ភាពកក់ក្តៅក្នុងផ្ទះមិត្តរួមអាវុធ

     ដោយបានការយកចិត្តទុកដាក់ពីបណ្តាផ្នែកនិងស្មារតីសាមគ្គីឧបត្ថម្ភគ្នាទៅវិញទៅមករបស់មិត្តរួមអាវុធ ឆ្នាំ ២០២២ សមាគមអតីតយុទ្ធជន ស្រុក ទីវកឹង សាងសង់ផ្ទះមិត្តរួមអាវុធបាន១១ ខ្នង ជូនដល់សមាជិកដែលកំពុង​ជួប​ការ​លំបាកពី​លំនៅឋាន សរុបតម្លៃ​ ៥៧០ លាន​ដុង។

លោកង្វៀងវ៉ាំងថាវ (ទី ១ ខាងស្តាំ) និងរដ្ឋអំណាចមូលដ្ឋានអញ្ជើញទៅសួរសុខទុក្ខ និងជូនអំណោយគ្រួសារលោកមាគឹម លុយ។

     សមាគមអតីតយុទ្ធជនស្រុក ទីវកឹងមានសមាជិក ២.២៤៥ រូប។ ក្នុង​នោះ​​សមាជិក​ខ្មែរ ៤៦១​រូប។ ដោយសារចំណងមិត្តរួមអាវុធដែរ ឆ្នាំ ២០២២ សមាជិកសមាគមអតីតយុទ្ធជនគឹមលុយ នៅភូមិ ចុង‑ង ឃុំហ៊ីវទឺ ស្រុកទីវកឹង មិនបារម្ភ ពេលដែលមានភ្លៀងខ្យល់ខ្លាំង ពីព្រោះគ្រួសារគាត់ទទួលបានផ្ទះមិត្តរួមអាវុធមួយខ្នង ស្ថានភាពគ្រួសារលោកមាគឹមលុយជួបការលំបាកច្រើន គាត់ឈឺជំងឺវិបត្តិសរសៃឈាមខួរក្បាលអស់រយៈកាលជិត១០ ឆ្នាំមកហើយជា គ្រួសារស្ថិតក្នុងក្របខ័ណ្ឌគ្រួសារក្រីក្រ ជីវភាព​លំបាក​ខ្លាំង។ តាំងពីគាត់ធ្លាក់ខ្លួនឈឺមក ប្រពន្ធរបស់គាត់មិនអាចទៅធ្វើការរកប្រាក់បានឡើយ ពីព្រោះ នៅផ្ទះមើលថែទាំប្តីជាប្រចាំ។ ប្រាក់ចំណូល​របស់​គ្រួសារ ​ ពឹងលើ​ប្រាក់ស៊ី​ឈ្នួលមិនទៀងទាត់របស់កូនប្រុសម្នាក់​ ។ ពីមុនគ្រួសារគាត់ក៏បានរដ្ឋអំណាចមូលដ្ឋានឧបត្ថម្ភផ្ទះមេត្តាធម៌មួយខ្នងដែរ ពេលដែលផ្ទះនោះបាក់បែកទ្រុឌទ្រោមក៏បានសមាគមអតីតយុទ្ធជនឃុំ ធ្វើសេនាធិការជូនសមាគមអតីតយុទ្ធជនស្រុក  តាមរយៈនោះ នៅដើមឆ្នាំ ២០២២ គ្រួសារលោកមាលុយក៏បានលោក ត្រឹងទ្រីយុងអតីតលេខាបក្សខេត្ត ឧបត្ថម្ភប្រាក់ ៥០ លានដុង ដើម្បីសាងសង់ផ្ទះមិត្តរួមអាវុធ។

     មីងត្រឹងធីថឿងប្រពន្ធលោកមាគឹមលុយសំណេះសំណាលដោយរំភើបថា៖ “គ្រួសារខ្ញុំសូមថ្លែងអំណរអរគុណយ៉ាងជ្រាលជ្រៅចំពោះសមាគមអតីតយុទ្ធជនឃុំដែលបានឧបត្ថម្ភប្រាក់ជូនគ្រួសារខ្ញុំ សាងសង់បានផ្ទះរឹងមាំដូចសព្វថ្ងៃ។ទោះបីកូន​ខ្ញុំខិត​ខំធ្វើការរកប្រាក់យ៉ាងណាក៏ដោយ ក៏បានត្រឹមផ្ញើជូនមកខ្ញុំលៃលកទិញ​ថ្នាំ និងប្រើប្រាស់ប្រចាំថ្ងៃប៉ុណ្ណោះ។ ផ្ទះ​មេត្តាធម៌​ទ្រុឌទ្រោម គ្រួសារ​ខ្ញុំគ្មាន​ប្រាក់ទិញសម្ភារសម្រាប់​ជួសជុលផងធ្វើម្តេចមានប្រាក់សង់ផ្ទះថ្មីឲ្យបានរឹងមាំបែបនេះ។ ក្រៅពីឧបត្ថម្ភសង់លំនៅឋាន សមាគមអតីតយុទ្ធជនឃុំ នៅទាំងជូនអំណោយជាអង្ករ មី និងសម្ភារសម្រាប់ប្រើប្រាស់ ជារឿយៗសម្រាប់ប្តីប្រពន្ធខ្ញុំហូបចុក ប្រើប្រាស់ក្នុងគ្រួសារ។ ប្តីខ្ញុំឈឺជិត១០ឆ្នាំហើយ ទោះបីគាត់មិនអាចនិយាយបានក៏ដោយ ប៉ុន្តែគាត់បញ្ចេញទឹកមុខសប្បាយរីករាយខ្លាំងណាស់ពេលដែលមិត្តរួមអាវុធមកសួរសុខទុក្ខជាពិសេសបានជូនផ្ទះ ០១ ខ្នងនេះ។ នេះ​គឺជាថាមពលជំនួយឲ្យគាត់បន្តការ​រស់​នៅ​ជាមួយ​គ្រួសារយ៉ាងសប្បាយរីករាយ និង​សុភមង្គល។

     លោកង្វៀងវ៉ាំងថាវ អនុប្រធានសមាគមអតីតយុទ្ធជនស្រុក ទីវកឹងមានប្រសាសន៍ថា៖ “ការកសាងផ្ទះមិត្តរួមអាវុធតាមសម្បទា “រឹងមាំ ០៣ យ៉ាង” ជូនសមាជិកអតីតយុទ្ធជនដែលកំពុងជួបការលំបាកគឺជាភារកិច្ច  សំខាន់ៗរបស់សមាគម។ ដើម្បីអនុវត្តល្អភារកិច្ចនេះ ជារៀងរាល់ឆ្នាំ សមាគមអតីតយុទ្ធជនស្រុក បានសហការជាមួយសមាគមអតីតយុទ្ធជនឃុំ-ទីប្រជុំជនទៅសួរសុខទុក្ខ និងត្រួតពិនិត្យស្ថានភាពលំនៅឋានរបស់សមាជិក។ ឆ្លងតាមរយៈនោះ សមាគមបានកំណត់ថាត្រូវឧបត្ថម្ភសាងសង់ថ្មី ឬឧបត្ថម្ភជួសជុល។ បន្ទាប់ពីនោះ សមាគមក៏ចាត់តាំង​ប្រជុំជាមួយគណៈប្រតិបត្តិការសមាគមស្រុក បណ្តាឃុំ ទីប្រជុំជនដើម្បីពិគ្រោះយោបល់។ ក្នុងនោះ ផ្តល់អាទិភាពដល់ការសាងសង់ផ្ទះមិត្តរួមអាវុធសម្រាប់ជូនដល់គ្រួសារសមាជិកដែលកំពុងជួបការលំបាកពីលំនៅឋាន។ ឆ្លងតាមរយៈការធ្វើសេនាធិការ ការចលនារបស់អង្គការចាត់តាំងសមាគម បណ្តាអង្គការចាត់តាំង និងសប្បុរសជនតែងចូលរួមឧបត្ថម្ភសម្រាប់សាងសង់ផ្ទះមិត្តរួមអាវុធជូនដល់សមាជិកដែលមានស្ថានភាពលំបាក ដើម្បីគាត់មានលំនៅឋានរឹងមាំនឹងនរចិត្តប្រកបការងារ កសាងជីវភាពបានរីកចម្រើន សុភមង្គល”។

     ឆ្នាំ២០២២ ក្រៅពីកសាងផ្ទះមិត្តរួមអាវុធឧបត្ថម្ភសមាជិក សមាគមអតីតយុទ្ធជនស្រុកទីវកឹងនៅទាំងសាងសង់ផ្ទះឧបការគុណ ០៦ខ្នង ជូនដល់គ្រួសារគោលនយោបាយ (ក្នុងមួយខ្នងតម្លៃពី ៥០-៦០លានដុង) សរុបតម្លៃ ៧២០ លានដុង។សាងសង់​ផ្ទះ​មេត្តាធម៌ ០៦ខ្នងជូនដល់​គ្រួសារ​ក្រីក្រ (​ក្នុងមួយខ្នងៗតម្លៃពី ៤០-៦០លាន​ដុង) ​សរុបតម្លៃ២៦០លាន​ដុង។

     ឆ្នាំ ២០២៣សមាគមអតីតយុទ្ធជនស្រុកនឹងបន្តការខិតសាងសង់ផ្ទះមិត្តរួមអាវុធ ០៥ ខ្នងទៀតឧបត្ថម្ភដល់សមាជិកដែលជួបការលំបាកពីលំនៅឋាន ដើម្បីធានាឲ្យសមាជិកទាំងអស់មានផ្ទះរឹងមាំតាមសម្បទារបស់ក្រសួងស្ថាបនា៕

អត្ថបទ‑រូបថត៖ សុជា