“សេដ្ឋីដូង” នៅតំបន់ដីលឿងហ្វា

លោកមាធ្វី (ទី១ខាងស្តាំ) រៀបរាប់អនុស្សារវីយ៍ពីការលក់អុសដូង។

          លោកផាងវ៉ាំងធ្វី បានផ្សារភ្ជាប់នឹងរបរដាំដូងជាង ៣០ ឆ្នាំកន្លង។ ដំបូងគាត់ដាំ ២០ កុង ដើម្បីយកស្រកី ស្លឹក ធាងដូងធ្វើអុសលក់ រកប្រាក់ចិញ្ចឹមគ្រួសារ។ ដំណាក់កាលនោះ ជារៀងរាល់ថ្ងៃប្តីប្រពន្ធគាត់ដឹកជញ្ជូនអុសដូងដោយទូកយកទៅលក់នៅតំបន់ផ្សេងៗជាមួយតម្លៃពី ២០០‑៥០០ ដុងក្នុងមួយបាច់។ កាលនោះ ប្រពន្ធគាត់គិតកាប់ដើមដូងចោលដើម្បីដាំដើមឈើហូបផ្លែផ្សេងវិញ ប៉ុន្តែលោកមាធ្វីប្តេជ្ញារក្សាចម្ការដូងរហូតមក។ ប្រមាណ ១៥ ឆ្នាំមកនេះ តម្លៃផ្លែដូងបានថ្លៃ ឈ្មួញមកទិញដល់ចម្ការ សេដ្ឋកិច្ចគ្រួសារគាត់ចាប់ផ្តើមកែលម្អបន្តិចម្តងៗពីការលក់ផ្លែដូង ឆ្នាំ ២០២០ ផ្លែដូងទុំគ្រួសារលោកមាធ្វីបានឈ្មួញមកប្រមូលទិញដល់ចម្ការជារៀងរាល់ខែ ជាមួយតម្លៃពី ១២០‑១៣០ ពាន់ដុងក្នុងមួយទ្វាទសកៈ (១២ ផ្លែ)។ ជាមួយនឹងផ្ទៃចម្ការដូង ៥០ កុង លោកមាធ្វីប្រមូលផលជាង ៨.០០០ ផ្លែក្នុងមួយខែ ក្រោយពេលទូទាត់ខ្ទង់ចំណាយរួច (ដាក់ជីក្នុងមួយឆ្នាំ ០២ លើក សរុបទឹកប្រាក់ ២៥ លានដុង)គ្រួសារលោកមាធ្វីទទួលបានប្រាក់ជាង ៩០០ លានដុងក្នុងមួយឆ្នាំ។

         សំណេះសំណាលអំពីបទពិសោធន៍ដាំដូង ក្នុងពេលកន្លង លោកផាងវ៉ាំងធ្វីបានឲ្យដឹង៖ បើចង់បណ្តុះពូជដូងគឺគ្រាន់តែជ្រើសយកផ្លែធំៗល្អៗយកទៅបណ្តុះឲ្យដុះរួចយកទៅដាំជាការស្រេច។ ដើម្បីដូងលូតលាស់ល្អ ជារៀងរាល់ឆ្នាំគ្រួសារខ្ញុំដាក់ជី ០២ លើក ក្នុងរដូវប្រាំង ០១ លើក រដូវវស្សា ០១​ លើក។ រដូវប្រាំងខ្ញុំដាក់ជីអូរ៉េចំនួន ០,៥ គីឡូក្រាមក្នុងមួយគល់ ហើយស្រោចទឹកជារឿយៗ។ រដូវវស្សាខ្ញុំដាក់ជី NPK ១៦‑១៦‑៨ ចំនួន ០១ គីឡូក្រាមក្នុងមួយគល់។ ទម្រង់បង្វែរផ្ទៃដីចម្ការ ចម្រុះនិងផ្ទៃដីផលិតស្រូវផ្ដល់ទិន្នផលទាបមកដាំដូងតែងបានឃុំយកចិត្តទុកដាក់ជានិច្ច។ លោកលីវ៉ាំងតឹម ប្រធានសមាគមកសិករឃុំលឿងហ្វាបានឲ្យដឹង៖ អនុវត្តតាមកិច្ចចង្អុលការរបស់គណៈកម្មាធិការបក្ស រដ្ឋអំណាចឃុំស្ដីពីការផ្លាស់ប្ដូរពូជដំណាំនាំមកលទ្ធផលសេដ្ឋកិច្ចខ្ពស់ ក្នុងនោះក៏បានចង្អុលការឲ្យដាំដូងផងដែរ។ ជាលទ្ធផល ឆ្នាំ ២០២០ ឃុំបានបង្វែរផ្ទៃដីចម្ការចម្រុះ និងផ្ទៃដីផលិតស្រូវផ្ដល់ទិន្នផលទាបជាង ៦,២ ហិកតាមកដាំដូងលើស ២០% បើប្រៀបនឹងផែនការដាក់ចេញ។ កើនតួលេខមកទល់ពេលនេះ ឃុំលឿងហ្វាមានចម្ការដូង ៦៨៧ ហិកតា។ ជុំរុំដាំដូងច្រើនបំផុតគឺភូមិអូរជិក (អា)ជាង ១៦២ ហិកតា អូរជិក (បេ) ជាង ២០៦ ហិក តា។ អនុវត្តគោលការណ៍ផ្លាស់ប្ដូរពូជដំណាំ កែប្រែចម្ការចម្រុះនៅលើភូមិសាស្រ្តឃុំក៏មានគំរូកសិករឆ្នើមជាច្រើននាក់បានផ្លាស់ប្តូរពូជដំណាំនាំមកនូវប្រសិទ្ធភាពជាក់ស្តែង។ ក្នុងនោះមានបង្វែរផ្ទៃដីចម្ការចម្រុះមកដាំដូងនាំមកលទ្ធផលសេដ្ឋកិច្ចខ្ពស់ដូចជាលោកមាផាងវ៉ាំងធ្វីជាគ្រួសារមួយក្នុងចំណោមគ្រួសារ ដែលផ្សារភ្ជាប់ជាមួយនឹងចម្ការដូងហើយធ្វើមានពីចម្ការដូងនោះឯង។

         ដាំដូងមិនត្រឹមតែនាំមកលទ្ធផលសេដ្ឋកិច្ចខ្ពស់ប៉ុណ្ណោះទេ​ នៅទាំងរួមចំណែកការពារបរិស្ថាននៅជនបទឲ្យបានខៀវ‑ជ្រះ‑ស្អាតទៀតផង។ពីព្រោះដាំដូងមិនសូវប្រើថ្នាំគីមី។ ដោយការខិតខំផ្ទាល់ខ្លួន នឹងការប្តេជ្ញាថែរក្សាចម្ការដូង កំណត់យកដើមដូងធ្វើជាសក្តានុពល លោកផាងវ៉ាំងធ្វីក៏ល្បីឈ្មោះជា  “សេដ្ឋីដូង”​ ក្នុងតំបន់ឃុំលឿងហ្វា។ ព្រោះថាផ្តើមចម្ការ ដូងដំបូង ២០ កុង គ្រួសារគាត់សន្សំទិញបានដី ៣០ កុងដាំដូងជាបន្ត​ទៀតព្រមទាំងសន្សំសំចៃសង់បានផ្ទះមួយខ្នងយ៉ាងស្កឹមស្កៃជាមួយតម្លៃជាង ១,២ ពាន់លានដុងកាលពី ឆ្នាំ ២០១៦ ៕        

អត្ថបទ‑រូបថត៖សុជា