គិតគូរលំនៅឋានជូនសមាជិកា

គ្រួសារមីង ថាច់ធីញ៉ាង នៅភូមិស្មោញ ឃុំឡុងឌឹកទីក្រុង ត្រាវិញជាគ្រួសារជួបការលំបាកខ្លាំងបានសមាគមសហព័ន្ធន៍នារីខេត្តជ្រើសឧបត្ថម្ភលំនៅឋានសំណេះសំណាលដោយរំភើប​ចិត្ត​ថា៖ “ ជីវភាពប្តីប្រពន្ធខ្ញុំពឹងទៅលើការងារស៊ីឈ្នួលរក​ប្រាក់ដើម្បីផ្គត់ផ្គង់ជីវភាពគ្រួសារ ។ ប៉ុន្តែជិត ០​១ ​ឆ្នាំកន្លងមក​ ​ខ្ញុំ​មានជំងឺដាច់សរសៃ​ឈាម​ក្នុង​ក្បាល ចំនួនប្រាក់ដែលគ្រួសារខំ​សន្សំ​ទុកពីមុនមកក៏​យក​ទៅ​ព្យាបាលជំងឺឲ្យខ្ញុំអស់។ ម្យ៉ាងវិញទៀត តាំងពីខ្ញុំមានជំងឺមក ប្តីខ្ញុំក៏នៅផ្ទះមើលថែខ្ញុំ ជីវភាពជួបការលំបាកច្រើនបានព្រឹកខ្វះល្ងាច ធ្វើម្តេចមានប្រាក់សាងសង់លំនៅឋាន។ អាស្រ័យបានការយកចិត្តទុកដាក់ឧបត្ថម្ភនេះហើយទើបគ្រួសារខ្ញុំមានលំនៅឋានរឹងមាំ ហើយស្ងប់ចិត្តដើម្បីបន្តព្យាបាលជំងឺឲ្យឆាប់បានជាសះស្បើយ។

ចំពោះសមាគមសហពន្ធន៍នារីស្រុកចូវថាញ់វិញ តាំងពីដើមឆ្នាំ ២០២២ មកទល់បច្ចុប្បន្ន សមាគមគ្រប់លំដាប់ថ្នាក់ក្នុងស្រុកចលនាបណ្តាអាជីវកម្ម សប្បុរសជនឧបត្ថម្ភកសាងផ្ទះមេត្តាធម៌បាន ០៥ ខ្នង ជូនសមាជិកាដែលកំពុងជួបការលំបាកអំពីលំនៅឋាន សរុបតម្លៃ ២៥០ លានដុង។

មីងថាច់ធីញ៉ាង (ខាងស្តាំ) ក្នុងលំនៅឋានថ្មីដែលសមាគមសហព័ន្ធន៍នារីខេត្តឧបត្ថម្ភ។

គ្រួសារសមាជិកា ស៊ើងធីធីរ (នៅភូមិដំរីឆ្លង ឃុំម៉ីចាញ់ ស្រុកចូវថាញ់) ជាសមាជិកាក្រីក្រ បានសមាគមស្រុកឧបត្ថម្ភលំនៅឋាន។ ប្តីរបស់បងធីរបានស្លាប់មុននេះ ០២ ឆ្នាំដោយសារគ្រោះថ្នាក់ចរាចរណ៍។ បងធីររស់នៅជាមួយម្តាយបង្កើតដែលមានអាយុជាង ៧0 ឆ្នាំ។ ដោយបានការយកចិត្តទុកដាក់ឧបត្ថម្ភពីសំណាក់សមាគមសហព័ន្ធន៍នារីស្រុកចូវថាញ់ ពីរនាក់ម្តាយ និងកូនមានលំនៅឋានកក់ក្តៅ មានកម្លាំងចិត្ត និងក្តីសង្ឃឹមដើម្បីជម្នះរាល់ការលំបាកក្នុងជីវភាព។

អ្នកស្រី គាងធីមិញង្វៀត ប្រធានសមាគមសហព័ន្ធន៍នារីខេត្តមានប្រសាសន៍ថា៖ រយៈពេលកន្លង សមាគមនារីគ្រប់លំដាប់ថ្នាក់ក្នុងខេត្តមានវិធីសាស្រ្តធ្វើសកម្មភាពច្នៃប្រតិដ្ឋជានិច្ច មានខ្លឹមសារក៏ដូចជារូបភាពសកម្មភាពជាក់ស្តែង ដើម្បីរួមចំណែកក្នុងការគិតគូរដល់ជីវភាពសមាជិកាបងប្អូននារី។ ក្នុងនោះ អនុវត្តសង្គមូបនីយកម្មចលនាបណ្តាប្រភពកម្លាំងឧបត្ថម្ភ “ផ្ទះមេត្តាធម៌” បានប្រជាជនគ្រប់លំដាប់ថ្នាក់ចូលរួម ឧបត្ថម្ភ គ្រាំទ្រយ៉ាងពេញទំហឹង។ “លំនៅឋានមេត្តាធម៌” បានសាងសង់ឡើង និងជូនដល់សមាជិកាក្រីក្រ មិនត្រឹមតែបញ្ជាក់អំពីការយកចិត្តទុកដាក់ពីសំណាក់សមាគមគ្រប់លំដាប់ថ្នាក់ហើយនៅទាំងជំរុញទឹកចិត្តឲ្យបងប្អូននារីក្រីក្រខិតខំពលកម្ម ផលិតកម្ម កសាងជីវភាពគ្រួសារ រួមចំណែកជាមួយ នឹងបក្ស រដ្ឋអំណាចអនុវត្តល្អភារកិច្ចពង្រីកសេដ្ឋកិច្ច‑សង្គមនៅមូលដ្ឋាន៕

អត្ថបទ‑រូបថត៖ សុជា