រួមកម្លាំងកសាងធ្លុងមហាសាមគ្គី

            ព្រះចៅអធិការគ្រប់អង្គមិនត្រឹមតែគិតគូរពីការបួសរៀនរបស់ព្រះសង្ឃ កសាងបណ្ដាសំណង់នៅក្នុង​ទីធ្លាវត្ត។ល។ នៅទាំងរួមចំណែកជាមួយរដ្ឋអំណាច​មូល​ដ្ឋាន​អនុវត្តបណ្ដាសំ​ណង់សាធារណប្រយោជន៍ដូចជា៖ ចលនា​កសាងស្ពាន​ជនបទ កសាងបង្គោលអំ​ពូលអគ្គិសនីអុជបំភ្លឺដងផ្លូវជនបទ​ ចលនាពុទ្ធបរិស័ទ​បរិច្ចាគដីកសាងសំណង់សា​ធារណប្រយោជន៍គិតជាតម្លៃរាប់រយលានដុង។

បណ្ដាសកម្មភាពរបស់សមាគមព្រះសង្ឃសាមគ្គីស្នេហាជាតិស្រុកតែងមានអញ្ជើញតំណាងរដ្ឋអំណាចចូលរួម។

            លោកង្វៀងវ៉ាំងញ៉ាញ់ អនុប្រធានគណៈកម្មាធិការរណសិរ្សមាតុភូមិវៀត​ណាមស្រុក​កូវង៉ាងបានឱ្យដឹងថា៖ ជារៀងរាល់ឆ្នាំ ឱ្យតែដល់ទិវាអនុស្សាវរីយ៍​បង្កើតរណសិរ្ស បណ្ដាមូលដ្ឋានតែងចាត់តាំងពិធីបុណ្យមានភាពអធិកអធមបង្គួរ ក្នុងនោះមាននិមន្តបណ្ដា​អង្គ-លោកអ្នកមុខអ្នកការសាសនា អ្នកមានប្រជាប្រិយ​ភាពជនរួមជាតិខ្មែរ និងប្រជាជនចូលរួម។ ទង្វើនោះគឺបញ្ជាក់ឱ្យឃើញនូវ​តម្លៃល្អ​ល្អះនៃធ្លុងមហាសា​មគ្គី ញ៉ាំងឱ្យប្រជាជនមានស្មារតីយល់ដឹង​ក្នុងការរក្សាធ្លុង​មហាសាមគ្គី បដិសេធទៅនឹងបណ្ដាទ្រឹស្ដីមួលបង្កាច់ ខុសឆ្គងពិសពុល បង្កឲ្យមានជំនឿជាងទៀតក្នុងប្រជាជន​ចំពោះការដឹកនាំរបស់បក្ស។​និយាយពី​ការរួមចំណែកកសាងធ្លុងមហាសាមគ្គីនៅតាមវត្តអារាមលើភូមិសាស្រ្តស្រុកកូវង៉ាង មិនអាចបំភ្លេចពីសកម្មភាពលេចធ្លោជាច្រើននៅវត្តកងចកក្ការាម (ធ្លក) ឃុំហ៊ីបហ្វា ក្រោមការគ្រប់គ្រងរបស់ព្រះចៅអធិការថាច់តារា។ ព្រះអង្គរួមជា​មួយគណៈអា​រាមាភិបាលវត្តអនុវត្តល្អការងារផ្សព្វផ្សាយដើម្បីលើកកម្ពស់ស្មារតី​យល់ដឹងរបស់ប្រជាជននៅមូលដ្ឋាន ពង្រីកល្អធ្លុងមហាសាមគ្គីទូទាំងជនជាតិដូចជា៖ ចលនាពុទ្ធបរិស័ទប្រតិបត្តិល្អគោលការណ៍ គោលមាគ៌ារបស់បក្ស គោលនយោបាយ​ច្បាប់របស់រដ្ឋ ការកំណត់របស់មូលដ្ឋាន រក្សាអនាម័យបរិស្ថាន អនុវត្តល្អបណ្ដា​លក្ខឋាន​ស្ដីពីកសាងជនបទថ្មី សាមគ្គីកសាងជីវភាពវប្បធម៌នៅតំបន់ប្រជាជន​ស្នាក់នៅ រក្សាសុវត្ថិភាពអំពីសន្តិសុខ​សណ្ដាប់ធ្នាប់នៅមូលដ្ឋាន។       គិតតាំងពីឆ្នាំ ២០២១ មកទល់ពេលនេះ ព្រះតេជគុណថាច់តារា បំផុសចលនាអន្ទង​ខ្សែអគ្គិសនីអុជបំភ្លឺតាមដងផ្លូវបានប្រវែង ៧០០ ម៉ែត្រ ជាមួយថវិកា ២១ លានដុង។ បំផុសចលនាកសាងផ្ទះសាមគ្គីធម៌បាន ៦ ខ្នងជូនពុទ្ធបរិស័ទដែលជួ​បលំបាក​អំពីលំនៅឋាន គិតជាតម្លៃ ៣០០ លានដុង កសាងស្ពាន ៦ កន្លែង សរុបថវិកាជាង ៧០០ លានដុង។ ជូនអំណោយសប្បុរសធម៌ឱកាសបុណ្យចូលឆ្នាំថ្មី សែនដូនតា បុណ្យតេត ដណ្ដាំស្លជូនពុទ្ធបរិស័ទក្នុងតំបន់ចត្តាឡីស័ក ដណ្ដាំស្លគិតគូរការហូប​ចុកជូនកងកម្លាំងនគរ​បាលមកធ្វើបណ្ណសម្គាល់ពលរដ្ឋនៅក្នុងវត្ត និងកងកម្លាំងមកចាក់វ៉ាក់សាំងជូនប្រជាជនលើភូមិសាស្រ្តគិតជាតម្លៃជាង ៣០០ លានដុង។ ព្រះតេជគុណថាច់តារាបន្តឧបត្ថម្ភសៀវភៅ ទោចក្រយានសម្រាប់ប្អូនៗដែល​មានស្ថានភាពលំបាក គិតជាតម្លៃជាង ៣០ លានដុង។ ក្រៅពីនោះ ព្រះតេជគុណនៅទាំង​ចូលរួមបរិច្ចាគដី ផលដំណាំ រុក្ខជាតិជាច្រើនទៀតដើម្បីកសាងផ្លូវគមនាគមន៍ជនបទ និងស្ដារប្រឡាយធារាសាស្រ្តវាលស្រែបម្រើឱ្យការផលិតកសិកម្ម ចលនាពុទ្ធបរិស័ទប​រិច្ចាគដី ផលដំណាំ រុក្ខជាតិកសាងផ្លូវបេតុងបង្កលក្ខណៈឱ្យប្រជាជនធ្វើដំណើរ​ទៅមក ដឹកជញ្ជូនមុខទំនិញ សិស្សានុសិស្សធ្វើដំណើរទៅរៀនបានងាយស្រួល។

ព្រះតេជគុណថាច់តារា និមន្តជាដំណើរដំបូងលើស្ពានដែលទើបកសាងរួច។

            ព្រះតេជគុណថាច់តារាមានថេរដីកាឱ្យដឹង៖ បណ្ដាសកម្មភាពរបស់អាត្មា​គឺចង់រួមចំណែកជាមួយរដ្ឋអំណាចមូលដ្ឋានគិតគូរបានល្អការងារសុខុមាលភាពសង្គម ពង្រីកធ្លុងមហាសាមគ្គីកសាងមាតុភូមិ គិតគូរដល់បណ្ដាស្ថានភាព ជាពិសេសគឺជាសកម្មភាពមួយសំដៅជ្រោមជ្រែងដើម្បីស្រុក​កសាងសម្រេចលក្ខឋានស្រុកជនបទថ្មីនាពេលខាងមុខ។

            ឬក៏នៅវត្តបទុមឈូកស (ចុងមីសថ្មី) ឃុំញីទ្រឿង បណ្ដាទង្វើប្រកបដោយលក្ខណវប្បធម៌នៃមនុស្ស ហើយក៏ជាទង្វើពង្រីកធ្លុងមហាសាមគ្គីជនជាតិ​ផងដែរ។ ជារៀងរាល់ឆ្នាំ ព្រះតេជគុណថាច់កាលី ជាព្រះពហុស្សូត បំផុសចលនាកសាងផ្ទះចំនួន ២ ខ្នងឧបត្ថម្ភដល់គ្រួសារដែលជួបលំបាកអំពីលំនៅឋាន។ តាមថេរដីការបស់ព្រះតេជគុណថាច់កាលី ការបំផុសចលនាថវិកាសាង​សង់ផ្ទះជូនគ្រួសារក្រីក្រមិនត្រឹមតែមានការរួមវិភាគទានរបស់ពុទ្ធបរិស័ទខ្មែរឡើយ នៅទាំងមានជនជាតិកិញចូល​រួមផងដែរ។ នេះបញ្ជាក់ឱ្យឃើញពីសាមគ្គីភាព​សង្គមក្រោមការដឹកនាំរបស់បក្សកាន់តែបានពង្រីក ។

            ចូលរួមសកម្មភាពក្នុងសមាគមពុទ្ធសាសនាវៀតណាមលើភូមិសាស្រ្តស្រុក ក្នុងនោះមានទាំងពីរនិកាយគឺឧត្តរនិកាយ និងទក្ខិណនិកាយ។ ទោះបីការប្រជុំជីវកិច្ចមានការ​ខុសគ្នាក៏ដោយ ប៉ុន្តែអង្គទាំងនោះ តែងសម្ដែងពីតួនាទីជាពុទ្ធសាវក ធ្វើសកម្មភាពពុទ្ធសាសនាប្រកបដោយសាមគ្គីភាពស្ថិតក្នុងក្របខ័ណ្ឌច្បាប់អនុញ្ញាត។ អាស្រ័យហេតុនោះអង្គ-អ្នកទាំងនោះតែងសម្ដែងពីលក្ខណៈសាមគ្គីខ្ពស់ បានគណៈកម្មាធិការបក្ស រដ្ឋអំណាចគ្រប់លំដាប់ថ្នាក់វាយតម្លៃខ្ពស់​ពីកិច្ចសហការនៃនិកាយ​ទាំងពីរ។ ជាក់ស្ដែងគឺឱកាសអំណរអនុស្សាវរីយ៍ ទិវាប្រពៃណីរបស់បណ្ដាអង្គការមហាជន ថ្ងៃបុណ្យតេត។ល។ តំណាងឱ្យនិកាយទាំងពីរតែងជួបជុំគ្នាជាក្រុមនិមន្ត-អញ្ជើញទៅសួរសុខទុក្ខប្រសិទ្ធពរដល់​បណ្ដាអង្គភាពលើភូមិសាស្រ្ត។

            តាមថេរដីការបស់ព្រះតេជគុណថាច់រ៉ីយ៍ ប្រធានសមាគមព្រះសង្ឃសាមគ្គីស្នេហា​ជាតិស្រុកកូវង៉ាង ប្រធានគណៈអភិបាលសមាគមពុទ្ធសាសនាវៀតណាមស្រុកកូវង៉ាង៖ ក្នុងសកម្មភាពពុទ្ធសាសនាតែងដាក់ចេញគោលដៅពង្រីកធ្លុងមហាសាមគ្គី។ ផ្ដើមពីនោះប្រមូលផ្ដុំបានព្រះសង្ឃ ដូនជីនៃនិកាយទាំងពីរអនុវត្តល្អតាមធម្មនុញ្ញនៃមជ្ឈិម​សមាគមពុទ្ធសាសនាវៀតណាម ក្នុងនោះមានការពង្រីកល្អសាមគ្គីភាពនៃនិកាយ​ពុទ្ធសាសនាទាំងពីរ៕  

អត្ថបទ‑រូបថត៖ ថាច់សម្បត្តិ