តំណាងរដ្ឋសភានីតិកាលទី ១៤ អង្គភាពខេត្តត្រាវិញជួបសំណេះសំណាលជាមួយម្ចាស់ឆ្នោតស្រុកចូវថាញ់ ទីវកឹង និងទីក្រុងត្រាវិញ

      សន្និបាតជួបសំណេះសំណាលជាមួយម្ចាស់ឆ្នោតគឺសំដៅរបាយការណ៍លទ្ធផលសម័យប្រជុំលើកទី ១១ រដ្ឋសភានីតិកាលទី ១៤ និងលទ្ធផលដោះស្រាយសំណើរបស់ម្ចាស់ឆ្នោត។ល។

         ក្នុងអង្គសន្និបាតមាន ០៩​ យោបល់របស់ម្ចាស់ឆ្នោតដោយមាន ១៩ ខ្លឹមសារស្នើដល់រដ្ឋសភា រដ្ឋាភិបាល បណ្ដាក្រសួង ផ្នែកមជ្ឈិម គណៈកម្មាធិការបក្សខេត្ត ក្រុមប្រឹក្សាប្រជាជន គណៈកម្មាធិការប្រជាជនខេត្ត ស្រុកចូវថាញ់ និងបណ្ដាមន្ទីរ ផ្នែកដែលពាក់ព័ន្ធអំពី៖ របបគោលនយោបាយអាទិភាពចំពោះមូលដ្ឋានក្រីក្រ សុខុមាលភាពសង្គម បណ្ដារបបគោលនយោបាយសម្រាប់អ្នកមានសគុណចំពោះបដិវត្តន៍។ ម្ចាស់ឆ្នោត ដាំងអាញ់ដាវ នៅភូមិអូត្រែញ៉ ឃុំម៉ីចាញ់បានឲ្យដឹង៖ បច្ចុប្បន្ន នៅលើភូមិសាស្រ្តភូមិអូត្រែញ៉នៅមានផ្លូវលំមួយចំនួនកំពុងត្រូវការរដ្ឋអំណាចចូលរួមជាមួយប្រជាជនអនុវត្តជួយឲ្យប្រជាកសិករដឹកជញ្ជូន លក់មុខទំនិញកសិផលទទួលបានប្រាក់កម្រៃខ្ពស់។ ម្ចាស់ឆ្នោតឡេថាញ់ហ៊ុង នៅភូមិដូវយ៉ុង (អា) ឃុំម៉ីចាញ់ស្នើ៖ គប្បីឆាប់មានផែនការទុនវិនិយោគបង្កើនកម្រិតបើកទូលាយផ្លូវជាតិ ៥៤ កំណាត់ភូមិសាស្រ្តស្រុកចូវថាញ់។ល។

ម្ចាស់ឆ្នោតឃុំហ៊ុងហ្វាមានយោបល់ស្នើរដ្ឋសភា។​ រូបថត៖ តូវៀង

         ថ្លែងយោបល់ក្នុងអង្គសន្និបាត លេខាបក្សខេត្តលោកង៉ូជីកឿងបានកត់សម្គាល់នូវការខិតខំរបស់បក្ខភាគ ប្រជាជនស្រុកចូវថាញ់និយាយរួម ឃុំទាំង ០៣ របស់ស្រុកចូវថាញ់និយាយដោយឡែកបានរួមបំពេញយ៉ាងសកម្មក្នុងការពង្រីកសេដ្ឋកិច្ច វប្បធម៌ សង្គម។ ចំពោះវិស័យមួយចំនួនដែលម្ចាស់ឆ្នោតយកចិត្តទុកដាក់ លោកលេខាបក្សខេត្តបានចង្អុលការឲ្យគណៈកម្មាធិការប្រជាជនគ្រប់លំដាប់ថ្នាក់ មន្ទីរ ផ្នែក ខេត្តកត់ត្រារួចប្រញាប់មានវិធីសាស្រ្តពិនិត្យ សមស្របដើម្បីម្ចាស់ឆ្នោតស្ងប់ចិត្ត។ ជាពិសេស បណ្ដាបញ្ហាដែលពាក់ព័ន្ធដល់គោលនយោបាយសម្រាប់អ្នកមានសគុណចំពោះបដិវត្តន៍។ លោកលេខាបក្សខេត្តបានចង្អុលការឲ្យគណៈកម្មាធិការបក្ស រដ្ឋអំណាចនិងបណ្ដាផ្នែកអង្គការមហាជនរបស់ស្រុកចូវថាញ់បង្កើនការផ្សព្វផ្សាយធ្វើឲ្យប្រជាជនគ្រប់ជាន់ស្រទាប់លើភូមិសាស្រ្តស្រុកយល់អំពីគោលដៅ អត្ថន័យនៃការបោះឆ្នោតតំណាងរដ្ឋសភានីតិកាលទី ១៥ និងបោះឆ្នោតតំណាងក្រុមប្រឹក្សាប្រជាជនគ្រប់លំដាប់ថ្នាក់អាណត្តិកាល ២០២១ -២០២៦។

         ក្នុងថ្ងៃទី ២៣ នោះដែរ តំណាងរដ្ឋសភា នីតិកាលទី ១៤ អង្គភាពខេត្តត្រាវិញអាស្រ័យលោកថាច់ភឿកបិញ សមាជិកគណៈប្រតិបត្តិការបក្សខេត្ត អនុប្រធានជំនាញការក្រុមប្រតិភូតំណាងរដ្ឋសភាអង្គភាពខេត្តត្រាវិញធ្វើជាប្រធានក្រុមអញ្ជើញទៅជួបសំណេះសំណាលជាមួយម្ចាស់ឆ្នោតនៅសង្កាត់ទី ១ ទី ៣ ទី ៤ ទី ៧ ទី ៨ ទី ៩ (ទីក្រុងត្រាវិញ)។ នៅបណ្ដាកន្លែងជួបសំណេះសំណាលតំណាងរដ្ឋសភា នីតិកាលទី ១៤ អង្គភាពខេត្តត្រាវិញបានជូនដំណឹងអំពីខ្លឹមសារ លទ្ធផលដោះស្រាយ បណ្ដាយោបល់សំណើរបស់ម្ចាស់ឆ្នោត និងលទ្ធផលនៃសម័យប្រជុំលើកទី ១១ រដ្ឋសភា នីតិកាលទី ១៤។

       នៅបណ្ដាកន្លែងជួបសំណេះសំណាល ម្ចាស់ឆ្នោតទីក្រុងត្រាវិញមានយោបល់ស្នើជាច្រើនដល់បណ្ដាស្ថាប័នមានសមត្ថកិច្ចអំពីរបបគោលនយោបាយចំពោះអ្នកបំពេញការងារនៅភូមិ អនុសង្កាត់ (របបចូលនិវត្តន៍ គាំពារសុខាភិបាល។ល។) បញ្ហាចរាចរណ៍នៅទីក្រុង (ផ្លូវ ក្រុងនៅតម្លុកច្រើន ស្ថានភាពបើកបរឆ្លងភ្លើងក្រហមពេលចូលរួមធ្វើចរាចរណ៍ អាចកើតគ្រោះថ្នាក់ចរាចរណ៍)។ ម្ចាស់ឆ្នោតលាតត្រដាងអំពីស្ថានភាពប្រណាំងម៉ូតូខុសច្បាប់ បង្កអុកឡុកសណ្ដាប់ធ្នាប់សហគមន៍ បំពានច្បាប់ចំពោះក្មេងស្ទាវគប្បីមានរូបភាពជម្នះ ស្ថានភាពល្បែងស៊ីសង (ល្បែងបាញ់ត្រី) នៅតែមិនទាន់វិនិច្ឆ័យជ្រះស្រឡះ។ល។

        បណ្ដាយោបល់ស្នើរបស់ម្ចាស់ឆ្នោតបានថ្នាក់ដឹកនាំនគរបាលទីក្រុងត្រាវិញ ថ្នាក់ដឹកនាំគណៈកម្មាធិការប្រជាជនទីក្រុងត្រាវិញនិងជំនួសមុខឲ្យតំណាងរដ្ឋសភា អង្គភាពខេត្តត្រាវិញ លោកថាច់ភឿកបិញបានកត់ត្រា ទទួលយកអធិប្បាយដោះស្រាយសមស្រប៕

        មុននោះមួយថ្ងៃ (ថ្ងៃទី ២២ ) លោក ថាច់ភឿកបិញ សមាជិកគណៈប្រតិបត្តិការបក្សខេត្ត អនុប្រធានជំនាញការក្រុមប្រតិភូតំណាងរដ្ឋភានីតិកាលទី ១៤ អង្គភាពខេត្តត្រាវិញ វរៈសេនីយ៍ឯក ហឿវ៉ាំងងៀ មេបញ្ជាការរងគណៈបញ្ជាការដ្ឋានយោធាខេត្ត លោកស្រីតាំងធីង៉ុកម៉ាយ នាយិការងមន្ទីរអប់រំ-បណ្តុះបណ្តាល ក៏បានអញ្ជើញទៅជួបសំណេះសំណាលជាមួយម្ចាស់ឆ្នោតជិត ៣០០ នាក់នៅបណ្ដាឃុំ៖  ឃុំភូកឹង ហ៊ីវទ្រុង ហ៊ុងហ្វា តឹងហ៊ុង តឹងហ្វានិងទីប្រជុំជនទីវកឹង ស្រុកទីវកឹង។

         ម្ចាស់ឆ្នោតទាំងនោះបានលាតត្រដាង រួចមានសំណើអំពីបញ្ហាមួយចំនួនដែលជាប់ជំពាក់នៅមូលដ្ឋាន។ ជាក់ស្តែងគឺ ស្នើឲ្យរដ្ឋពិនិត្យបង្កើនកម្រិតប្រាក់ឧបត្ថម្ភកសាងផ្ទះឧបការគុណជូនដល់មុខសញ្ញា គ្រួសារគោលនយោបាយ ពីព្រោះចំនួនប្រាក់ឧបត្ថម្ភដូចបច្ចុប្បន្ននេះ (៥០ លានដុងក្នុងមួយខ្នង) នៅទាបពេក មិនអាចធានាបានអំពីគុណភាព បង្កើនកម្រិតថវិកាឧបត្ថម្ភជួសជុលផ្ទះឧបការគុណដែលបានកសាងពីមុន ហើយទ្រុឌទ្រោមធ្ងន់ធ្ងរ។ រដ្ឋពិនិត្យការអនុវត្តន៍កម្រិតឧបត្ថម្ភប្រចាំខែដល់បណ្តាអ្នកទទួលតួនាទីនៅភូមិដែលមានចំនួនគ្រួសារប្រជាជនក្រោមពី ៣៥០ គ្រួ និងភូមិដែលមានគ្រួសារប្រជាជនលើសពី ៣៥០ គ្រួក្នុងឃុំតែមួយនៅមានការខ្ពស់ទាបជាងគ្នាយ៉ាងច្រើន ប៉ុន្តែតួនាទីទទួលបន្ទុក សមត្ថកិច្ច ធ្វើសកម្មភាព ចំនួនការងាររវាងបណ្តាភូមិប្រហាក់ប្រហែលគ្នាម៉្លោះហើយបណ្តាលឲ្យកើតមានស្ថានភាពលើសខ្វះគ្នា មិនសូវមានការឯកភាព មិនសូវអស់ពីចិត្តក្នុងការងារក្នុងដំណាក់កាលចង្អុលការអនុវត្តបណ្តាចលនាប្រឡងប្រណាំង និងភារកិច្ចនយោបាយនៅមូលដ្ឋាន។ ស្នើឲ្យរដ្ឋមានគោលនយោបាយអាទិភាពបន្ថែមទៀតអំពីទុនផលិត ឧបត្ថម្ភផ្ទះដល់បណ្តាមុខសញ្ញាដែលធ្លាប់ចូលរួមធ្វើសង្រ្គាមបានពិនិត្យទទួលផលប្រយោជន៍តាមសេចក្ដីសម្រេចចិត្តលេខ ២៩០ និងលេខ ១៨៨ របស់រដ្ឋាភិបាល​ និងមុខសញ្ញាមួយចំនួនមានសគុណចំពោះបដិវត្តន៍កំពុងជួបលំបាកក្នុងជីវភាព។ ស្នើឲ្យរដ្ឋពិនិត្យស្ងើចសរសើរជូនរង្វាន់ និងទទួលស្គាល់វត្តអូរវែងចាស់​ (ភូមិអូរវែង) ឃុំហ៊ុងហ្វាជាវត្តមានសគុណចំពោះបដិវត្តន៍ ពីព្រោះធ្លាប់បានចិញ្ចឹមលាក់បំពួន ការពារកម្មាភិបាលថ្នាក់ដឹកនាំបដិវត្តន៍ជាច្រើនក្នុងសម័យសង្រ្គាមប្រឆាំងអាមេរិកសង្រ្គោះជាតិ។ ស្នើមិនគប្បីរំសាយបណ្តាមណ្ឌលសិក្សារាត់រាយស្ថិតក្រោមឱវាទបណ្តាសាលាបឋមសិក្សានៅតំបន់ជ្រៅ តំបន់មានជនរួមជាតិខ្មែររស់នៅច្រើន ដើម្បីបង្កលក្ខណៈងាយស្រួលឲ្យប្អូនៗទៅរៀន ជៀសវាងករណីបោះបង់ការរៀនសូត្រពាក់កណ្តាលកាល។ ស្នើឲ្យរដ្ឋប្រញាប់បើកការដ្ឋានស្ថាបនាស្ពានដាយង៉ាយ ឆ្លងទន្លេហូវតភ្ជាប់ខេត្តត្រាវិញ-សុកត្រាំង ដើម្បីរួមចំណែកជំរុញឲ្យសេដ្ឋកិច្ច-សង្គមរីកចម្រើនរហ័ស និងស្ថិរភាព។

         បណ្តាយោបល់ស្នើ និងការលាតត្រដាងរបស់ម្ចាស់ឆ្នោតរបស់ឃុំ ទីប្រជុំជនទាំង ០៦ បានថ្នាក់ដឹកនាំគណៈកម្មាធិការបក្ស រដ្ឋអំណាចមូលដ្ឋានអធិប្បាយដោះស្រាយតាមសមត្ថកិច្ច ចំណែកយោបល់ស្នើដែលពាក់ព័ន្ធដល់គោលការណ៍ គោលនយោបាយរបស់បក្ស រដ្ឋ បានតំណាងរដ្ឋភានីតិកាលទី ១៤ អង្គភាពខេត្តត្រាវិញកត់ត្រាទុកដើម្បីយកទៅលាតត្រដាងជូនចំពោះស្ថាប័នមានសមត្ថកិច្ចពិនិត្យក្នុងរយៈពេលខាងមុខ៕

តូវៀង-តឹងង៉ុក-ថាច់ហ្វាង