អ្នកគ្រូថាច់ធីហ្វីគ្រូបង្រៀនភាសាខ្មែរពូកែ

          ក្រោយពេលប្រឡងយកសញ្ញាបត្រផ្នែកគរុកោសល្យអក្សរសាស្រ្តខ្មែរណាម​បូសាលាមហវិទ្យាល័យត្រាវិញនៅឆ្នាំ ២០១៣ អ្នកគ្រូ  ថាច់ធីហ្វី បានចូលរួមប្រឡងជ្រើសរើសក្របខណ្ឌ រួចបានបញ្ជូនទៅបង្រៀនវិញ្ញាសាភាសាខ្មែរនៅសាលាសកលជនជាតិអន្តេវាសិក អនុវិទ្យាល័យស្រុកយ្វៀង​ហាយរហូតមកទល់សព្វថ្ងៃ។ ក្នុងការបង្ហាត់​បង្រៀន អ្នកគ្រូតែងឧស្សាហ៍ព្យាយាម ម៉្លោះហើយ ស្នាដៃក្នុងការងារអប់រំ​របស់អ្នកគ្រូកាន់តែបានលើកកម្ពស់ ហើយបានទទួលស្គាល់ជាយុទ្ធនារីប្រឡងប្រណាំងថ្នាក់មូលដ្ឋាន ០៣ ឆ្នាំបន្តបន្ទាប់និង បានទទួលស្គាល់ជាគ្រូបង្រៀនពូកែថ្នាក់ស្រុកឆ្នាំសិក្សា ២០១៩-២០២០។

អ្នកគ្រូថាច់ធីហ្វីកំពុងបង្រៀនភាសាខ្មែរដល់ប្អូនៗ។

            ជាមួយតួនាទីជាគ្រូបង្រៀនទទួលបន្ទុកមុខវិញ្ញាសា អ្នកគ្រូតែងរក្សាខ្ជាប់ស្នា​ដៃ “បង្រៀនល្អ រៀនល្អ” សម្រាប់ខ្លួន និងសម្រាប់សិស្សានុសិស្ស។ ផ្តើមពីនោះលទ្ធផល​សិក្សា​ភាសាខ្មែររបស់សិស្សតែងសម្រេចលទ្ធផលខ្ពស់។ អ្នកគ្រូថាច់ធីហ្វី​បានចែករំលែក៖ ដោយកំណត់ឃើញថា ទន្ទឹមនឹងការអប់រំសកល​ សិស្សជន​ជាតិខ្មែរនៅតំបន់ជ្រៅ ឆ្ងាយដាច់ស្រយាល ភាគច្រើនមានតម្រូវការរៀនភាសាជនជាតិ ម៉្លោះហើយខ្ញុំមានបំណងរួមចំណែកអ្វីដែលខ្លួនសន្សែសន្សំបានដើម្បីបង្ហាត់បង្រៀនដល់ប្អូនៗ។ ក្នុងការងារបង្ហាត់បង្រៀន ខ្ញុំតែងស្រាវជ្រាវបណ្តាឯកសារពាក់ព័ន្ធ ធ្វើឧបករណ៍បង្ហាត់បង្រៀនដែលជាប់ទាក់ទងដល់មុខវិញ្ញាសាដោយខ្លួនឯង សំដៅជួយឲ្យប្អូនៗយល់ច្បាស់លាស់ភាសាខ្មែរ និងលក្ខណៈវប្បធម៌ដ៏វិសេសវិសាលរបស់ជនរួមជាតិខ្មែរ។

            ដោយអាស្រ័យរក្សាបានល្អស្នាដៃក្នុងការបង្រៀននិងរៀន ម៉្លោះហើយ ជារៀងរាល់ឆ្នាំ សាលាសកលជន​ជាតិអន្តេវាសិកអនុវិទ្យាល័យ ស្រុកយ្វៀងហាយតែងមានសិស្សចូលរួមសម័យប្រឡង “សៀវភៅជ្រះ អក្សរស្អាត” ភាសាខ្មែរថ្នាក់ស្រុក និងថ្នាក់ខេត្ត ហើយទទួលបានរង្វាន់លេខមួយ លេខពីរផងដែរ។

           អ្នកគ្រូថាច់ធីហ្វីតែងរួសរាយសកម្មអនុវត្តបណ្តាកិច្ចការដែលគណៈចាងហ្វាងតម្រូវ​ឱ្យ។ លោកគ្រូលីង៉ុកទ្រឿង  ចាងហ្វាងរងសាលាសកលជនជាតិអន្តេវាសិកអនុវិទ្យាល័យ​ស្រុកយ្វៀងហាយបានឱ្យដឹង៖ អ្នកគ្រូថាច់ធីហ្វីជាគ្រូបង្រៀនវ័យក្មេងប្រកបដោយសុទ្ធចិត្តជាមួយការងារ និងបន្ទុករបស់ខ្លួន។ អ្នកគ្រូបានរួមចំណែកជួយឱ្យសាលាសម្រេចបណ្តាកម្រិតផែនការអំពីចលនា ក៏ដូចជាគុណភាពអប់រំបណ្តា​មុខវិញ្ញាសាក្នុងសាលានិយាយរួម ភាសាខ្មែរនិយាយដោយឡែកមិនបង្អង់បានលើក​កម្ពស់។

           បច្ចុប្បន្ន ចលនាសិល្បៈរបស់សាលាកំពុងរីកចម្រើនក៏អាស្រ័យដោយមានការរួមចំ​ណែករបស់អ្នកគ្រូថាច់ធីហ្វីដែរ។ អ្នកគ្រូបានរួមជាមួយសាលាជ្រើសយក​ឈុតសម្តែងសមស្រប រួចហ្វឹកហាត់ឱ្យប្អូនៗចេះរបៀបរាំស្ទាត់ជំនាញបង្គួរ។ ផ្តើមពីនោះ ប្អូនៗក្នុងក្រុមសិល្បៈរបស់សាលាតែងបានជ្រើសចូលរួមសម្តែងនៅតាមបណ្តាឱកាសចាត់តាំងបុណ្យទានរបស់ជនរួមជាតិខ្មែរ។

        ជាគ្រូបង្រៀនវ័យក្មេងមួយរូប អ្នកគ្រូតែងផ្តោះប្តូរអំពីចំណេះដឹងវិជ្ជាជីវៈ ដើម្បីអនុវត្តសម្រេចល្អភារកិច្ច និងជួយឱ្យបុព្វហេតុអប់រំនៅតំបន់ជនរួមជាតិខ្មែរកាន់តែសម្រេចបានលទ្ធផលខ្ពស់ ស័ក្តិសមជាមួយបុព្វហេតុផ្លាស់ថ្មីរបស់ប្រទេសជាតិនាពេលបច្ចុប្បន្ន៕        

                   អត្ថបទ-រូបថត៖ សម្បត្តិ