យកចិត្តទុកដាក់ពង្រីកសមាជិកជនជាតិខ្មែរ

ប្អូនថាច់ធីអៀងញ៉ីចូលរួមសកម្មភាពសង្គម។

             ពេលបានចូលរួមក្នុងអង្គការនឹងជួយឲ្យយុវជនមានមោទនភាព មានស្មារតីទទួលបន្ទុកចំពោះសហគមន៍ និងសង្គម។ មានប្អូនៗជាច្រើននាក់ដែលបានពង្រីកជាសមាជិកសម្ព័ន្ធយុវជនហើយនោះ បច្ចុប្បន្នតែងមានការព្យាយាមរៀនសូត្រ លត់ដំអត្តចរិតបានល្អ។ ប្អូនថាច់ធីអៀងញ៉ី សិស្សថ្នាក់ទី ១០/២ សាលា អនុវិទ្យាល័យ‑វិទ្យាល័យលឿងហ្វា ឃុំលឿងហ្វា ស្រុកចូវថាញ់បានឲ្យដឹង៖ កាលប្អូនកំពុងរៀនបឋមសិក្សា ប្អូនឃើញបងៗពាក់អាវសម្ព័ន្ធមានសញ្ញាយុវជន ប្អូនចូលចិត្ត និងចង់បានពង្រីកជាសមាជិកសម្ព័ន្ធយុវជនណាស់។ ម្ល៉ោះហើយ ប្អូនតែងខិតខំរៀនសូត្រឲ្យបានពូកែ ចូលរួមបណ្តាសកម្មភាពក្រុមកុមារឈានមុខ ដើម្បីបានពង្រីកជាសមាជិកសម្ព័ន្ធយុវជន។កាលពីចុងឆ្នាំសិក្សាទីថ្នាក់ ៩ ប្អូនមានកិត្តិយសបានពង្រីកជាសមាជិកសម្ព័ន្ធយុវជន។ តាំងពីនោះមក ប្អូនយល់ដឹងបានច្រើន និងមានស្មារតីទទួលបន្ទុកជាងមុន ថ្ងៃណាសម្រាករៀន ប្អូនតែងចូលរួមបណ្តាចលនាដូចជា៖ ចលនាថ្ងៃសៅរ៍ស្ម័គ្រចិត្ត ថ្ងៃអាទិត្យបៃតង។ល។ ប្អូននឹងព្យាយាមរៀនសូត្រដើម្បីរក្សាខ្ជាប់កិត្តិនាមជាសិស្សពូកែ និងបន្តចូលរួមបណ្តាចលនាសម្ព័ន្ធយុវជនដើម្បីតបស្នងនូវការស្រឡាញ់រាប់អានរបស់សម្ព័ន្ធយុវជនសាលា។

          ចំពោះប្អូនស៊ើងធីង៉ុកហឹង ជាសិស្សថ្នាក់ទី ៩/២ សាលាអនុវិទ្យាល័យស៊ុងឡុក ឃុំស៊ុងឡុកជាសិស្សពូកែម្នាក់របស់សាលា បានសាលាជ្រើសឲ្យទៅរៀនថ្នាក់ចំណាប់អារម្មណ៍សម្ព័ន្ធយុវជនកាលពីថ្ងៃទី ២០ មីនា ឆ្នាំ ២០២១។​ ង៉ុកហឹងសំណេះសំណាលថា៖ប្អូនសប្បាយចិត្តណាស់ពេលដែលបានសាលាជ្រើសឲ្យទៅរៀនថ្នាក់ចំណាប់អារម្មណ៍សម្ព័ន្ធយុវជន ប្អូនបានជ្រួតជ្រាបនូវខ្លឹមសារអំពីប្រវត្តិបក្ស ប្រវត្តិសម្ព័ន្ធយុវជន ឧត្តមគតិក្នុងការរស់នៅរបស់យុវជន ណែនាំពីរបៀបច្រៀងបទចម្រៀងគោរពទង់ជាតិ។ល។ ប្អូនចូលចិត្តណាស់រួចប្អូនមានអារម្មណ៍ដូចជាធំដឹងក្តីជាងមុន។ ប្អូន នឹងបន្តខិតខំរៀនសូត្រដើម្បីក្លាយជាសិស្សល្អ កូនកតញ្ញូ ជាពិសេសប្អូននឹងខិតខំរៀនសូត្រ ព្រមទាំងចូលរួមបណ្តាចលនាដែលសម្ព័ន្ធយុវជនសាលា និងសម្ព័ន្ធយុវជនថ្នាក់លើបំផុសចលនាដើម្បីឆាប់បានពង្រីកជាសមាជិកសម្ព័ន្ធយុវជន។​

          តាំងពីខែតុលាឆ្នាំ ២០២០ ដល់ថ្ងៃទី ២០ មីនា ឆ្នាំ ២០២១ គណៈអចិន្ត្រៃយ៍សម្ព័ន្ធយុវជនស្រុកចូវថាញ់ ចាត់តាំងបើកថ្នាក់ចំណាប់អារម្មណ៍សម្ព័ន្ធយុវជនបាន ១៤ ថ្នាក់ជូនយុវជន ៩៧២ នាក់ក្នុងនោះ មានយុវជនខ្មែរ ៤៩%។ ពេលចូលរួមថ្នាក់ចំណាប់អារម្មណ៍សម្ព័ន្ធយុវជន សិក្ខាកាមបានរៀនសូត្រចំណេះដឹងសំខាន់ៗដូចជា៖ ទិសដៅឧត្តមគតិ តួនាទី និងភារកិច្ចរបស់សម្ព័ន្ធយុវជន ឈ្មោះ និងបណ្តាចលនារបស់សម្ព័ន្ធជាច្រើនដំណាក់កាលមហាសន្និបាតរបស់សម្ព័ន្ធយុវជនកុម្មុយនិស្តហូជីមិញ និងទស្សនរបស់លោកប្រធានហូជីមិញចំពោះការងារយុវជន។ល។ ផ្តើមពីនោះបានជួយឲ្យយុវជនបង្កើនការយល់ដឹងក្នុងការរៀនសូត្រ លត់ដំអត្តចរិតដើម្បីមានវ័យវឌ្ឍនាការល្អ។ ឆ្លងតាមរយៈថ្នាក់ចំណាប់អារម្មណ៍នេះមានយុវជនឆ្នើម ៨៩៨ នាក់ បានពង្រីកជាសមាជិកសម្ព័ន្ធយុវជន កើនតួលេខមកទល់ពេលនេះ ក្នុងទូទាំងស្រុកចូវថាញ់មានសមាជិក ៣.៨៣៨ ក្នុងនោះ សមាជិកជនជាតិខ្មែរ ៦៥%។ បណ្តាយុវជនដែលបានពង្រីកជាសមាជិកសម្ព័ន្ធយុវជន សុទ្ធសឹងជាសិស្ស គំរូមានគុណសម្បត្តិល្អ ព្យាយាមរៀនសូត្រ​និងសកម្មចូលរួមបណ្តាចលនាក្រុមកុមារឈានមុខនៅមូលដ្ឋាន។  ទន្ទឹមនឹងនោះ គណៈអចិន្ត្រៃយ៍សម្ព័ន្ធយុវជនស្រុក នៅទាំងចង្អុលការបណ្តាមូលដ្ឋានសម្ព័ន្ធយុវជនឲ្យចាត់តាំងបណ្តាសកម្មភាព មានប្រយោជន៍ដូចជា៖ ផ្តោះ ប្តូរសិល្បៈ ចាត់តាំងលេងល្បែងប្រជាប្រិយ ដាំដើមឈើ អនាម័យបូជនីយដ្ឋានយុទ្ធជនពលី។ល។  ដើម្បីជួយឲ្យយុវជនយល់ពីអត្ថន័យ សកម្មភាពរបស់សម្ព័ន្ធយុវជន​ និងមានកិត្តិយស បានចូលរួមជាកងជួរសម្ព័ន្ធយុវជន។

         បងម៉ាយក្វឹកត្វឹង អនុលេខាសម្ព័ន្ធយុវជនស្រុកចូវថាញ់មានប្រសាសន៍ថា៖ យុវជនឆ្នើមដែលមានអាយុគ្រប់ ១៥ ឆ្នាំ រមែងបានពង្រីកជាសមាជិកសម្ព័ន្ធយុវជនតាមច្បាប់កំណត់។ ដូច្នោះហើយគណៈអចិន្ត្រៃយ៍សម្ព័ន្ធយុវជនស្រុក តែងយកចិត្តទុកដាក់ចង្អុលការបណ្តាមូលដ្ឋានសម្ព័ន្ធយុវជនផ្សព្វផ្សាយ ចលនាសិស្សានុសិស្ស យុវជននៅជនបទឱ្យចូលរួមថ្នាក់ចំណាប់អារម្មណ៍សម្ព័ន្ធយុវជន ដើម្បីបំពាក់បំប៉ន អប់រំយុវជនឆ្នើម មានសតិអារម្មណ៍ សីលធម៌ របៀបរស់នៅល្អ ជួយឲ្យពួកគេបង្កើនការយល់ដឹងអំពីប្រវត្តិសាស្រ្តសម្ព័ន្ធយុវជននិងបក្សកុម្មុយនិស្តវៀតណាម។ ឆ្លងតាមរយៈនោះដែរ ជួយឲ្យយុវជនយល់ពីសិទ្ធិ ផលប្រយោជន៍ តួនាទីរបស់សម្ព័ន្ធយុវជន ដើម្បីជាថាមពលជំរុញឲ្យពួកគេព្យាយាមរៀនសូត្រ   អប់រំខ្លួនឲ្យបានល្អដើម្បីបានចូលក្នុងកងជួរសម្ព័ន្ធយុវជន។   

        គិតតាំងពីខែតុលាឆ្នាំ ២០២០ ដល់ថ្ងៃទី ២០ ខែមីនាឆ្នាំ ២០២១ បណ្តាមូលដ្ឋានសម្ព័ន្ធយុវជនស្ថិតក្រោមឱវាទសម្ព័ន្ធយុវជនស្រុកចូវថាញ់បានឧទ្ទេសនាមសមាជិកឆ្នើម ៧០ នាក់ (ក្នុងនោះសមាជិកជនជាតិខ្មែរ ៣០ នាក់)ជូនបក្សពិនិត្យពង្រីកជាបក្ខជនបាន ១៥ នាក់ ក្នុងនោះ មានសមាជិកជនជាតិខ្មែរ ០៥ នាក់៕      

អត្ថបទ‑រូបថត៖ សុជា