ផ្តុំរំលឹកមេរៀនឲ្យសិស្សចូលរួមប្រឡងយកវិញ្ញាបនបត្រវិទ្យាល័យឆ្នាំ ២0២២

លោកគ្រូ យ៉េបចន្ថា ចាងហ្វាងសាលាសកលជនជាតិអន្តេវាសិកអនុវិទ្យាល័យ និងវិទ្យាល័យស្រុកថ្កូវមានប្រសាសន៍ថា៖ ដើម្បីបំពាក់បំប៉នចំណេះដឹងឲ្យ​​សិស្សប្រឡងបញ្ចប់វគ្គសិក្សាទី ២ នៃឆ្នាំសិក្សា ២០២១-២០២២ និងប្រឡងយកវិញ្ញាបនបត្រឆ្នាំ ២0២២ គណៈចាងហ្វាងសាលាបានជ្រើសគ្រូបង្រៀនឆ្នើម 0៩ នាក់ដែលមានបទពិសោធន៍ច្រើន ដើម្បីរំលឹកមេរៀនដល់សិស្សថ្នាក់ទី ១២ ។ ពេលវេលារំលឹកមេរៀនចែកចេញជាពីរដំណាក់កាល៖ ដំណាក់កាលទី ១៖ រួមមាន 0៨ សប្តាហ៍ (ចាប់ពីថ្ងៃទី ១១ មេសា ឆ្នាំ ២0២២ ដល់ថ្ងៃទី ០៤ ខែមិថុនា ឆ្នាំ ២0២២)។ អំឡុងពេលនេះ គ្រូបង្រៀនផ្តុំរំលឹកមេរៀនសំខាន់ៗក្នុងកម្មវិធីសិក្សាថ្នាក់ទី ១២ និងណែនាំសិស្សឱ្យធ្វើលំហាត់គំរូវិញ្ញាសាប្រឡងសញ្ញាបត្រវិទ្យាល័យឆ្នាំ ២០២២។ ដំណាក់កាលទី ២ រួមមាន ០៤ សប្តាហ៍ (ចាប់ពីថ្ងៃទី ០៦ ខែមិថុនា ឆ្នាំ ២០២២ ដល់ថ្ងៃទី ០២ ខែកក្កដា ឆ្នាំ ២០២២)។ នេះជាអំឡុងពេលដែលគ្រូបង្រៀនផ្តុំបំប៉នចំណេះសំខាន់ៗក្នុងកម្មវិធីសិក្សាថ្នាក់ទី១០ ទី១១ និងថ្នាក់ ទី១២ និងណែនាំឲ្យសិស្សប្រឡងសាកល្បងតាមគំរូវិញ្ញាសាប្រឡងយកវិញ្ញាបនបត្រឆ្នាំ ២0២២។

លោកគ្រូត្រឹមមិញង្វៀន កំពុងរំលឹកមេរៀនដល់សិស្សថ្នាក់ទី ១២​/A២។

ក្នុងនាមជាគ្រូបង្រៀនដែលសាលាបានជ្រើសរំលឹកមេរៀនដល់សិស្សថ្នាក់ទី ១២ លោកត្រឹមមិញង្វៀន គ្រូបង្រៀនគណិតវិទ្យានៃសាលាសកលជនជាតិអន្តេវាសិកអនុវិទ្យាល័យ និងវិទ្យាល័យស្រុកថ្កូវមានប្រសាសន៍ថា៖ សាលាមានតម្លាភាពត្រង់ដែលសិស្សស្នាក់នៅអន្តេវាសិកដ្ឋាន ដូច្នោះហើយ គ្រូបង្រៀនងាយស្រួលអនុវត្តល្អតាមផែនការរំលឹកមេរៀនឲ្យសិស្សត្រៀមប្រឡងបញ្ចប់ថ្នាក់ទី១២។ បច្ចុប្បន្នខ្ញុំផ្តុំរំលឹកមេរៀនក្នុងកម្មវិធីថ្នាក់ទី១២ ជំនួយឲ្យសិស្សប្រឡងបញ្ចប់វគ្គសិក្សាទី ២ បានល្អដើម្បីទទួលបានពិន្ទុខ្ពស់ចុះឈ្មោះប្រឡងយកវិញ្ញាបនបត្រវិទ្យាល័យឆ្នាំ ២0២២ ឲ្យទាន់ពេលកំណត់។ បន្ទាប់ពីនោះ ខ្ញុំនឹងបន្តរំលឹកមេរៀនគណិតវិទ្យាតាមគំរូវិញ្ញាសាប្រឡងឆ្នាំ ២០២២ របស់ក្រសួងអប់រំ និងបណ្តុះបណ្តាល និងរំលឹកមេរៀនសំខាន់ៗក្នុងកម្មវិធីសិក្សាថ្នាក់ទី ១០ ទី១១ និងទី១២ តាមការកំណត់របស់ក្រសួងអប់រំ និងបណ្តុះបណ្តាល។

ប្អូនថាច់ថាញ់ថាវ ប្រធានថ្នាក់ទី ១២/A២ សាលាសកលជនជាតិអន្តេវាសិកអនុវិទ្យាល័យ និងវិទ្យាល័យស្រុកថ្កូវបានឲ្យដឹង៖ បច្ចុប្បន្នប្អូនៗបានគ្រូបង្រៀនជួយរំលឹកមេរៀនសំខាន់ៗក្នុងកម្មវិធីសិក្សាថ្នាក់ទី ១២ និងឆ្លៀតពេលណែនាំប្អូនៗឲ្យប្រឡងសាកល្បង ធ្វើលំហាត់តាមគំរូ លំហាត់ដែលពិបាកៗ ដើម្បីឲ្យប្អូនត្រៀមចំណេះដឹងជាស្រេចចូលរួមប្រឡងយកវិញ្ញាបនបត្រវិទ្យាល័យឆ្នាំ ២0២២។ បច្ចុប្បន្ននេះ សិស្សថ្នាក់ទី ១២/A២ ទាំងអស់កំពុងយកចិត្តទុកដាក់រៀនមុខវិជ្ជាទោល និងក្រុមមុខវិជ្ជាដែលខ្លួនបានជ្រើស។ ចំពោះប្អូនវិញ ប្រឡងយកវិញ្ញាបនបត្រវិទ្យាល័យឆ្នាំ ២0២២ ប្អូនមានគម្រោងដាក់ពាក្យចូលរៀនមុខជំនាញផ្នែកហិរញ្ញិកធនាគារ។ ម្ល៉ោះហើយ ទន្ទឹមនឹងការរំលឹកមេរៀនមុខវិជ្ជាដែលត្រូវតែប្រឡង (គណិតវិទ្យា អក្សរសាស្ត្រ ភាសាបរទេស) ប្អូនក៏យកចិត្តទុកដាក់រំលឹកមេរៀនក្នុងក្រុមមុខវិជ្ជាវិទ្យាសាស្រ្តធម្មជាតិ។ ប្អូននឹងខិតខំប្រឡងឲ្យទទួលបានពិន្ទុខ្ពស់ ដើម្បីបានជ្រើសចូលរៀនក្នុងវិស័យដែលប្អូនចូលចិត្ត។

គ្រូ និងសិស្សថ្នាក់ទី ១២/A២ កំពុងរំលឹកមេរៀន។

ទាក់ទងដល់ខ្លឹមសារ និងឯកសាររំលឹកមេរៀន លោកគ្រូយ៉េបចន្ថា បានឲ្យដឹងបន្ថែមថា៖ យោងតាមក្រសួងអប់រំ និងបណ្តុះបណ្តាល លក្ខន្តិកៈប្រឡងយកវិញ្ញាបនបត្រវិទ្យាល័យឆ្នាំ ២០២២ នៅប្រក្រតីដូចឆ្នាំកន្លង។ ភាគច្រើននៅក្នុងកម្មវិធីសិក្សាថ្នាក់ទី១២ (ពី ៨៥-៩០% នៃវិញ្ញាសាប្រឡង) ក្រៅពីនោះមាននៅក្នុងកម្មវិធីសិក្សាទី ១០ និងទី ១១។ គំរូវិញ្ញាសាប្រឡងសាកល្បងឆ្នាំនេះលៃលកតាមចំណេះដឹងមុខវិជ្ជានីមួយៗក្នុងកម្មវិធីសិក្សាវិទ្យាល័យតម្រូវឲ្យសមស្របដើម្បីបណ្តាមូលដ្ឋានអប់រំមហាវិទ្យាល័យ ឧត្តមសិក្សា អប់រំវិជ្ជាជីវៈធ្វើជាមូលដ្ឋានសម្រាប់ជ្រើសសិស្សចូលរៀន។

ឆ្នាំ ២0២២ ជាឆ្នាំដំបូងដែលក្រសួងអប់រំ និងបណ្តុះបណ្តាលអនុវត្តការចុះឈ្មោះប្រឡងយកវិញ្ញាបនបត្រវិទ្យាល័យតាមប្រព័ន្ធបន្តផ្ទាល់ ក្នុងរង្វង់ពីថ្ងៃទី 0៤ ខែឧសភា ឆ្នាំ ២0២២ ដល់ម៉ោង ០៥ គត់ ថ្ងៃទី ១៣ ខែឧសភា ឆ្នាំ ២0២២ នៅលើប្រព័ន្ធគ្រប់គ្រងនៃការប្រឡងនៅគេហទំព័រ http://thisinh.thitotnghiepthpt.edu.vn។ តាមរយៈនោះ សាលាសកលជនជាតិអន្តេវាសិកអនុវិទ្យាល័យ និងវិទ្យាល័យស្រុកថ្កូវ មានសិស្សថ្នាក់ទី ១២ ចំនួន ៦៩ នាក់ ចុះឈ្មោះប្រឡង។ ក្នុងនោះ​មានសិស្ស ៥៩ នាក់​​ចុះឈ្មោះ​ប្រឡង​ក្រុមវិញ្ញាសាវិទ្យាសាស្ត្រ​ធម្មជាតិ (រូបសាស្រ្ត គីមីសាស្រ្ត ជីវសាស្រ្ត)សិស្ស ១០ នាក់​បាន​ចុះឈ្មោះ​ប្រឡង​ក្រុមវិញ្ញាសាវិទ្យាសាស្ត្រ​សង្គម (​ប្រវត្តិសាស្ត្រ ភូមិសាស្ត្រ ការអប់រំ​ប្រជាពលរដ្ឋ) ៕

អត្ថបទ‑រូបថត៖ សុជា