សាលាបឋមសិក្សាចូវដៀង(អា)៖ អនុវត្តល្អការងារចលនាទិញប័ណ្ណគាំពារសុខាភិបាលជូនសិស្សខ្មែរ

ដើម្បីចលនាឪពុកម្តាយសិស្សឲ្យទិញប័ណ្ណគាំពារសុខាភិបាលជូនសិស្សសម្រេចអត្រា ១00% តាំងពីដើមឆ្នាំសិក្សា សាលាបឋមសិក្សាចូវដៀង (អា)មានផែនការចាត់ឲ្យកម្មាភិបាល គ្រូបង្រៀន ជាពិសេសគ្រូអចិន្ត្រៃយ៍ ពិនិត្យបញ្ជីរាយនាមសិស្សដែលមានស្ថានភាពលំបាក ដើម្បីរាយការណ៍ជូនគណៈចាងហ្វាងសាលា និងគណៈតំណាងសមាគមឪពុកម្តាយសិស្សអំពីគ្រួសារសិស្សដែលមានស្ថានភាពលំបាកគ្មានលទ្ធភាពទិញប័ណ្ណគាំពារសុខាភិបាល។ គណៈចាងហ្វាងសាលា​សហការជាមួយរដ្ឋ​អំណាចមូលដ្ឋាន ចលនាសប្បុរសជនចូលរួម ឧបត្ថម្ភដោយច្រើនរូបភាពក្នុងនោះមាន​ឧបត្ថម្ភ ទិញប័ណ្ណគាំពារសុខាភិបាលជូនសិស្ស ដើម្បី បង្កលក្ខណៈងាយស្រួលក្នុង​ការថែទាំសុខភាពសិស្សបានល្អ។

អ្នកគ្រូផល្លី (ទី ១ ខាងស្តាំ)ជូនសៀវភៅ និងប័ណ្ណគាំពារសុខាភិបាលដល់ប្អូនមិញតឹម។

អ្នកគ្រូឡេហ្វាងម៉ាយ ចាងហ្វាងសាលាបឋមសិក្សាចូវដៀង (អា)មានប្រ​សាសន៍ថា៖ ដោយ មានលក្ខណៈពិសេសជាសាលាដែលមានសិស្ស​ខ្មែរមករៀន​កុះករដំណាក់កាលត្រៀមចូលឆ្នាំសិក្សាថ្មីជារៀងរាល់ឆ្នាំ សាលាតែងចង្អុលការ​កម្មាភិបាល គ្រូបង្រៀនក្តាប់ស្ថានភាពគ្រួសារ សិស្សម្នាក់ៗឲ្យ​ច្បាស់ដើម្បីមាន​វិធានការឧបត្ថម្ភ ឲ្យបានទាន់ពេល។ ទន្ទឹមនឹងនោះ ត្រូវទំនាក់ទំនងដើម្បីជំរុញទឹកចិត្តឪពុកម្ដាយសិស្សដែលទៅធ្វើការឆ្ងាយ ឱ្យយកចិត្តទុកដាក់ដល់ការរៀនសូត្ររបស់កូនៗ ពិសេសគឺការទិញប័ណ្ណគាំពារសុខាភិបាលជូនកូនៗនាដើមឆ្នាំសិក្សា។ ពីព្រោះការទិញប័ណ្ណគាំពារសុខាភិបាល គឺជាសកម្មភាពដ៏ល្អរួមចំណែកក្នុងការថែទាំសុខភាពសិស្សក៏ជាគោលដៅនៃការអប់រំ និងបណ្តុះបណ្តាលសិស្សគ្រប់ជ្រុងជ្រោយដើម្បីឲ្យមានសុខភាពបរិបូណ៌បន្តការរៀនសូត្របានល្អ។

ក្នុងនាមជាគ្រូអចិន្ត្រៃយ៍ រួមជាមួយទឹកចិត្តមេត្តាអាណិតស្រឡាញ់សិស្ស អ្នកគ្រូ ថាច់ធីផល្លី គ្រូអចិន្ត្រៃយ៍ថ្នាក់ទី៥/អាមិនត្រឹមតែចលនាឪពុកម្តាយសិស្ស និងសប្បុរសជនចូលរួមទិញគាំពារសុខាភិបាលជូនសិស្សប៉ុណ្ណោះទេ អ្នកគ្រូនៅទាំងចំណាយប្រាក់របស់ខ្លួនផ្ទាល់ដើម្បីទិញប័ណ្ណគាំពារសុខាភិបាល សៀវភៅពុម្ពជូនសិស្សដែលមានស្ថានភាពលំបាកខ្លាំងទៀត ផង។ ឆ្នាំសិក្សា ២០២១-២០២២ អ្នកគ្រូ ផល្លី ទិញប័ណ្ណគាំពារសុខាភិបាលបាន ០២ ប័ណ្ណ និងសៀវភៅពុម្ព ០២ ឈុត ជូនសិស្ស ០៤ នាក់ដែលមានស្ថានភាពលំបាកខ្លាំង គិត ជាទឹកប្រាក់ជិត ០១ លានដុង។ អ្នកគ្រូផល្លី ឲ្យដឹងថា៖ មានឪពុកម្តាយខ្លះ ដោយសារស្ថាន ភាពលំបាកទើបទៅធ្វើការឆ្ងាយ ហើយដំណាក់កាលនោះក៏ជួបនឹងអាសន្នរោគរាតត្បាត រកការងារធ្វើមិនបានគ្មានប្រភពចំណូល ជីវភាពកាន់តែជួបការលំបាកជាងទៀត។ ដូច្នោះហើយពេលខ្ញុំរំលឹកដល់ការ​រៀនរបស់កូនៗ ក្នុងឆ្នាំសិក្សាថ្មី ត្រូវ​ទិញ​សៀវភៅ ទិញប័ណ្ណគាំពារ​សុខាភិបាលជាដើម គាត់ច្រើននិយាយថាចង់​ឲ្យ​កូន​សម្រាករៀនមួយ​ឆ្នាំ។ ខ្ញុំអាណិតគាត់ណាស់ ពេលឮគាត់ និយាយដូច្នោះ។ ម្ល៉ោះហើយ ខ្ញុំក៏សន្សំសំចៃឧបត្ថម្ភប្អូនៗបានខ្លះ ពីព្រោះខ្ញុំអាណិតប្អូនៗមិនចង់ឲ្យប្អូនៗសម្រាករៀនមួយឆ្នាំឡើយ។

សិស្សសាលាបឋមសិក្សចូវដៀង (អា)។

ប្អូនថាច់មិញតឹម សិស្សថ្នាក់ទី ៥/អា ជាសិស្សម្នាក់ក្នុងចំណោមសិស្ស 0៤ នាក់ ដែលមានស្ថានភាពលំបាកខ្លាំង។ ឪពុក​ប្អូនទៅធ្វើការយួរកំបោរ ប្រាក់​ចំណូល​មិនទៀងទាត់។ ម្តាយ នៅផ្ទះមើលថែកូនប្អូន ២ នាក់។ បងស្រីមិញតឹមកំពុងរៀនថ្នាក់ទី ៦។  ស្ថានភាពគ្រួសារ មិញតឹមជួបការលំបាកខ្លាំងរកប្រាក់សម្រាប់ប្រើប្រាស់ប្រចាំថ្ងៃពិបាកណាស់ទៅហើយ ធ្វើ ម្តេចមានលទ្ធភាពទិញប័ណ្ណគាំពារសុខាភិបាលទិញសៀវភៅពុម្ពសម្រាប់កូនពីរនាក់ទៅរៀន ម្ល៉ោះហើយ ទើបឪពុកម្តាយប្អូនចង់ឲ្យប្អូនសម្រាករៀនមួយឆ្នាំ។ យល់អំពីស្ថានភាពនោះ អ្នកគ្រូ ផល្លី ក៏ឧបត្ថម្ភប្រាក់ទិញសៀវភៅពុម្ព និងប័ណ្ណគាំពារសុខាភិបាលជូនប្អូនមិញតឹម។ ប្អូនសូម​អរគុណអ្នកគ្រូអចិន្ត្រៃយ៍​យ៉ាងជ្រាលជ្រៅ។ ប្អូន​សន្យាថានឹងខិតខំ​រៀនសូត្រឲ្យ​បានល្អ ដើម្បី​កុំ​ឲ្យ​លោកគ្រូ​ អ្នកគ្រូ ជាពិសេស​អ្នកគ្រូអចិន្រ្តៃយ៍ខកបំណងឡើយ។

ឆ្នាំសិក្សា ២0២១-២0២២ សាលាបឋមសិក្សាចូវដៀង (អា)មានសិស្ស ៤៩៤ នាក់ (សិស្សខ្មែរ ៩0%) ក្នុងនោះមានសិស្សក្រីក្រ ១0% ទទួលរបបគាំពារសុខាភិបាលរបស់រដ្ឋ សិស្ស ៩0% ឪពុកម្តាយត្រូវទិញប័ណ្ណគាំពារសុខាភិបាលឲ្យកូនៗ។ ក្នុងនោះមានសិស្ស ២០% មានស្ថានភាពលំបាក។ ដើម្បីចូលរួមចែករំលែកការលំបាកជាមួយឪពុកម្តាយសិស្សដែលមានស្ថានភាពលំបាក គណៈចាងហ្វាងសាលាចលនាកម្មាភិបាល គ្រូបង្រៀន និងសប្បុរសជនចូលរួមឧបត្ថម្ភទិញប័ណ្ណគាំពារសុខាភិបាល ៨០ ប័ណ្ណ សៀវភៅពុម្ព ១០ ឈុត និងសៀវភៅសរសេរ ៥.០០០ ក្បាល សម្រាប់ឧបត្ថម្ភសិស្សដែលមានស្ថានភាពលំបាក៕

អត្ថបទ‑រូបថត៖ សុជា