បេក្ខសិស្សជាង ៩.៧០០ នាក់ចូលរួមប្រឡងយកវិញ្ញាបនបត្រវិទ្យាល័យជាតិឆ្នាំ ២០២៤

     នៅរសៀលថ្ងៃទី ២៦ ខែមិថុនា មណ្ឌលប្រឡងវិទ្យាល័យក្នុងខេត្តចំនួន ២៩ មណ្ឌលបានបើកសម័យប្រឡងយកវិញ្ញាបនបត្រវិទ្យាល័យជាតិឆ្នាំ ២០២៤ ដោយមាន  បេក្ខសិស្ស ៩.៦៧៩/៩.៧០៦ នាក់ (ស្មើ ៩៩,៧២% នៃចំនួនបេក្ខសិស្សដែលបានចុះឈ្មោះប្រឡង) ។ នៅវេលាម៉ោង ០២ រសៀល បេក្ខសិស្សទៅកាន់មណ្ឌលប្រឡងនីមួយៗ ដើម្បី បំពេញបែបបទលិខិតប្រឡង ស្តាប់អនុរក្សផ្សព្វផ្សាយអំពីលក្ខន្តិកៈប្រឡង កាលបរិច្ឆេទ ប្រឡង និងកែតម្រូវនាម-គោត្ត  (ប្រសិនបើមានខុស) ក្នុងលិខិតចូលរួមប្រឡង។

នៅ​រសៀល​ថ្ងៃ​ទី​ ២៦ មិថុនា បេក្ខសិស្ស​នៅ​មណ្ឌល​ប្រឡង​សាលាវិទ្យាល័យហ៊ីវទឺ​មក​កាន់មណ្ឌលប្រឡងពិនិត្យតារាងរាយនាម និង​បំពេញ​បែបបទ​ប្រឡង ។

     * នៅស្រុកទីវកឹង មានមណ្ឌលប្រឡង ០៣ មណ្ឌលរួមមាន៖ សាលាវិទ្យាល័យទីវកឹង វិទ្យាល័យកូវក្វាង និងវិទ្យាល័យហ៊ីវទឺ ដោយមានបេក្ខសិស្ស ៩៩៨ នាក់ចូលរួមប្រឡង។ បេក្ខសិស្ស​នៅតាម​មណ្ឌល​ប្រឡង​ក្នុង​ស្រុកអនុវត្ត​ម៉ឺងម៉ាត់ និង​គោរព​តាមលក្ខន្តិកៈ នៅមណ្ឌល​ប្រឡង​។

     នៅសាលា​វិទ្យាល័យ​ហ៊ីវទឺ មាន​បេក្ខសិស្ស​ ១៧៩ ​នាក់ចូលរួមប្រឡង។ បន្ទាប់ពីប្រឡងចប់វិញ្ញាសាទី ១ (អក្សរសាស្ត្រ) ដោយកំណត់ពេល ១២០ នាទីបេក្ខសិស្ស ថាច់ធីស្វឹងម៉ាយ រីករាយឲ្យដឹងថា៖ វិញ្ញាសាអក្សរសាស្រ្តឆ្នាំនេះសុទ្ធសឹងតែចេញក្នុងប្រព័ន្ធមេរៀនដែលគ្រូបង្រៀនបានបំពាក់បំប៉ន។ បើតាមប្អូនយល់ឃើញ ថាវិញ្ញាសាអក្សរសាស្រ្តមិនពិបាកពេក ល្មមសមគួរតាមសមត្ថភាពប្អូន ម្ល៉ោះហើយ ប្អូនធ្វើបានល្អគួរសម ។ ខ អាន-យល់ និង វគ្គតែងសេចក្តីប្អូនធ្វើបានទាំងអស់។

បេក្ខសិស្សមណ្ឌល​ប្រឡងសាលា​វិទ្យាល័យហ៊ីវទឺ ស្តាប់​អ្នកគ្រូអនុរក្សប្រកាសលក្ខន្តិកៈ​ប្រឡង។

     រីឯ​បេក្ខសិស្ស ថាច់សុធី ក៏ដូច្នោះ​ដែរ។ ប្អូនមាន​ទំនុក​ចិត្តចំពោះខ្លួនឯងនៅ​ពេល​ប្រឡងចប់វិញ្ញាសា​ទី ១។ សុធីសំណេះសំណាល៖ “វិញ្ញាសាដំបូងប្អូនធ្វើបានល្អ ។ ផ្តើមពីនោះ ញ៉ាំងឲ្យប្អូន​មាន​អារម្មណ៍​រីក​រាយ មានថាមពលដើម្បី​បន្ត​ការ​ប្រឡងវិញ្ញាសា បន្តទៀត។

     *នៅទីក្រុងត្រាវិញ មានមណ្ឌលប្រឡងចំនួន ០៣ មណ្ឌល៖ សាលា វិទ្យាល័យទីក្រុងត្រាវិញ វិទ្យាល័យង្វៀងធៀងថាញ់ សាលាអនុវត្តគរុកោសល្យ ដោយមានបេក្ខសិស្ស ១.៨៣១ នាក់ចូលរួមប្រឡង។

បេក្ខសិស្សថាច់ធីស្វឹងម៉ាយ (ទី ២ រាប់ពីឆ្វេងទៅស្តាំ) និងមិត្តភក្តិ ពិនិត្យសំណួរប្រឡងឡើងវិញ ។

បេក្ខសិស្សហ្វិញធីថាញ់ម៉ី (ទី ២ រាប់ពីស្តាំទៅឆ្វេង) និងមិត្តភក្តិពិនិត្យសំណួរប្រឡងឡើងវិញ។

     នៅ​រសៀល​ថ្ងៃ​ទី ២៧ ខែ​មិថុនា បេក្ខសិស្ស​ប្រឡងវិញ្ញាសាគណិត​សាស្រ្តតាមរូបភាពពហុជ្រើសរើស ​ដោយកំណត់ពេល ៩០ នាទី ។ មណ្ឌល​ប្រឡងនៅ សាលាវិទ្យាល័យទី​ក្រុង​ត្រាវិញ មាន​បេក្ខសិស្ស​ ៥៩៨ ​នាក់ចូលរួមប្រឡង​។ ពេល​ប្រឡង​វិញ្ញាសាគណិតសាស្រ្តរួច បេក្ខសិស្ស​ខ្លះ​មានទឹកមុខរីករាយ បេក្ខសិស្សខ្លះ​មាន​ទឹកស្រពោន។

      បេក្ខសិស្ស ស៊ើងបេតី មណ្ឌលប្រឡងសាលាវិទ្យាល័យទីក្រុងត្រាវិញ សំណេះ សំណាល៖ វិញ្ញាសាគណិតសាស្រ្តច្បាមតាមកម្មវិធីសិក្សាកម្រិតវិទ្យាល័យ ជាពិសេស ថ្នាក់ទី ១២។ ក្នុងនោះ អត្រាសំណួរយោងតាមការយល់ដឹងខ្ពស់ មានច្រើនសំណួរ ។ ប្អូនឆ្លើយសំណួរមធ្យមៗបានគ្រាន់បើ។ ចំពោះសំណួរដែលពិបាកប្អូនមិនសូវមាន​ទំនុក​ចិត្តប៉ុន្មានឡើយ។

បេក្ខសិស្សស៊ើងបេតី (ខាងស្តាំ) និងថាច់ថាប្រឡងសម្រេច ២ វិញ្ញាសានៅថ្ងៃដំបូង។

     ចំពោះប្អូនថាច់ថា មណ្ឌលប្រឡងសាលាវិទ្យាល័យ​ទីក្រុងត្រាវិញសំណេះ សំណាល៖ ចំពោះប្អូន វិញ្ញាសាគណិតសាស្រ្តឆ្នាំនេះពិបាក​បន្តិច រួមមាន ៥0 ខ ។ ក្នុងនោះ សំណួរងាយៗ ប្រមាណ ៥0% ។ សំណួរមធ្យម ២0% សំណួរពិបាកបន្តិច ៣0% ។ ចំពោះប្អូនៗមាន​ទំនុក​ចិត្តចំពោះចម្លើយរបស់ប្អូនដែលជ្រើសត្រូវ​ប្រហែល ៦០%។

     សម័យប្រឡងយកវិញ្ញាបនបត្រវិទ្យាល័យជាតិឆ្នាំ ​២០២៤ ​ នៅរក្សាបែបបទ ដូចសម័យប្រឡងយកវិញ្ញាបនបត្រវិទ្យាល័យជាតិ​ឆ្នាំ ​២០២៣ ។ បេក្ខសិស្សចូលរួមប្រឡង ០៤ វិញ្ញាសារួមមាន៖ គណិតសាស្រ្ត អក្សរសាស្ត្រ ភាសាបរទេស និងជ្រើសប្រឡង ១ ក្រុមវិញ្ញាសា ក្នុងចំណោម ០២  ក្រុមវិញ្ញាសា គឺក្រុមវិញ្ញាសាវិទ្យាសាស្ត្រធម្មជាតិ (គីមីសាស្រ្ត រូបសាស្រ្ត ជីវសាស្រ្ត) និងក្រុមវិញ្ញាសា វិទ្យាសាស្ត្រសង្គម (ប្រវត្តិសាស្រ្ត ភូមិសាស្រ្ត អប់រំពលរដ្ឋ)។ វិញ្ញាសាអក្សរសាស្រ្តប្រឡង តាមរូបភាពសរសេរជាអត្ថបទ វិញ្ញាសាក្រៅពីនោះប្រឡងតាមរូបភាពពហុជ្រើសរើស៕

អត្ថបទ - រូបថត៖ សុជា