គណៈកម្មាធិការប្រជាជនស្រុកកូវកែស្ងើចសរសើរក្រុមទូក-ង

ថ្នាក់ដឹកនាំស្រុកកូវកែ ជូនលិខិតសរសើរដល់បណ្តាបុគ្គលឆ្នើមនៃក្រុមទូក-ង ទទួលបានជ័យលាភី។ រូបថត៖ បាធី

      ក្នុងពិធីប្រណាំងទូក-ងអំណរពិធីបុណ្យ អកអំបុកខេត្តត្រាវិញបើកទូលាយ ដើម្បីអំណរពិធីបុណ្យ អកអំបុកខេត្តត្រាវិញឆ្នាំ ២០២២ បានចាត់តាំងឡើង នៅព្រែកឡុងបិញ ទីក្រុងត្រាវិញ ក្នុងរយៈពេល ០២ ថ្ងៃ (ទី ០៦ និង ទី ០៧ វិច្ឆិកា) កន្លងហើយ  ក្រុមទូក-ង ស្រុកកូវកែដណ្ដើមបានជ័យជម្នះពីបណ្ដា ក្រុមទូក-ងដទៃ ០៣ រង្វាន់លេខ ១។ ក្នុងនោះ ខ្លឹមសារដែលប្រណាំងទូក-ងសម្រាប់បុរសចម្ងាយផ្លូវ ៨០០ ម៉ែត្រ និង ៦០០ ម៉ែត្រ មាន ០៨ ក្រុមចូលរួមប្រកួត និងខ្លឹមសារប្រណាំងទូក-ងសម្រាប់បុរស-នារី មាន ០៦ ក្រុមចូលរួម។
     នៅក្នុងពិធីអំណរស្នាដៃ សមមិត្តង្វៀងធីញៀង អនុប្រធានគណៈកម្មាធិកាប្រជាជនស្រុកកូវកែ បានស្ងើចសរសើរ និងកត់សម្គាល់ការចូលរួមប្រណាំងរបស់ក្រុមទូក-ងរបស់ស្រុក និងការចូលរួមឧបត្ថម្ភគាំទ្ររបស់សមូហភាព បុគ្គល សប្បុរសជន ដើម្បីរួមចំណែកឱ្យក្រុមទូក-ងរបស់ស្រុកទទួលបានជ័យ ជម្នះ។ ទន្ទឹមនឹងនោះ សមមិត្តក៏បានថ្លែងអំណរគុណ និងស្នើដល់បណ្តាបុគ្គល អង្គភាពទាំងនោះឲ្យបន្តរក្សាស្មារតីសាមគ្គី ស្និទ្ធស្នាល រួមចំណែកអនុវត្តល្អ ការងារសង្គមូបនីយកម្ម បណ្តាសកម្មភាពវប្បធម៌  កីឡា នៅលើភូមិសាស្ត្រស្រុកកូវកែ។
     ក្នុងឱកាសនេះ គណៈកម្មាធិការប្រជាជនស្រុកកូវកែជូនលិខិតសរសើរ ១២ ច្បាប់ដល់សមូហភាព ០២ កន្លែង និងបុគ្គល ១០ នាក់ដែលមានស្នាដៃ ក្នុងការរួមចំណែកឱ្យក្រុមទូក-ងរបស់ស្រុកទទួលបានជោគជ័យ។ ទន្ទឹមជាមួយនោះ ក្នុងពិធីអំណរស្នា ដៃនេះដែរ បណ្តាសប្បុរសជនបន្តឧបត្ថម្ភថវិកាដល់ក្រុមទូក-ងរបស់ស្រុកចំនួន ៥០ លានដុងទៀត៕  ប្រែសម្រួល៖ សុខា