គោលនយោបាយឥណទានឧបត្ថម្ភមាមីងខ្មែរនៅស្រុកទីវកឹងពង្រីកសេដ្ឋកិច្ច

លោកកាវតៀងដង(ទី ១ ខាងស្តាំ)សំណេះសំណាលអំពីការពង្រីកសេដ្ឋកិច្ចគ្រួសារលោកថាច់រ៉ូន។

ដោយកំណត់ថាការងារកាត់បន្ថយភាពក្រីក្រស្ថិរភាពជាភារកិច្ចនយោបាយសំខាន់មួយ  កន្លងហើយធនាគារគោលនយោបាយសង្គមស្រុកទីវកឹង​ ផ្តុំកម្លាំងកេណ្ឌប្រមូល​បណ្តាប្រភពទុនអនុវត្តល្អគោលនយោបាយឥណទានរបស់រដ្ឋដើម្បី​ឧបត្ថម្ភប្រជាជនក្នុង​នោះមានមាមីងខ្មែរពង្រីកសេដ្ឋកិច្ច កែលម្អជីវភាព ។ លោក កាវតៀងដង  នាយកធនាគារគោលនយោបាយសង្គមស្រុក​ទីវកឹងមានប្រ​សាសន៍ថា៖ កន្លងហើយ ទោះបីជួបការលំបាកច្រើនដោយសារអាសន្នរោគកូវីដ-១៩ ប៉ុន្តែដោយបានការ​យកចិត្តទុកដាក់ ចង្អុលការរបស់គណៈកម្មាធិការបក្ស ​រដ្ឋអំណាចគ្រប់លំថ្នាក់រួមជាមួយការខិតខំរបស់ធនាគារគោលនយោបាយសង្គមស្រុក ក្នុងការកេណ្ឌប្រមូលបណ្តាប្រភពទុន សកម្មក្នុងការរំសាយទុនបានទាន់ពេលសុវត្ថិភាព បង្កលក្ខណៈឲ្យមាមីងមានដើមទុនពង្រីកការផលិត។

ភូមិអូរខ្នារ ឃុំហ៊ីវទ្រុងជាភូមិមួយក្នុងចំណោមភូមិដែលមានមាមីង​ខ្មែរជាច្រើនបុល​ទុន​ពីធនាគារគោលនយោបាយសង្គមស្រុកដើម្បីពង្រីកការផលិត កែលម្អជីភាព។ មីងង្វៀងធីកឹមប្រធានក្រុមប្រិតសំចៃ និងបុលទុនភូមិអូរខ្នារបានឲ្យដឹងថា៖ បណ្តាគ្រួសារមាមីងខ្មែរក្នុងភូមិដែលបុលទុនអាទិភាពពង្រីកការផលិតរួចផុតពីភាពក្រីក្រស្ថិរភាពដូចគ្រួសារ៖ លោកថាច់រ៉ូន មីងថាច់ធីគឹមឡួង សឺនធីម៉ែន គឹមធី​បុណ្យ ថាច់​ជួន។ល។​ មកទល់ដំណាច់ខែមីនា ឆ្នាំ ២0២២ ភូមិមានគ្រួសារក្រីក្រ និងជិតក្រ ៣៩ គ្រួបានបុលទុនពីធនាគារគោលនយោបាយសង្គមស្រុក  ក្នុងនោះមានគ្រួសារមាមីង​ខ្មែរ ១៧ គ្រួសរុបប្រាក់បំណុល​ជាង ១,៦ ពាន់​លាន​ដុង។

គ្រួសារ ថាច់រ៉ូននៅភូមិ អូរខ្នារជាគ្រួសារក្រីក្រមួយគ្រួដែលបានបានបុលទុនអាទិភាពពីធនាគារគោលនយោបាយសង្គមវិនិយោគក្នុងការចិញ្ចឹមសត្វ ពង្រីកការផលិតរួចផុតពីភាពក្រីក្រកាលពីឆ្នាំ ២0២0។  មីង ថាច់ធីស៊ើង (ម្តាយលោកថាច់រ៉ូន) រីករាយឲ្យដឹងថា៖ អាស្រ័យបានធនាគារបង្កលក្ខណៈឲ្យកូនខ្ញុំបុលទុនអាទិភាព ទើបគ្រួសារខ្ញុំមានដើមទុនសម្រាប់ពង្រីកសេដ្ឋកិច្ច ជីវភាពគ្រួសារបានស្ថិរភាពដូចបច្ចុប្បន្ន។ ឆ្នាំ ២០១៤ កូន​ខ្ញុំ​បុលទុនបាន ​១៥​ លានដុងផ្សំនឹង​ប្រាក់សន្សំសំចៃ ០៧​ លាន​ដុងរបស់គ្រួសារទៀត ក៏ទិញបានគោញីល្អ ០២​ ក្បាល។ មក​ទល់​ពេល​នេះ គ្រួសារ​ខ្ញុំ​មាន​គោ​ ០៥​ ក្បាល។ ដោយសារ​ចង់​វិនិយោគ​ទិញ​សម្ភារ​ផលិត គ្រួសារខ្ញុំក៏​លក់​គោ​ ០៣ ក្បាល តម្លៃ​ជាង ៤៥ លាន​ដុង ។ បានប្រាក់នោះមក គ្រួសារខ្ញុំក៏ទិញម៉ាស៊ីនជ្រួយដីតម្លៃជាង ៣0 លានដុង ប្រាក់ក្រៅពីនោះ ខ្ញុំទិញមាន់ ទាមកចិញ្ចឹម ។ល។ ក្រៅពីរបរចិញ្ចឹមសត្វ ស៊ីឈ្នួលជ្រួយដីឲ្យមាមីងក្នុងភូមិតាមរដូវស្រូវមួយរដូវៗ កូនខ្ញុំនៅទាំងទៅធ្វើជាងកំបោររក​ប្រាក់​ចំណូល​បន្ថែម  ដើម្បីកសាង​ជីវភាព​គ្រួសារឲ្យ​រីក​ចម្រើនជាងទៀត។

លោកកាវតៀងដង (ទី ១ ខាងស្តាំ) សំណេះសំណាលជាមួយគ្រួសារលោកថាច់រ៉ូន។

លោក ថាច់ចៀង ប្រធានគណៈកម្មការប្រជាជនភូមិអូរខ្នារបានឲ្យដឹងថា៖ អាស្រ័យអនុវត្តល្អគោលនយោបាយរបស់បក្ស និងរដ្ឋ ក្នុងនោះ មានគោលនយោបាយឥណទានទើបអត្រាគ្រួសារក្រីក្ររបស់ភូមិមានការថយចុះគួរឲ្យកត់សម្គាល់។ ប្រសិនបើកាលពីឆ្នាំទើបចែកភូមិ (២០០៤) ទូទាំងភូមិមានគ្រួសារក្រីក្រ ១៦៥ គ្រួសារ ស្រូបយកអត្រាជាង ៧២% នៃចំនួនគ្រួសាររួមក្នុងភូមិលុះដល់ឆ្នាំ ២០២២ ភូមិនៅមានគ្រួសារក្រីក្រត្រឹមតែ ០៧ គ្រួសារប៉ុណ្ណោះ ភាគច្រើនជាគ្រួសារស្ថិតក្នុងក្របខ័ណ្ឌគាំពារសង្គម។

លោកកាវតៀងដងបានឲ្យដឹងបន្ថែមទៀតថា៖ ឆ្នាំ ២០២២ ធនាគារគោលនយោបាយសង្គមស្រុកបន្តកិច្ចសហការជាមួយបណ្តាផ្នែកមានសមត្ថកិច្ចស្រុក គណៈកម្មាធិការប្រជាជនបណ្តាឃុំ ទីប្រជុំជន ដើម្បីអនុវត្តល្អគោលនយោបាយឥណទានអាទិភាពសម្រាប់គ្រួសារប្រជាជនក្រីក្រ ជិតក្រ និងមុខសញ្ញាផ្សេងៗទៀតរបស់ខេត្តសមស្របទៅនឹងមូលដ្ឋានក្នុងដំណាក់កាលនីមួយៗ។ ទន្ទឹមនឹងនោះ ធនាគារក៏បង្កើនការបណ្តុះបណ្តាលបំពាក់បំប៉នបុគ្គលិកនៃប្រព័ន្ធធនាគារគោលនយោបាយសង្គមស្រុកអនុវត្តល្អការងារគោលនយោបាយឥណទានសង្គមក្នុងស្ថានភាពថ្មី។   

ឆ្នាំ ២0២២ ធនាគារគោលនយោបាយសង្គមស្រុកទីវកឹងបន្តកិច្ចបង្កលក្ខណៈជូនបណ្តាគ្រួសារប្រជាជនក្នុងនោះមានគ្រួសារមាមីងខ្មែរបុលទុនអាទិភាពដើម្បីពង្រីកការផលិត។ គិតមកដល់ដំណាច់ខែមីនា ឆ្នាំ ២0២២ ទូទាំងស្រុកមានគ្រួសារប្រជាជន ៦៩២ គ្រួបុលទុនពីធនាគារគោលនយោបាយសង្គមស្រុក ប្រាក់បំណុលជាង ២0,៣ ពាន់លានដុង។ ក្នុង​នោះ​មាន​គ្រួសារមាមីង​ខ្មែរ ១៧១​ គ្រួសារ​ សរុបប្រាក់បំណុល​ជាង ៤,៦​ ពាន់​លាន​ដុង៕

អត្ថបទ‑រូបថត៖ សុជា