ថាច់ស៊ើងសំណាង និងទឹកចិត្តស្នេហាសិល្បៈ

កើតចេញ និងធំដឹងក្តីឡើងក្នុងគ្រួសារកសិករក្រីក្រមួយនៅស្រុកកូវកែ ខេត្តត្រាវិញ  ថ្វីត្បិតជីវភាពជួបនឹងការលំបាកជាមួយនឹងមុខរបរស៊ីឈ្នួល ប៉ុន្តែឪពុកម្តាយរបស់សំណាងតែងតាំងចិត្តព្យាយាមស្វែងរកផ្លូវបញ្ញាសម្រាប់កូនៗ។ ឪពុកម្តាយតែងព្យាយាមពុះពារឆ្លងកាត់ការលំបាកដើម្បី ចិញ្ចឹមកូនៗរៀនសូត្រចប់កម្រិតវិទ្យាល័យ។ មិនធ្វើឱ្យឪពុក​ម្តាយខកបំណង និង​ក្តី​ស្រលាញ់នោះ ​ បងប្អូនសំណាងតែង​តែ​ខិត​ខំ​សិក្សា​រៀនសូត្រ​បាន​ល្អជានិច្ច។  មិន​ត្រឹម​តែ​រៀន​ចប់​ថ្នាក់​ទី​ ១២​ ប៉ុណ្ណោះ​ទេ ថែម​ទាំង​បញ្ចប់​ការសិក្សា​សាកល​វិទ្យាល័យ​ទៀត​ផង។  ដោយ​សារ​តែ​ស្រឡាញ់​ភាសា ​វប្បធម៌​ខ្មែរ និង​បទ​ភ្លេង​ប្រពៃណី​ពីបទចម្រៀងប្រភេទមហោរី សំណាងបាន​ជ្រើសរើស​ និង​បញ្ចប់​ការ​សិក្សាផ្នែក​ភាសា​ខ្មែរ​សាលាសាកលវិទ្យាល័យ​ត្រាវិញ។ សំណាងបាន​ចែករំលែក​ថា៖ ខ្ញុំ​ស្រ​ឡាញ់​​សិ​ល្បៈ​ខ្លាំង​​​ណាស់ ជាពិសេស​គឺចម្រៀង​បទ​បុរាណ បទសម័យ ឥឡូវ​ខ្ញុំ​ក៏​ច្រៀងដែរ ប៉ុន្តែ​តិច​តួច​ទេ។  ហើយ​ខ្ញុំចាត់ទុកការចូលចិត្តនេះដូច​ជា​ ​ការ​កម្សាន្តដើម្បីធ្វើឱ្យជីវិតខ្ញុំកាន់តែប្រសើរឡើង។

ប្អូនថាច់សំណាងចូលរួមពីធីប្រឡងមហោស្រពចម្រៀងប្រជាប្រិយតំបន់វាលរាបទន្លេគីវឡុងលើកទី ២ ឆ្នាំ ២០២២។

ដោយសារស្រឡាញ់សិល្បៈនិងចង់ចែករំលែកក្តីស្រឡាញ់នេះទៅកាន់មិត្តភ័ក្តិដែលមានចំណាប់អារម្មណ៍ដូចខ្ញុំ កាលខ្ញុំនៅជានិស្សិតមហាវិទ្យាល័យផ្នែកភាសា វប្បធម៌ វិចិត្រសិល្បៈខ្មែរណាមបូ ការចាត់តាំងប្រកួតប្រជែងឬដោះដូរសិល្បៈរបស់សាលាម្តងៗ លើកណាខ្ញុំក៏បានចូលរួមផងដែរ។ ដោយសារមានរូបរាងតូចស្តើង ទឹកមុខស្លូតបូត ពាក់សម្លៀកបំពាក់ប្រពៃណីនិងរូបភាពបុរសខ្មែរគ្រងឈុតប្រពៃណី និងច្រៀងបទចម្រៀងដ៏ពីរោះ សំណាងតែងធ្វើឱ្យទស្សនិកជន និងគណៈកម្មការប្រឡងចាប់អារម្មណ៍យ៉ាងខ្លាំង  ។ សំណាងបានឱ្យដឹងថា៖ ទោះបីគ្រួសារខ្ញុំមិនមានទំនៀមទម្លាប់ក្នុងវិស័យសិល្បៈក៏ដោយ ប៉ុន្តែខ្ញុំស្រឡាញ់ការច្រៀងរាំតាំងពីតូច រួមជាមួយនឹងការគាំទ្ររបស់គ្រួសារ ខ្ញុំក៏បានក្លាយជាមនុស្សម្នាក់ដែលធ្លាប់ស្គាល់ក្នុងបណ្ដាពិធីប្រឡងទាក់ទងដល់តន្ត្រីបុរាណដូចជា៖ ចម្រៀងខ្មែរ ភ្លេងការ មហោរី បាសាក់។ល។ គ្រួសារខ្ញុំអ្នកណាក៏ស្រឡាញ់សិល្បៈ ជាពិសេសចម្រៀង ខ្ញុំចេះច្រៀងតាំងពីនៅរៀនថ្នាក់អនុវិទ្យាល័យម៉្លេះ ខ្ញុំច្រៀងតាមអារម្មណ៍ ស្តាប់តារាចម្រៀងខ្មែរហើយហាត់ច្រៀងដោយខ្លួនឯង និងបានបងស្រីខ្ញុំ បង្ហាញ់ពីរបៀបដកដង្ហើមពេលច្រៀង ខ្ញុំមិនដែលបានរៀននៅសាលាបណ្តុះបណ្តាលណាមួយឡើយ។  គ្រាន់​តែ​ច្រៀង​តាម​ចំណង់​ចំណូល​ចិត្ត​របស់​ខ្លួន​ប៉ុណ្ណោះ។

ឆ្នាំ ២០១៨ កាលពីនៅជានិស្សិតសាលាសកលវិទ្យាល័យត្រាវិញ ក្នុងឱកាសមហោស្រពអបអរសាទរបុណ្យចូលឆ្នាំថ្មីប្រពៃណីជាតិខ្មែរនៅស្រុកថ្កូវ សំណាងបានចុះឈ្មោះចូលរួមប្រកួតប្រជែង និងទទួលបានមេដាយប្រាក់ខាងបទចម្រៀង។  ក្នុង​ឆ្នាំ​នេះដដែល​សំណាងទទួលបាន​ជ័យលាភី​លេខ ​១ ពីបទ​ចម្រៀង “បងអុំទូកស៊យ”- ប្រភេទមហោរី ក្នុង​ពិធីប្រឡង​បន្លឺសំឡេងនិស្សិតអបអរសាទរបុណ្យចូលឆ្នាំថ្មីរបស់សាលា ។

ប្អូនថាច់សំណាងចូលរួមពីធីប្រឡងមហោស្រពចម្រៀងប្រជាប្រិយ។

រួមជាមួយចំណង់ចំណូលចិត្ត និងស្នេហាសិល្បៈរបស់សមាជិកគ្រួសារទាំងអស់  នៅខែតុលាឆ្នាំ ២០១៨ សំណាង និងបងស្រីបានចុះឈ្មោះចូលរួមប្រឡងមហោស្រពចម្រៀងប្រជាប្រិយខ្មែរតំបន់វាលរាបទន្លេគឺវឡុងលើកទី ១ ខេត្តសុកត្រាំង ជាមួយបទចម្រៀងភ្លេងការ និងទទួលបានជ័យលាភីលេខ ៣។ ជាមួយនឹងប្រភេទចម្រៀងភ្លេងការនេះដែរសំណាងឈ្នះរង្វាន់លើកទឹកចិត្តក្នុងមហោស្រពចម្រៀងប្រជាប្រិយតំបន់វាលរាបទន្លេគឺវឡុងលើកទី ២ ឆ្នាំ ២០២២ បានចាត់តាំងឡើងនៅខេត្តសុកត្រាំជាមួយនឹង “បទសំពៅថយ”​។ ក្រៅ​ពី​នេះ ​បុរស​ជនជាតិខ្មែរមួយ​រូប​នេះ​សម្រេច​បាន​សមិទ្ធផល​គួរ​ឱ្យ​កត់​សម្គាល់​ក្នុង​ការ​ប្រកួតប្រឡងប្រណាំង​ផ្សេង​ៗ​ ទៀត​ផង​ដែរ ។

បច្ចុប្បន្នសំណាងជាបុគ្គលិកផ្នែកលក់អនឡាយ និងចិញ្ចឹមសត្វនៅផ្ទះ។  ពេលសួរអំពីគោលបំណងរបស់ខ្លួន សំណាងបានចែករំលែកថា៖ “គោលបំណងរបស់ខ្ញុំគឺចង់ធ្វើជាគ្រូបង្រៀនមុខវិជ្ជាដែលខ្ញុំបានរៀន បង្រៀនផង និងហាត់ច្រៀងបទចម្រៀងប្រពៃណី ពេលទំនេរអាចច្រៀងឱ្យប្អូនៗស្ដាប់​គួរ​ឱ្យ​ចាប់​អារម្មណ៍​ខ្លាំង​ណាស់ ។  បងស្រីរបស់សំណាង (ថាច់ស៊ើងណាវី) បច្ចុប្បន្ននេះជាសហការីទូរទស្សន៍ VTV5 ហើយប្អូនប្រុសរបស់គាត់ (ថាច់ស៊ើងសម្បត្តិ) កំពុងបំពេញកាតព្វកិច្ចយោធានៅខេត្តដុងណាយ។

ជាមួយនឹងទឹកចិត្តស្នេហាសិល្បៈ ការខិតខំប្រឹងប្រែង និងទេពកោសល្យដែលមានស្រាប់នោះ សូមប្រសិទ្ធពរថាច់ស៊ើងសំណាងនឹងបានក្លាយជាអ្នកដែលបំផុសគំនិតយុវជនអំពីបទភ្លេងតន្ត្រីប្រពៃណីរបស់ជនជាតិយើង៕

អត្ថបទ‑រូបថត៖ សុខា