លទ្ធផលពីចលនាយុវជនកសាងខ្លួន បង្កើតអាជីព

កសិដ្ឋានចិញ្ចឹមគោ។ រូបថត៖ រតនា

          បងង្វៀងមិញបិញ លេខាសម្ព័ន្ធយុវជនឃុំតឹបង៉ាយបានឲ្យដឹង៖ ឃុំមានសមាជិកយុវជន ២១០ នាក់ចូលរួមប្រជុំជីវភាព ១៣ សាខាសម្ព័ន្ធយុវជន (សាខាសម្ព័ន្ធយុវជនភូមិ ០៩​ កន្លែង សាខាសម្ព័ន្ធយុវជនសាលារៀន ០៤ កន្លែង)។ ការងារសម្ព័ន្ធយុវជននិងចលនាសម្ព័ន្ធយុវជន យុវកុមារលើភូមិសាស្រ្ដឃុំមានរបៀបរៀបរយ បណ្ដាសកម្មភាពប្រព្រឹត្តឡើងយ៉ាងផុសផុលទាក់ទាញយុវជនចូលរួមកុះករ ដូចជា៖ យុទ្ធនាការយុវ ជនស្ម័គ្រចិត្តរដូវវិស្សមកាល ថ្ងៃអាទិត្យបៃតង បណ្ដាសកម្មភាពដើម្បីប្អូនៗជាទីស្រឡាញ់ តបស្នងសងគុណ។ល។ ក្នុងនោះ ចលនា “រួមដំណើរជាមួយយុវជនកសាងខ្លួន បង្កើតអាជីព” បានសមាជិកយុវជនជ្រោមជ្រែងខ្លាំងក្លា បង្កជាបរិយាកាសប្រឡងប្រណាំងយ៉ាងផុសផុល លេចធ្លោគំរូយុវជនឆ្នើមជាច្រើនជាមួយបណ្ដាទម្រង់មានលទ្ធផលសេដ្ឋកិច្ចខ្ពស់ រួមបំពេញឲ្យការពង្រីកសេដ្ឋកិច្ច-សង្គមរបស់មូលដ្ឋាន។

               ឆ្នាំ ២០១៥ បានសម្ព័ន្ធយុវជនឃុំឲ្យខ្ចីទុន ១០​ លានដុងពីប្រភពមូលនិធិឧបត្ថម្ភយុវជនកសាងខ្លួន បង្កើតអាជីពរបស់សម្ព័ន្ធយុវជនឃុំតឹបង៉ាយ (មិនគិតប្រាក់ការក្នុងរយៈពេល ០២ ឆ្នាំ) បងង្វៀងជីថាញ់ លេខាសាខាសម្ព័ន្ធយុវជនភូមិង៉ាយហ្វាអនុវត្តទម្រង់ចិញ្ចឹមគោមេ។ ដំបូងបងថាញ់ទិញគោមេមួយក្បាលមកចិញ្ចឹម ពេលមេគោនោះកើតកូនឈ្មោលបងទុកចិញ្ចឹមពី ០៦ ដល់ ០៧ ខែ ហើយប្រសិនបើកើតបានកូនញីវិញទុកបន្តពូជ។ គិតមកដល់ពេលនេះ ហ្វូងគោរបស់បងថាញ់មាន ០៦ ក្បាល គិតជាតម្លៃតាមការប៉ាន់ស្មាន​ជិត ១០០ លានដុង (កើន ១០ ដងបើប្រៀបជាមួយកាលទើបអនុវត្តទម្រង់) ហើយបងបានសងដើមទុនវិញដើម្បីសម្ព័ន្ធយុវជនឃុំឲ្យអ្នកផ្សេងខ្ចីវិញ។

                 តាមបងង្វៀងជីថាញ់ គ្រួសារបងត្រឹងតៀងញឹង សមាជិកយុវជននៅភូមិង៉ូវ៉ាំងកៀកជួបលំបាកអំពីសេដ្ឋកិច្ច។ ឆ្នាំ ២០១៦ បងញឹងបានសម្ព័ន្ធយុវជនឃុំឧបត្ថម្ភឲ្យបុល ១០ លានដុងដោយមិនគិតប្រាក់ការសម្រាប់អនុវត្តទម្រង់ចិញ្ចឹមគោមេដែរ។ បងញឹងទិញគោមេ ០១ ក្បាលមកចិញ្ចឹម មកទល់ពេលនេះកើតកូនបាន ០២ ក្បាល។ បងយកលាមកគោសម្រាប់ដាំបន្លែបង្កា ដូចជា៖ ស្ពៃ ត្រកួន។ល។ ដើម្បីមានប្រាក់ចំណូល រាល់ថ្ងៃ។ ក្នុងឆ្នាំ ២០២០ បងញឹងលក់គោ ០១ ក្បាលបាន ២០ លានដុង។ ជាមួយប្រាក់ទុននេះ បងញឹងបន្តអនុវត្តទម្រង់ដាំដំណាំ។ បងចៃករំលែក៖ បានការឧបត្ថម្ភទុននិងបច្ចេកទេសចិញ្ចឹមពីសម្ព័ន្ធយុវជនឃុំ ខ្ញុំកសាងបានទម្រង់ចិញ្ចឹមសត្វនិងដាំដុះផ្ដល់លទ្ធផលសេដ្ឋកិច្ចខ្ពស់ គ្រួសារមានប្រភពចំណូលលំនឹងជាង ១០០.០០០ ​ដុងក្នុងមួយថ្ងៃ។ ផ្ដើមពីនោះ ប្ដីប្រពន្ធខ្ញុំមានលក្ខណៈចិញ្ចឹមកូន ០២ នាក់រៀនសូត្រ។

                 បងង្វៀងមិញបិញឲ្យដឹងបន្ថែម៖ ផ្ដើមពីប្រភពទុនមូលនិធិកសាងខ្លួន បង្កើតអាជីពរបស់សម្ព័ន្ធយុវជនឃុំ ពីឆ្នាំ ២០១៥ មកទល់ពេលនេះបានឧបត្ថម្ភឲ្យកម្មាភិបាល សមា​ជិកយុវជន ០៤ នាក់បុលពង្រីកទម្រង់ចិញ្ចឹមគោមេ។ ដើម្បីជំរុញមាំចលនារួមដំណើរជាមួយយុវជនកសាងខ្លួន បង្កើតអាជីព សម្ព័ន្ធយុវជនឃុំតឹបង៉ាយបានផ្សព្វផ្សាយបណ្ដាគោលនយោបាយអាទិភាពរបស់រដ្ឋជាពិសេសគឺប្រភពទុនឧបត្ថម្ភយុវជនផ្ដើមអាជីពតាមរយៈធនាគារគោលនយោបាយសង្គម។ សមាជិកយុវជនជាច្រើនបានឧបត្ថម្ភឲ្យបុលទុនសម្រាប់ដោះស្រាយការងារធ្វើ ពង្រីកសេដ្ឋកិច្ច។ ក្រៅពីនោះ សម្ព័ន្ធយុវជនឃុំនៅទាំងសហការចាត់តាំងបើកវគ្គហ្វឹកហាត់អំពីបច្ចេកទេស បណ្ដាទម្រង់ពង្រីកសេដ្ឋកិច្ចទទួលបានលទ្ធផលជូនសមាជិកយុវជន បង្កជាបុព្វហេតុដើម្បីបន្តកសាងអង្គការចាត់តាំងមូលដ្ឋានសម្ព័ន្ធយុវជនពីមួយថ្ងៃទៅមួយថ្ងៃកាន់តែរឹងមាំ។ ពីដើមឆ្នាំ ២០២០ មកទល់ពេលនេះ សម្ព័ន្ធយុវជនឃុំបន្តរក្សាប្រភពទុនឧបត្ថម្ភយុវជនផ្ដើមអាជីពអាស្រ័យសម្ព័ន្ធយុវជនឃុំគ្រប់គ្រងមកទល់ពេលនេះ ២០ លានដុង។ ពិគ្រោះ និងឧទ្ទេសនាមការងារធ្វើជូនសមាជិកយុវជន ១០២ នាក់នៅបណ្ដាក្រុមហ៊ុនក្នុងនិងក្រៅខេត្ត ឧទ្ទេសនាមនីហរ័ណពលករ ០៣ នាក់)។ ទន្ទឹមនឹងនោះ សហការជាមួយធនាគារគោលនយោ បាយសង្គមស្រុកទីវកឹងរំសាយទុនជាង ១,១ ពាន់លានដុងឲ្យសមាជិកយុវជន ៣៧ នាក់ពង្រីកសេដ្ឋកិច្ច។ បច្ចុប្បន្នសម្ព័ន្ធយុវជនឃុំតឹបង៉ាយកំពុងគ្រប់គ្រងក្រុមប្រិតសំចៃនិងបុលទុន ០៧ ក្រុម សរុបបំណុលជាង ៤,៣ ពាន់លានដុង មានគ្រួសារសមាជិកយុវជន ២២៦ គ្រួបុល។

               ទន្ទឹមនឹងចលនាផ្ដើមអាជីព សម្ព័ន្ធយុវជនឃុំតឹបង៉ាយនៅទាំងជំរុញមាំផ្សព្វផ្សាយបណ្ដាសកម្មភាពស្ម័គ្រចិត្តដើម្បីជីវភាពសហគមន៍ ការពារបរិស្ថាន អនុវត្តការងារសុខុមាលភាពសង្គម។ល។ សម្ព័ន្ធយុវជនឃុំកសាងផែនការចាត់តាំងបណ្ដាសកម្មភាពជាក់ស្ដែង ច្នៃប្រតិដ្ឋ ដូចជា៖ ចាត់តាំងកន្លែងលាងដៃរម្ងាប់មេរោគដោយមិនគិតថ្លៃ ០៥ កន្លែងនៅទីសាធារណសំដៅរួមចំណែកបង្ការ ទប់ស្កាត់ជំងឺកូវីដ ១៩។ ចូលរួមផ្សព្វផ្សាយអំពីរបៀបបង្ការ ទប់ស្កាត់ជំងឺគ្រុនឈាមនិងជំងឺឆ្លងផ្សេងៗ សុវត្ថិភាពគ្រឿងបរិភោគ សហការជាមួយសាខាសម្ព័ន្ធយុវជនមន្ទីរពហុព្យាបាលតំបន់ស្រុកទីវកឹងចាត់តាំងពិនិត្យជំងឺនៅនឹងផ្ទះ ជូនអំណោយនិងចាត់តាំងពេលអាហារមេត្តាធម៌ ជូនលោកយាយលោកតាអនាថា ០៦ រូបនៅភូមិដៃទទឹង។ ក្រៅពីនោះ សមាជិកយុវជននៅទាំងចាត់តាំងទៅសួរសុខទុក្ខគ្រួសារគោលនយោបាយ អ្នកមានសគុណចំពោះបដិវត្តន៍នៅបណ្ដាថ្ងៃបុណ្យតេត ជូនអំណោយសិស្សក្រីក្រ ចូលរួមបរិច្ចាគឈាមស្ម័គ្រចិត្ត ផ្ដោះប្ដូរសិល្បៈនាឱកាសអនុស្សាវរីយ៍បណ្ដាថ្ងៃបុណ្យធំៗ។ល ។

               អាចនិយាយបានថា៖ ចលនា “រួមដំណើរជាមួយយុវជនកសាងខ្លួន បង្កើតអាជីព” បានបង្កជាបរិយាកាសប្រឡងប្រណាំង ពលកម្មយ៉ាងផុសផុល បំផុសស្មារតីសាមគ្គីក្នុងសមាជិកយុវជន បង្ហាញឲ្យឃើញទឹកចិត្តរបស់យុវជន រួមចំណែកកសាងភូមិស្រុកពីមួយថ្ងៃទៅមួយថ្ងៃកាន់តែសម្បូរ អារ្យធម៌៕

                ប្រែសម្រួល៖ ថាច់ហ្វាង