ឆ្នាំថ្មី ជោគជ័យថ្មី

សន្ធឹកស្គរជ័យតន្រ្តីសៀង                  ឆ្នាំថ្មីយាសយាងសូរជយឃោសន៍។

- ស្តេចគោឧសភទប់វិយោគ             ស្រណោះស្រណោកសោកស្តាយស្មោះ
ស្នាដៃបវរល្អឥតខ្ចោះ                   ​     ឆ្នាំចាស់ផុតអស់ស្រណោះកេរ្តិ៍។
- ឥឡូវឆ្នាំខាលចូលមកដល់              កិច្ចការនៅសល់ផ្តល់ខ្លាស្នេហ៍
ស្តេចគោកោះហៅអស់ពលរេហ៍          រៀបពិធីផ្ទេររេតំណែង។
- ព្យគ្ឃរាជស្តេចខ្លាបារមីខ្ពស់             ហើរហោះចុះមកក្រោមសូរភ្លេង
នាំអស់បរិវារទាំងចាស់ក្មេង              ទទួលតំណែងបែងការថ្មី។
- ទឹកដីត្រាវិញពេញសម្រស់                ខ្លាកើតសោមនស្សព្រោះថ្វីដៃ
មិនស្មានឆ្នាំចាស់ផ្លាស់ប្តូរក្រៃ             សូមម្ចាស់គោថ្លៃបកស្រាយផង។
- ស្តេចគោឆ្នាំឆ្លូវពេញមោទនៈ           រៀបរាប់ប្រាប់ច្បាស់ឆ្នាំចាស់ឆ្លង
ឆ្នាំហើយក្តៅងំសង្គមរង                     កូវីដយង់ឃ្នងប៉ងប្រហារ។
- សង្គមបិទស្ទះខះសេដ្ធកិច្ច               ទិន្នផលច្រើនតិចលិចអសារ
ស្រែស្រូវដំណាំចាំទីផ្សារ                       ផ្លូវឃាំងរាំងផ្សារច្បារចុះថ្លៃ។
- វិស័យអបរំស្រទំស្មោះ                       រៀនសូធ្យសាន្តគ្រោះតាមអនឡៃ
សិស្សតូចសិស្សធំពុំទៅឆ្ងាយ               រៀនតាមអនឡៃឆ្ងាយសាលា។
- បុណ្យទានត្រូវផ្អាកមូយរយៈ   ​​          ព្រួតដៃយកជម្នះរោគឬស្យា
ខកខានជួបជុំផ្តុំវត្តវ៉ា                         ប្តេជ្ញាទប់ស្កាត់កូវីដឆ្លង។
- ស្តាប់គោឧសភស្តេចជេដ្ឋជ័យ         រន្ធត់ហឫទ័យចក្រីខ្លា
មិនស្មានឆ្នាំចាស់ប៉ះខ្លោចផ្សារ          ដោយរោគឬស្យាប្រហារបង់។
- ឥឡូវអនុជពុំស្មានសោះ                   ត្រាវិញលួតលាស់ស្រស់បំព្រង
តើអ្វីជាកិច្ចដ៏ចម្បង                         ត្រាវិញរួចរងឆ្លងគ្រោះភ័យ?
- កិច្ចការចំរើនមានច្រើនណាស់         រៀមសែនមោទនៈអាណត្តិថ្មី
មហាសន្និបាតបក្សទីដប់បី                 ប្រៀបដូចវារីស្រពស្រែស្រូវ។
- សាមគ្គីធ្លុងមួយជួយជម្នះ                 កាប់ឆ្ការរូតរះឆ្ពោះទិសដៅ
វិន័យជាក្រឹត្យពុំហ្មងសៅ                     ត្រូវខុសសខ្មៅដៅច្បាស់ទែង។
- ការងារសកម្មមានប្រសិទ្ធ                ចេះច្នៃប្រឌិតខិតខំស្វែង
ទម្លុះទម្លាយឃើញផលស្តែង                 កាត់ព្យុះអ័ព្ទផ្សែងតែងទៅមុខ។
- អភិវឌ្ឍន៍សង្គមពុំធ្លោយធ្លាក់            បន្តអភិរក្សដាក់ទំនុក
ជនបទសាងថ្មីនាំក្តីសុខ                     ភូមិស្រុកចំរើនកើនលាភី។
- ស្តាប់រៀមរ៉ាយរ៉ាប់ចាប់ចិត្តណាស់       មាគ៌ាល្អល្អះអាណត្តិថ្មី
តែប្អូនចង់ដឹងពីគ្រោះភ័យ                 កូវីដរសាយឆ្ងាយឬអត់?
- អនុវត្តផែនការទ្វេទិសដៅ                 ធ្វើឲ្យកក់កក្តៅរាល់អភិវឌ្ឍន៍
សេដ្ឋកិច្ចសង្គមពុំក្រខ្សត់                    កសាងជនបទប្រាកដថ្មី។
- ទន្ទឹមទិសដៅក្តៅគគុក                     កូវីដអុកឡុកកំចាត់ឆ្ងាយ
ស្រុះស្រួលកម្លាំងទាំងប្រុសស្រី                ផ្តួលរោគចង្រៃសាយអាសន្ន។
- ចាក់ថ្នាំវ៉ាក់សាំងប្រឆាំងរោគ              ផ្តាច់សម្ងំជ្រកពួនជិះជាន់
វ៉ាក់សាំងដណ្តប់គ្រប់តំបន់                   កូវីដស្លោស្លន់អាសន្នឆ្ងាយ។
- សេដ្ឋកិច្ចសង្គមពុំធ្លាក់ចុះ                  ផ្តើមលូតសម្រស់ស្រស់ប្រក្រតី
នោះហើយផែនការទិសដៅពីរ               នាំសុខសួស្តីជូនប្រជា។
- ស្តាប់បងអធិប្បាយខ្យាយសេចក្តី         ឆ្នាំចាស់អាណត្តិថ្មីពិតមហិមា
ឆ្នាំថ្មីខ្លាប្អូនសូមធានា                          ហែតាមមាគ៌ាដ៏ភ្លឺស្វាង។
- ឆ្នាំខាលឆ្នាំខ្លាក្លាមាឌមាំ                     មិនដេកសម្ងំថ្នមសំណាង
ព្រួតដៃកាប់ឆ្ការស្ថាបនាសាង                 អភិវឌ្ឍន៍គ្រប់យ៉ាងសាងសុខអើយ៕   

                                                                             ដោយ៖ ថាច់សុវណ្ណេន