វត្តចម្បាបូរី(ត្រោកលិច)៖ រួមចំណែកក្នុងការអប់រំបណ្ដុះបណ្ដាលស្រទាប់បញ្ញវន្តខ្មែរ

ព្រះតេជគុណ ថាច់ម៉ី ព្រះចៅអធិការវត្តចម្បាបូរី (ត្រោកលិច) ​មានថេរដីកាឱ្យដឹងថា៖ ជិត ៣០ ឆ្នាំទទួលនាទីជាព្រះចៅអធិការ ជារៀងរាល់ឆ្នាំ អាត្មាសហការជាមួយព្រះអាចារ្យ លោកអាចារ្យបើកបណ្ដាថ្នាក់ពុទ្ធិកមធ្យមសិក្សាបឋមភូមិ‑ទុតិយភូមិ និងបណ្ដាថ្នាក់ខេមរភាសាឱ្យសមណសិស្ស‑សិស្ស កូនចៅជនរួមជាតិខ្មែរ​បានរៀនសូត្រ។ ក្នុងឆ្នាំសិក្សា ព.ស. ២៥៦៦ វត្តបើកថ្នាក់ពុទ្ធិកមធ្យមសិក្សាបាន ៣ ថ្នាក់រួមមាន៖ ថ្នាក់ពុទ្ធិកមធ្យមសិក្សាបឋមភូមិឆ្នាំទី ១ និងទី ២ និងថ្នាក់ពុទ្ធិកមធ្យមសិក្សាទុតិយភូមិឆ្នាំទី ២ ដោយមានសមណសិស្ស‑សិស្សជាង ៥០  អង្គ‑រូបចូលរៀន។ ចំពោះថ្នាក់វិជ្ជាខេមរភាសា ជារៀងរាល់ឆ្នាំ​ វត្តចាត់តាំងនៅក្នុងវត្តបាន ៤‑៥ ថ្នាក់ដោយមានសិស្សានុសិស្សប្រមាណ ១៥០ រូបចូលរៀន។ ចំពោះសិស្សានុសិស្សដែលនៅឆ្ងាយពីវត្ត បានការឯកភាព​រវាងគណៈអាចារ្យបង្រៀន និងការអនុញ្ញាតពីរដ្ឋអំណាច​មូលដ្ឋាន វត្តលៃលកបើកថ្នាក់រៀនពេលថ្ងៃ និងពេលយប់នៅតាមបណ្ដាភូមិបាន​ប្រមាណ ៥ ថ្នាក់ ដោយមានសិស្សាប្រមាណ ១០០ រូបចូលរៀន។ ឆ្លងតាម​រយៈនោះ ជួយឱ្យប្អូនៗមានលក្ខណៈបានរៀនសូត្រភាសាជាតិនៅជិតផ្ទះ។

ដោយអាស្រ័យគុណភាពបង្រៀននៅក្នុងវត្តកាន់តែរីកចម្រើន ម៉្លោះហើយសកម្មភាពរៀនសូត្រនៅក្នុងវត្តកាន់តែបានសមណសិស្សនៅវត្តដទៃៗទាំងក្នុងនិងក្រៅខេត្តយកព្រះទ័យទុកដាក់។ សមណសិស្សយ៉ាញ់ធឿង នៅខេត្តអាងយ៉ាង កំពុងសិក្សាថា្នក់ពុទ្ធិកមធ្យមសិក្សាទុតិយភូមិឆ្នាំទី ២ មានថេរដីកាឱ្យដឹង៖ រៀនសូត្រនៅ​ក្នុងវត្ត អាត្មាកំណត់ឃើញពីបរិស្ថានរៀនសូត្រនៅទីនេះយ៉ាងល្អ៖ ទីមួយបានទទួលក្រេប​យក​​ចំណេះដឹង តម្លៃអំពីអក្សរសាស្រ្ត ភាសាជាតិ។​ ទីពីររាល់ការគិតគូរ ឧបត្ថម្ភអំពីការឆាន់ចុក ទំនុកបម្រុងបច្ច័យបួន សេនាសនៈបានព្រះចៅអធិការយកព្រះ​ទ័យ​ទុកដាក់។ គ្រូបង្រៀន សុទ្ធតែជា​គ្រូបង្រៀនដែលមានចំណេះវិជ្ជាមាំមួន អនុវត្តល្អតួនាទីបង្ហាត់បង្រៀន ជួយឱ្យអាត្មាផ្ដោតអារម្មណ៍យ៉ាងខ្ពស់ទៅរកការសិក្សា។ នោះ ជាកម្លាំងជំរុញឱ្យអាត្មាខិតខំរៀនសូត្របានល្អប្រសើរជាងទៀត។

ម៉ោងរៀនប្រែគម្ពីរមង្គលត្ថទីបនីរបស់សមណសិស្ស‑សិស្សវត្តត្រោកលិច។

ចំពោះសមណសិស្សយ៉ាញ់ញ៉ និមន្តមកពីខេត្តគៀងយ៉ាង​ក៏ជាសមណសិស្សថ្នាក់ពុទ្ធិកមធ្យមសិក្សាទុតិយភូមិឆ្នាំទីពីរបានចែករំលែកថា៖ អាត្មានិមន្តមករៀននៅខេត្តត្រាវិញបាន ៦ ឆ្នាំមកហើយ បណ្ដាឆ្នាំមុនរៀននៅ​តាមបណ្ដាវត្តផ្សេង ឆ្នាំនេះអាត្មាចុះឈ្មោះ និងបានបញ្ជូនមករៀននៅវត្តនេះ។ រៀនសូត្រនៅវត្តនេះអាត្មាពិនិត្យឃើញថា ស្មារតីសាមគ្គីរវាងសមណសិស្ស និងគ្រូបង្រៀនយ៉ាងល្អ គ្មានការប្រកាន់ ថានេះអង្គមកពីក្រៅ នោះអង្គនៅក្នុងវត្ត។ ជាតួយ៉ាងដូចជាសង្ឃភត្តនៅតាមគ្រួសារពុទ្ធបរិស័ទតែងបានចាត់ជាសលាកភត្តដូចៗគ្នា។

ដើម្បីការបើកថ្នាក់រៀនបានល្អប្រសើរជាង វត្តតែងបម្រុងបានល្អមូលដ្ឋានសម្ភារ​បម្រើឱ្យ​ការ​បង្រៀន និងរៀនទាំងកន្លែងស្នាក់អាស្រ័យរបស់សមណសិស្សទៀតសោត ក៏ត្រៀមបម្រុងបានហ្មត់ចត់ផងដែរ។ មិនត្រឹមតែសមណសិស្ស និមន្តមកសិក្សា​ឡើយ វត្តនៅទាំងកសាងបានអន្តេវាសិកដ្ឋាន ទាក់ទាញបាននិស្សិតរាប់សិបរូបមកស្នាក់នៅរៀនសូត្រទាំងមហាវិទ្យាល័យ និងពុទ្ធិកមធ្យមសិក្សក្នុងវត្តទៀតផង។ អាស្រ័យហេតុនោះ មានប្អូនមួយចំនួនស្នាក់នៅរៀនសូត្រនៅក្នុងវត្តរហូតបញ្ចប់ការសិក្សាទាំងថ្នាក់ពុទ្ធិកមធ្យមសិក្សា និងមហាវិទ្យាល័យ។

ប្អូនគឹមធីប៊ិចលិញ នៅភូមិចុងតាដោក ឃុំម៉ីចាញ់ ស្រុកចូវថាញ់ ជានិស្សិតមួយរូបស្នាក់នៅរៀនសូត្រក្នុងវត្តត្រោកលិចបានឱ្យដឹងថា៖ ប្អូនកំពុងសិក្សាឆ្នាំទីបួនផ្នែកគ្រប់គ្រងអាជីវកម្មនៃមហាវិទ្យាល័យត្រាវិញ  ហើយប្អូនក៏បានរៀនចប់ និងប្រឡងយកសញ្ញាបត្រថ្នាក់ពុទ្ធិកមធ្យមសិក្សាទុតិយភូមិ។ ស្នាក់នៅក្នុងវត្ត ប្អូនលៃលកពេលវេលាបានរៀនសូត្រផ្នែកជំនាញរបស់ខ្លួនផង ជួយបង្ហាត់បង្រៀនថ្នាក់ពុទ្ធិកមធ្យមសិក្សានៅក្នុងវត្តផង។ វត្តមានគុណចំពោះប្អូន ក្រោយពេលបញ្ចប់ការសិក្សា ប្អូនក៏មានបណ្ដាទង្វើជាក់ស្ដែងដើម្បីសំដែងការដឹងគុណចំពោះវត្តទៅតាមសមត្ថភាពរបស់ប្អូនៗ។

អនុវត្តសារលិខិតលេខ ៨២២/SGDĐT-GDDT ចុះថ្ងៃទី ២៣ ខែឧសភា ឆ្នាំ ២០២២ របស់មន្ទីរអប់រំ​ និងបណ្ដុះបណ្ដាលខេត្ត “ស្ដីពីបវេសនាកាលថា្នក់ខេមរភាសានៅតាមមណ្ឌលវត្ត” ក្នុងឱកាសវិស្សមកាលឆ្នាំសិក្សា ២០២១ ‑២០២២ វត្តក៏ត្រៀមរាល់លក្ខណៈដើម្បីទទួលប្អូនៗចូលរៀន ត្រូវតាមស្មារតីចង្អុលការនៃសារលិខិតខាងលើ។ ជាក់ស្ដែងគឺចាប់ផ្ដើមបើកថ្នាក់រៀន​  និងទទួលប្អូនៗចូលរៀនចាប់ពីថ្ងៃទី ១៥ ខែមិថុនា ឆ្នាំ ២០២២ និងបញ្ចប់វគ្គសិក្សា​នៅមុនថ្ងៃទី ១៥ ខែសីហាឆ្នាំ ២០២២។ ដោយរក្សាខ្ជាប់ខ្ជួនការបើកសាលារៀន វត្តចម្បាបូរី (ត្រោកលិច) បានចាត់ទុកដូចជាមជ្ឈមណ្ឌលអប់រំបណ្ដុះបណ្ដាលបញ្ញវន្ត​ខ្មែរនៅគ្រប់សម័យកាល៕          

អត្ថបទ‑រូបថត៖ សម្បត្តិ