តម្លៃបង្កងថយចុះយ៉ាងខ្លាំងក្នុងរដូវអាសន្នរោគ

កសិករស្រុកយ្វៀងហាយប្រមូលផលបង្កង។

កសិករថាច់យ៉ែង នៅភូមិព្រែកកន្ទីរ ឃុំឡុងវិញបានឱ្យដឹង៖ គ្រួសារចិញ្ចឹមបង្កងជាង ៩០០.០០០ ក្បាលក្នុងស្រះ ១,២ ហិកតា។ អាស្រ័យថែទាំត្រូវតាមនីតិវិធីបច្ចេកទេស គួបផ្សំជាមួយអាកាសធាតុអំណោយផលផងនោះ ម៉្លោះហើយបង្កងធំធាត់រហ័សបង្គួរ ដល់ដំណាក់កាលពាក់កណ្តាលខែកក្កដា ឆ្នាំ ២០២១ គឺដល់ពេលប្រមូលផល។ ពេលហៅឈ្មួញមកទិញបង្កងប្រភេទ ២៥‑៣០ ក្បាលមានទម្ងន់ មួយគីឡូក្រាមឈ្មួញឱ្យតម្លៃតែ ១២០.០០០​​ ដុង។​ ជាមួយ​តម្លៃនោះ បើប្រៀបជាមួយរដូវមុនៗថយចុះ ២៥.០០០ ដុងក្នុងមួយគីឡូក្រាម ពេលសួរឈ្មួញពីមូលហេតុតម្លៃបង្កងត្រូវថយចុះនោះ ឈ្មួញបានឆ្លើយតបថា អាស្រ័យ​មិនអាចនាំចេញទៅលក់នៅខេត្ត ក្រុងដទៃបាន។ អាស្រ័យមិនដឹងអាសន្នរោគ​នៅអូសអន្លាយ​ដល់ពេលណា រួមជាមួយបាតុភាពចំណីសម្រាប់បង្កងកាន់តែកើនឡើង ម៉្លោះហើយគ្រួ​សារ​ព្រមលក់ដូចតម្លៃខាងលើ ។

កសិករ គាងឬទ្ធិ នៅទីប្រជុំជនឡុងថាញ់  ស្រុកយ្វៀងហាយចែករំលែក៖ គ្រួសារ​ចិញ្ចឹមបង្កងជាច្រើនឆ្នាំ ដល់ពេលជិតប្រមូលផល ខ្ញុំតែងតាមដានព័ត៌មានលើមធ្យោបាយ​ព័ត៌មានមហាជន កាសែត ទូរទស្សន៍អំពីតម្លៃទីផ្សារ ក្នុងនោះមានតម្លៃបង្កង បើឃើញ​តម្លៃបង្កងកើនឡើងនោះហាក់ដូចមានភាពកក់ក្តៅ ដេកលក់ស្រួល បើសិនឃើញតម្លៃថយចុះត្រឹមតែប្រមាណ ១០.០០០ ដុងក្នុងមួយគីឡូក្រាមនោះគឺមានការបារម្ភយ៉ាងខ្លាំង។ ចិញ្ចឹមបង្កងសព្វថ្ងៃនេះ មិនសូវមានគ្រួសារណាវិនិយោគទុនដំបូង ១០០% ឡើយ មានគ្រួសារចិញ្ចឹមបង្កងខ្លះត្រូវជំពាក់បំណុលដេប៉ូលក់ចំណីប្រមាណ ៦០% នៃការចំណាយ​សម្រាប់ការចិញ្ចឹមបង្កង បើសិនដល់ពេលប្រមូលផលតម្លៃបង្កងកើនខ្ពស់ អ្នកចិញ្ចឹមចំណេញ បើសិនតម្លៃធ្លាក់ចុះទាប​នោះ ងាយឱ្យអ្នកចិញ្ចឹមជំពាក់បំណុល។ អាស្រ័យហេតុនោះ ខ្ញុំសង្ឃឹមធ្វើយ៉ាងណាអាសន្នរោគឆាប់ឆ្លងផុតទៅ តម្លៃឆាប់បានវិល​ត្រឡប់មកភាពប្រក្រតីវិញ ។

មិនត្រឹមតែកសិករស្រុកយ្វៀងហាយប៉ុណ្ណោះទេដែលកំពុងព្រួយបារម្ភជាមួយតម្លៃបង្កងត្រូវថយចុះកសិករស្រុកកូវង៉ាងក៏ដូច្នោះដែរ។ បងសឺនណា នៅភូមិកំពង់ទទឹង ឃុំឡុងស៊ើង ស្រុកកូវង៉ាងក៏សម្តែងក្តីបារម្ភពីតម្លៃបង្កងដែលមានបាតុ​ភាពថយចុះយ៉ាងខ្លាំង។ បងសឺនណា បានឱ្យដឹង៖ គ្រួសារតែងរក្សាផ្ទៃដីចិញ្ចឹមបង្កងប្រ​មាណ ១,៤ ហិកតាជាច្រើនឆ្នាំកន្លង។ ឱ្យតែដល់ដំណាក់កាលប្រមូលផលគឺមានឈ្មួញមក​សួររកទិញ  រីឯក្នុងរដូវអាសន្នរោគអ្នកចិញ្ចឹមត្រូវស្វែងរកឈ្មួញ ប៉ុន្តែហៅឈ្មួញមកទិញ​ជាច្រើនដងនៅតែមិនទាន់ឃើញមុខឈ្មួញ​ ពីព្រោះឈ្មួញទាំងនោះឱ្យដំណឹងថារកមិនបានច្រកចេញ។ ប៉ុន្មានថ្ងៃមុន មានអ្នកមកសួររកទិញដោយតម្លៃ ១២០.០០០ ដុងក្នុងមួយគីឡូក្រាម ប្រភេទបង្កង ២៥‑៣០ ក្បាលក្នុងមួយគីឡូក្រាម ប៉ុន្តែទិញបានតែ ៣០‑៤០ គីឡូក្រាម ម៉្លោះហើយគ្រួសារមិនសម្រេចចិត្តលក់។ បច្ចុប្បន្ន ខ្ញុំនៅជំពាក់​បំណុលដេប៉ូចំណីបង្កងច្រើនបង្គួរ ម៉្លោះហើយបើសិនបានតម្លៃប្រហែលពី ១៣០.០០០‑១៣៥.០០០​ ដុងក្នុងមួយគីឡូក្រាមប្រភេទបង្កង ២៥‑៣០ ក្បាលមានទម្ងន់​មួយ​គីឡូ​ក្រាមនោះគ្រួសារនឹងលក់ឱ្យឈ្មួញ នៅអូសអន្លាយពេល វេលាមិនល្អឡើយ។

ស្ថានភាពអាសន្នរោគជាប់តាមផលវិបត្តិជាច្រើនធ្វើឱ្យឥទ្ធិពលដល់វិស័យជាច្រើន មិនត្រឹមវិស័យជលផលឡើយ ទាំងវិស័យដាំដុះក៏ត្រូវប្រឈមមុខជាមួយភាពលំបាក​ប្រហាក់ប្រហែលគ្នាផងដែរ៕  

អត្ថបទ‑រូបថត៖ ថាច់សម្បត្តិ