សមាគមព្រះសង្ឃសាមគ្គីស្នេហាជាតិស្រុកទីវកឹង៖ បង្កើនគុណភាពអប់រំសិស្សប្រកបដោយគុណសម្បត្តិ-វិជ្ជាសម្បត្តិ

     កំណត់ច្បាស់ថា វិ​ស័យអប់រំផ្នែកពុទ្ធិកសិក្សាគឺជាមូលដ្ឋានកសាងសមាគមរឹងមាំ។ ជាច្រើនឆ្នាំកន្លងសមាគមព្រះសង្ឃសាមគ្គីសេ្នហាជាតិស្រុកទីវកឹងចង្អុលការបណ្តាវត្តអនុវត្តល្អការងារអប់រំពុទ្ធិកសិក្សា ដើម្បីអប់រំសិស្សប្រកបដោយគុណសម្បត្តិ-វិជ្ជាសម្បត្តិ។

     តាំងពីបុរាណកាលមក វត្ដអារាមខ្មែរមិនត្រឹមតែជាបូជនីយដ្ឋានប៉ុណ្ណោះទេ នៅទាំងជាមជ្ឈមណ្ឌលអប់រំព្រះសង្ឃ និងប្រជាពុទ្ធបរិស័ទខ្មែរទៀតផង។ ដើម្បីបង្កើនគុណភាពអប់រំពុទ្ធិកសិក្សា ក៏ដូចជាអប់រំអក្សរសាស្រ្ត វប្បធម៌ខ្មែរ សមាគមព្រះសង្ឃសាមគ្គីសេ្នហាជាតិស្រុកទីវកឹងតែងចង្អុលការបណ្ដាវត្ដបង្កើនការគ្រប់គ្រងគ្រូបង្រៀនឲ្យបានល្អ ផ្លាស់ប្ដូរវិធីសាស្ដ្រអប់រំតាមកម្មវិធីសិក្សារបស់សមាគមព្រះសង្ឃសាមគ្គីសេ្នហាជាតិខេត្ដ-ស្រុក ។ ថ្នាក់ស្រុក គឺរៀននូវថ្នាក់ពុទ្ធិកមធ្យមសិក្សាបឋមភូមិឆ្នាំទី ១, ទី ២ និងឆ្នាំ ទី ៣ ។ បេក្ខសិស្សត្រូវរៀនទាំងផ្លូវលោក និងផ្លូវធម៌ពី ១០- ១៣ មុខវិជ្ជា​​ដូចជា៖ ព្រះគាថា ពុទ្ធានុពុទ្ធ វេយ្យាករណ៍បាលី សម្ព័ន្ធមាលា តែងសេចក្តី គណិតវិទ្យា ភាសាអង់គ្លេស។ល។

គណៈអចិន្ត្រៃយ៍សមាគមស្រុក ធ្វើជាអធិបតីមណ្ឌលប្រឡងរួមនៅវត្តកំពង់មាស។

     ព្រះអាចារ្យសឺនហ្វាង គង់នៅវត្តកំពង់ឈូក (ផ្នោសង្រ្កម) បង្រៀនបណ្តាថ្នាក់ពុទ្ធិកសិក្សាក្នុងស្រុកទីវកឹងមានថេរដីកាថា៖ ឆ្នាំសិក្សា ២០២២- ២០២៣ អាត្មាទទួលបង្រៀន ០២ វត្ត។ អាត្មាបង្រៀនមុខវិជ្ជាសម្ព័ន្ធមាលានៃពុទ្ធិកមធ្យមសិក្សាបឋមភូមិឆ្នាំទី ១ នៅវត្តសាសនសាមគ្គីរង្សី (អូរត្រាវ) និងបង្រៀនមុខវិជ្ជាភាសាខ្មែរនៃពុទ្ធិកមធ្យមសិក្សាបឋមភូមិឆ្នាំទី ២ នៅវត្តកំពង់ឈូក (ផ្នោសង្រ្កម)។ ទន្ទឹមនឹងបង្រៀនបេក្ខសិស្សបង្កើនចំណេះដឹងមុខជំនាញចំពោះមុខវិជ្ជានីមួយៗដែលអាត្មាទទួលបន្ទុកនោះ អាត្មានៅទាំងឆ្លៀតពេលអប់រំបេក្ខសិស្សអំពីវប្បធម៌ ប្រពៃណីខ្មែរអំពីសុជីវធម៌ក្នុងជីវភាពជាបព្វជិតក៏ដូចជាជីវភាពជាគ្រហស្ថដើម្បីរួមចំណែកអប់រំសិស្សមានចំណេះដឹងផងមានសុជីវធម៌ក្នុងការរស់នៅផង ។

     ព្រះតេជគុណគឹមម័ន ព្រះអនុប្រធានសមាគមព្រះសង្ឃសាមគ្គីស្នេហាជាតិស្រុក ប្រធានគណៈកម្មាធិការពុទ្ធិកសិក្សាស្រុកទីវកឹង ព្រះចៅអធិការរងវត្តពោធិវង្សកំពង់ដូង (ផ្នោដូង)មានថេរដីកាថា៖ គុណភាពនៃឆ្នាំសិក្សា ២០២២-២០២៣ មានការកើនឡើង បើប្រៀបនឹងឆ្នាំសិក្សាកន្លង។ ពីព្រោះឆ្នាំសិក្សាកន្លង មានការជះឥទ្ធិពលអំពីអាសន្នរោគកូវីដ-១៩ ការប្រឡងបញ្ចប់ឆ្នាំសិក្សាបានចាត់តាំងនៅតាមវត្ត ដូច្នោះហើយគុណភាពមិនសូវបានខ្ពស់។ ឆ្នាំសិក្សានេះ សមាគមស្រុកបានចាត់តាំងប្រឡងរួម មានគណៈមន្ត្រីសង្ឃស្រុកធ្វើជាអធិបតីនៃមណ្ឌលប្រឡង។ ការចេញវិញ្ញាសាប្រឡងក៏ដូចជាលក្ខន្តិកៈនៃការប្រឡងបានប្រព្រឹត្តទៅយ៉ាងម៉ឺងម៉ាត់។ ដើម្បីអនុវត្តសម្រេចភារកិច្ចសំខាន់ៗក្នុងវិស័យសិក្សាអប់រំរបស់ស្រុកនាឆ្នាំសិក្សា ២០២៣-២០២៤ សមាគមស្រុកបានចង្អុលការបណ្តាវត្តយកព្រះទ័យទុកដាក់ និងអនុវត្តល្អការងារគ្រប់គ្រងគ្រូបង្រៀន រំលឹកគ្រូបង្រៀនឲ្យចូលបង្រៀនឲ្យបានទៀងទាត់មានវិធីសាស្រ្តបង្រៀនល្អ ពិនិត្យវាយតម្លៃសិស្សទាំងគុណសម្បត្តិ និងវិជ្ជាសម្បត្តិ ដើម្បីបន្តការបង្កើនគុណភាពវិស័យអប់រំពុទ្ធិកសិក្សាស្រុកឲ្យកើនឡើងទាំងបរិមាណ និងគុណភាព។

បេក្ខសិស្សថ្នាក់ពុទ្ធិកមធ្យមសិក្សាបឋមភូមិឆ្នាំទី ២ ទទួលជ័យលាភីពីលេខ ១ ដល់លេខ ៥ (រាប់ពីស្តាំទៅឆ្វេង)

     ឆ្នាំសិក្សា ២០២២-២០២៣ ស្រុកទីវកឹងបើកបង្រៀនពុទ្ធិកមធ្យមសិក្សាបឋមភូមិ (ឆ្នាំទី ១ ទី ២ ទី ៣) ចំនួន ០៨ បន្ទប់ ដោយមានបេក្ខសិស្ស ២២៤ អង្គ និងរូបចូលរៀន។ ក្នុងនោះថ្នាក់ពុទ្ធិកមធ្យមសិក្សាបឋមភូមិឆ្នាំទី ១ មានបេក្ខសិស្ស ១៣០ អង្គ និងរូប ចូលរួមប្រឡង ។ លទ្ធផល ១០០% បេក្ខសិស្សប្រឡងជាប់ថ្នាក់។ សមណសិស្សដោតឹងវ៉ូវ សិក្សានៅវត្តផ្នោសង្រ្កម​ទទួលជ័យលាភីលេខ ១ ។ ថ្នាក់ពុទ្ធិកមធ្យមសិក្សាបឋមភូមិឆ្នាំទី ២ មានបេក្ខសិស្ស ៤១ អង្គ និងរូប ចូលរួមប្រឡង។ លទ្ធផល ១០០% បេក្ខសិស្សប្រឡងជាប់ថ្នាក់។ បេក្ខសិស្សថាច់វ៉ាំងសាន្ត​ សិក្សាវត្តផ្នោសង្ក្រម ទទួលជ័យលាភីលេខ ១។ ថ្នាក់ពុទ្ធិកមធ្យមសិក្សាបឋមភូមិឆ្នាំទី ៣ មានបេក្ខសិស្ស ៥៩ អង្គ និងរូប ចូលរួមប្រឡង។ លទ្ធផល ១០០% បេក្ខសិស្សប្រឡងជាប់ថ្នាក់។ បេក្ខសិស្សគឹមវិសែល សិក្សានៅវត្តពោធិវង្សកំពង់ដូងទទួលជ័យលាភីលេខ ១ ៕

អត្ថបត‑រូបថត៖ សុជា