របរចិញ្ចឹមពពែជាទិសដៅពង្រីកសេដ្ឋកិច្ចលំនឹង និងស្ថិរភាព

ឆ្នាំ ២០១៤ ជាមួយចំនួនទុនបន្តិចបន្តួច បងទិញពពែពូជ Boer បង្កាត់ ០១ គូនៅខេត្តបេនត្រែមកចិញ្ចឹម ពូជពពែនេះមានចំណុចសំខាន់គឺឆាប់ធំ សមស្របនឹងអាកាសធាតុក្តៅ ធន់នឹងជំងឺ ស៊ីមិនរើសចំណី។ ពពែឈ្មោលអាចមានទម្ងន់ជាង ១០០ គីឡូក្រាម ពពែញីពី ៨០-៩០ គីឡូក្រាម មានសាច់ច្រើនជាងពូជពពែផ្សេង។ ចំណីសម្រាប់វាគឺសន្លឹកឈើគ្រប់ប្រភេទ វល្លិ៍ ស្មៅធម្មជាតិ។ បងឡែបានឲ្យដឹងថា ពពែងាយចិញ្ចឹមបង្គួរ ធន់នឹងជំងឺបានល្អ ការលក់ចេញក៏លំនឹង និងមិនសូវបង់កម្លាំងថែទាំ សមស្របជាមួយអ្នកដែលទើបចិញ្ចឹមថ្មីពីព្រោះវិនិយោគទុនតិច។

ពពែ Boer បង្កាត់ជាមធ្យម ០២ ឆ្នាំកើតកូន ០៣ ល្បះ ក្នុងមួយល្បះកើតបានពី ០១-០៣ ក្បាល ក្រោយពេលចិញ្ចឹមបានពី ០៧-០៨ ខែអាចមានទម្ងន់ពី ៣៥-៤០ គីឡូក្រាម ហើយអាចលក់បាន។ បច្ចុប្បន្ននេះ ពពែសាច់ក្នុងមួយគីឡូក្រាមមានតម្លៃពី ១២០.០០០-១៤០.០០០ ដុងពពែពូជក្នុងមួយគីឡូក្រាមតម្លៃពី ១៦០.០០០ -១៨០.០០០ ដុង ឈ្មួញមកប្រមូលទិញដល់ផ្ទះ។

ទម្រង់ចិញ្ចឹមពពែរបស់បងង្វៀងវ៉ាំងយ៉ាវ។ រូបថត៖ ហ៊ឺវហ្វេ

តាមបងឡែ ពពែគ្រប់ប្រភេទមិនសូវចូលចិត្តត្រជាក់ឡើយ ម៉្លោះហើយគប្បីចិញ្ចឹមដោយរបៀបធ្វើទ្រុងរតកម្ពស់ពីមុខដីពី ៦០-៨០ សងទីម៉ែត្រដើម្បីបង្កបរិស្ថានស្រឡះស្រឡួន ងាយអនាម័យទ្រុង។ ក្រៅពីប្រភពចំណូលពីការលក់ពពែពូជ និងពពែសាច់ ក្នុងមួយឆ្នាំៗបងឡែ នៅទាំងមានប្រភពចំណូលរាប់លានដុងពីការលក់លាមកពពែទៀតផង។

ជាមួយបទពិសោធន៍ក្នុងការចិញ្ចឹមពពែជាច្រើនឆ្នាំកន្លង ដើម្បីជៀសវាងកុំឲ្យពពែដោលឈ្មោលជាមួយពពែរួមពូជពង្សដូចគ្នាបណ្តាលឲ្យអន់គុណភាពហ្វូងពពែ បងឡែតែងដឹងពីរបៀបបែងប្រភេទពពែញីនិងពពែឈ្មោលពូជ មានបញ្ជីកត់ត្រាត្រឹមត្រូវដើម្បីធានាពពែដោលឈ្មោលពេលកូនកើតចេញមកមានគុណភាពល្អ។ បច្ចុប្បន្ននេះ ហ្វូងពពែរបស់បងឡែមានជាង ២០ ក្បាល រួមមានពពែញី ១០ ក្បាល ពពែឈ្មោល ០៣ ក្បាល និងពពែសាច់ជាង ១០ ក្បាល។ ទន្ទឹមជាមួយការចិញ្ចឹម និងលក់ពពែសាច់ បងឡែនៅទាំងប្រកបរបរសេវាដាក់ឈ្មោលពពែ និងលក់ពពែសាច់ដល់គ្រួសារដែលនៅជិតខាង ក្នុង និងក្រៅឃុំដូចជា ហ្វាមិញ ហ៊ឹងមី ភឿកហាវ។ អាស្រ័យព្យាយាមពលកម្មផលិត ចូលចិត្តស្រាវជ្រាវរៀនសូត្រ ក្នុងមួយឆ្នាំប្រភពចំណូលពីការចិញ្ចឹមពពែរបស់គ្រួសារបងឡែសម្រេចជាង ៨០ លានដុង។

ស្នាក់នៅភូមិសែវរ៉ាញ់នោះដែរ គ្រួសារ​បង ង្វៀងវ៉ាំងយ៉ាវ ក៏បានចិញ្ចឹមពពែ Boer បង្កាត់បានជាង ០៤ ឆ្នាំកន្លង។ បងទិញពពែពូជពីគ្រួសារបងឡែ។ បងយ៉ាវបានវិនិយោគទុនធ្វើទ្រុងចិញ្ចឹមយ៉ាងត្រឹមត្រូវ ហើយដាំស្មៅច្រើនសម្រាប់ផ្គត់ផ្គង់ប្រភពចំណីឲ្យពពែ។ បច្ចុប្បន្ននេះហ្វូងពពែរបស់បងមាន ០៨ ក្បាល ហើយបងមានបំណងបន្តបើកទូលាយទ្រង់ទ្រាយទ្រុងចិញ្ចឹមដើម្បីពង្រីកសេដ្ឋកិច្ចគ្រួសារ។ បងយ៉ាវសំណេះសំណាល៖ “ខ្ញុំមានបំណងឲ្យថ្នាក់ដឹកនាំគ្រប់ថ្នាក់នៅមូលដ្ឋានចាត់តាំងបណ្តាវគ្គហ្វឹកហាត់បច្ចេកទេសចិញ្ចឹមពពែ របៀបបង្ការជំងឺដើម្បីយើងខ្ញុំអនុវត្តទៅក្នុងការចិញ្ចឹមនាំមកលទ្ធផលសេដ្ឋកិច្ចខ្ពស់ជាង”។

ចំណែកបងហ្វិញថាញ់ឡឹម ស្នាក់នៅភូមិថូងវ៉ាង ក៏ជាអ្នកធ្លាប់ចិញ្ចឹមពពែ ០៦ ឆ្នាំកន្លងហើយដែរ។ បងឡឹមឲ្យដឹងថា៖ ប្រភពចំណូលពីការចិញ្ចឹមពពែថ្វីត្បិតមិនច្រើនប៉ុន្តែវាលំនឹងនិងស្ថិរភាព មានពេលខ្លះតម្លៃពពែសាច់ចុះថោកក្នុងមួយគីឡូក្រាមនៅត្រឹមពី ៧០.០០០ -៨០.០០០ ដុង ប៉ុន្តែយើងខ្ញុំនៅតែមានចំណេញ ពីព្រោះចិញ្ចឹមពពែឆាប់បានប្រមូលផល ឆាប់កើតកូន និងមិនបង់ប្រាក់ទិញចំណី។

ដោយសារពពែស៊ីតែសន្លឹកឈើ វល្លិ៍ ស្មៅគ្រប់ប្រភេទ ម្ល៉ោះហើយមាមីងចិញ្ចឹមពពែមិនបារម្ភពីរឿងចំណីសម្រាប់ពពែឡើយ។ ពេលពពែជិតប្រមូលផលទើបបំប៉នបន្ថែមចំណីឧស្សាហកម្មដើម្បីបំប៉នឲ្យពពែបង្កើនទម្ងន់។

ចែករំលែកអំពីបទពិសោធន៍ក្នុងការចិញ្ចឹមពពែ បងឡឹមបានឲ្យដឹង ក្រៅពីការជ្រើសពូជមានប្រភពច្បាស់លាស់ពីបណ្តាមូលដ្ឋានមានប្រជាប្រិយភាព អ្នកចិញ្ចឹមត្រូវយកចិត្តទុកដាក់ដល់របៀបថែទាំ ជាពិសេសគឺដំណាក់កាលកើតកូន កម្លាំងខ្សោយ។ ពេលនេះ រួមជាមួយការបៅទឹកដោះមេ ពពែកូននៅទាំងបានបំប៉នបន្ថែមជាតិដែក និងវីតាមីន។ ពេលពពែកូនមានអាយុ ០២ ខែ ខ្ញុំគម្លាតចេញពីមេរបស់វា។ ក្រោយមកខ្ញុំបែងពពែមេ និងពពែសាច់ឲ្យនៅដោយឡែកពីគ្នា។ ពពែទាំងអស់សុទ្ធសឹងបានបំពាក់លេខរៀងដើម្បីងាយតាមដាន និងថែទាំ។

ក្រៅពីគ្រួសារបងឡែ បងយ៉ាវ បងឡឹម ឃុំឡុងហ្វានៅមានគ្រួសារចិញ្ចឹមពពែជាច្រើនទៀតនាំមកលទ្ធផលសេដ្ឋកិច្ចដល់គ្រួសារ ដូចជា បងង្វៀងវ៉ាំងមឹង បងជុងវ៉ាំងតាយ នៅភូមិរ៉ាច់ហ្គុក បងផាមវ៉ាំងគី នៅភូមិបាតិញ បងស្រីឡេធីល្វឹងនៅភូមិសែវរ៉ាញ់។ល។

តាមរបាយការណ៍បូកសរុបអនុវត្តសេចក្តីសម្រេចចិត្តឆ្នាំ ២០២០ របស់បក្ខភាគឃុំឡុងហ្វា ស្តីពីរបរចិញ្ចឹមសត្វហ្វូងពពែរបស់ឃុំមាន ៣៥៥ ក្បាល សម្រេច ១៤២% សេចក្តីសម្រេចចិត្ត។ ចំណែកការអនុវត្តកម្រិតផែនការសេចក្តីសម្រេចចិត្តឆ្នាំ ២០២១ ស្តីពីការចិញ្ចឹមសត្វ ក្នុងនោះសរុបហ្វូងពពែប្រមាណ ៤០០ ក្បាល។ តាមស្ថានភាពជាក់ស្តែង ជាមួយការពង្រីក និងវិនិយោគរបស់គ្រួសារមាមីងចិញ្ចឹមពពែ យើងខ្ញុំជឿជាក់ថាហ្វូងពពែទូទាំងឃុំឡុងហ្វានឹងកើនឡើង សម្រេច និងសម្រេចលើសកម្រិតផែនការសេចក្តីសម្រេចចិត្តឆ្នាំ ២០២១៕

ប្រែសម្រួល៖ តឹងង៉ុក