កូវង៉ាង៖ បង្កើនការតាមដាន ថែទាំសុខភាពព្រះសង្ឃក្រោយពេលបានចាក់វ៉ាក់ស៊ីនបង្ការជំងឺ

ព្រះតេជគុណថាច់សៀន ព្រះចៅអធិការវត្តកំពង់នាវា(កំពង់ទូក) ឃុំហ៊ីបហ្វា មាន​ថេរដីការឱ្យដឹងថា៖ ឮដំណឹងអាការៈជាច្រើន ក្រោយពេលចាក់វ៉ាក់ស៊ីនបណ្តាលឱ្យអាត្មា​ក៏មានការព្រួយបារម្ភ ប៉ុន្តែក្រោយពេលចាក់រួចស្រេចក្នុង អង្គអាត្មាមានអារម្មណ៍ដូចជាធម្មតា មិនមានអាការៈខុសប្រក្រតី។ បានចាក់វ៉ាក់ស៊ីនបង្ការអាសន្នរោគកូវីដ‑១៩ ធ្វើឱ្យអាត្មាមាន​ការនឹងនរចិត្ត។ តែទោះជាដូច្នោះក៏ដោយ អាត្មាក៏មិនគួរធ្វេសប្រហែសខ្លួនដែរ។ អាត្មាបន្តសហការជាមួយគណៈអារាមាភិបាលដើម្បីធ្វើល្អការ​ងារផ្សព្វផ្សាយ រួមចែករំលែកតាមសមត្ថភាពរបស់អាត្មាទៅក្នុងបណ្តាវិធានការបង្ការ ទប់ស្កាត់អាសន្នរោគ រួមចំណែករុញច្រានរោគជំងឺឆាប់រលត់​រលាយបាត់ទៅ។

ព្រះតេជគុណថាច់សៀន ឧទ្ទេសនាមពីលិខិតដែលបានចាក់វ៉ាក់ស៊ីនលើកទី ១។

ស្រុកកូវង៉ាងមានព្រះសង្ឃជាង ១០០ អង្គគ្រប់លក្ខណៈចាក់វ៉ាក់ស៊ីនបង្ការអាសន្ន​រោគកូវីដ‑១៩។ ព្រះតេជគុណថាច់តារា អនុប្រធាននិងជាប្រធានការិយាល័យសមាគម​ព្រះសង្ឃសាមគ្គីស្នេហាជាតិស្រុកកូវង៉ាងមានថេរដីកាឱ្យដឹងថា៖ ក្រោយពេលមានសេចក្តី​ប្រកាសចាក់វ៉ាក់ស៊ីនបង្ការអាសន្នរោគកូវីដ‑១៩ សមាគមបានសហការជាមួយសមាគមពុទ្ធ​សាសនាវៀតណាមស្រុកឡើងបញ្ជីព្រះសង្ឃនៅតាមបណ្តាវត្តលើភូមិសាស្រ្ត ផ្ញើទៅមជ្ឈមណ្ឌលសុខាភិបាលស្រុក បន្ទាប់មកបំផុសចលនាព្រះសង្ឃនិមន្តទៅចាក់ថ្នាំត្រូវតាម​ពេលកំណត់។ អាស្រ័យហេតុនោះ អត្រាមុខសញ្ញាគ្រប់លក្ខណៈចាក់វ៉ាក់ស៊ីន​សម្រេចខ្ពស់បង្គួរ។

ស្រុកកូវង៉ាងជាស្រុកមួយក្នុងចំណោមស្រុកដែលមានព្រះសង្ឃជាច្រើនអង្គពីវត្តដទៃៗមកស្នាក់អាស្រ័យ​សិក្សាបណ្តាថ្នាក់ពុទ្ធិកសិក្សានៅតាមបណ្តាវត្តលើភូមិសាស្រ្ត។ ហេតុនោះ ការចាក់វ៉ាក់ស៊ីន​បង្ការជំងឺ បានអនុវត្តទូលំទូលាយ ទាំងព្រះសង្ឃនៅមូលដ្ឋាន ព្រមទាំងពី​មូលដ្ឋានដទៃមកស្នាក់អាស្រ័យរៀនសូត្រ។  ប៉ុន្តែនៅមុនពេលចាក់វ៉ាក់ស៊ីន ព្រះសង្ឃទាំង​នោះត្រូវឆ្លើយតបបានលិខិតស្នាមពាក់ព័ន្ធមួយចំនួន និងមានអាយុត្រូវតាមការកំណត់ពេល​ចាក់វ៉ាក់ស៊ីន។ អាស្រ័យការចាក់វ៉ាក់ស៊ីនត្រូវស្ថិតទៅ លើអំឡុងអាយុពី ១៨ ឆ្នាំឡើងទៅ ធានាសុខភាព ជំងឺប្រចាំប្រាណ។ល។ ម៉្លោះហើយនៅតាមបណ្តាវត្តលើភូមិសាស្រ្ត  មានព្រះសង្ឃដល់ទៅរាប់សិបអង្គគង់នៅស្នាក់អាស្រ័យរៀនសូត្រ ប៉ុន្តែមានព្រះសង្ឃតែចំនួនតិច​តួចប៉ុណ្ណោះគ្រប់លក្ខណៈចាក់វ៉ាក់ស៊ីន។ តួយ៉ាងដូចជានៅវត្តកងចក្ការាម(ធ្លក) ឃុំហ៊ីបហ្វា មានព្រះសង្ឃគង់នៅដល់ទៅជាង ៤០ អង្គ ប៉ុន្តែមានព្រះសង្ឃត្រឹមតែ ១៥ អង្គប៉ុណ្ណោះបាន​ចាក់វ៉ាក់ស៊ីន។

លោកតូមិញចូវ នាយករងមជ្ឈមណ្ឌលសុខាភិបាលស្រុកកូវង៉ាងបានឱ្យដឹងថា៖  អាស្រ័យរបប និងពេលវេលាឆាន់ចុករបស់ព្រះសង្ឃ គណៈមហានិកាយខ្មែរមានការខុស​ប្លែកពីសាមញ្ញជនខ្លាចក្រែងកើតមានបណ្តាអាការៈក្រោយពេលចាក់វ៉ាក់ស៊ីនយ៉ាងខ្ពស់ ម៉្លោះហើយ បន្ទាប់ពីចាក់រួច មជ្ឈមណ្ឌលតែងតាមដានយ៉ាងដិតដល់។ទន្ទឹមនឹងនោះមានការប្រកាសលេខទូរសព្ទ និងវេជ្ជបណ្ឌិតទទួលបន្ទុក បើសិនមានសញ្ញាខុសប្រក្រតីនោះ ហៅទូរសព្ទទៅលោកវេជ្ជបណ្ឌិតទទួលបន្ទុកដើម្បីទទួលបានការប្រឹក្សាយោបល់។ ប៉ុន្តែក្រោយពេលចាក់វ៉ាក់ស៊ីនរហូតមកទល់ពេលនេះ មិនទាន់ទទួលបានទូរសព្ទណាទាក់ទងដល់បណ្តាអាការៈក្រោយពេលចាក់វ៉ាក់ស៊ីនឡើយ។

ការចាក់វ៉ាក់ស៊ីនបង្ការអាសន្នរោគកូវីដ‑១៩ គឺសំដៅធានាអំពីសុខភាពជូនទូទាំងប្រ​ជាជន ជាគោលការណ៍ដ៏ត្រឹមត្រូវរបស់បក្ស និងរដ្ឋយើង។ អាស្រ័យហេតុនោះ ការចាក់វ៉ាក់ស៊ីន ចំ​ពោះព្រះសង្ឃនិយាយរួម នៅភូមិសាស្រ្តស្រុកកូវង៉ាងនិយាយដោយឡែកគឺនាំមកនូវភាពរីករាយសម្រាប់ព្រះសង្ឃគ្រប់ព្រះអង្គស្ងប់ចិត្តបួសរៀន ប្រតិបត្តិផ្លូវព្រះពុទ្ធសាសនា៕       ​​​

អត្ថបទ‑រូបថត៖ ថាច់សម្បត្តិ