រៀនសូត្រតាមអ៊ំហូ ពង្រីកល្អតួនាទីស្នូល ធ្វើជាគំរូឆ្នើម

            ក្រោយពេលអនុវត្តសម្រេចលក្ខឋានភូមិជនបទថ្មីលើកកម្ពស់ឆ្នាំ ២០២១ សាខាបក្សភូមិដាយត្រឿងបន្តចេញផ្សាយសេចក្តីសម្រេចចិត្ត ស្ដីពីការកសាងជនបទថ្មីខ្នាតគំរូ និងខិតខំអនុវត្តសម្រេចក្នុងឆ្នាំ ២០២៣។ ដើម្បីសម្រេចបានគោលដៅដាក់ចេញ ដោយមានតួនាទីជាលេខាសាខាបក្សភូមិ លោកថាច់ង៉ុកសាង តែងសកម្មបំផុសចលនាប្រជាជនផ្លាស់ប្តូររចនាសម្ព័ន្ធផលិត កសាងបណ្តាទម្រង់គំរូ ភ្ជាប់ជាមួយការពង្រីកសេដ្ឋកិច្ចគ្រួសារ។

            លោកគឹមថាញ់កឹង សមាជិកគណៈប្រតិបត្តិការបក្សឃុំភូកឹង ទទួលបន្ទុកចង្អុលការសាខាបក្សភូមិដាយត្រឿងឱ្យដឹង៖ ដោយមានតួនាទីជាលេខាសាខាបក្សភូមិ លោកថាច់ង៉ុកសាង តែងពង្រីកល្អតួនាទីជាគំរូឆ្នើម ឈានមុខក្នុងបណ្តាចលនានៅមូលដ្ឋាន ជាពិសេសគឺចលនាកសាងជនបទថ្មី។ ដើម្បីបំផុសចលនា លោកបានយកពូជដំណាំ សត្វចិញ្ចឹមថ្មីៗ មកអនុវត្តវិសោធនកម្មក្នុងគ្រួសារ ក្រោយមកផ្សព្វផ្សាយឱ្យប្រជាជនអនុវត្តតាម។ ទម្រង់មួយដែលលោក អនុវត្តដំបូងបង្អស់នៅក្នុងភូមិនោះគឺទម្រង់ដាំដូងតាមបែបធម្មជាតិ (ប្រើជីលាមកគោ)។ ទម្រង់នេះមិនត្រឹមតែទទួលបានលទ្ធផលគួរឲ្យរីករាយជូនគ្រួសារលោក​ឡើយ នៅទាំងបានប្រជាជនប្រមាណ ២០ គ្រួសារនៅក្នុងភូមិអនុវត្តតាមលើផ្ទៃចម្ការជាង ១២ ហិកតា និងចិញ្ចឹមគោជាង ២០០ ក្បាល។

បងថាច់ង៉ុកសាងថែទាំហ្វូងគោ។

            លោក ថាច់ង៉ុកសាងចែករំលែកថា៖ អស់រយៈកាលជាង ០៥ ឆ្នាំ ដោយឃើញផលប្រយោជន៍ពីការដាំដូង និងចិញ្ចឹ​មគោនាំមកលទ្ធផលសេដ្ឋកិច្ចខ្ពស់ ខ្ញុំបានវិនិយោគទុនទិញគោមេ ១០ ក្បាលមកចិញ្ចឹម និងបង្វែរដីផលិតស្រូវមិនសូវមានផល ០១ ហិកតាមកដាំដូងតាមបែបធម្មជាតិ និង ដាំស្មៅក្នុងចម្ការដូង។ ក្រោយពេលអនុវត្តទម្រង់នេះបាន ០៣ ឆ្នាំ ​ដូង និងគោក៏ចាប់ផ្តើមផ្តល់ផល ពេលទូទាត់ប្រាក់ចំណាយរួចស្រេច ក្នុងមួយឆ្នាំខ្ញុំនៅចំណេញរាប់រយលានដុង។

            ទម្រង់ដាំដូងតាមបែបធម្មជាតិដែលលោកថាច់ង៉ុកសាងបានបំផុសចលនា មិនត្រឹមតែរួមចំណែកក្នុងការពង្រីកសេដ្ឋកិច្ចនៅតំបន់ដែលមានជនជាតិខ្មែររស់នៅច្រើន (ជាង​ ៩០% នៃចំនួនប្រជាជនរួមក្នុងភូមិ) ហើយនៅទាំងរួមចំណែកក្នុងការផលិតកសិកម្មស្ថិរភាព មានប្រសិទ្ធភាព និងជិតដិតជាមួយបរិស្ថាននៅភូមិជនបទថ្មីដាយត្រឿងទៀតផង។

            បង ថាច់ង៉ុកថាយ នៅភូមិដាយត្រឿង ឃុំភូកឹងឲ្យដឹង៖ គ្រួសារខ្ញុំបានបង្វែរដីផលិតស្រូវមិនសូវមានផល ០២ កុងឡើងចម្ការដូង និងចិញ្ចឹមគោ ០៧​ ក្បាលដើម្បីយកលាមកធ្វើជី។ តាំងពីពេលដាំដូងតាមបែបធម្មជាតិ សេដ្ឋកិច្ចគ្រួសារខ្ញុំកាន់តែបានធូរធាជាងមុន។

            ទន្ទឹមនឹងការដាំដូងដោយប្រើជីលាមកគោ លោកថាច់ង៉ុកសាងនៅទាំងសកម្មចូលរួមបណ្ដាវគ្គហ្វឹកហាត់ផ្ទេរជូនវិទ្យាសាស្ត្របច្ចេកទេសថ្មីៗ។ បច្ចុប្បន្នភូមិមានក្រុមផលិតស្រូវ ០៦ ក្រុម ដោយមានសមាជិក ១៥៤ នាក់ ផលិតលើផ្ទៃដីស្រែ ២០៥ ហិកតា កំពុងធ្វើសកម្មភាពមានប្រសិទ្ធភាព ទម្រង់ដាំត្រសក់ផ្អែមដោយបច្ចេកវិទ្យាខ្ពស់ លើផ្ទៃដី ០,៣ ហិកតា ទម្រង់ចិញ្ចឹមគោគួបផ្សំជាមួយការដាំដូងតាមបែបធម្មជាតិ លើផ្ទៃដីជាង​១២​ ហិកតា។ល។

            ពេលសេដ្ឋកិច្ចគ្រួសារប្រជាជនបានរីកចម្រើន រួមចំណែកកាត់បន្ថយគ្រួសារក្រីក្រ ក្នុងភូមិរៀងរាល់ឆ្នាំ។ បច្ចុប្បន្ន ចំនួនគ្រួសារធូរធាគ្រាន់បើក្នុងភូមិកើនឡើង ៨០ គ្រួសារ និងគ្រួសារក្រីក្របានកាត់បន្ថយនៅតែ ០១ គ្រួសារ ប្រភពចំណូលមធ្យម របស់ជនរួមជាតិខ្មែរនៅទីនេះម្នាក់ៗសម្រេច ៥៤ លានដុងក្នុងមួយឆ្នាំ។

            អស់រយៈកាលជាង ១៨​ ឆ្នាំទទួលបន្ទុកជាលេខាសាខាបក្សភូមិដាយត្រឿង លោក ថាច់ង៉ុកសាងតែងធ្វើជាបក្ខជនគំរូ។ លោកធ្លាប់ បានប្រធានគណៈកម្មាធិការប្រជាជនខេត្តជូនប័ណ្ណសរសើរ “រៀនសូត្រនិងធ្វើតាមគំរូសីលធម៌ហូជីមិញ” ០៣ ឆ្នាំបន្តបន្ទាប់ (ឆ្នាំ ២០០៧‑២០០៩)។ ជាង ១០ ឆ្នាំមកអាយនេះ លោកតែងរក្សាខ្ជាប់កិត្តិនាមបក្ខជនសម្រេចឆ្នើមភារកិច្ច៕

អត្ថបទ‑រូបថត៖ សុខា