វត្តឫស្សីស្រុក ផ្អាកចាត់តាំងសកម្មភាពបុណ្យអកអំបុក ដើម្បីបង្ការ ទប់ស្កាត់អាសន្នរោគកូវីដ-១៩

ព្រះតេជគុណ ថាច់ឡេង ព្រមទាំងគណៈកម្មការចាត់តាំងពិធីបុណ្យអកអំបុកត្រួតពិនិត្យវប្បធម៌ភណ្ឌលយប្រទីប។

លោកមា ថាច់រ៉ី ប្រធាន​គណៈចាត់តាំង​ពិធីបុណ្យអកអំបុកវត្តឫស្សីស្រុកមាន​ប្រសាសន៍​ថា៖ ​ ពិធីបុណ្យ​អកអំ​បុក​ដែលវត្តឬស្សីស្រុកជារៀងរាល់ឆ្នាំ​ទាក់ទាញ​ប្រជាជនពី ០៣-០៤​ ពាន់​នាក់ចូលរួម។ ខ្ញុំ​បាន​ព្រះ​ចៅ​អធិការ​វត្ត ប្រគល់នាទីឲ្យធ្វើជាប្រធានគណៈកម្មការបុណ្យអកអំបុក​ដើម្បីត្រួតពិនិត្យ ចាត់ចែងបណ្តា​សកម្មភាពលេងល្បែងប្រជាប្រិយជាច្រើនប្រភេទដូចជា៖ វាយឆ្នាំង ទាញព្រ័ត្រ អង្រួនទូក អុំល្អី ជិះកង់លើបន្ទះក្តាលើផ្ទៃទឹកក្នុងស្រះ។ល។ចូលរួមលេងកម្សាន្តបានទាំងអស់គ្នា មិនថាប្រុសឬស្រី​ វ័យចាស់ឬក្មេងឡើយ។ ជាពិសេសមាន​ប្រណាំង​ទូក-ងប្រភេទ​តូច​ប្រវែង​ ១១ ​ម៉ែត្រ ចំណុះ​កីឡាករ កីឡាការិនី ​១២ ​នាក់​។ ចំពោះល្បែងប្រណាំង​ទូក-ង ត្រូវ​ចុះឈ្មោះ​មុន ១៥ ​ថ្ងៃ ដើម្បី​រៀបចំ​​ហ្វឹកហាត់​អុំទូកមុន​ពេល​ចូលរួម​ប្រកួត។ ឆ្នាំនេះ ជាឆ្នាំដំបូងដែលវត្តផ្អាកសកម្មភាពបុណ្យអកអំបុក ដើម្បីបង្ការ ទប់ស្កាត់អាសន្នរោគកូវីដ-១៩។

ជិតដល់ថ្ងៃពេញបូណ៌មី ខែកត្តិកមាមីង បងប្អូនណាដែលធ្លាប់ចូលរួមលេងល្បែង ក៏ដូចជាអញ្ជើញមកកម្សាន្តនាពិធីបុណ្យអកអំបុកដែលវត្តឬស្សីស្រុកចាត់តាំងជារៀងរាល់ឆ្នាំនោះ ពិតជាកំពុងនឹកភ្នកក្នុងចិត្តពីអនុស្សាវរីយ៍នាបុណ្យអកអំបុក ប៉ុន្មានឆ្នាំកន្លងមិនខាន។ បងស្រីយ៉ាងធីសុដានៅភូមិឫស្សីស្រុក ឃុំផុងភូរៀបរាប់ថា៖ ដល់ថ្ងៃបុណ្យអកអំបុក នរណាក៏នឹកឃើញអនុស្សាវរីយ៍ពីឆ្នាំកន្លងដែលចូលរួមលេងល្បែងប្រជាប្រិយក្នុងពិធីបុណ្យអកអំបុកដែលវត្តឫស្សីស្រុកចាត់តាំង។ ខ្ញុំ​បាន​ចូល​រួម​​ប្រណាំង​ទូក-ង ​ជា​ច្រើន​ឆ្នាំ​មក​ហើយ។ ពីមុនជិតដល់ពិធីបុណ្យម្តងៗបងប្អូននារីតែងចុះឈ្មោះ និងចូលរួមហ្វឹកហាត់អុំទូក-ង​ ដើម្បីចូលរួមប្រកួតប្រជែងយ៉ាងសប្បាយរីករាយ។ ឆ្នាំនេះដោយសារជំងឺរាតត្បាតស្មុគស្មាញវត្តមិនចាត់តាំងពិធីបុណ្យទៀតមាមីងក្នុងភូមិនរណាក៏យល់ដែរ។ សង្ឃឹមថាអាសន្នរោគឆាប់បានបង្រ្កាប ដើម្បីជីវភាពប្រជាជនមានភាពប្រក្រតីដូចដើមវិញ។

ព្រះតេជគុណ ថាច់ឡេង ព្រះចៅអធិការវត្ត ឫស្សីស្រុក ព្រមទាំងគណៈកម្មការចាត់តាំងពិធីបុណ្យត្រួតពិនិត្យវត្ថុបុរាណដែលតាំងពិពណ៌ជារៀងរាល់ឆ្នាំ

ព្រះតេជគុណ ថាច់ឡេង ព្រះចៅអធិការវត្តឫស្សីស្រុក មានថេរដីកាថា៖ ពិធីបុណ្យអកអំបុកជាពិធីបុណ្យប្រពៃណីខ្មែរបានវត្តឫស្សីស្រុកចាត់តាំងឡើងដោយមានទ្រង់ទ្រាយធំបំផុតក្នុងឆ្នាំ។ ពិធីបុណ្យនេះបានចាត់តាំងពីឆ្នាំ ១៩៩២ ហើយបានរក្សារហូតមកដល់បច្ចុប្បន្ន។ ជារៀងរាល់ឆ្នាំឲ្យតែជិតដល់ថ្ងៃពេញបូណ៌មីខែកត្តិក ក្នុងភូមិឫស្សីស្រុកមានភាពអ៊ូអរណាស់ ដោយសារសំឡេងចង្វាក់អុំទូក-ងរបស់កីឡាករកីឡាការិនីមិនជំនាញ ដែលហ្វឹកហាត់អុំដើម្បីចូលរួមប្រកួតប្រជែង រួមជាមួយនឹងបណ្តាការលេងល្បែងប្រជាប្រិយ ល្បែង សម័យថ្មី ញ៉ាំងឲ្យពិធីបុណ្យអកអំបុកនៅភូមិឫស្សីស្រុកកាន់តែទាក់ទាញបងប្អូនទាំង ០៣ ជនជាតិកិញ-ខ្មែរ‑ហ្វាក្នុងសហគមន៍សាមគ្គី លេងកម្សាន្តយ៉ាងសប្បាយរីករាយ និងប្រិតសំចៃ។ ព្រោះថា ដរាបណាប្រជាជនមានទីលានលេងកម្សាន្តមានប្រយោជន៍នៅមូលដ្ឋានហើយ ដរាបនោះប្រជាជនមិនទៅឆ្ងាយ នាំឲ្យបង់ខាតប្រាក់ច្រើន និងមិនធានាសុវត្ថិភាពចរាចរណ៍ទៀតផង។ល។ ដោយមានអត្ថន័យ និងមានប្រយោជន៍ដូច្នោះ​ ឆ្នាំ ២០០៥ អាត្មាបានបង្កើតគណៈចាត់តាំងពិធីបុណ្យអកអំបុក និងបវារណាពុទ្ធបរិស័ទចូលរួមឧបត្ថម្ភដើម្បីគណៈចាត់តាំងចាត់ចែងសកម្មភាពនៃពិធីបុណ្យឲ្យប្រព្រឹត្តទៅបានល្អ បង្កលក្ខណៈឲ្យប្រជាពុទ្ធបរិស័ទក៏ដូចជាប្រជាជនមានទីលានកម្សាន្តសប្បាយ ។

ថ្វីត្បិតតែមិនចាត់តាំងលេងល្បែងប្រជាប្រិយដូចរាល់ឆ្នាំ ប៉ុន្តែដល់រាត្រីថ្ងៃពេញបូណ៌មី ខែកត្តិក គណៈចាត់តាំងពិធីបុណ្យអកអំបុកវត្តឬស្សីស្រុក នឹងរៀបចំពិធីអកអំបុកថ្វាយ ព្រះខែ និងនិមន្តព្រះសង្ឃចម្រើនព្រះបរិត្តដូចឆ្នាំមុនដែរ៕

អត្ថបទ‑រូបថត៖ សុជា