ធានាលំនឹងជីវភាពជូនប្រជាជនក្នុងតំបន់ហ៊ុមព័ទ្ធ

ទាក់ទងដល់ ០៣​ ករណីវិជ្ជមានជាមួយ វីរុស SAR‑CoV‑2  កាលពីថ្ងៃទី ០២ និងទី ០៣ កក្កដា ឆ្នាំ ២០២១ នៅលើភូមិសាស្ត្រឃុំលឿងហ្វា ស្រុកចូវថាញ់ គណៈចង្អុលការបង្ការទប់ស្តាត់ជំងឺកូវីដ-១៩ ខេត្តត្រាវិញបានចុះផ្សាយសេចក្តីសម្រេចចិត្តលេខ ៨៣/QĐ-BCĐ “ស្តីពីការបង្កើតតំបន់ចត្តាឡីស័កសុខាភិបាលគម្លាតសង្គម ដើម្បីបង្ការទប់ស្កាត់ជំងឺកូវីដ-១៩” ចំពោះភូមិបត់ចែក និងភូមិពន្លាជ័យ(បន្លា) ឃុំលឿងហ្វា ស្រុកចូវថាញ់។

លោកស៊ើងហុងមិញ ប្រធានគណៈការងាររណសិរ្សមាតុភូមិពន្លាជ័យបានឲ្យដឹង៖ អាស្រ័យជំងឺកូវីដ-១៩ កើតឡើងដោយចៃដន្យ ទើបក្នុងបណ្តាថ្ងៃដំបូងទទួលបញ្ជាចត្តាឡីស័កគ្រួសារប្រជាជនចំនួន ២២ គ្រួ (ក្នុងនោះ មានជនរួមជាតិខ្មែរ ១៩ គ្រួសារ) ដោយមានមនុស្សរាយ ៨៦ នាក់នៅភូមិពន្លាជ័យនរណាក៏មានអារម្មណ៍ស្លន់ស្លោរន្ធត់។ ប៉ុន្តែក្រោយពេលស្តាប់ការផ្សព្វផ្សាយ បំផុសចលនានោះ ប្រជាជនភាគច្រើននឹងនរចិត្ត ហើយប្រតិបត្តិម៉ឹងម៉ាត់តាមសេចក្តីកំណត់ស្តីពីបង្ការទប់ស្តាត់ជំងឺកូវីដ-១៩។ ដោយឡែកបណ្តាគ្រួសារផលិត ធ្វើអាជីវកម្ម ពេលត្រូវគម្លាតចត្តាឡីស័កដូច្នេះ រដ្ឋអំណាចមូលដ្ឋានក៏មានវិធីសាស្រ្ត កេណ្ឌប្រមូលកម្មាភិបាលនៅមូលដ្ឋាន មាមីងនៅជិតខាង ញាតិសន្តាននៅខាងក្រៅឧបត្ថម្ភមាមីងដែលនៅក្នុងតំបន់ហ៊ុមព័ទ្ធបានលំនឹងជីវភាព​ និងផលិតទាន់រដូវ។

តំបន់ហ៊ុមព័ទ្ធបង្ការទប់ស្កាត់អាសន្នរោគកូវីដ-១៩។

ចែករំលែកជាមួយយើងខ្ញុំ មីងផាងង៉ុកស៊ើង បានឲ្យដឹង៖ ពេលឮដំណឹងហ៊ុមព័ទ្ធ ខ្ញុំបារម្ភខ្លាំងណាស់ ប៉ុន្តែក្រោយពេលបានស្តាប់ការផ្សព្វផ្សាយ របស់រដ្ឋអំណាចមូលដ្ឋានផ្តល់ដំណឹងថា ប្រជាជននៅទីនេះប្រសិនជាជួបលំបាក ឬក៏ជាប់ជំពាក់វាក់វិនអំពីជីវភាពឬក្នុងការផលិតនោះ នឹងទទួលបានការឧបត្ថម្ភរបស់រដ្ឋអំណាចមូលដ្ឋាន ម៉្លោះហើយខ្ញុំនឹងនរចិត្ត។ រដ្ឋអំណាចមូលដ្ឋានក៏ឧបត្ថម្ភទាន់ពេលបណ្តាសម្ភារប្រើប្រាស់ចាំបាច់ក្នុងគ្រួសារខ្ញុំ និងមាមីងនៅជិតខាង។ ដោយឡែកគ្រួសារខ្ញុំជួបលំបាកដោយសារហ្វូងគោគ្មានចំណីស៊ី។ ឃើញដូច្នោះ មាមីងនៅជិតខាង និងញាតិសន្តាននៅក្រៅតំបន់ហ៊ុមព័ទ្ធ ជួយកាត់ស្មៅ រួចដឹកជញ្ជូនមកឲ្យកងកម្លាំងប្រចាំប៉ុស្ដិ៍ពិនិត្យអង្កេតអាសន្នរោគ ទទួលយក​រួចដឹកមកដល់ផ្ទះខ្ញុំ។

បណ្តាអ្នកដែលធ្វើការងារកសិកម្មក្នុងតំបន់ហ៊ុមព័ទ្ធ ​ បន្តរក្សាកិច្ចការកសិកម្ម។ អ្នកណាដែលមិនមានការងារចាំចាច់ ត្រូវបិទទ្វារនៅក្នុងផ្ទះ។ ជីវភាពប្រចាំថ្ងៃនៅតែប្រព្រឹត្តទៅយ៉ាងធម្មតា ប៉ុន្តែចំណុចដែលខុសពីធម្មតាគឺមាមីងទាំងនោះតែងរក្សាជានិច្ចការពាក់របាំងមុខ ដើម្បីបង្ការទប់ស្តាត់ជំងឺកូវីដ-១៩។ ប្រជាជនត្រូវការទិញសម្ភារប្រើប្រាស់ចាំបាច់ក្នុងគ្រួសារតែងបានកងកម្លាំងប្រចាំនៅប៉ុស្ដិ៍ត្រួតពិនិត្យឧបត្ថម្ភ។ ការទាក់ទងរបស់ប្រជាជនៅក្នុងភូមិសំខាន់គឺប្រើប្រាស់ទូរស័ព្ទ។ បណ្តាអ្នកដែលនៅធ្វើការក្នុងក្រុមហ៊ុន អាជីវកម្មបានដោះស្រាយឲ្យសម្រាកការងារដើម្បីនៅក្នុងផ្ទះ។

ទន្ទឹមនឹងការផ្សព្វផ្សាយបណ្តាវិធានការបង្ការទប់ស្កាត់ជំងឺកូវីដ-១៩ ការគិតគូរឧបត្ថម្ភ ដើម្បីប្រជាជនបានលំនឹងជីវភាពក្នុងតំបន់ចត្តាឡីស័កតែងបានរដ្ឋអំណាចមូលដ្ឋានផ្សព្វផ្សាយដើម្បីធានាបង្ការទប់ស្តាត់ជំងឺកូវីដ-១៩ បានអនុវត្តត្រូវតាមសេចក្តីកំណត់។ លោកស៊ើងហុងមិញ ប្រធានគណៈការងាររណសិរ្សមាតុភូមិភូមិពន្លាបានឲ្យដឹងបន្ថែម៖ ក្នុងបណ្តាថ្ងៃកន្លង ២២ គ្រួសារដែលនៅក្នុងតំបន់ចត្តាឡីស័ក ទទួលបានការឧបត្ថម្ភពីបណ្តាគណៈ បណ្តាផ្នែក អង្គការមហាជនពីថ្នាក់ខេត្តរហូតដល់ថ្នាក់ឃុំ និងការចូលរួមវិភាគទានរបស់សប្បុរសជនផងដែរ។ ឆ្លងតាមនោះភូមិទទួលបានបណ្តាសម្ភារប្រើប្រាស់ចាំបាច់ក្នុងគ្រួសារដូចជា៖ អង្ករជាង ២,២ តោន ម៉ីកញ្ចប់ជាង ២០០​ ធុង ប្រេង ស្ករ ប៊ីចេង របាំងមុខ ទឹកលាងដៃរម្ងាប់មេរោគ សាច់ជ្រូក ស៊ុត ស្ករគ្រាប់ បន្លែ ផ្លែឈើ។ល។ និងប្រាក់ ២២ លានដុង (ក្នុងមួយគ្រួសារទទួលបាន ០១ លានដុង)។ ដោយឡែកវត្តពន្លាជ័យក៏នៅក្នុងតំបន់ចត្តាឡីស័ក ក្រៅពីទទួលបានការឧបត្ថម្ភបណ្តាសម្ភារប្រើប្រាស់ចាំបាច់សម្រាប់ព្រះសង្ឃ វត្តនៅទាំងទទួលបានអង្ករជាង ០៣ តោនទៀតផង។

ដើម្បីប្រជាជនក្នុងមណ្ឌលហ៊ុមព័ទ្ធ បាននឹងនរចិត្តអនុវត្តល្អការបង្ការទប់ស្តាត់ជំងឺកូវីដ-១៩ តាមស្មារតីចង្អុលការរបស់ខេត្តនិងមូលដ្ឋាន ឃុំលឿងហ្វាយកចិត្តទុកដាក់ការងារត្រួតពិនិត្យ ក្នុងការអនុវត្ត។ លោកហ្វិញគឹមជុង‑អនុប្រធានគណៈកម្មាធិការប្រជាជនឃុំលឿងហ្វាបានឲ្យដឹង៖ ថ្នាក់ដឹកនាំឃុំតែងមកកាន់ប៉ុស្ដិ៍ដើម្បីត្រួតពិនិត្យ ក្តាប់ស្ថានភាពជីវភាពរបស់ប្រជាជន និងការងារទទួលឧបត្ថម្ភពីបណ្តាផ្នែក អង្គការមហាជន និងបណ្តាប្រភពឧបត្ថម្ភផ្សេងឲ្យបានទាន់ពេល។

ដោយមានការចូលរួមយ៉ាងប្តូរផ្តាច់របស់ទូទាំងប្រព័ន្ធនយោបាយ ក៏ដូចជាការចែករំលែក ស្និទ្ធស្នាល ឧបត្ថម្ភទាន់ពេលរបស់សប្បុរសជន និងប្រជាជននៅក្រៅតំបន់ហ៊ុមព័ទ្ធ មិនត្រឹមតែជំនួយឲ្យប្រជាជននៅភូមិពន្លាជ័យ និងភូមិបត់ចែកលំនឹងជីវភាពប៉ុណ្ណោះ ហើយនៅទាំងជាមូលដ្ឋានដើម្បីប្រជាជននៅទីនេះ បាននឹងនរចិត្តអនុវត្តបណ្តាសេចក្តីកំណត់ស្តីពីបង្ការទប់ស្តាត់ជំងឺកូវីដ-១៩ ទៀតផង៕

អត្ថបទ‑រូបថត៖ សុខា