ជនរួមជាតិខ្មែរឃុំហ៊ីបហ្វាសាមគ្គីរួមកម្លាំងកសាងជនបទថ្មី

ផ្លូវគមនាគមន៍ជនបទនៅតំបន់ជនរួមជាតិខ្មែរ។ រូបថត៖ ឌិញកាញ់

         លោកថាច់សាហ្វី កម្មាភិបាលចូលនិវត្តន៍នៅឃុំហ៊ីបហ្វាបានឲ្យដឹងថា៖ អាស្រ័យដោយគោលនយោបាយឧបត្ថម្ភរបស់រដ្ឋជាច្រើនដូចជា៖ ឧបត្ថម្ភទុន ផ្ទេរជូនវិទ្យាសាស្រ្ត-បច្ចេកទេស ឧបត្ថម្ភលំនៅឋាន ដីសង់ផ្ទះ ជាពិសេសគឺការងារកាត់បន្ថយភាពក្រីក្រ ម៉្លោះហើយជីវភាពរបស់មាមីងខ្មែរនៅឃុំហ៊ីបហ្វាមានការវិវឌ្ឍជាលំដាប់។ ឆ្លងតាមរយៈបណ្ដាកិច្ចចលនាប្រឡងប្រណាំងស្នេហាជាតិ ប្រឡងប្រណាំងពលកម្មផលិត តាំងពីការចូលរួមកម្លាំងថ្ងៃពលកម្ម រួមវិភាគទានជាថវិកាកសាងសំណង់ មាមីងជនរួមជាតិខ្មែរស្ម័គ្រចិត្តបរិច្ចាគដីសម្រាប់កសាងបណ្តាសំណង់ គម្រោងការ ដើម្បីផលប្រយោជន៍រួមរបស់មូលដ្ឋាន។

        លោកមាថាច់ផាក កសិករផលិតពូកែរបស់ឃុំហ៊ីបហ្វាចែករំលែកថា៖ ក្នុងរយៈកាលកន្លងហើយ គណៈកម្មាធិការប្រជាជនឃុំបានបង្កើនការផ្សព្វផ្សាយដល់កម្មាភិបាល បក្ខជននិងប្រជាជន​អំពីការកសាងជនបទថ្មី។ ឆ្លងតាមនោះ មានបុគ្គល សមូហភាពជាច្រើនចូលរួមដោយបណ្តាសំណង់ ការងារជាក់ស្តែង ក្នុងនោះមានសំណង់គមនាគមន៍ជនបទបានកសាងដោយមានការចូលរួមរបស់មាមីងជនរួមជាតិខ្មែរ បំផុតគឺស្មារតីសាមគ្គីរបស់ប្រជាជនធ្វើម្ចាស់ការក្នុងការកសាងជនបទថ្មី។ ព្រះតេជគុណថាច់តារា ព្រះចៅអធិការវត្តកងចក្តារាម(ធ្លក) ឃុំហ៊ីបហ្វា អនុប្រធានសមាគមព្រះសង្ឃសាមគ្គីស្នេហាជាតិស្រុកកូវង៉ាងមានព្រះសង្ឃដីកាថា៖ គោលការណ៍កសាងជនបទថ្មីរបស់បក្ស និងរដ្ឋសមស្របជាមួយបំណងរបស់ប្រជាជន។ ហេតុនោះ សមាគមព្រះសង្ឃសាមគ្គីស្នេហាជាតិស្រុកកូវង៉ាង និងវត្តធ្លកទន្ទឹមនឹងការអនុវត្តកិច្ចការព្រះពុទ្ធសាសនាលើបណ្តាវិស័យ នៅទាំងបំផុសចលនាវត្តនានាក្នុងស្រុកចូលរួមបំពេញការងារសប្បុរសធម៌សង្គមនៅមូលដ្ឋាន ដូចជា៖ និមន្តទៅសួរសុខទុក្ខអ្នកមានវ័យចាស់អានាថាមានជំងឺ គ្មានទីពឹងផ្អែក និងបណ្តានិស្សិតក្រីក្រ បំផុសចលនាព្រះចៅអធិការបណ្តាវត្ត ព្រះសង្ឃចូលរួមវិភាគទានប្រាក់ អង្ករ ឧបត្ថម្ភដល់បណ្តាគ្រួសារដែលមានស្ថានភាពលំបាក។ បាន ២៧០ លើក ជាមួយទឹកប្រាក់សរុបជិត ១៧០ លានដុង ចាត់តាំងជូនអាហារូបករណ៍ដល់សិស្សក្រីក្របាន ៦០ លើក គិតជាប្រាក់ជិត ៧០ លានដុង សាងសង់ផ្ទះមហាសាមគ្គី ០២ ខ្នង អស់ ថវិកា ១០៥ លានដុង។ល។ ក្រៅពីនោះ ក្នុងការចាត់តាំងពិធីបុណ្យពុទ្ធសាសនាព្រះចៅអធិការបណ្តាវត្ត ព្រះសង្ឃ តែងគួបផ្សំការផ្សព្វផ្សាយគោលការណ៍ គោលនយោបាយរបស់បក្ស ក្រឹត្យច្បាប់របស់រដ្ឋ ស្ដីពីបណ្តាបញ្ហា៖​ បង្ការប្រឆាំងគ្រោះអបាយមុខសង្គម សុវត្ថិភាពចរាចរណ៍ សន្តិសុខសណ្តាប់ធ្នាប់អាស្រ័យនគរបាលចាត់តាំង។ល។ រួមចំណែកជាមួយរដ្ឋអំណាចមូលដ្ឋានកសាងសម្រេចជោគជ័យឃុំជនបទថ្មី។

          លោកង្វៀងត្រឿងយ៉ាង លេខាបក្សឃុំហ៊ីបហ្វាបានឲ្យដឹង៖ អនុវត្តតាមកិច្ចចង្អុលការរបស់គណៈកម្មាធិការបក្សស្រុក គណៈកម្មាធិការប្រជាជនស្រុកស្ដីពីការអនុវត្តន៍កម្មវិធីគោលដៅជាតិកសាងជនបទថ្មី តាំងពីឆ្នាំ ២០១៥-២០២០ មានគោលការណ៍ គោលនយោបាយស្ដីពីជនជាតិរបស់បក្សនិងរដ្ឋជាច្រើនបានបណ្តាគណៈ ផ្នែក បណ្តាថ្នាក់របស់ស្រុក ឃុំផ្សព្វផ្សាយទាន់ពេល គ្រប់គ្រាន់ដល់ជនរួមជាតិខ្មែរ ក្នុងនោះមានការចូលរួមយ៉ាងសកម្មរបស់អ្នកមានប្រជាប្រិយភាព ព្រះសង្ឃ បណ្តាបក្ខជនខ្មែរ ពង្រីកបានប្រសិទ្ធភាពក្នុងការងារផ្សព្វផ្សាយ បង្កបានភាពសាមគ្គីក្នុងការរស់នៅ តួនាទីរបស់អ្នកមានប្រជាប្រិយភាពក្នុងតំបន់ជនរួមជាតិខ្មែរបានពង្រីកប្រសិទ្ធភាពនៅមូលដ្ឋានហើយបង្កើតបានទម្រង់ផលិតមានលទ្ធផលជាច្រើនដូចជា៖ ទម្រង់ផលិតស្រូវសរីរាង្គ ស្រូវគុណភាពខ្ពស់ ផលិតស្រូវពូជ និងអនុវត្តបច្ចេកទេសជឿនលឿនទៅក្នុងការផលិត នាំមកលទ្ធផលខ្ពស់។ ផ្តើមពីនោះ តម្លៃផលិតកើនជាមធ្យមក្នុងមួយឆ្នាំសម្រេច ១២,៥%។ ប្រភពចំណូលជាមធ្យមរបស់មនុស្សម្នាក់ដល់ចុងឆ្នាំ ២០២០ សម្រេច ៥០,១ លានដុងក្នុងមួយឆ្នាំ។ អត្រាគ្រួសារក្រីក្រនៅលើភូមិសាស្ត្រឃុំបច្ចុប្បន្ននៅជាង ៤% ថយចុះ ១៧,៩% បើប្រៀបនឹងឆ្នាំ ២០១៥។ បំផុសចលនាសាងសង់ផ្ទះថ្មីជូនគ្រួសារក្រីក្របាន ១៥៩ ខ្នង ។ បច្ចុប្បន្នទូទាំងឃុំអត្រាគ្រួសារដែលមានផ្ទះសម្រេចតាមសម្បទារបស់ក្រសួងស្ថាបនា ២.៣៨១/២.៤៥៤ ខ្នង។

        អាស្រ័យការប្តេជ្ញាចិត្តរបស់ទូទាំងប្រព័ន្ធនយោបាយ និងការសាមគ្គីរួមទាំងកម្លាំងកាយចិត្តរបស់មាមីងជនរួមជាតិខ្មែរ បានញ៉ាំងឱ្យទិដ្ឋភាពជនបទពីមួយថ្ងៃទៅមួយថ្ងៃកាន់តែអភិវឌ្ឍ គុណភាពជីវភាពសម្ភារ និងស្មារតីរបស់ជនរួមជាតិខ្មែរបានលើកកម្ពស់ ចុងឆ្នាំ ២០២០ ឃុំហ៊ីបហ្វាអនុវត្តសម្រេច ១៩/១៩ លក្ខឋានកសាងជនបទថ្មី៕

ឌិញកាញ់-សុខា