កសិករសួរវិស្វករឆើ្លយ៖បច្ចេកទេសដាំនិងថែទាំឫស្សីយកទំពាំង

ដាំឫស្សីអាចយកទៅសាងសង់ផ្ទះ ធ្វើទ្រុងក្រោល ធ្វើរបរសិប្បកម្មនិងយក​ទំពាំង។ បច្ចុប្បន្ន នៅខេត្តត្រាវិញ ឫស្សីយកទំពាំងមានបណ្តាពូជបានប្រជាកសិករដាំដូចជា៖ ឫស្សីមាំងតុង (ពូជឫស្សីនេះធំខ្ពស់ ទំពាំធំមានពណ៌ត្នោត) ឫស្សីមាំងតុងក្រហម (មានប្រភពមកពីដុងណាមបូ​ មានលក្ខណៈដូចឫស្សីមាំងតុងខ្មៅ ទំពាំងមានពណ៌ស្វាយ​) ឫស្សីដូចជាពក ឫស្សីស្រុក​(ឬហៅ ថាឫស្សីចិន មានប្រភពមកពីប្រទេស​ចិន)។ល។

កម្រិតដាំនិងរបៀបដាំ៖ ច្រើនដាំតាម ០៣ កម្រិត៖ក្នុងមួយហិកតាដាំ ៤០០ ដើម (០៥X០៥ ម៉ែត្រ) ក្នុងមួយហិកតាដាំ ៣៣០ ដើម (០៦X០៥ ម៉ែត្រ) ក្នុងមួយហិកតាដាំ ២៧០ ដើម (០៦X០៦ ម៉ែត្រ)។ ក្នុងរយៈពេលពីរឆ្នាំដំបូងអាចដាំដំណាំអាហារឆ្លាស់ជាមួយឫស្សី “យកខ្លីចិញ្ចឹមវែង”។

រណ្តៅនីមួយៗទំហំពី ៥០X៥០ សង់ទីម៉ែត្រ ឬ ៦០X៦០ សង់ទីម៉ែត្រ ដាក់​ជីក្រោលបាតរណ្ដៅនីមួយៗមុនពេលដាំពី​ ០៥-១០ គីឡូក្រាមអាចដាំបានទាំងរដូវប្រាំងនិងវស្សា ប៉ុន្តែល្អបំផុតគប្បីដាំនៅរដូវវស្សា។

ទម្រង់ដាំទំពាំងឫស្សី។ រូបថត៖ រតនា

ថែទាំ៖ ដំណាក់កាលដំបូង ឬស្សីត្រូវការស្រោចទឹកនិងរក្សាជាតិសំណើម ជៀសវាងកុំឲ្យទឹកជន់លិចក្នុងចម្ការយូរអន្លាយ។ ជារៀងរាល់ឆ្នាំនៅរដូវវស្សាត្រូវជម្រះស្មៅ ជ្រួយដីនៅជុំ​វិញគល់រួចដាក់ជីតាមកំណត់។ ចំពោះឫស្សីដែលដាំបានពីរខែ ដាក់ជីចម្រុះ NPK ២០-២៩-២៥+TE ក្នុងមួយហិកតាពី ៥០-១០០​ គីឡូក្រាមដោយចែកចេញជា​ច្រើនលើក។ ក្នុងមួយលើកៗដាក់ក្នុងមួយគល់ពី ១០០-២០០ ក្រាម(ចម្ងាយពីគល់ពី ១៥-២០ សង់ទីម៉ែត្រ)។ ចំពោះចម្ការឫស្សីដែលដាំបាន​ ០២ ឆ្នាំឡើងទៅ ដាក់ជីសរីរាង្គនៅរដូវវស្សាក្នុងមួយហិកតាពី ០៥-១០ តោនដាក់ជី NPK ក្នុងមួយគល់ពី ១០០-២០០ ក្រាម (មួយខែមួយលើក)។ យកស្លឹកឫស្សីឬចំបើង គល់ជញ្ជ្រាំង ឬស្លឹក ឈើគ្របគល់ ក្រោយមកស្លឹក​ឈើរលួយសុសបង្កជាជីទិន្នផលទំពាំងនឹងកើនឡើង។

*ក្រោយពេលដាំបាន ០២​ ឆ្នាំ ក្នុងមួយឆ្នាំត្រូវយកដីលុបគល់ម្ដង។ ជាមួយការអនុវត្ត​បច្ចេក​ទេសលុបដីនៅគល់នឹងធ្វើឲ្យដីផុស ទំពាំងរីកធំរសជាតិផ្អែម។ ពេលដល់​ដំណាក់កាលដាក់ជី ត្រូវកៀរដីចេញ ជៀសវាងកុំឲ្យគ្រើលគុម្ព​ជះឥទ្ធិពលដ​ល់​គុណ​ភាពចម្ការឫស្សី។ កាត់បណ្តាមែកខាងក្រោមចោលឲ្យស្រឡះ។ ដើម្បីរក្សាគុម្ពឬស្សី រៀងរាល់ឆ្នាំគប្បីជ្រើសទំពាំងល្អៗ ទុកស្នងឫស្សីដែលចាស់ត្រូវកាប់​ចោល។ ក្នុងមួយគុម្ពៗគប្បីរក្សាទុកពី ០៦-០៧ ដើម។ ចំពោះចម្ការឬស្សីមានអាយុពី ០២ ឆ្នាំទុក ០៣ ដើម ចំពោះឬស្សីដែលមានអាយុ ០១​ ឆ្នាំទុកពី ០១-០២ ដើម៕     

ប្រែសម្រួល៖ ថាច់ហៀង