ភាពកក់ក្ដៅក្នុងលំនៅឋានសាមគ្គីធម៌

     គិតតាំងពីឆ្នាំ ២០១៨ មកទល់ពេលនេះ សមាគមព្រះសង្ឃសាមគ្គីស្នេហាជាតិស្រុកកូវ​ង៉ាងកសាង និងប្រគល់ជូនផ្ទះសាមគ្គីធម៌បាន ៨ ខ្នងដល់បណ្ដាគ្រួសារដែលជួបលំបាកអំពីលំ​នៅឋាន ផ្ទះមួយខ្នងៗបានឧបត្ថម្ភទឹកប្រាក់ចំនួន ៥០ លានដុង។ ក្នុងនោះ សមាគមព្រះសង្ឃសាមគ្គីស្នេហាជាតិខេត្តឧបត្ថម្ភ ១ ខ្នង ផ្ទះចំនួន ៧ ខ្នង អាស្រ័យការរួមវិភាគទានរបស់ព្រះចៅអធិការបណ្ដាវត្តខ្មែរលើភូមិសាស្រ្តស្រុក ។ ផ្ទះសាមគ្គីធម៌ បានរួមចំណែកជាមួយរដ្ឋអំណាចមូលដ្ឋានគិតគូរបានល្អដល់បណ្ដាស្ថានភាព​គ្រួ​​សារលំបាក ជួយឱ្យគ្រួសារទាំងនោះមានជីវភាពកាន់តែបានកក់ក្ដៅជាង។

ក្ដីរីករាយរបស់ប្ដីប្រពន្ធបង សឺនង៉ុកស្នា និងបងស្រីថាច់ធីស្រាន្ត(ពីរនាក់កណ្ដាល)ក្នុងថ្ងៃបានទទួលផ្ទះថ្មី។

   លោកតាថាច់ឃ្លាំង អាយុ ៨២ ឆ្នាំ នៅភូមិផ្នោរអំពក់(កូវវី)​ ឃុំថាញ់ហ្វាស៊ើង ស្រុកកូវង៉ាង ជាគ្រួសារមួយក្នុងបណ្ដាគ្រួសារបានសមាគមព្រះសង្ឃសាមគ្គីស្នេហាជាតិស្រុកឧបត្ថម្ភផ្ទះសាមគ្គីធម៌កាលពីដើមឆ្នាំ ២០១៩។ លោកតាថាច់ឃ្លាំង សំណេះសំណាលថា៖ ខ្ញុំមានក្ដីរីករាយយ៉ាងខ្លាំងពេល​ដែលបានព្រះសង្ឃឧបត្ថម្ភផ្ទះ។ ចំពោះរូបខ្ញុំស្ថិតក្នុងវ័យចាស់ បានទទួលរបបប្រចាំ​ខែរបស់អ្នកមានវ័យចាស់។ បច្ចុប្បន្ន ខ្ញុំមានកូនម្នាក់ កំពុងទៅប្រកបកិច្ចការរកទទួល​ទានដល់ខេត្តបិញយឿង ផ្ញើប្រាក់កាសជាញឹកញាប់មកឱ្យខ្ញុំ។ ទោះបីជាឆ្ងាយពីកូនក៏ពិត​មែន ប៉ុន្តែពេលសម្លឹងឃើញមានលំនៅឋានដូច្នេះ ខ្ញុំមានអារម្មណ៍រីករាយខ្លាំងណាស់។

   គ្រួសារបងសឺនង៉ុកស្នា បងស្រីថាច់ធីស្រាន្ត នៅភូមិរាជមល្ល ឃុំគីមហ្វា ក៏ទើបទទួលបានផ្ទះសាមគ្គីធម៌ដែលសមាគមព្រះសង្ឃសាមគ្គីស្នេហាជាតិស្រុកកូវង៉ាង​​​ឧបត្ថម្ភ។ គ្រួសារបងស្នា ស្ថិតក្នុងមុខសញ្ញាក្រីក្រនៃមូលដ្ឋាន រស់នៅក្នុងលំនៅឋានបណ្ដោះអាសន្ន។ ជាការអភ័ព្វ ក្នុងលើកដែលមានភ្លៀងធំ ខ្យល់បក់បោកខ្លាំងក្នុងខែសីហា ឆ្នាំ ២០២២ បណ្ដាលឱ្យផ្ទះរបស់បងត្រូវរលំ។ បាន រដ្ឋអំណាចមូលដ្ឋាន អញ្ជើញមកសួរសុខទុក្ខ និងចលនា សមាគមព្រះសង្ឃសាមគ្គីស្នេហាជាតិស្រុកឧបត្ថម្ភ ៥០ លានដុង សមាគមសហពន្ធន៍នារីឧបត្ថម្ភ ៤០ លានដុងដើម្បី កសាងលំនៅឋានជូនគ្រួសារបងឲ្យបាន​រឹងមាំ។ គិតមកទល់ពេលនេះ លំនៅឋានបានកសាងរួចរាល់ ប្ដីប្រពន្ធរស់នៅក្នុងលំនៅឋានថ្មី ជាកម្លាំងជំរុញទឹកចិត្តប្ដីប្រពន្ធបងខិតខំឈានឡើងចាកផុតភាពក្រីក្រស្ថិរភាព។

   បងសឺនង៉ុកស្នា រៀបរាប់ថា៖ លំនៅឋានជាប្រភពនៃសេចក្ដីសុខយ៉ាងធំធេងចំពោះគ្រួសារខ្ញុំ។ កាលពីមុន ជាមួយជីវភាពលំបាក ខ្ញុំគ្មានគិតដល់ការកសាងបានលំនៅឋានយ៉ាងនេះឡើយ ដោយបានការជួយឧបត្ថម្ភរបស់រដ្ឋ របស់សមាគមព្រះសង្ឃសាមគ្គីស្នេហាជាតិស្រុក ពេលនេះខ្ញុំមានលំនៅឋានសមរម្យ ជាថាមពលដើម្បីជួយឲ្យគ្រួសារខ្ញុំមានលក្ខណៈចិញ្ចឹមកូន ២​ នាក់បានរៀនសូត្របានល្អប្រសើរជាងទៀតផង។

   ក្នុងការអនុវត្តន៍គោលនយោបាយចំពោះគ្រួសារក្រីក្រ ក្នុងនោះមានគោលនយោបាយឧបត្ថម្ភលំនៅឋានតែងបានរដ្ឋអំណាចមូលដ្ឋានយកចិត្តទុកដាក់។ ទោះជាដូច្នោះក៏ដោយ បណ្ដាគោលនយោបាយក៏មានកំណត់ មូលដ្ឋាន តែងពិនិត្យដោះស្រាយឱ្យគ្រួសារទទួលផលពីថ្នាក់ទាបឡើងទៅ ពោលគឺគ្រួសារដែលលំបាកបំផុតទទួលបានការឧបត្ថម្ភមុន។ អាស្រ័យហេតុនោះ ការរួម​ដំណើររបស់សមាគមព្រះសង្ឃសាមគ្គីស្នេហាជាតិខេត្ត ស្រុកជាមួយរដ្ឋអំណាចមូលដ្ឋានគឺ​ដើម្បីរួមចំណែកអនុវត្តល្អការគិតគូរដល់ស្ថានភាពលំបាករបស់គ្រួសារប្រជាជននិយាយរួម ជនជាតិខ្មែរនិយាយដោយឡែក។​

   ព្រះតេជគុណ ថាច់រ៉ីយ៍ ប្រធានសមាគមព្រះសង្ឃសាមគ្គីស្នេហាជាតិស្រុកកូវង៉ាង មានសង្ឃដីកាឱ្យដឹងថា៖ ក្នុងការកសាងផ្ទះសាមគ្គីធម៌ជូនគ្រួសារដែលលំបាកអំពីលំនៅ​ឋាន សមាគមតែងជម្រាបដល់រដ្ឋអំណាចមូលដ្ឋាន រួចបានរដ្ឋអំណាចមូលដ្ឋានយល់ព្រម។ ពេលប្រគល់ជូនផ្ទះក៏មានការអញ្ជើញរដ្ឋអំណាចមូលដ្ឋានចូលរួមផងដែរ។​ ទង្វើនោះគឺដើម្បីសំដែងនូវការប្រមូលផ្ដុំកម្លាំងសាមគ្គីរបស់គណៈកម្មាធិការបក្ស រដ្ឋអំណាច ជាមួយបណ្ដាអង្គការចាត់តាំងនយោបាយសង្គមប្រយោជន៍រួមគ្នាគិតគូរជីវភាពប្រជាជន។

   តាមប្រសាសន៍របស់លោកង្វៀងឌឹកម៉ូវ អនុប្រធានគណៈកម្មាធិការរណសិរ្សមាតុភូមិវៀត​ណាមស្រុកកូវង៉ាង៖ សមាគមព្រះសង្ឃសាមគ្គីស្នេហាជាតិស្រុកជាអង្គការចាត់តាំងសមាគមមួយតំណាងឱ្យ​ការផ្សារភ្ជាប់រវាងសាសនា និងសង្គម។ បណ្ដាអង្គសមាជិកក្នុងសមាគម មិនត្រឹមតែ ប្រតិបត្តិសាសនាដោយផ្ទាល់ ជាតំណាងឱ្យនិកាយព្រះពុទ្ធសាសនា។ល។ឡើយ នៅទាំរួមដំណើរជាមួយបក្ស រដ្ឋ ដើម្បីគិតគូរដល់បណ្ដាស្ថានភាពលំបាក។ ការកសាងលំនៅឋានឧបត្ថម្ភគ្រួសារដែលជួបលំបាកអំពីលំនៅឋានគឺរួមចំណែកក្នុងការកសាងជីវភាពថ្មីសម្រាប់ជនរួមជាតិខ្មែរលើភូមិសាស្រ្ត។ យើងខ្ញុំសង្ឃឹមថា ព្រះចៅអធិការគ្រប់វត្តនឹងបន្តពង្រីកល្អជាងទៀតបណ្ដាសកម្មភាពដើម្បីការងារសាសនា និងការងារសង្គម៕

អត្ថបទរូបថត៖ ថាច់សម្បត្តិ