ខេត្តត្រាវិញរក្សាខ្ជាប់ជំនឿសាសនាអំណរពិធីពិសាខបូជា

ព្រះតេជគុណ ថាច់រឿន ប្រធានសមាគមព្រះសង្ឃសាមគ្គីស្នេហាជាតិស្រុកយ្វៀងហាយ  ព្រះចៅអធិការវត្តសត្ថារីនទី (ប្រខុប) ឃុំង៉ូវឡាក ស្រុកយ្វៀងហាយ មានថេរដីកាឱ្យដឹងថា៖ ទោះបីការចាត់តាំងពិធីបុណ្យពិសាខបូជាគ្មានកិច្ចចង្អុលការរបស់សមាគមព្រះសង្ឃសាមគ្គីស្នេហាជាតិដល់បណ្ដាវត្តពីរបៀបចាត់តាំងក៏ដោយ ប៉ុន្តែ ១៤ វត្តខ្មែរលើភូមិសាស្រ្តស្រុកតែងចាត់តាំងដោយហ្មត់ចត់ ក្នុងនោះមានចងបដារូបភាពអំពីព្រះពុទ្ធទ្រង់ប្រសូត ត្រាស់ដឹង បរិនិព្វាន។ល។ ចំពោះវត្តប្រខុប នៅបណ្ដាឆ្នាំដែលមិនទាន់ឥទ្ធិពលដោយអាសន្នរោគកូវីដ-១៩ ក៏ចាត់តាំងក្បួនដង្ហែជុំវិញភូមិស្រុក ដើម្បីឱ្យជនគ្រប់រូបកំណត់ដឹងបានពីពិធីមួយដែលទាក់ទងដល់ជំនឿសាសនារបស់ជនរួមជាតិខ្មែរ។ ឆ្នាំនេះ ទប់ស្កាត់បានអាសន្នរោគ រាល់សកម្មភាពបានវិលត្រឡប់មកសភាពធម្មតា វត្តមានការមមាញឹកយ៉ាងខ្លាំងក្នុងការកសាង ជួសជុលបណ្ដាសំណង់មួយចំនួន ម៉្លោះហើយមិនអាចចាត់តាំងក្បួនដង្ហែឡើយ។ ប៉ុន្តែរាល់ពិធីកិច្ចទាក់ទងដល់បុណ្យពិសាខបូជាតែងបានវត្តចាត់តាំងត្រឹមត្រូវតាមព្រះពុទ្ធសាសនា។

នៅតាមវត្តខ្មែរតែងចងបដារូបគំនូរព្រះពុទ្ធអំណរបុណ្យពិសាខបូជា។

កាលនៅជាកុមារភាព ព្រះពុទ្ធមាននាមថា សិទ្ធត្ថ (មានន័យថា​អ្នកសម្រេចប្រយោជន៍តាមបំណង) ជារាជបុត្តរបស់ព្រះបាទសុទ្ធោទនៈ និងមហេសីគឺព្រះនាងមាយា។ សិទ្ធត្ថកុមារទ្រង់ប្រសូតនៅថ្ងៃសុក្រ ១៥ កើត ពិសាខ ៦២៣ ឆ្នាំមុនគ្រិស្តសករាជ នៅឧទ្យានលុម្ពិនី។ អាយុ ២៩ ឆ្នាំសិទ្ធត្ថកុមារចេញចាកវិមានចូលទ្រង់ព្រះផ្នួស។  អាយុ ៣៥ ឆ្នាំ នៅថ្ងៃ ១៥ កើតខែពិសាខបានត្រាស់ដឹងសម្មាសម្ពោធិញាណ។ អាយុ ៨០ ឆ្នាំ​ ក៏នៅក្នុងថ្ងៃ ១៥ កើតខែពិសាខដែរ ព្រះអង្គយាងចូលបរមនិព្វាន។ ដូច្នេះហេតុទាំង ៣ គឺ ប្រសូត ត្រាស់ដឹង និងបរិនិព្វានគឺសុទ្ធតែក្នុងខែពិសាខ ខុសប្លែកតែឆ្នាំប៉ុណ្ណោះ។ ព្រះពុទ្ធមានព្រះបរមនាមជាច្រើនដូចជា៖ ព្រះដ៏មានព្រះភាគ ព្រះលោកនាថ សក្យមុនី គោត្តម ជិនស្រី។ល។ បច្ចុប្បន្ន ឱវាទប្រៀនប្រដៅរបស់ព្រះអង្គ សាយភាយទៅដល់ប្រទេសជាច្រើន នៅលើពិភពលោក ក្នុងនោះមានប្រទេសខ្លះចាត់ទុកពុទ្ធសាសនាជាសាសនារបស់រដ្ឋ។

ដើម្បីរំលឹកដល់ព្រឹត្តិការណ៍ទាំង ៣ ខាងលើ នៅតាមបណ្ដាវត្តខ្មែរលើភូមិសាស្រ្តខេត្ត (១៤៣ វត្ត) និងវត្តខាងមហាយានតែងមានពុទ្ធបរិស័ទជាច្រើនធ្វើដំណើរទៅកាន់វត្តដើម្បីអនុវត្តពិធីកិច្ចបុណ្យពិសាខបូជា។ ចំពោះពុទ្ធបរិស័ទខ្មែរ ពេលថ្ងៃតែងយកចង្ហាន់ទៅវត្តប្រគេនព្រះសង្ឃ ស្ដាប់ព្រះធម៌ទេសនាដើម្បីបំបាត់ភាពស្មុគស្មាញ់នៅក្នុងចិត្ត ព្រមទាំងសាងអំពើជាកុសលសម្រាប់ខ្លួន និងកម្ចាត់ចោល លោភ ទោស មោហ ដែលបង្កប់នៅក្នុងខ្លួន។ ​ ពេលរាត្រី ពួកគាត់មកជួបជុំគ្នាបន្តទៀតដើម្បីធ្វើកិច្ចនមស្ការព្រះរតនត្រ័យ និមន្តព្រះសង្ឃសូត្រមន្ត។ បន្ទាប់មកចំពោះអង្គ លោកអ្នកពុទ្ធបរិស័ទដែលមានទេពកោសល្យខាងស្មូតធម្មសង្វេគ ក៏នាំគ្នាសូត្រធម្មសង្វេគរំលឹកដល់ម្ចាស់សាសនា គឺព្រះពុទ្ធដែលបានស្វែងរកឃើញសច្ចធម៌ដឹកនាំសត្វឆ្ពោះទៅការសាងអំពើល្អ។

រូបគំនូរសិទ្ធត្ថកុមារទ្រង់ប្រសូត។

ដូច្នេះអំណរពិធីបុណ្យពិសាខបូជា ឬហៅថា «បុណ្យប្រជុំហេតុបីយ៉ាង» គឺសំដៅដល់កាលពី ២៦៤៦ ឆ្នាំមុនដែលសិទ្ធត្ថកុមារទ្រង់ប្រសូត ២៦០១ ឆ្នាំសិទ្ធត្ថកុមារបានត្រាស់ដឹងជាព្រះសម្មាសម្ពុទ្ធ និង ២៥៦៦ ឆ្នាំដែលព្រះសម្មាសម្ពុទ្ធបរិនិព្វាន។ ក្នុងថ្ងៃបុណ្យពិសាខាបូជា ចំពោះវត្តដែលមានការចាត់​តាំងបើកថ្នាក់ពុទ្ធិកសិក្សាឱ្យព្រះសង្ឃរៀនសូត្រក៏ចាត់ទុកថ្ងៃនោះ ជាថ្ងៃត្រៀមបម្រុងឱ្យការចូលរៀន។ ហេតុនោះ ក្នុងរាត្រីដែលពុទ្ធបរិស័ទនិមន្តព្រះសង្ឃសូត្រមន្តពិសាខបូជា ក៏ជារាត្រីសូត្រមន្តត្រៀមបម្រុងបើកសាលា លុះដល់ថ្ងៃ ១ រោចខែពិសាខសមណសិស្ស‑សិស្សក៏ចូលរៀនថ្នាក់ពុទ្ធិកសិក្សាតទៅ៕

អត្ថបទ‑រូបថត៖ ថាច់សម្បត្តិ