាំជាង ៦០% ជារបស់កសិករខ្មែរ។ ដំណាំភាគច្រើនដូចជា៖ម្ទេសដៃនាង សណ្ដែកដី ត្រឡាច ឃ្លោក ម្រះ បន្លែហូបស្លឹកជាច្រើនប្រភេទសម្រាប់លក់នៅទីផ្សារបុណ្យចូលឆ្នាំថ្មី។

លោកត្រឹងក្វឹកត្វង ឲ្យដឹងបន្ថែម៖ សមាគមកសិករឃុំបង្កើនការណែនាំកសិករគឺត្រូវសម្អាតដីមុននឹងដាំ ចុះពូជ គួបផ្សំនឹងការដាក់ជីឲ្យមានតុល្យភាព មិនត្រូវប្រើជីគីមីច្រើនហួសកម្រិត។ ទន្ទឹមនឹងនោះ ណែនាំមាមីងកសិករឲ្យប្រើប្រាស់ថ្នាំការពារុក្ខជាតិតាមគោលការណ៍ត្រូវ ៤ យ៉ាងគឺ៖ ត្រូវថ្នាំ ត្រូវកម្រិតថ្នាំ ត្រូវពេល ត្រូវវិធីសាស្ត្រ ដើម្បីធានាទាំងបរិមាណ និងគុណភាពផលិតផលសម្រាប់អ្នកប្រើប្រាស់ទិញយកទៅហូបដោយសុវត្ថិភាពក្នុងឱកាសពិធីបុណ្យចូលឆ្នាំថ្មីប្រពៃណីខ្មែរ៕

អត្ថបទ - រូបថត៖ សុជា