ដាក់អង្គប់កណ្តុរដើម្បីការពាររដូវកាល

       បងង្វៀងថាញ់ដុងចែករំលែក៖ ជាមួយចំនួនអង្គប់ប្រមាណ ១៦០ គ្រឿង មានយប់ខ្លះ «ត្រូវប៉ាន់»បានកណ្តុរពី១៤­១៥គីឡូក្រាម លក់ដោយតម្លៃ ៤០.០០០ ដុងក្នុងមួយគីឡូក្រាម។ ផ្តើមពីការចូលចិត្តនោះ ខ្ញុំតែងដើរដាក់អង្គប់ពីវាលមួយទៅវាលមួយគ្មានថ្ងៃសម្រាកឡើយ។ ប្រការដែលបណ្តាលឱ្យខ្ញុំពេញចិត្តជាមួយរបរនេះគឺធ្វើដំណើរទៅដល់ទីណាមាមីងកសិករតែងត្រេកអរ សំខាន់គឺនៅតាមបណ្តាផ្ទៃដីដែលត្រៀមបម្រុងចុះពូជស្រូវមាមីងតែងត្រូវការអ្នកដាក់អង្គប់កណ្តុរដូចរូបខ្ញុំ។

បងង្វៀងថាញ់ដុងត្រៀមបម្រុងអង្គប់។

        ធម្មតាអ្នកដែលគេដាក់អង្គប់កណ្តុរ ច្រើនដាក់អង្គប់បែរមុខឆ្ពោះទៅរករន្ធកណ្តុរ​ដោយបំណងថា កណ្តុរចេញពីរន្ធហើយទៅរកនុយឆ្លងកាត់អង្គប់គឺជាប់។ ប៉ុន្តែចំពោះបងដុងគឺមិនសំខាន់ទៅលើប្រការនោះឡើយ បងពិនិត្យរំពៃយ៉ាងហ្មត់ចត់នូវផ្លូវដែលកណ្ដុរធ្លាប់វារចុះឡើង​ បើសិនពិនិត្យឃើញស្រូវត្រូវកណ្តុរបំផ្លាញច្រើននោះ ជួនកាលបងដាក់អង្គប់បែរមុខចេញពីរន្ធកណ្តុរ។ ពីព្រោះតាមការយល់ឃើញរបស់បង ដើម្បីសន្សឹមៗកុំឱ្យកណ្តុរមើលឃើញរួចខ្លាចអង្គប់ កណ្តុរវារតាមផ្លូវណាក៏តែបានដើម្បីទៅរកនុយតាមសភាពធម្មតា ពេលស៊ីឆ្អែតរួចវិលត្រឡប់មកវិញឬក៏ប្រទះឃើញស្រមោលមនុស្សនោះក៏ភ័យស្លន់ស្លោរត់តាមផ្លូវទក់ៗដែលវាធ្លាប់វារ។ អាស្រ័យហេតុនោះ អត្រាកណ្តុរចូលជាប់អង្គប់យ៉ាងច្រើន គាប់ជួនអង្គប់មួយអាចជាប់កណ្តុរដល់ទៅពីរក្បាល។

       បងង្វៀងថាញ់ដុងចែករំលែកបន្ថែម៖ របរណាក៏ដោយត្រូវឆ្លងកាត់បទពិសោធន៍ រៀនសូត្រ រយៈពេលខ្លីឬវែងយោងទៅតាមរបរនីមួយៗ។ ចំពោះរបរដាក់អង្គប់កណ្តុរ ឧបករណ៍គឺមានស្រាប់ ដាក់លក់នៅតាមផ្សារត្រូវបង្កើនបន្ថែមរឺស័រ(ដែករស់)ដើម្បីបង្កើនកម្លាំងវាយខ្ទប់ទ្វារអង្គប់។ ប្រការសំខាន់គឺកំណត់ដឹងផ្លូវរបស់កណ្តុរ។ បើសិនកំណត់ចំផ្លូវរបស់កណ្តុរនោះ អង្គប់ណាក៏មានកណ្តុរចូលទាំងអស់។ កាលពីមុនអ្នកដាក់អង្គប់កណ្តុរភាគច្រើនចាំបាច់ត្រូវប្រើប្រាស់ដល់បណ្តាប្រភេទចំណីសម្រាប់ធ្វើជានុយបញ្ឆោតកណ្តុរ។ ចំពោះរូបខ្ញុំគឺមិនចាំបាច់ អង្គប់ឥតនុយក៏មានកណ្តុរសម្រាប់លក់ដែរ។ បទពិសោធន៍ដាក់អង្គប់កណ្តុរជាច្រើនឆ្នាំខ្ញុំក៏បានចែករំលែកបទពិសោធន៍របស់ខ្លួនឱ្យបងប្អូនខ្មែរជាច្រើនរូបទៀត ហើយបច្ចុប្បន្ន មានបងប្អូនខ្លះកំពុងប្រកបរបរនេះ។​ ខ្ញុំរំពឹងគិតឃើញថា​ មានមនុស្សជាច្រើនប្រកបរបរនេះក៏ជាការល្អពីព្រោះកាត់បន្ថយបានសត្វកណ្តុរបំផ្លិចបំផ្លាញផលដំណាំដែលបច្ចុប្បន្នមាមីងកំពុងមានការតក់ក្រហល់។

        ជាមួយបំណងកាត់បន្ថយការបំផ្លិចបំផ្លាញផលដំណាំនៃសត្វកណ្តុរ កសិករជាច្រើនតែងប្រើប្រាស់ថ្នាំកម្ចាត់។ សត្វកណ្តុរពេលដែលត្រូវថ្នាំហើយអាចរស់នៅបាន  ២-៣ ថ្ងៃទើបងាប់ ។​ អាស្រ័យហេតុនោះ​ បងង្វៀងថាញ់ដុង  តែងយកចិត្តទុកដាក់ដល់សុវត្ថិភាពអាហារសម្រាប់អ្នកប្រើប្រាស់​ ពោលគឺបណ្តាកន្លែងដែលដឹងថាមានប្រើប្រាស់ថ្នាំសម្រាប់កម្ចាត់កណ្តុរគឺបងជៀសឆ្ងាយកន្លែងដែលនៅរយៈពេលប្រហែល១០ថ្ងៃទៀតដល់ពេលព្រោះស្រូវគឺបងបង្កើនដាក់អង្គប់កណ្តុរ ពីព្រោះតាមគំនិតយល់ឃើញរបស់បង រយៈពេលនេះកសិករមិនទាន់ប្រើប្រាស់ថ្នាំអ្វីឡើយ។​ ផ្តើមពីការយកចិត្តទុកដាក់នោះ ផលិតផលកណ្តុររបស់បងបានមនុស្សជាច្រើនស្វែងរកទិញ។

        ក្នុងខណៈទប់ទល់ជាមួយការបំផ្លិចបំផ្លាញស្រូវ​ផលដំណាំពីសត្វកណ្តុរ កន្លែងណាដែលមានមុខអ្នកដាក់អង្គប់កណ្តុរដូចជាបងង្វៀងថាញ់ដុង​ ចាត់ទុកដូចជាបាននាំយកភាពរីករាយជូនដល់មាមីងកសិករ រួមចំណែកនាំយកសុវត្ថិភាពក្នុងការផលិតស្រូវ ដាំដំណាំជូនប្រជាកសិករ៕  

អត្ថបទ-រូបថត៖ ថាច់សម្បត្តិ