បុព្វហេតុអប់រំក្នុងតំបន់ជនរួមជាតិខ្មែរ

ពាក់ព័ន្ធដល់វិស័យអប់រំតំបន់ជនជាតិខ្មែរក្នុងខេត្ត មិនអាចរំលងពីការរួមចំណែកយ៉ាងសកម្មរបស់សមាគមព្រះសង្ឃសាមគ្គីស្នេហាជាតិខេត្តត្រាវិញ។        ព្រះឧបជ្ឈាយ៍ ថាច់អង ព្រះមេគណនិងជាប្រធានគណៈកម្មាធិការពុទ្ធិកសិក្សាខេត្ត មានថេរដីកាថា៖ ដោយបានការយកចិត្តទុកដាក់ ឧបត្ថម្ភរបស់បក្ស និងរដ្ឋ វិស័យអប់រំអក្សរសាស្ត្រខ្មែរ ក៏ដូចជាវិស័យអប់រំពុទ្ធិកសិក្សាក្នុងខេត្តទទួលបានលទ្ធផលគួរឱ្យកត់សម្គាល់ ។ ជារៀងរាល់ឆ្នាំ មានសមណសិស្ស និងយុវសិស្សពី ៩០០-១.០០០ អង្គ និងរូបប្រឡងជាប់ថ្នាក់ពុទ្ធិកមធ្យមសិក្សាបឋមភូមិ-ទុតិយភូមិ ។ ដើម្បីរួមចំណែកជាមួយបក្ស និងរដ្ឋអនុវត្តល្អវិស័យអប់រំតំបន់ជនរួមជាតិខ្មែរ គណៈកម្មាធិការពុទ្ធិកសិក្សាខេត្តបញ្ចូលមុខវិជ្ជាក្នុងកម្មវិធីសិក្សាឲ្យសមស្របនឹងការអភិវឌ្ឍន៍របស់សង្គមដូចជា៖ ភាសាអង់គ្លេស-ខ្មែរ បាលី-ខ្មែរ គណិតវិទ្យា វៀតណាមប្រែខ្មែរ ។ល។ បំពាក់បំប៉នចំណេះដឹងពីមាគ៌ាពុទ្ធសាសនា ក៏ដូចជាចំណេះដឹងសង្គមជូនដល់កូនចៅពុទ្ធបរិស័ទខ្មែរ រួមចំណែកបណ្តុះបណ្តាលប្រភពកម្មាភិបាលជនជាតិខ្មែរជូនខេត្តយើង។

ព្រះឧបជ្ឈាយ៍ថាច់អង (ជួរមុខ ទី ២ ពីឆ្វេងទៅស្តាំ) ថតរូបជាមួយ សមាជិក គណៈកម្មាធិការពុទ្ធិកសិក្សាខេត្ត។

   លោក ថាច់មុនី អនុប្រធានគណៈជនជាតិខេត្តមានប្រសាសន៍ថា៖ ជាច្រើនឆ្នាំកន្លង ខេត្តតែងសកម្មក្នុងការផ្សព្វផ្សាយ អនុវត្តមានប្រសិទ្ធភាពគោលការណ៍ គោលមាគ៌ា គោលនយោបាយរបស់បក្ស និងរដ្ឋ ចំពោះជនជាតិខ្មែរ ជាពិសេសគឺយកចិត្ត ទុកដាក់ អភិវឌ្ឍន៍វិស័យអប់រំ និងបណ្តុះបណ្តាល។ ទន្ទឹមនឹងការយកចិត្តទុកដាក់វិនិយោគកសាងមូលដ្ឋានសម្ភារ ឧបត្ថម្ភដល់ការអប់រំ និងបណ្តុះបណ្តាលតាមរយៈប្រព័ន្ធអប់រំសកល ខេត្តនៅទាំងឧបត្ថម្ភ បង្កលក្ខណៈឲ្យសមាគមព្រះសង្ឃសាមគ្គីស្នេហាជាតិខេត្តអនុវត្តល្អសកម្មភាពអប់រំ និងបណ្តុះបណ្តាលតាមប្រព័ន្ធពុទ្ធិកសិក្សាទៀតផង។ ក្នុងនោះ មានឧបត្ថម្ភថវិកាជារៀងរាល់ឆ្នាំជាង ០២ ពាន់លានដុង សម្រាប់សមាគមខេត្តឧបត្ថម្ភគ្រូបង្រៀនអក្សរសាស្រ្តខ្មែររដូវវិស្សមកាលនៅតាមវត្ត។ ជំនួយថវិកា ដើម្បីសមាគមខេត្តចាត់តាំងសម័យប្រឡងពុទ្ធិកមធ្យមសិក្សាបឋមភូមិ-ទុតិយភូមិ។ល។ សរុបមក ប្រព័ន្ធអប់រំនៃសាលាសកលជនជាតិអន្តេវាសិក ក៏ដូចជាប្រព័ន្ធអប់រំនៃបណ្តាសាលាពុទ្ធិកសិក្សា គឺជាមូលដ្ឋានបណ្តុះបណ្តាលកូនចៅមាមីងជនរួមជាតិខ្មែរឲ្យមានវ័យវឌ្ឍនាការ បរិបូរដោយ “គុណសម្បត្តិ និងវិជ្ជាសម្បត្តិ” រួមចំណែកក្នុងការបណ្តុះបណ្តាលប្រភពកម្មាភិបាល និងប្រភពធនធានមនុស្សជូនខេត្ត។

លោក ថាច់ភឿកប៊ិញ សមាជិកគណៈប្រតិបត្តិការបក្សខេត្ត អនុប្រធានទទួលបន្ទុកជំនាញនៃក្រុមប្រតិភូតំណាងរដ្ឋសភានីតិកាលទី ១៥ អង្គភាពខេត្តត្រាវិញមានប្រសាសន៍ថា៖ វិធីសាស្រ្តស្វែងយល់អំពីប្រពៃណីវប្បធម៌ជាតិយើងឲ្យបានច្បាស់លាស់ ដំបូងបង្អស់យើងត្រូវរៀនអក្សរសាស្រ្តរបស់ជាតិយើងឲ្យស្ទាត់ជំនាញ។ នោះហើយជាមូលហេតុនាំឱ្យខ្ញុំតែងចំណាយពេលស្រាវជ្រាវឯកសារ និងចូលរៀននៅបណ្តាថ្នាក់ប្រជាសិក្សា ពុទ្ធិកមធ្យមសិក្សាបឋមភូមិ-ទុតិយភូមិ និងសាលាមធ្យមសិក្សាបាលី-ខ្មែរត្រាវិញជំនួយឲ្យខ្ញុំយល់ភាសាខ្មែរ ភាសា​បាលី-​ខ្មែរបានជ្រៅជ្រះ និងមានលទ្ធភាព​សន្ទនា ថ្លែងសុន្ទរកថា សំណេះសំណាលជាមួយមាមីងម្ចាស់ឆ្នោតនៅតំបន់ជនរួមជាតិខ្មែរ ដើម្បីផ្សព្វផ្សាយបណ្តាគោលការណ៍ គោលនយោបាយកក្រឹត្យច្បាប់របស់បក្ស និងរដ្ឋ ដល់មាមីងខ្មែរ និងងាយស្រួលក្នុងការស្វែងយល់ពីចិត្តសាស្រ្ត គោលបំណងរបស់មាមីងខ្មែរ ដើម្បីស្នើដល់រដ្ឋសភាពីបណ្តាគោលនយោបាយវិនិយោគអភិវឌ្ឍន៍តំបន់ជនរួមជាតិខ្មែរតំបន់វាលទំនាបទន្លេគឺវឡុងនិយាយរួម តំបន់ជនរួមជាតិខ្មែរខេត្តត្រាវិញនិយាយដោយឡែក។

   តាមតួលេខស្ថិតិរបស់គណៈជនជាតិខេត្ត បច្ចុប្បន្ននេះក្នុងខេត្តមានកម្មាភិបាល បុគ្គលិក និយោជិតរដ្ឋជាង ២២.៦០០ នាក់ ក្នុងនោះ មានជនជាតិខ្មែរជាង ២១% ។ អាចបញ្ជាក់បានថា ការវិនិយោគអភិវឌ្ឍន៍វិស័យអប់រំ និងបណ្តុះបណ្តាលនៅតំបន់ជនរួមជាតិខ្មែរបានរួមចំណែកយ៉ាងសកម្មក្នុងការបណ្តុះបណ្តាលប្រភពកម្មាភិបាលជនជាតិខ្មែរជាច្រើនជូនខេត្ត។ នេះគឺជាមូលដ្ឋានដើម្បីខេត្តបន្តការអនុវត្តល្អសេចក្តីសម្រេចចិត្តលេខ ០៦-NQ/TU ចុះថ្ងៃទី ០៨ តុលា ឆ្នាំ ២០២១ របស់គណៈកម្មាធិការបក្សខេត្ត“ស្តីពីបន្តការអភិវឌ្ឍន៍គ្រប់វិស័យក្នុងតំបន់ជនរួមជាតិខ្មែរដំណាក់កាល ២0២១ - ២0២៥ ទិស ដៅដល់ឆ្នាំ ២0៣0”៕

អត្ថបទ‑រូបថត៖ សុជា