ការរៀនសូត្រផ្នែកពុទ្ធិកសិក្សានៅវត្តអង្គររាជបូរី(អង្គ)

                 ជាច្រើនឆ្នាំមកហើយ វត្តអង្គររាជបូរី (អង្គ) នៅសង្កាត់ទី ៨ ទីក្រុងត្រាវិញមិនត្រឹមតែល្បីល្បាញជាវត្តដែលមានអាយុកាលយូរអង្វែង ជាកេរដំណែលវប្បធម៌ថ្នាក់ជាតិប៉ុណ្ណោះទេ ហើយនៅទាំងជាវត្តពុទ្ធសាសនាគណៈមហានិកាយខ្មែរមួយល្បីល្បាញអំពីការចាត់តាំងថ្នាក់បង្រៀន-រៀនបណ្តាថ្នាក់ពុទ្ធិកសិក្សាដើម្បីរួមចំណែកដល់ការបណ្តុះបណ្តាលធនធានព្រះសង្ឃ កូនចៅជនរួមជាតិខ្មែរទៀតផង។

គណៈមេប្រយោគពិនិត្យផ្តល់ពិន្ទុដល់សមណសិស្ស សិស្សប្រឡងឆមាស។

              សមណសិស្សមកសិក្សានៅក្នុងវត្ត មិនត្រឹមតែផ្តុំឱ្យការសិក្សាផ្នែកពុទ្ធិកសិក្សាប៉ុណ្ណោះទេមានអង្គខ្លះនៅទាំងឆ្លៀតរៀនបណ្តាថ្នាក់បំពេញវិជ្ជាមហាវិទ្យាល័យទៀតផង។

             ប្អូនស្រី សឺនធីស្វ៊ឹង​ នៅភូមិព្រះស្រែ ឃុំលឿងហ្វា ស្រុកចូវថាញ់ ជានិស្សិតឆ្នាំទី ២ ផ្នែកអក្សរសាស្រ្តខ្មែរសាលាមហាវិទ្យាល័យត្រាវិញបានឱ្យដឹង៖ ជាច្រើនឆ្នាំមកហើយក្រៅពីរៀននៅសាលាសកល ប្អូនតែងផ្សារភ្ជាប់ការរៀនសូត្រខាងពុទ្ធិកសិក្សានៅវត្តអង្គ។ ក្នុងចំណោមចំណេះដឹងនោះ ដោយឡែកអំពីភាសាខ្មែរដែលមានការលាយឡំដោយភាសាសំស្រ្កឹត បាលីនោះបានជួយឱ្យប្អូនមិនបង្អង់លើកកម្ពស់ចំណេះដឹង។ ពេលបញ្ចប់ការសិក្សាកម្រិតវិទ្យាល័យ ប្អូនបន្តជ្រើសរើសផ្នែកភាសាខ្មែរនៅសាលាមហាវិទ្យាល័យត្រាវិញដើម្បីឱ្យសមស្របជាមួយចំណេះដែលខ្លួនសន្សំបាន។

                រយៈពេលជាច្រើនឆ្នាំរក្សាខ្ជាប់ការបើកសាលាពុទ្ធិកសិក្សា មានអង្គខ្លះក្រោយពេលបញ្ចប់ការសិក្សាបណ្តាថ្នាក់ពុទ្ធិកសិក្សាក៏ស្ម័គ្រចិត្តសុំបន្តស្នាក់នៅក្នុងវត្តដើម្បីជួយបង្ហាត់បង្រៀនស្នងបន្តឱ្យអ្នកជំនាន់មុន។ ព្រះតេជគុណ ថាច់បូរ៉ា ព្រះអចិន្តេយ្យាចារ្យថ្នាក់ពុទ្ធិកមធ្យមសិក្សាទុតិយភូមិឆ្នាំទី១វត្តអង្គររាជបូរី(អង្គ)មានថេរដីកាឱ្យដឹង៖​ បច្ចុប្បន្ន នៅក្នុងវត្តមានព្រះឧទ្ទេសាចារ្យជាង ២០ អង្គជួយបង្ហាត់បង្រៀន។ អាស្រ័យហេតុនោះ វត្តតែងត្រៀមបម្រុង បើសិនបានសមាគមព្រះសង្ឃសាមគ្គីស្នេហាជាតិខេត្តយល់ព្រមឱ្យបើកបណ្តាថ្នាក់ ​ និងបញ្ជូនសមណសិស្សមកសិក្សានៅក្នុងវត្តនោះ វត្តអាចឆ្លើយតបបានគ្រប់គ្រាន់ពីធនធានគ្រូបង្រៀនទទួលបន្ទុក រួចអាចបើកថ្នាក់ពុទ្ធិកសិក្សាខ្ពស់ជាង។

                ការរៀនសូត្របណ្តាថ្នាក់ពុទ្ធិកសិក្សារបស់សមណសិស្សបានរក្សា ប្រការមួយក្នុងបណ្តាប្រការសំខាន់បង្គួរនោះគឺដោយសារសទ្ធា ការឧបត្ថម្ភចង្ហាន់បិណ្ឌបាតដល់ព្រះសង្ឃរបស់ពុទ្ធបរិស័ទនៅចំណុះវត្ត។ ព្រះឧបជ្ឈាយ៍ ថាច់សុខសាន្ត ព្រះចៅអធិការវត្តអង្គររាជបូរី(អង្គ)មានថេរដីកាឱ្យដឹង៖ ពុទ្ធបរិស័ទខ្មែរចំណុះវត្តមានសទ្ធាក្នុងការឧបត្ថម្ភព្រះសង្ឃសិក្សារៀនសូត្រណាស់។​ កន្លែងស្នាក់អាស្រ័យវត្តគិតគូរចំណែកចង្ហាន់អាហារភោជនតែងបានពុទ្ធបរិស័ទបម្រុងគ្រប់សព្វរាល់ពេលព្រះសង្ឃនិមន្តទៅបិណ្ឌបាត។ រួមជាមួយនោះគឺការលៃលកធនធានអ្នកមានលទ្ធភាព មានចំណេះវិជ្ជាទទួលបន្ទុកឱ្យការបង្ហាត់បង្រៀន ម៉្លេះទើបជាច្រើនឆ្នាំកន្លង ជិតដល់ពេលបវេសនកាលឆ្នាំសិក្សាថ្មី ក្រៅពីចំនួនសមណសិស្សដែលគណៈសិក្សាអប់រំពុទ្ធិកសិក្សានៃសមាគមព្រះសង្ឃសាមគ្គីស្នេហាជាតិខេត្តប្រគល់ឱ្យ នៅទាំងមានសមណសិស្សនៅតាមបណ្តាខេត្តក្រៅមកសុំស្នាក់អាស្រ័យរៀនសូត្រទៀតផង។ នោះគឺជាមោទនភាពរបស់វត្តពេលបានរួមចំណែកដល់ការបណ្តុះបណ្តាលព្រះសង្ឃ កូនចៅជនរួមជាតិខ្មែរស្នងបន្តទៅជំនាន់ក្រោយទៀត៕       

                 អត្ថបទ-រូបថត៖ សម្បត្តិ