សិស្សឆ្នើមក្នុងការរៀនសូត្រ និងធ្វើតាមដំបូន្មានអ៊ំ

* ស៊ើងធីង៉ុកថើ៖ ធ្វើតាមដំបូន្មានអ៊ំ អំពីការលត់ដំអត្តចរិត បំពាក់បំប៉នសីលធម៌អស់មួយជីវិត

ប្អូនស៊ើងធីង៉ុកថើ អានសៀវភៅ។

ស៊ើងធីង៉ុកថើជាសិស្សថ្នាក់ទី ១២/៤ សាលា​វិទ្យាល័យឡុងហ៊ីប ឃុំឡុងហ៊ីបស្រុកថ្កូវសម្រេចកិត្តិនាមជាសិស្សគ្រាន់បើពូកែ ១១ ឆ្នាំ បន្តបន្ទាប់។ ជាពិសេសរយៈកាល ០២ ឆ្នាំ ដែលរៀននៅសាលាវិទ្យាល័យឡុងហ៊ីប ប្អូនសម្រេចកិត្តនាមពូកែឆ្នើមបានគណៈចាងហ្វាងសាលាសរសើរជារឿយៗនៅថ្ងៃគោរពទង់ជាតិដើមសប្តាហ៍ ដើម្បីឱ្យមិត្តភក្តិរៀនសូត្រ និងយកតម្រាប់តាម។

ក្នុង​ការរៀនសូត្រ ​និង​ធ្វើ​តាមដំបូន្មានអ៊ំ ង៉ុកថើចំណាប់អារម្មណ៍បំផុតអំពី​ការលត់ដំអត្តចរិត បំពាក់បំប៉ន​សីលធម៌អស់មួយ​ជីវិត។ តាមរយៈនោះ ង៉ុកថើ តែងអនុវត្តល្អតាមច្បាប់សីលធម៌នៅរាល់សកម្មភាព ក៏ដូចជាចាំជានិច្ចក្នុងសតិរបស់ខ្លួន។ ជាពិសេស​ចាប់តាំងពីបានមិត្តរួម​ថ្នាក់ទុកចិត្ត ជ្រើស​ធ្វើជា​ប្រធាន​ថ្នាក់​រយៈកាល  ​០៣​ ឆ្នាំរៀននៅសាលាវិទ្យាល័យ​។

ង៉ុកថើសំណេះសំណាលថា៖ ក្នុងរឿងនិទានរបស់អ៊ំ ដែលប្អូនបានអាន ជំនួយឲ្យប្អូនមានចំណេះដឹងដ៏មានតម្លៃ ដើម្បីយកទៅអនុវត្តក្នុងការរៀនសូត្រ និងការរស់នៅ។ ក្នុងនោះ អ៊ំហូជាទីគោរពស្រឡាញ់បានផ្តាំថា៖ “យើងគ្រប់រូបត្រូវរៀនសូត្របំពាក់បំប៉នសីលធម៌ ដូចជាលុបមុខជារៀងរាល់ថ្ងៃ” នេះជាការងារដែលត្រូវព្យាយាមធ្វើឲ្យបានខ្ជាប់ខ្ជួន និងធ្វើអស់មួយជីវិត។ អ៊ំនៅទាំងបញ្ជាក់ថា៖ “មានវិជ្ជាសម្បត្តិប៉ុន្តែ​គ្មាន​គុណសម្បត្តិ​គឺ​ជាមនុស្សឥតប្រយោជន៍។ ​មាន​គុណសម្បត្តិ ប៉ុន្តែគ្មានវិជ្ជាសម្បត្តិមិនអាចធ្វើ​ការងារអ្វីមានប្រយោជន៍ឡើយ” ។ ធ្វើតាមដំបូន្មានអ៊ំប្អូន​តែង​ស្តាប់​បង្គាប់តាមដំបូន្មាន​ឪពុក ម្ដាយ និង​គ្រូបង្រៀន។ ក្នុងថ្នាក់រៀនប្អូនតែងយកចិត្តទុកដាក់ស្តាប់គ្រូពន្យល់មេរៀនព្រមទាំងក្រើនរំលឹកដោយវាចាទន់ភ្លន់ចំពោះមិត្តភក្តិណាដែលនិយាយគ្នាក្នុងថ្នាក់រៀន។ ពង្រីកស្មារតីសាមគ្គី ជួយធុរៈគ្នាក្នុងការរៀនសូត្រ។ ពេលនៅ​ផ្ទះ​ក្រៅពី​ម៉ោងធ្វើលំហាត់ ប្អូនបាន​ជួយធ្វើ​ការងារ​ផ្ទះ ដើម្បីសម្រាលការផ្ទះមួយចំណែកណាជូន​ឪពុក​ម្តាយ។

លោកគ្រូ ឡេហ្វាងណាម លេខាសម្ព័ន្ធយុវជនសាលាវិទ្យាល័យឡុងហ៊ីប បានឲ្យដឹង៖ ង៉ុកថើគឺជាកូនស្រីម្នាក់គត់របស់គ្រួសារដែលមានជីវភាពធូរធា ប៉ុន្តែ ង៉ុងថើគ្មានចរិតក្អេងក្អាងឡើយ។ ជាច្រើនឆ្នាំមកនេះ ង៉ុកថើ តែងព្យាយាមរៀនសូត្រ និងលត់ដំអត្តចរិតបានល្អជាពិសេសប្អូនតែងគោរពធ្វើតាមដំបូន្នានអ៊ំជានិច្ច។ អាស្រ័យហេតុនោះទើបង៉ុកថើមិនត្រឹមតែសម្រេចកិត្តិនាមជាសិស្សពូកែ ឆ្នើមប៉ុណ្ណោះទេ ថែមទាំងអនុវត្តល្អតួនាទីជាប្រធានថ្នាក់ លេខាសាខាសម្ព័ន្ធយុវជនថ្នាក់ ឈានមុខក្នុងសកម្មភាពសម្ព័ន្ធយុវជន និងសម្រេចស្នាដៃជាច្រើនគួរឲ្យកត់សម្គាល់ដូចជា៖ ទទួលជ័យលាភីលេខ ៣ នាពិធីប្រឡងស្វែងយល់អំពី “ ឧត្តមគតិ សីលធម៌ ឥរិយាបថហូជីមិញ” ថ្នាក់ស្រុក (ឆ្នាំសិក្សា ២0២0-២0២១)។ ជ័យលាភីលេខ ១ ថ្នាក់សាលានាពីធីប្រឡងនិទានរឿងអ៊ំហូ (ឆ្នាំសិក្សា ២០២១-២០២២)។ល។

* ថាច់ធីហុង៖  ធ្វើតាមដំបូន្មានអ៊ំ “វ័យក្មេង ធ្វើការងារស្រាល”

ប្អួនថាច់ហុង (ខាងឆ្វេង) និងមិត្តរួមថ្នាក់អានសៀវភៅនៅបណ្ណាល័យសាលា។

ថាច់ធីហុង ជាសិស្សថ្នាក់ទី ៥/១ សាលាបឋមសិក្សាលឿងហ្វា(សេ) ឃុំលឿងហ្វា (អា) ស្រុកចូវថាញ់។ ហុងជាកូនលុះក្នុងដំបូន្មាន​របស់ឪពុក​ម្តាយ​កាលទើបដឹងក្តីម៉្លេះប្អូនតែង ព្យាយាម​រៀនសូត្របានល្អ។ ដោយ​ការព្យាយាម​នោះ  ហុងក៏​សម្រេចកិត្តិនាមជា​សិស្ស​ពូកែ​ក្នុងរយៈកាល ០៤ ឆ្នាំ បន្តបន្ទាប់។ ទន្ទឹមនឹងនោះ  ហុងនៅទាំងចូលរួមបណ្តាពិធីប្រឡងជាច្រើន ទទួលបានជ័យលាភី​ខ្ពស់​ជារឿយៗ ដូចជា៖ ជ័យលាភីលេខ ១ នាពីធីប្រឡង​និទាន​រឿងអ៊ំថ្នាក់សាលា។ ជ័យលាភីលេខ ៣ នាពិធីប្រឡងកុមារឧទ្ទេសនាមសៀវភៅថ្នាក់ស្រុក។ល។

កើតនិងធំដឹងក្តីក្នុងគ្រួសារកសិករ។ ទោះបីមមាញឹកនឹងការងារធ្វើស្រែចម្ការក៏ដោយ ប៉ុន្តែពេលមកពីរៀនវិញ ឪពុកម្តាយប្អូនហុងតែងចំណាយពេលស្និទ្ធស្នាល ជំរុញទឹកចិត្ត និងរួមដំណើរជាមួយហុង (ហុងមានបងប្អូនស្រី ០២ នាក់)ក្នុងពេលរៀន និងធ្វើលំហាត់នៅផ្ទះ។

ដើម្បីសម្រេចស្នាដៃក្នុងការរៀនសូត្រដូចបច្ចុប្បន្ននេះ ទន្ទឹមនឹងការជំរុញស្មារតីរបស់ឪពុក ម្តាយ ហុងតែងគោរព និងធ្វើតាមដំបូន្មានអ៊ំ។ ហុងសំណេះសំណាល៖ ប្អូនចូលចិត្តអានសៀវភៅណាស់ ជាពិសេសអានសៀវភៅ “និទានរឿងអ៊ំហូជាមួយយុវជន យុវកុមារ”។ ក្នុង​នោះ​ ប្អូនរៀនសូត្រ និងធ្វើតាមបណ្តាំអ៊ំបានផ្តាំចំពោះយុវជន និងយុវកុមារថា៖ “ វ័យក្មេង​ធ្វើការងារស្រាល តាម​កម្លាំងរបស់ខ្លួន”។ ដើម្បីគោរព ធ្វើបានល្អតាមដំបូន្មានអ៊ំ ប្អូនតែងសកម្មចូលរួមបណ្តាចលនា “ផែនការតូច”ដូចជា៖ រើសអេតចាយ ក្រដាសគ្រប់ប្រភេទជាដើម ដើម្បីកសាងមូលនិធីក្រុមកុមារឈានមុខ សម្រាប់ឧបត្ថម្ភមិត្តភក្តិដែលមានស្ថានភាពលំបាក។ ក្រៅពីនោះប្អូននៅទាំង​ជួយណែនាំ​មិត្តភ័ក្តិ​ក្នុង​ការរៀនសូត្រ​តាមរយៈចលនា “មិត្តទាំងពីរនាក់ជួយគ្នាដើម្បីជឿនលឿ” “ជួយមិត្ត​ជម្នះ​ការលំបាក”។ល។

អ្នកគ្រូ ង្វៀងធីឡង គ្រូបង្រៀនអចិន្រ្តៃយ៍ថ្នាក់ទី ៥/១ សាលាបឋមសិក្ស លឿងហ្វា (សេ)បានឲ្យដឹង៖ ប្អូនថាច់ធីហុងជាសិស្សលុះក្នុងដំបូន្មាន រៀនពូកែ។ ក្រៅ​ពីនោះ ប្អូននៅទាំង​បាន​គ្រូ​បង្រៀនអប់រំឲ្យអនុវត្ត​ល្អ​នូវដំបូន្មាន ​៥ ប្រការរបស់អ៊ំហូ​​។ នេះជាវិជ្ជាសម្បត្តិដ៏មានតម្លៃសម្រាប់សិស្សទាំងអស់ក្នុងនោះមានប្អូនហុង យកទៅអនុវត្តក្នុងការរៀនសូត្រនិងជីវភាពដើម្បីមានវ័យវឌ្ឍនាការល្អ៕                                                                           

អត្ថបទ‑រូបថត៖ សុជា