បង្កើនប្រព័ន្ធឧគ្ឃោសនសព្ទបម្រើការផ្សព្វផ្សាយ បង្ការ ទប់ស្កាត់អាសន្នរោគកូវីដ-១៩

      ឃុំភឿកហ៊ឹង ស្រុកថ្កូវ ជាមូលដ្ឋានមួយក្នុងបណ្តាមូលដ្ឋានអនុវត្តល្អការងារនេះ។ លោក ង្វៀងវ៉ាំងទ្វឹង ប្រធានគណៈកម្មាធិការប្រជាជនឃុំភឿកហ៊ឹងបានឱ្យដឹងថា៖ មូលដ្ឋានចាត់ទុកប្រព័ន្ធឧគ្ឃោសនសព្ទជាឧបករណ៍មួយក្នុងចំណោមឧបករណ៍សំខាន់​រួមចំណែកនាំយកព័ត៌មានជូនដល់ប្រជាជន។ ក្នុងបណ្តាថ្ងៃធម្មតា បណ្តាប្រព័ន្ធឧគ្ឃោសន​សព្ទតែងបន្តការផ្សាយសំឡេងពីស្ថានីយផ្សាយសំឡេង​វៀតណាម ស្ថានីយ៍ផ្សាយសំឡេងខេត្តត្រាវិញ ស្ថានីយ៍ផ្សាយសំឡេងស្រុកថ្កូវទៀងទាត់ក្នុងមួយថ្ងៃ ០២  លើក។ ប៉ុន្តែក្នុងលើកបង្កើនការងារបង្ការ ទប់ស្កាត់អាសន្នរោគកូវីដ-១៩ បណ្តាប្រព័ន្ធឧគ្ឃោសនសព្ទបានបង្កើនពេលផ្សាយក្នុងមួយថ្ងៃពី ៤-៥ លើក ជាមួយរយៈពេលផ្សាយក្នុងមួយ​លើកៗពី ១៥-២០ នាទី។ ដោយអាស្រ័យមានប្រព័ន្ធឧគ្ឃោសនសព្ទនៅតាមបណ្តាភូមិ ម៉្លោះហើយការផ្សព្វផ្សាយមានភាពងាយស្រួលជាង ជួយឲ្យប្រជាជនមានស្មារតីភ្ញាក់រលឹក​ក្នុងការអនុវត្តន៍បណ្តាវិធានការបង្ការ ទប់ស្កាត់អាសន្នរោគ។

         ឃុំភឿកហ៊ឹងមានផ្សារសម្រាប់បម្រើដល់ការលក់ដូរមុខទំនិញរបស់ប្រជាជនចំនួន ០២ កន្លែង(ផ្សារក្បាលថ្នល់ និងផ្សារភឿកហ៊ឹង)។ ជារៀងរាល់ថ្ងៃ ផ្សារទាំង ០២ នេះបម្រើគ្រួសារជួញដូរប្រមាណ ៧០០-៨០០ គ្រួ។ នៅតំបន់ផ្សារភឿកហ៊ឹង ជាផ្សារនៅភ្ជាប់ជាមួយប្រឡាយ ៣/២ ក្រៅពីមធ្យោបាយផ្លូវគោក នៅទាំងមានមធ្យោបាយផ្លូវទឹករបស់ប្រជាជនពីកន្លែងនានាមក​ប្រមូលផ្តុំនៅទីនេះជួញដូរមុខទំនិញ។ ក្រៅពីនោះ នៅលើភូមិសាស្រ្តឃុំមានរោងផលិតស្បែក​ជើង ០១ កន្លែងរបស់ក្រុមហ៊ុនស្បែកជើងម៉ីផុង ដោយមានពលករ-ពលការិនីជិត ១.០០០ នាក់កំ​ពុងធ្វើការ។ អាស្រ័យហេតុនោះ​ ការបង្កើនបណ្តាប្រព័ន្ធឧគ្ឃោសនសព្ទក្នុងគោលបំណង “ទោះជាពេលណា កន្លែងណា”​ក៏ដោយប្រជាជនតែងបានស្តាប់ព័ត៌មានផ្សព្វផ្សាយ។

ប្រព័ន្ធឧគ្ឃោសនសព្ទបានដាក់លើខ្ពស់។

           បងថាច់យ៉ាន់ ប្រជាជននៅភូមិផ្សារលើ បានឱ្យដឹងថា៖ ប្រជាជនបានធ្លាប់ជា​មួយសំឡេងផ្សាយចេញពីប្រព័ន្ធឧគ្ឃោសនសព្ទលើភូមិសាស្រ្តទៅហើយ បើសិនមិនឮសំឡេងផ្សាយ​ទេនោះ ពួកគាត់ច្រើនសួរគ្នាថាមិនដឹងជាមានបញ្ហាអីទេដឹង។ ពីព្រោះឧគ្ឃោសនសព្ទផ្សាយសំឡេង គឺជាចំណីប្រចាំថ្ងៃរបស់ប្រជាជនតាមដានព័ត៌មានក្នុងប្រទេស ខេត្ត ស្រុក​ ឃុំ។ ព័ត៌មានទាក់ទងដល់ការ​ផលិត ធ្វើអាជីវកម្ម ចំពោះបណ្តាថ្ងៃបង្កើនការផ្សព្វផ្សាយតាមកិច្ចចង្អុលការរបស់ថ្នាក់លើស្តីពីការងារបង្ការ ទប់ស្កាត់អាសន្នរោគកូវីដ-១៩ ប្រព័ន្ធឧគ្ឃោសនសព្ទក៏បង្កើនពេលផ្សព្វផ្សាយ។ ផ្តើមពីនោះ  ជួយឲ្យប្រជាជនបង្កើន​ស្មារតីប្រុងប្រយ័ត្ន ជំរុញទឹកចិត្តដល់បណ្តាសមាជិកក្នុងគ្រួសារ សហគមន៍ រួមគំនិតក្នុងការបង្ការ ទប់ស្កាត់ជំងឺ និង បណ្តាចលនារបស់មូលដ្ឋាន។

            ក្រៅពីការ​ផ្សាយបន្តព័ត៌មានវិទ្យុផ្សាយសំឡេងវៀតណាម ព័ត៌មានខេត្ត ព័ត៌មានស្រុក ឃុំភឿកហ៊ឹង នៅទាំងកសាងកម្មវិធីផ្សាយ​សំឡេងសមស្របជាមួយស្ថានភាពរបស់មូលដ្ឋាន។ គិតតាំងពីដើមឆ្នាំ ២០២១ មកទល់ពេលនេះ ឃុំកសាងព័ត៌មានបានជាង ១៥០ ព័ត៌មានផ្សាយលើដំណាក់​ផ្សាយសំឡេងរបស់ឃុំចុះដល់ភូមិទាំង ៩/៩ លើភូមិសាស្រ្ត។ ក្នុងនោះមានការបង្កើនផ្សព្វ​ផ្សាយអំពីការបោះឆ្នោត ការបង្ការ ទប់ស្កាត់អាសន្នរោគ ស្ថានភាពប្រែប្រួលកម្រិតទឹកប្រៃ ស្ថានភាពចុះពូជស្រូវរដូវដើមឆ្នាំរបស់ប្រជាជន។ល។    បងស្រីថាច់ធីគន្ធា នៅភូមិស្លែងថ្មី ឃុំភឿកហ៊ឹងសំណេះសំណាល៖ ព្រឹកឡើងរៀប​ចំរបស់របរត្រៀមលក់ដូរបណ្តើរ ស្តាប់ការផ្សាយសំឡេងបណ្តើរ ក្នុងនោះមានខ្លឹមសារជា​ច្រើនទាក់ទងដល់ការបង្ការ ទប់ស្កាត់អាសន្នរោគកូវីដ-១៩។​ ដោយរំពឹងគិតឃើញពីការគ្រោះថ្នាក់នៃអាសន្នរោគ ម៉្លោះហើយ  ខ្ញុំតែងប្រតិបត្តិត្រឹមត្រូវតាម​ការព្រមានរបស់ផ្នែកសុខាភិបាល លក់ដូរត្រូវពាក់របាំងមុខ រក្សាគម្លាតសុវត្ថិភាព ។ល។ ​ព្រោះសុខភាពមានតម្លៃជាទីបំផុត ម៉្លោះហើយគប្បីរក្សាសុខភាពឲ្យបានល្អ៕​​​

អត្ថបទ-រូបថត៖ ថាច់សម្បត្តិ