ការត្រៀមបម្រុងពិធីបុណ្យកឋិនទាននៅវត្តកំបាំងបាត់

          ព្រះតេជគុណ ថាច់សាមន្ត ព្រះចៅអធិការវត្តកំបាំងបាត់មានថេរដីកាឱ្យដឹងថា៖ មុនឆ្នាំ ២០១៦ វត្តមិនសូវមានគ្រួសារពុទ្ធបរិស័ទចាត់តាំងអង្គកឋិនទានដង្ហែចូល​មកប្រគេនព្រះសង្ឃនៅក្នុងវត្តឡើយ ប៉ុន្តែចាប់ពីឆ្នាំ ២០១៦ វត្ត មានពុទ្ធបរិស័ទចាត់តាំងជាអង្គកឋិនទានដង្ហែចូលមកប្រគេនព្រះសង្ឃនៅក្នុងវត្តកាន់តែច្រើន។ ដោយឡែកក្នុងកឋិនកាលឆ្នាំ ២០២២ មានម្ចាស់កឋិនដល់ទៅ ៣ គ្រួសារចាត់តាំងដង្ហែចូលមកប្រគេនព្រះសង្ឃ(១​ កន្លែងនៅឃុំផុងភូ និង ២ កន្លែងក្នុងចំណុះវត្ត)។  ដល់ថ្ងៃ ១៣ ខែអស្សុជ ទើបចាត់តាំងអង្គកឋិនទានដង្ហែចូលមកក្នុងវត្ត ប៉ុន្តែនៅតាមគ្រួសារម្ចាស់កឋិនទានចាត់តាំងឡើងចាប់ពីថ្ងៃ ៩ រោច រួចតម្កល់ត្រៃចីវរ បរិក្ខារនៅក្នុងផ្ទះ លុះដល់ថ្ងៃ ១៣ រោចដែលជាថ្ងៃចាត់​តាំងបុណ្យកឋិនសាមគ្គីនៅក្នុងវត្ត គ្រួសារពុទ្ធបរិស័ទជាម្ចាស់កឋិនទាំង ៣ គ្រួសារ ទើបដង្ហែចូលមករួមជាមួយកឋិនសាមគ្គីចាត់តាំងដង្ហែប្រទក្សិណឧបោសថាគាររួចចូលវេរប្រគេនសង្ឃបញ្ចប់កម្មវិធីបុណ្យកឋិនទាន។ បានជាវត្តចាត់តាំងពិធីបុណ្យដោយរបៀប​នោះ ពីព្រោះចំនួនគ្រួសាពុទ្ធបរិស័ទនៅចំណុះវត្តតិចតួច បើមិនចាត់តាំងដោយរបៀបនេះទេនោះ  មិនធានាគ្រប់អ្នកជួយកិច្ចការក្នុងកម្មវិធីបុណ្យ។

ពុទ្ធបរិស័ទប្រគេនបរិក្ឋារព្រះតេជគុណ ថាច់សាមន្តដើម្បីត្រៀមឱ្យការចាត់តាំងបុណ្យកឋិនទាន។

          ព្រះតេជគុណ ថាច់សាមន្តរំលឹកឡើងវិញកាលពីឆ្នាំ ២០២១ ពិធីបុណ្យកឋិនទានក្នុងពេលកំពូលដែលអាសន្នរោគកូវីដ-១៩​ ប្រែប្រួលយ៉ាងស្មុគស្មាញ វត្តគ្មានគ្រួសារពុទ្ធបរិស័ទណាចាត់តាំងដង្ហែចូលប្រគេនព្រះសង្ឃ។ ដើម្បីរក្សាទំនៀមក្នុងព្រះពុទ្ធសាសនា វត្តក៏ចាត់តាំងជាអង្គកឋិនទានសាមគ្គី មានពុទ្ធបរិស័ទតែបន្តិចបន្តួចចូលរួម ពីព្រោះត្រូវគម្លាតសង្គម។ ក្រោយពេលអាសន្នរោគបានត្រួតពិនិត្យ រាល់ការប្រជុំជីវភាពត្រឡប់មកសភាពធម្មតាវិញ មានពុទ្ធបរិស័ទចាត់តាំងជាអង្គកឋិនទានដង្ហែចូលមកប្រគេនព្រះសង្ឃនៅក្នុងវត្ត ហើយវត្តក៏សង្ឃឹមថា​បានថវិកាច្រើនគ្រាន់បើដើម្បីកសាងបណ្ដាសំណង់នៅក្នុងទីធ្លាវត្ត។ ពីព្រោះវត្តស្ថិតនៅតំបន់ ឆ្ងាយ សំណង់ជាច្រើនមិនទាន់បានកសាងសមរម្យនៅឡើយ។

          បុណ្យកឋិនទាន ជាពិធីបុណ្យផ្ដើមចេញពីការគោរពប្រតិបត្តិផ្លូវព្រះពុទ្ធសាសនាដែលព្រះសម្មាសម្ពុទ្ធជាម្ចាស់អនុញ្ញាតឱ្យព្រះភិក្ខុទទួលអនុមោទនាបន្ទាប់ពីបញ្ចប់ការគង់ចាំព្រះវស្សាអស់រយៈពេល ៣ ខែ។ អាស្រ័យហេតុនោះ ក្រោយពេលព្រះភិក្ខុសង្ឃចេញព្រះវស្សា ពុទ្ធបរិស័ទដែលជាអ្នកមានសទ្ធាតែងចាត់តាំងជាអង្គកឋិនទានដើម្បីដង្ហែចូលវេរប្រគេនព្រះភិក្ខុសង្ឃ។ ជាមួយពុទ្ធានុញ្ញាត ក្នុងរយៈពេល ២៩ ថ្ងៃ ចាប់ពីថ្ងៃ ១ រោចខែអស្សុជដល់ថ្ងៃ ១៥ កើតខែកត្តិក ពុទ្ធបរិស័ទអាចជ្រើសថ្ងៃណាចាត់ជាថ្ងៃល្អ ថ្ងៃគាប់ប្រសើរដើម្បីចាត់តាំង តាមពុទ្ធានុញ្ញាតចែងក្នុងវិន័យបិដក។

ព្រះតេជគុណ ថាច់សាមន្ត ពិភាក្សាកិច្ចការបុណ្យកឋិនទានជាមួយបណ្ដាសមាជិកគណៈអារាមាភិបាល។

         លោកថាច់យ៉ែន ប្រធានគណៈអារាមាភិបាលវត្តកំបាំងបាត់ មានប្រសាសន៍ឱ្យដឹងថា៖ ខ្ញុំធ្លាប់បានបួសរៀននៅក្នុងវត្តនេះ បន្ទាប់ពីលាចាកសិក្ខាបទទៅក៏នៅតែបន្តការជួយបណ្ដាកិច្ចការនៅក្នុងវត្ត ធ្លាប់ឃើញផ្ទាល់ការចាត់តាំងពិធីបុណ្យកឋិនទានជារៀងរាល់ឆ្នាំ។ ប្រៀបជាមួយកឋិនទាន​នាពេលសព្វថ្ងៃ មានការខុសប្លែកជាងបណ្ដាឆ្នាំដែលប្រទេសជាតិនៅក្រខ្សត់។ ជាក់ស្ដែងដូច​បច្ចុប្បន្ន ជីវភាពរបស់ជនរួមជាតិខ្មែរកាន់តែមានភាពវិវឌ្ឍន៍ សម្ភារផ្សេងៗ បរិក្ខារសម្រាប់ពិធីបុណ្យកឋិនទានក៏មានភាពសម្បូរបែប សទ្ធាពុទ្ធបរិស័ទដុះដាលចាត់តាំងជាអង្គកឋិនទានចូលប្រគេនព្រះសង្ឃនៅក្នុងវត្តក៏មានចំនួនម្ចាស់ច្រើនជាង។

         ក្នុងរយៈពេល ២ ថ្ងៃចាត់តាំងពិធីបុណ្យកឋិនទាន៖ ថ្ងៃទី ១ បានចាត់ជាថ្ងៃចូលបុណ្យ។ ប្រការដែលពុទ្ធបរិស័ទជាម្ចាស់កឋិនទានមិនអាចបោះបង់បាននោះគឺនិមន្តព្រះសង្ឃទទួលភត្តនៅវេលាព្រឹក និងថ្ងៃត្រង់ រួចពុទ្ធបរិស័ទជាម្ចាស់កឋិនទានច្រើនចាត់តាំង​ទទួល​បដិសណ្ឋារៈដោយភោជនាហារភ្ញៀវកិត្តិយស សាច់ញាតិជិតឆ្ងាយ។ ពេលយប់និមន្តព្រះសង្ឃប្រទានធម្មទេសនា សូត្រមន្ត។ល។ អំឡុងពេលប្រហែលម៉ោង ១២-១៣ នៃថ្ងៃទី ២ ចាត់តាំងជាក្បួនដង្ហែអង្គកឋិនទានយ៉ាងអធិកអធមចូលវេរ​ប្រគេនដល់ព្រះសង្ឃជាកិច្ចបញ្ចប់កម្មវិធីបុណ្យ៕ 

អត្ថបទ-រូបថត៖ ថាច់សម្បត្តិ