ឃុំតឹបស៊ើង៖ ពង្រីកប្រសិទ្ធភាពក្លឹប “កសិករល្អ ៣ យ៉ាង”

លោកគឹមវន្ធី ប្រធានសមាគមកសិករឃុំតឹបស៊ើងបានឲ្យដឹងថា៖ ប្រហែលពីឆ្នាំ ២០១៨ ទៅមុខ លើភូមិសាស្រ្តឃុំ នៅតាមបណ្ដាផ្លូវជនបទមួយចំនួន ប្រជាជនមិនទាន់កាប់ឆ្ការព្រៃឈើស៊ុមទ្រុម បាំងប្រយោលភ្នែក ហើយផ្លូវច្រកនៅចង្អៀតមិនទាន់បានស្រឡះ។ ភូមិមួយចំនួននៅកើតបណ្ដាករណីបំពានច្បាប់ ដូចជាប៉ះទង្គិចចរាចរ លេងល្បែង ជល់មាន់ ឆក់លួច យុវជនប្រមូលផ្ដុំគ្នានៅពេលយប់ សេព គ្រឿងស្រវឹងរួចបង្កអុកឡុកនៅទីសាធារណៈ បើកបរម៉ូតូឆ្វៀលឆ្វាត់ បំពងសំឡេង។ល។ បណ្ដាលឲ្យជះឥទ្ធិពលដល់ចិត្តសាស្រ្តព្រួយបារម្ភក្នុងប្រជាជន ។

ពិធីចេញបង្ហាញមុខក្លឹប “កសិករល្អ ៣ យ៉ាង”។ រូបថត៖ ស៊ើងតៀង

ភូមិបាតី (សេ) ជាភូមិមួយក្នុងចំណោមភូមិ ទាំង ០៩ ស្ថិតនៅតំបន់ជនបទរបស់ឃុំតឹបស៊ើង។ ភូមិនេះធំទូលាយ ស្ថិតនៅសងខាងផ្លូវជាតិលេខ ៥៤ ភ្ជាប់ព្រំប្រទល់ឃុំភឿកហ៊ឹង។ ភូមិមានប្រជាជនចំនួន ២០៥ គ្រួសារ មានជនរួមជាតិខ្មែររស់នៅទីនោះ ៩២% នៃចំនួនគ្រួសាររួម។ មាមីងភាគច្រើនប្រកបរបរចិញ្ចឹមសត្វ និងផលិតកសិកម្ម។ មុននេះ ស្មារតីយល់ដឹងក្នុងការប្រតិបត្តិច្បាប់របស់គ្រួសារប្រជាជនមួយចំនួននៅអន់ថយ នៅទន្ទឹងរង់ចាំទៅលើគោលនយោបាយឧបត្ថម្ភរបស់រដ្ឋ ធ្លាក់ទៅក្នុងអន្លង់អបាយមុខសង្គម។ តាមតួលេខស្ថិតិឆ្នាំ ២០១៧ ភូមិបាតី (សេ) មានមុខសញ្ញា ០៩ នាក់ប្រព្រឹត្តអំពើបំពានច្បាប់ រួមមានមុខសញ្ញា ០២ នាក់លេងបៀ ០២ នាក់ឆក់លួច ម្នាក់សេពគ្រឿងស្រវឹងរួចបង្កអុកឡុកសាធារណៈ ០៣ នាក់តែងប្រមូលផ្ដុំគ្នានៅពេលយប់ ម្នាក់ទៀតតែងបើកបរម៉ូតូឆ្វៀលឆ្វាត។ ស្ថិតក្នុងស្ថានភាពនោះ ទាមទាររដ្ឋអំណាចមូលដ្ឋានត្រូវមានវិធីសាស្រ្តទាន់ពេលដើម្បីចលនា ទប់ស្កាត់ ធានាស្ថានភាពសន្តិសុខសណ្ដាប់ធ្នាប់នៅមូលដ្ឋាន។

អនុវត្តគោលការណ៍របស់សមាគមកសិករស្រុកថ្កូវស្ដីពីការជំរុញមាំចលនា “ទូទាំងប្រជាជនការពារសន្តិសុខមាតុភូមិ” រួមចំណែកធានាសន្តិសុខសណ្ដាប់ធា្នប់នៅមូលដ្ឋាន ឆ្នាំ ២០១៨ គណៈកម្មាធិការប្រជាជនឃុំបង្កើតក្លឹប “កសិករល្អ ៣ យ៉ាង” (យល់ដឹង និងអនុវត្តល្អបណ្ដាគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ ចូលរួមកសាងផ្លូវគមនាគមន៍ឲ្យស្រឡះស្រឡូន ជ្រះ ស្អាត អប់រំល្អកូនចៅក្នុងគ្រួសារមិនឲ្យបំពានច្បាប់ និងប្រព្រឹត្តអំពើបាបគ្រោះសង្គម រួមចំណែកកសាងភូមិសុវត្ថិភាពសន្តិសុខសណ្ដាប់ធ្នាប់) នៅភូមិបាតី (សេ) ដោយមានសមាជិក ០៩ រូប អធិការក្លឹបគឺលោកថាច់យ៉ើន ប្រធានសាខាសមាគមកសិករភូមិ។

លោកថាច់យ៉ើនបានឲ្យដឹងថា៖ រៀងរាល់ខែ ក្លឹបចាត់តាំងប្រជុំម្ដងដើម្បីផ្សព្វផ្សាយជួយឲ្យប្រជាជនយល់ច្បាស់គោលការណ៍របស់បក្ស គោលនយោបាយ ច្បាប់របស់រដ្ឋ ប្រសព្វនិងអប់រំបណ្ដាករណីបំពានច្បាប់អំពីសន្តិសុខសណ្ដាប់ធ្នាប់ លើកទឹកចិត្តឲ្យមុខសញ្ញាទាំងនោះខិតខំរកស៊ី មិនបំពានច្បាប់ ស្វែងយល់ និងសម្រុះសម្រួលបណ្ដាករណីវណ័្ឌទំនាស់តូចតាចនៅមូលដ្ឋាន កសាងមនោសញ្ចេតនារវាងអ្នកភូមិផងរបងជាមួយ អនាម័យបរិស្ថានតាមបណ្ដាដងផ្លូវ ស្រង់សំរាម ត្រកៀតប៉ោងនៅតាមប្រឡាយវាលស្រែ បង្កលក្ខណៈងាយស្រួលឲ្យប្រជាជនក្នុងភូមិធ្វើដំណើរទៅមក ពលកម្មផលិត។ ផ្សព្វផ្សាយ ដាស់ស្មារតីប្រជាជនឲ្យប្រុងប្រយ័ត្ននឹងកលល្បិចរបស់បណ្ដាប្រភេទឧក្រឹដ្ឋជនឆក់លួច បោកបញ្ឆោត យកទ្រព្យសម្បត្តិ ចេតនាបង្ករបួស។ល។ សំដៅបង្កើនស្មារតីប្រុងប្រយ័ត្ន ទន្ទឹមនឹងនោះ ចលនា ណែនាំសមាជិកឲ្យរកឃើញ ថ្កោលទោស ឡោមព័ទ្ធចាប់ឧក្រឹដ្ឋជន ស្វ័យបង្ការ គ្រប់គ្រង ការពារទ្រព្យសម្បត្តិរបស់ខ្លួន។

តាមប្រសាសន៍របស់លោកថាច់យ៉ើន មុនពេលបង្កើតក្លឹប “កសិករល្អ ៣ យ៉ាង” ក្នុងមួយឆ្នាំៗ គណៈកម្មការប្រជាជនភូមិសម្រុះសម្រួលពី ០៣-០៤ ករណី។ ចាប់ពីពេលបង្កើតក្លឹបមកទល់ពេលនេះ ក្រុមសម្រុះសម្រួល ភូមិសម្រុះសម្រួលករណីវណ័្ឌទំនាស់តូចតាចប្រមាណតែ ០២ ករណី រួមចំណែកបង្កភាពទំនាក់ទំនងផ្សារភ្ជាប់ជាមួយបណ្ដាគ្រួសារ រក្សាមនោសញ្ចេតនារវាងអ្នកភូមិផងជាមួយ។ ក្រោយពេលបង្កើតបាន ០៣ ឆ្នាំ ក្លឹបអប់រំមុខសញ្ញា ០៩ នាក់ មាន ០៧ នាក់បានកែប្រែខ្លួនល្អ បច្ចុប្បន្ននៅ ០២ នាក់កំពុងគ្រប់គ្រង និងបន្តអប់រំមុខសញ្ញា ០៤ នាក់ទៀតកែខ្លួនបានល្អ។

បានដឹងថា គ្រួសារលោកមាគឹមយឿនស្ថិតក្នុងក្របខ័ណ្ឌជិតក្រ មានកូន ០៣ នាក់ ០២ នាក់ទៅធ្វើការនៅខេត្តបិញយឿង ចំណែកកូនពៅនៅផ្ទះជាមួយជីដូនជីតា ប៉ុន្តែកូនពៅរបស់គាត់គ្មានការងារធ្វើលំនឹងឡើយ តែងប្រមូលផ្ដុំគ្នាជាមួយមិត្តរួចសេពគ្រឿងស្រវឹងហើយបង្កអុកឡុកភូមិស្រុកបណ្ដាលឲ្យបាត់ការសាមគ្គី។ ដោយឃើញរឿងរ៉ាវនោះកើតឡើងជាញឹកញាប់ ម៉្លោះហើយអតីតយុទ្ធជនទ្រិញវ៉ាំងជា សមាជិកក្លឹប “កសិករល្អ ៣ យ៉ាង” ទៅដល់ផ្ទះ ជួបរួចសួរអំពីហេតុផល ហើយលើកទឹកចិត្តឲ្យខិតខំរកស៊ី។ មិនត្រឹមតែម្ដង គាត់បានអញ្ជើញទៅដល់គ្រួសារនោះជាច្រើនលើក ម៉្លោះហើយ កូនពៅរបស់មាយឿនសន្សឹមៗផ្លាស់ប្ដូរគំនិត មិននៅប្រមូលផ្ដុំគ្នាសេពគ្រឿងស្រវឹងទៀត ហើយក៏ឡើងទៅទីក្រុងហូជីមិញធ្វើជាងកំបោរ រហូតមកទល់ពេលនេះ។

រួមជាមួយនោះ បណ្ដាសមាជិកក្លឹបចូលរួមយាមល្បាតធានាសន្តិសុខសណ្ដាប់ធ្នាប់បានចំនួន ៣២ លើករំសាយកន្លែងលេងល្បែង ០៣ កន្លែង ក្រុមយុវជនប្រមូលផ្ដុំគ្នានៅពេលយប់ ០១ កន្លែង អប់រំនៅនឹងកន្លែងចំបោះមុខសញ្ញា ១៨ នាក់។ ក្លឹបបានឧបត្ថម្ភ ០១ ករណីឲ្យបុលទុនពីធនាគារជាមួយចំនួនប្រាក់ ១០ លានដុងសម្រាប់ពង្រីកសេដ្ឋកិច្ចគ្រួសារ។ អាស្រ័យលទ្ធផលទាំងនោះរបស់ក្លឹប បង្កបានក្ដី ជំនឿក្នុងប្រជាជន ម៉្លោះហើយប្រជាជនតែងសកម្មចូលរួមថ្កោលទោសឧក្រឹដ្ឋជន។ ក្នុងរយៈពេល ០៣ ឆ្នាំកន្លង ប្រជាជនបានផ្ដល់ដំណឹងជូនកងកម្លាំងនគរបាលចាប់ករណីលេងបៀ ០១ ករណី ថ្កោលទោសមុខសញ្ញាលួចទ្រព្យសម្បត្តិម្នាក់។ គណៈអធិការក្លឹបសហការជាមួយនគរបាលឃុំចាប់ភ័ស្តុតាងមុខសញ្ញាប្រើឧបករណ៍អគ្គិសនីឆក់ចាប់ត្រីខុសច្បាប់ម្នាក់ ចាប់ភ័ស្តុតាងមុខសញ្ញាចូលរួមលេងបៀ ១២ នាក់ ផ្ដល់ ០៤ ប្រភពដំណឹងមានតម្លៃទាក់ទងដល់សន្តិសុខសណ្ដាប់ធ្នាប់ ជួយឲ្យកងកម្លាំងនគរបាលដោះស្រាយរឿងរ៉ាវទាន់ពេល។

ការខិតខំរបស់បណ្ដាសមាជិកក្នុងក្លឹប “កសិករល្អ ៣ យ៉ាង” បានរួមចំណែកបង្កើនការយល់ ដឹងក្នុងការប្រតិបត្តិច្បាប់ ក្នុងកម្មាភិបាល សមាជិក និងគ្រួសារកសិករភូមិបាតី (សេ)។ បច្ចុប្បន្ន ទម្រង់បានពង្រីកទូលាយនៅបណ្ដាភូមិបាតី (អា) ដើមជ្រៃ ដុងស៊ើង។ ផ្ដើមពីនោះ កម្មាភិបាល សមាជិកកសិករមានការសម្រេចចិត្តក្នុងការកសាងគ្រួសារមិនបំពានច្បាប់ និងមិនប្រព្រឹត្តអំពើបាបគ្រោះសង្គម។ អាស្រ័យហេតុនោះ គ្រួសារនីមួយៗតែងសកម្មអនុវត្ត និងចលនាមនុស្សរាល់គ្នាចូលរួមអនុវត្ត រួមចំណែកញ៉ាំងឲ្យចលនាទូទាំងប្រជាជនការពារសន្តិសុខមាតុភូមិពីមួយថ្ងៃទៅមួយថ្ងៃកាន់តែរាលដាល រួមចំណែករក្សាភ្ជាប់កិត្តិនាមឃុំសុវត្ថិភាពសន្តិសុខសណ្ដាប់ធ្នាប់៕

ប្រែសម្រួល៖ ថាច់ហ្វាង