លេខាសាខាបក្ស គឹមម៉ាកលី៖ សម្រេចឆ្នើមភារកិច្ចច្រើនឆ្នាំបន្តបន្ទាប់

លោកមាគឹមម៉ាកលី(ខាងឆ្វេង)កំពុងផ្តោះប្តូរជាមួយលេខាសាខាបក្សភូមិជ្រោយទន្សា។​ រូបថត៖ ហ្វិញណូយ

ឆ្នាំ ១៩៧៦ យុវជនគឹមម៉ាកលី នៅភូមិជ្រោយទន្សា ឃុំថាញ់ស៊ើង (បច្ចុប្បន្នឃុំគីមស៊ើង) ស្រុកថ្កូវបានទៅបំពេញកាតព្វកិច្ចយោធាអន្តរជាតិនៅសមរភូមិកម្ពុជា។ ឆ្នាំ​ ១៩៨២ ចេញចាកជួរទ័ពរួចវិលមកកាន់មូលដ្ឋាន ដល់ឆ្នាំ ១៩៩៩ ចូលរួមបំពេញការងារនៅភូមិដោយមានតួនាទីជាយោធាភូមិនិង អនុប្រធានគណៈកម្មការប្រជាជនភូមិហើយដល់ឆ្នាំ ២០០៤​ លោកបានសាខាបក្សភូមិជ្រោយទន្សា​បោះ​ឆ្នោតតែងតាំងធ្វើលេខាសាខាបក្សរហូតមកទល់ពេលនេះ។ ចំពោះតួនាទីណាក៏ដោយ លោកគឹមម៉ាកលីតែងអនុវត្តសម្រេចល្អនិងសម្រេចឆ្នើមភារកិច្ចជានិច្ចហើយបានស្ងើចសរសើរជូនរង្វាន់យ៉ាងច្រើន។

សាខាបក្សភូមិជ្រោយទន្សា មានបក្ខជន ១៩ រូបសុទ្ធសឹងជាជនជាតិខ្មែរដឹកនាំ​ប្រជាជនជិត ២១០ គ្រួសារ។ ជាមូលដ្ឋានស្ថិតនៅប្របទន្លេហូវ មានប្រឡាយខា្វត់ខ្វែង តែងជន់លិចដោយទឹក ឥទ្ធិពលដល់ការផលិតកសិកម្មរបស់មាមីងក្នុងភូមិ។ ម្យ៉ាងទៀត ផ្លូវគមនាគមន៍ក៏នៅខ្សត់ខ្សោយ ការធ្វើដំណើរទៅមក ដឹកជញ្ជូនមុខទំនិញរបស់ប្រជា​ជនក៏ជួបការលំបាកច្រើន។ នៅចំពោះមុខស្ថានភាពនោះ លេខាសាខាបក្ស គឹមម៉ាកលីតែងជញ្ជឹងគិតថា “បើសិនមិនម្ចាស់ការស្នើនៅរង់ចាំតែការបត់បែងទុននោះ ពិបាកអនុវត្តកសាងស្ពាន ថ្នល់ ទំនប់ព័ទ្ធជុំរឹងមាំដើម្បីបង្កលក្ខណៈងាយស្រួលជូនប្រជាជនណាស់”។ ផ្តើមពីនោះ លោកគឹមម៉ាកលីបានតម្រូវឲ្យបក្ខជនរួមជាមួយសាខាបក្សបំផុសចលនាប្រជាជន និងសប្បុរសជនក្នុងនិងក្រៅមូលដ្ឋានរួមវិភាគ​ទានទឹកប្រាក់ កម្លាំងពលកម្ម បរិច្ចាគដី ឈើហូបផ្លែដើម្បីកសាងប្រព័ន្ធហេដ្ឋារចនាសម្ព័ន្ធបម្រើការធ្វើដំណើរ ពង្រីកការផលិត បង្កើនប្រាក់ចំណូល លើកកម្ពស់ជីវភាព សម្ភារស្មារតីជូនប្រជាជន។

ប៉ុន្មានឆ្នាំមកអាយនេះ អាស្រ័យតម្លៃចុះថោក មាមីងកសិករខាតទុនច្រើន ម៉្លោះហើយ លោកគឹមម៉ាកលីបាន​បំផុសចលនាដល់សមូហភាពសាខាបក្សកសាងទម្រង់ “ប៉ិនប្រសប់ការងារប្រជាចលនា” ក្នុង​ការកសាងស្ពាន ថ្នល់ ទំនប់រាំងស្កាត់ទឹកជំនន់ រួចផ្លាស់ប្ដូររចនាសម្ព័ន្ធផលិតសមស្របជាមួយនឹងលក្ខណៈដីធ្លី ដើម្បីបង្កើនប្រាក់ចំណូលលើផ្ទៃដីផលិតមានខ្នាតតែមួយ។ គាត់តែងឈានមុខ ធ្វើជាគំរូ រួចចលនាបក្ខជនដទៃក្នុងសាខាបក្សរួមវិ​ភាគទាន។​ ចាប់ពីឆ្នាំ​ ២០១៦​ ដល់ឆ្នាំ ២០២០ លោកគឹមម៉ាកលី ឆ្លៀត​យកការជួយឧបត្ថម្ភរបស់បណ្តាអង្គការសប្បុរសជន និងប្រជាជនមូលដ្ឋានគបវាល់ថវិកា ថ្ងៃពលកម្មកសាងស្ពាន ៤ កន្លែង ជាមួយថវិកាជាង ៧០០ លានដុង។ ទន្ទឹមនឹងនោះ គាត់រួមជាមួយបក្ខជនក្នុងសាខាបក្សបំផុសចលនាប្រជាជនឲ្យបរិ​ច្ចាគដី ឈើហូបផ្លែកសាងភ្លឺទំនប់ព័ទ្ធជុំវាលស្រែ សរុបប្រវែងជាង ៦ គីឡូម៉ែត្រដើម្បីទប់ស្កាត់ទឹកជំនន់ ធានាឱ្យការផលិតរបស់ប្រជាជនក្នុងភូមិ។

ក្នុងការអនុវត្តន៍បង្វែររចនាសម្ព័ន្ធផលិតលោកគឹមម៉ាកលីក៏ជាគំរូក្នុងការបង្វែរពីដីដាំអំពៅមិនសូវមានផល ១.៥០០ ម៉ែត្រក្រឡាមកចិញ្ចឹមបង្កងជើងស  ទទួលបានប្រាក់កម្រៃប្រមាណ ១៥ លានដុងក្នុងមួយរដូវ(៣ខែ) ខណៈដែលមាមីងកសិករដាំអំពៅត្រូវខាត​ទុនច្រើនឆ្នាំបន្តបន្ទាប់។​ ផ្ដើមពីនោះ លោកបានបំផុសចលនាគ្រួសារក​សិករក្នុងភូមិ ០៩ គ្រួ បង្វែរផ្ទៃដីដាអំពៅ ៥,៥ ហិកតាមកចិញ្ចឹមជលផល  ដាំដូង ដាំស្មៅចិញ្ចឹមគោនាំមកប្រាក់កម្រៃ ប្រភពចំណូលខ្ពស់។

លោកគឹមម៉ាកលីបានឱ្យដឹង៖ “ធ្វើជាកម្មាភិបាលបម្រើប្រជាជន​ត្រូវប្រកបដោយសុទ្ធចិត្ត បំពេញការងារអស់ពីចិត្ត មា្ចស់ការស្នើ និងហានធ្វើ”។ បច្ចុប្បន្ន ភូមិជ្រោយទន្សាជាភូមិដំបូងបង្អស់ក្នុងឃុំមានទំនប់ព័ទ្ធជុំវាលស្រែ​ ១០០% និងដងផ្លូវទៅកាន់វាលស្រែជាង ៩០% បានកសាងរឹងមាំ បណ្តាញគមនាគមន៍បានកសាងតភ្ជាប់គ្នា។ ជាមួយកិច្ចចង្អុលការរបស់លោកគឹមម៉ាកលី ទម្រង់ “ប៉ិនប្រសបការងារប្រជាចលនា” របស់សាខាបក្សភូមិជ្រោយទន្សា ៣ ឆ្នាំបន្តបន្ទាប់ ( ២០១៨​-២០២០) បានគណៈកម្មាធិការបក្សឃុំគីមស៊ើងស្ងើចសរសើរ​ រួចចង្អុលការឲ្យពង្រីកទូលាយនៅសាខាបក្សដទៃក្នុងឃុំរៀនសូត្រនិងធ្វើតាម។

លោកតូថាញ់លីម លេខាគណៈកម្មាធិការបក្សឃុំគីមស៊ើង​វាយតម្លៃ៖ លោកគឹមម៉ាកលីតែងធ្វើជាគំរូឈានមុខក្នុងបណ្តាចលនាសកម្មភាពបដិវត្តន៍។ គាត់បានដឹកនាំសាខាបក្សអនុវត្តសម្រេចឆ្នើមភារកិច្ចជាច្រើនឆ្នាំបន្តបន្ទាប់ រួមចំណែកជំរុញសេដ្ឋកិច្ច-សង្គមនៅមូលដ្ឋាន៕         

ប្រែសម្រួល៖ សម្បត្តិ