ភាពអធិកអធមនៅមណ្ឌលប្រឡងវត្តពោធិវង្សកំពង់ដូង

     លោកថាច់មុនី អនុប្រធានគណៈជនជាតិខេត្តបានឲ្យដឹងថា៖ ជារៀងរាល់ឆ្នាំ គណៈកម្មាធិការបក្ស គណៈកម្មាធិការ​ប្រជាជនខេត្តតែងបង្កលក្ខណៈងាយស្រួលចំពោះវិស័យសិក្សារៀនសូត្រអក្សរសាស្រ្តខ្មែរ ផ្នែកពុទ្ធិកសិក្សារបស់​សាលាគណខេត្តជាដើម។ វិស័យសិក្សាអប់រំផ្នែកពុទ្ធិកសិក្សាតាមវត្តពុទ្ធសាសនាមហានិកាយខ្មែរបានរួមចំណែក​យ៉ាងសកម្មក្នុងបណ្តុះបណ្តាលប្រភពធនធានមនុស្សសម្រាប់ការអភិវឌ្ឍន៍សេដ្ឋកិច្ច-សង្គមរបស់ខេត្ត ជាពិសេសរួមចំណែកយ៉ាងសកម្មក្នុងការរក្សាអត្តសញ្ញាណជនជាតិខ្មែរ រុងរឿងតទៅអនាគត។

ព្រះឧបជ្ឈាយ៍កិត្តិបណ្ឌិតមហាថាច់អង (ទី ៣ រាប់ពីឆ្វេងទៅស្តាំ) ប្រធានគណៈចាត់តាំងមណ្ឌលប្រឡង ។

     មណ្ឌលប្រឡងមានកិត្តិយសណាស់ដោយបានទទួលស្វាគមន៍ដំណើរនិមន្តមកចូលរួមរបស់ព្រះគ្រូសុទ្ធីវីរបណ្ឌិតចៅគុណជោ ប្រធានការិយាល័យផ្នែកផ្សព្វផ្សាយពុទ្ធសាសនា និងអភិវឌ្ឍសង្គមនៃសាលាសាកលវិទ្យាល័យ​មហាចុឡាឡុងករណ៍រាជវិទ្យាល័យប្រទេសថៃ ។ ព្រះគ្រូសុធីវីរបណ្ឌិតមានព្រះថេរដីកាថា៖ អាត្មារីករាយណាស់ដែលបាន​ចូល​រួមកម្មវិធីប្រឡងពុទ្ធិកសិក្សាមហានិកាយខ្មែរនៅប្រទេសវៀតណាម។ បក្ស រដ្ឋក៏ដូចជាព្រះសង្ឃ និងពុទ្ធបរិស័ទនៅ​ទីនេះ​មានការសាមគ្គីចាត់តាំងកម្មវិធីប្រឡងបានល្អណាស់ បញ្ជាក់ឲ្យឃើញថា ព្រះសង្ឃ និងប្រជាពុទ្ធបរិស័ទនៅទីនេះ​បានសិក្សារៀនសូត្រ និងគោរពប្រតិបត្តិល្អតាមមាគ៌ាពុទ្ធសាសនា។

     ព្រះតេជគុណមហាសម្បត្តិ ព្រះចៅអធិការវត្តគោកទៀម ចាងហ្វាងសាលាភាសាបាលីប្រចាំខេត្តលុបបូរី ប្រទេសថៃដែលមានកំណើតនៅវត្តពោធិវង្សកំពង់ដូង (ផ្នោរដូង) បាននិមន្តមកចូលរួមកម្មវិធីប្រឡងនិង​មានថេរដីកាថា៖ កម្មវិធីប្រឡងពុទ្ធិកសិក្សាថ្នាក់ខេត្តបានចាត់តាំងនៅវត្តកំណើតរបស់អាត្មា ម្ល៉ោះហើយទោះបីមានការរវល់​យ៉ាងណាក៏អាត្មាឆ្លៀតពេលមកចូលរួមដែរ។ អាត្មាមានសទ្ធាជ្រះថ្លាណាស់ដោយបានឃើញសមាគមព្រះ​សង្ឃសាមគ្គី​ស្នេហាជាតិខេត្ត ក៏ដូចព្រះសង្ឃ និងពុទ្ធបរិស័ទវត្តពោធិវង្សកំពង់ដូងសាមគ្គីគ្នាចូលរួមធ្វើកិច្ចការនៅមណ្ឌលប្រឡង​នេះបានល្អគ្រប់យ៉ាង។

ព្រះគ្រូសុទ្ធីវីរបណ្ឌិត ចៅគុណជោ (កណ្តាល) ថតរូបអនុស្សាវរីយ៍ជាមួយព្រះសង្ឃនៅមណ្ឌលប្រឡង។

     ព្រះតេជគុណគឹមម័ន អនុប្រធានសមាគមព្រះសង្ឃសាមគ្គីស្នេហាជាតិស្រុក ប្រធានគណៈកម្មាធិការពុទ្ធិកសិក្សា​ស្រុក​ទីវកឹង ព្រះ​ចៅអធិ​ការរងវត្តពោធិវង្សកំពង់ដូង (ផ្នោរដូង)​មាន​ថេរដីកាថា៖ អា​ត្មា និងពុទ្ធបរិស័ទចំណុះជើងវត្តរីករាយ​ឥតឧបមា ដោយបានការអនុញ្ញាតអំពីគណៈមន្រ្តីសង្ឃខេត្តបានដាក់ឲ្យមណ្ឌលប្រឡងថ្នាក់ខេ​ត្ត​វត្តពោធិវង្សកំពង់ដូង (ផ្នោរដូង)។ នេះហើយជាតិថីសិរីភទ្ទភព្វព្រេងវាសនាសាវតាចារជាប្រវត្តិកំណត់ទុកក្នុងក្រឪបេះដូងនៃ​វត្តពោធិវង្សកំពង់ដូង​ដែលមានអាយុកាលជាង ០៣ សតវត្សរ៍មកហើយ។ ព្រះសង្ឃ និងពុទ្ធបរិស័ទចំណុះជើងវត្តសូមអរព្រះគុណ និងអរគុណចំពោះ​សប្បុរស​ជនទាំងឆ្ងាយជិត ដែលមានសទ្ធាជ្រះថ្លាចូលរួមឧបត្ថម្ភក្នុងកម្មពិធីប្រឡងនេះ។

     ព្រះតេជគុណថាច់ថឿ អនុប្រធានសមាគមព្រះសង្ឃសាមគ្គីស្នេហាជាតិស្រុកទីវកឹងតំ​ណាងឲ្យគណៈមេ​ប្រយោគជាង ២៤០ អង្គ និងរូបមានថេរដីកាថា៖ អក្សរសាស្រ្តជាតិបានរុងរឿងស្ថិតស្ថេរចេរកាលអាស្រ័យ​កុលបុត្រកុលធីតាខ្មែរខិតខំរៀនសូត្រ។ ការចាត់តាំងសម័យប្រឡងយកសញ្ញាបត្រពុទ្ធិកសិក្សាថ្នាក់ខេត្ត​គឺដើម្បីបញ្ជាក់​ក៏ដូចជាលើកស្ទួយការខិតខំរៀនសូត្ររបស់កូនចៅប្រជាពុទ្ធបរិស័ទខ្មែរ។ ក្នុងនាមជាតំណាងគណៈមេប្រយោគចូលរួមបំ​ពេញភារកិច្ចនៅមណ្ឌលប្រឡងនេះ យើងខ្ញុំតែងខិតខំផ្ចិតផ្ចង់ផ្ទៀងផ្ទាត់កែវិញ្ញាសាដោយយុត្តិធម៌ អនុវត្តល្អនៅរាល់ភារកិច្ច​ដែល​គណៈមន្តី្រសង្ឃខេត្តបានប្រគល់ជូន ដើម្បីរួមចំណែកក្នុងការងារជាប្រយោជន៍ដល់ជាតិ និងសាសនា។

     ការចាត់តាំងមណ្ឌលប្រឡងបានញ៉ាំងឲ្យពុទ្ធបរិស័ទទាំងចតុទ្ទិសមានសទ្ធាជ្រះថ្លាចូលរួមជាកុសលជាមួយគណៈចាត់តាំង។ ព្រះតេជគុណត្រឹងយ៉ឹង ព្រះចៅអធិការវត្តនាគវនារាម (ខ្ទឹង) សង្កាត់លេខ ៧ ទីក្រុង ត្រាវិញ ក៏មានសទ្ធាជ្រះថ្លាចូលរួមជាបច្ច័យផ្ទាល់អង្គ និងចលនាពុទ្ធបរិស័ទចូលរួមប្រគេន និងជូនអំណោយដល់បេក្ខសិស្ស និងគណៈមេប្រយោគនៅមណ្ឌលប្រឡង។ ព្រះតេជគុណត្រឹងយ៉ឹងមានថេរដីកា៖ ការប្រឡងរួមផ្នែកពុទ្ធិកមធ្យម​សិក្សាបឋមភូមិ-ទុតិយភូមិថ្នាក់ខេត្តឆ្នាំនេះទុកដូចជាពិធីបុណ្យជាតិរបស់ប្រជាពុទ្ធបរិស័ទខ្មែរយើងដែរ។ ម្ល៉ោះហើយ អាត្មាចូលរួមជាកុសល និងបវារណាពុទ្ធបរិស័ទមកប្រគេនភេសជ្ជ ក៏ដូចជាអំណោយដល់គណៈមេប្រយោគ បេក្ខសិស្សនៅមណ្ឌលប្រឡងនេះ សរុបជាបច្ច័យជាង ១១៣ លានដុង ដើម្បីរួមចំណែកញ៉ាំងឲ្យកម្មវិធី​ប្រឡងនេះប្រព្រឹត្តទៅឲ្យកាន់តែមានភាពឱឡារិកអធិកអធម។

ព្រះតេជគុណត្រឹងយ៉ឹង និងពុទ្ធបរិស័ទរៀបចំទេយ្យវត្ថុប្រគេន និងជូនដល់បេក្ខសិស្ស និងគណៈមេប្រយោគនៅមណ្ឌលប្រឡង។

     ព្រះឧបជ្ឈាយ៍កិត្តិបណ្ឌិតមហាថាច់អង ព្រះមេគណខេត្ត ប្រធានគណៈចាត់តាំងមណ្ឌលប្រឡងមាន​ព្រះថេរដីកាថា៖ ដោយសារអាសន្នរោគកូវីដ-១៩ ម្ល៉ោះហើយ ឆ្នាំសិក្សាកន្លង (២០២១‑២០២២) សាលាគណ​ខេត្តផ្អាកចាត់តាំងសម័យប្រឡង។ ឆ្នាំសិក្សានេះ សាលាគណបានបែងបត់ ការងារយ៉ាងប្រត្យក្ស រួចប្រគល់ជូន​គណៈកម្មាធិការសិក្សាខេត្តចាត់តាំងមណ្ឌលប្រឡងនៅវត្តពោធិវង្សកំពង់ដូង។ រាល់កិច្ចសម្រាប់សម័យប្រឡងនេះ សាលាគណខេត្តបានសហការជាមួយគណៈកម្មាធិការប្រជាជនខេត្ត គណៈជនជាតិខេត្តចាត់តាំងបានត្រឹមត្រូវតាមច្បាប់។ សមាគមស្រុក ក៏ដូចជាវត្តពោធិវង្សកំពង់ដូងសហការជាមួយរដ្ឋអំណាចមូលដ្ឋានអនុវត្តល្អតាមកិច្ចចង្អុលការរបស់ខេត្ត ញ៉ាំងឲ្យសម័យប្រឡង ប្រព្រឹត្តទៅយ៉ាងឱឡារិក អធិកអធម និងសម្រេចជោគជ័យជាស្ថាពរ។

     សម័យប្រឡងនៅវត្តពោធិវង្សកំពង់ដូងចាត់តាំងឡើងតាមរយៈសារលិខិតលេខ ២១៨ ចុះថ្ងៃទី ១៦ មករា ឆ្នាំ ២០២៣ របស់គណៈកម្មាធិការប្រជាជនខេត្ត ស្តីពីចាត់តាំងមណ្ឌលប្រឡងយកសញ្ញាបត្រពុទ្ធិកមធ្យមសិក្សាបឋមភូមិ-ទុតិយភូមិឆ្នាំសិក្សា ២០២២‑ ២០២៣ ៕

អត្ថបទ‑រូបថត៖ សុជា