ធ្វើអាជីវកម្មសម្ភារសម្រាប់ពិធីបុណ្យផ្សេងៗ និងសម្លៀកបំពាក់ប្រពៃណីខ្មែររួមចំណែកអភិរក្សអត្តសញ្ញាណវប្បធម៌ជាតិ

ព្រះសង្ឃចូលរួមគាំទ្រ​ទិញសម្ភារនៅហាងយស-ម៉ី នារដូវបុណ្យកឋិនទាន។

     ក្នុងរដូវបុណ្យកឋិននេះ តាមយើងខ្ញុំពិនិត្យឃើញហាងយស-ម៉ី នៅអនុសង្កាត់លេខ ៥ សង្កាត់ ទី ៩ ទីក្រុងត្រាវិញមានអតិថិជននិមន្ត និងអញ្ជើញមកជាវបរិក្ខារកឋិនយ៉ាងកុះករ។ ហាងមានលក់ត្រៃចីវរ និងសម្ភារជាច្រើនសម្រាប់ពិធីបុណ្យផ្សេងៗ។ ដោយសារស្រឡាញ់ទំនៀមទម្លាប់ប្រពៃណីខ្មែរ ទើបជំរុញឲ្យប្តីប្រពន្ធបងយស-ម៉ីវិនិយោគទុនលក់ សម្ភារសម្រាប់ធ្វើបុណ្យទានផ្សេងរបស់ជនរួមជាតិខ្មែរ។ ប្តីប្រពន្ធបងផ្សារភ្ជាប់នឹងរបរនេះជាង ១០ ឆ្នាំកន្លងមកហើយ។ ដំបូងប្តីប្រពន្ធបងមិន ទាន់មានដើមទុនច្រើន ម្ល៉ោះហើយបងទិញសម្ភារ បន្តិចបន្តួចដូចជាចីវរ សៀវភៅមហាសង្ក្រាន្តមកសម្រាប់ដើរលក់តាមវត្តអារាមខ្មែរ។ អស់រយៈកាលជាង ១០ ឆ្នាំដែលបានខិតខំលក់ដូរសន្សំសំចៃ បច្ចុប្បន្នប្តីប្រពន្ធបងយស-ម៉ី បើកហាងបាន ០២ កន្លែងសម្រាប់លក់ត្រៃចីវរ និងសម្ភារសម្រាប់ ជនរួមជាតិខ្មែរប្រារព្ធពិធីបុណ្យផ្សេងៗ។ 
     បងថាច់ធីភូម៉ី ម្ចាស់ហាងយស-ម៉ីសំណេះសំណាលថា៖ ប្តីប្រពន្ធខ្ញុំជាជនជាតិខ្មែរ ស្រឡាញ់វប្បធម៌ប្រពៃណីខ្មែរ ប្តីប្រពន្ធខ្ញុំសម្រេចចិត្តធ្វើអាជីវកម្មសម្ភារខ្មែរ ដើម្បីជីវភាពផង ដើម្បីចូលរួមអភិរក្សវប្បធម៌ខ្មែរផង។ ប្តីប្រពន្ធខ្ញុំត្រេកអរណាស់  និងសូមអរព្រះគុណ អរគុណយ៉ាងជ្រាលជ្រៅចំពោះព្រះសង្ឃ មាមីងជនរួមជាតិខ្មែរយើងដែលបានគាំទ្រ ជាវសម្ភារនៅហាងរបស់ខ្ញុំពីយូរលង់មក។ 
     ហាងសំអាងការខ្មែរយ៉ាន់-សុថាត នៅអនុសង្កាត់លេខ ៥ សង្កាត់ទី ៨ ទីក្រុងត្រាវិញ ក្នុងរដូវកឋិននេះក៏មានអតិថិជន មកជួល និងទិញសម្លៀកបំពាក់ច្រើនកុះករ។ ហាងមានលក់ដុំ លក់រាយ និងឲ្យជួលសម្លៀកបំពាក់ប្រពៃណីខ្មែរតាមបែបបុរាណ និងសម័យសម្រាប់ស្លៀកពាក់នៅពិធីមង្គលការ ពិធីបុណ្យ សម្លៀកបំពាក់សម្រាប់រាំរបាំផ្សេងៗ ជាដើម។
     ប្អូនថាច់ធីថាញ់ថាវ នៅភូមិអូរតាពៅ ឃុំដាឡុក ស្រុកចូវថាញ់ ជាអតិថិជនមកជួលសម្លៀកបំពាក់ខ្មែរនៅហាងយ៉ាន-សុថាតបានសំណេះសំណាលថា៖ រដូវកឋិននេះ ពិបាកជួលសម្លៀកបំពាក់ខ្មែរណាស់ ពីព្រោះបុណ្យកឋិនច្រើនប្រារព្ធឡើងនៅ ថ្ងៃសៅរ៍ ថ្ងៃអាទិត្យដូចគ្នា។ ប្អូនស្រឡាញ់ទំនៀម ទម្លាប់ខ្មែរខ្លាំងណាស់នៅថ្ងៃបុណ្យទាន ជាពិសេស គឺបុណ្យកឋិនទានប្អូនតែងស្លៀកពាក់សម្លៀកបំពាក់ប្រពៃណីខ្មែរ។ ឈុតសម្លៀកបំពាក់ប្រពៃណីខ្មែរយើងស្រស់ស្អាត ថ្វីត្បិតតែមិនស្លៀកពាក់ប្រចាំថ្ងៃក៏ដោយប៉ុន្តែប្អូនតែងស្លៀកពាក់នៅក្នុងពិធីបុណ្យទានម្តងៗ។ ប្អូនមានបំណងអភិវឌ្ឍន៍ និងអភិរក្សអត្តសញ្ញាណវប្បធម៌ជនជាតិខ្មែរឲ្យបាន រុងរឿងជានិច្ចនិរន្តរ៍។

បងសុថាត(ទី១ខាងស្តាំ) ម្ចាស់ហាងយ៉ាន់ សុថាតកំពុងឲ្យអតិថិជនជួលសម្លៀកបំពាក់ខ្មែរនារដូវកឋិន ។
     សំណេះសំណាលអំពីវិធីសាស្រ្តទាក់ទាញអតិថិជនខ្មែរឲ្យចូលចិត្តសម្លៀកបំពាក់ខ្មែរ បងស្រី ថាច់ធីសុថាត ម្ចាស់ហាងយ៉ាន់-សុថាតបានឲ្យដឹងថា៖ បច្ចុប្បន្នហាងខ្ញុំមានសម្លៀកបំពាក់ខ្មែរជាច្រើនឈុតតាមបែបបុរាណផង សម័យផង ដើម្បីឆ្លើយតបតាមតម្រូវរបស់អតិថិជនគ្រប់វ័យ។ ក្នុងការលក់ដូរ ក៏ដូចជាឱ្យជួលសម្លៀកបំពាក់ខ្មែរ  ហាងខ្ញុំតែងទិញបំពេញបន្ថែមឈុតថ្មីៗ ទំនើប ពេញនិយមរបស់អតិថិជន ជាពិសេសពេញនិយម របស់អតិថិជនជាយុវវ័យ។ ឃើញយុវវ័យចូលចិត្តសម្លៀកបំពាក់ប្រពៃណីខ្មែរ ខ្ញុំត្រេកអរណាស់ ពីព្រោះសម្លៀកបំពាក់គឺជាអត្តសញ្ញាណវប្បធម៌ របស់ជាតិមួយដែរ។ នេះជាថាមពលជំរុញឲ្យខ្ញុំ ខំពង្រឹងអាជីវកម្មឲ្យបានល្អ ដើម្បីទាក់ទាញយុវវ័យខ្មែរឲ្យចូលចិត្តសម្លៀកបំពាក់ខ្មែរ ដើម្បីចូលរួមអភិរក្សប្រពៃណីខ្មែរស្ថិតស្ថេរចីរកាល។
     ជនជាតិណាក៏មានទំនៀមទម្លាប់ប្រពៃណីវប្បធម៌ផ្សេងៗពីគ្នា ជនរួមជាតិខ្មែរយើងមានទំនៀមទម្លាប់ប្រពៃណី វប្បធម៌ដោយឡែករបស់ជនជាតិខ្មែរផងដែរ។ វប្បធម៌ ទំនៀមទម្លាប់នេះហើយ ដែលជាអត្តសញ្ញាណសម្រាប់សម្គាល់ជនជាតិខ្លួនសម្រាប់ជនបរទេសដឹងស្គាល់លក្ខណៈវប្បធម៌ពិសេសរបស់ជនជាតិគឺស្តែងឡើងតាមរយៈ បណ្តាពិធីបុណ្យទានប្រពៃណី។ ការប្រកបអាជីវកម្មសម្ភារសម្រាប់ពិធីបុណ្យរបស់បងប្អូនជន រួមជាតិខ្មែរ គឺជារបរមួយដែលរួមចំណែកក្នុងការអភិរក្ស និងអភិវឌ្ឍន៍អត្តសញ្ញាណវប្បធម៌ជនជាតិខ្មែរ៕              អត្ថបទ-រូបថត៖ សុជា